Lliteratura

Iniciativa pol Asturianu organiza un Mercadín de llibros n’asturianu esti martes, miércoles y xueves, 18, 19 y 20 d’avientu de 2012 de 5 a 9 de la tarde. El puestu tará nel Conseyu de Mocedá de Xixón, asitiáu nel 68 de l’Avenida Manuel Llaneza. Nel mesmu van poder atopase llibros n’asturianu dende 2 euros y el recién editáu Mapa de parroquies d’Asturies. Los fondos van destinase al llabor d’Iniciativa pol Asturianu.

Dende la organización soliciten collaboración pa que-yos merquen llibros o donen los que yá nun se quieran pa vendelos ellos darréu o echar un gabitu atendiendo con nós nel puestu, pa lo que dan un corréu, contautu@iniciativapolasturianu.org

Amás, anuncien que los interesaos en facese socios podrán facelo dende 20 euros al añu y llevase un llibru si lo faen nel Mercadín.

Conocíu más pola música, como artesanu ya intérprete, Fran Allegre asoleya agora una obra de teatru na variedá lleonesa del asturianu. El llibru, autoeditáu, titúlase “Sentir, y nun sentir sentire” y ye la so segunda obra, dempués del poemariu “Poemas pa nun ser lleidos”, que sacó Ediciones Filandón en 2008. Un vocabulariu cola torna al castellán de dellos términos acompanga al llibru. Tán previstes presentaciones en Villarejo de Órbigo, Veguellina de Órbigo, Lleón y Estorga.

El diseñador y dibuxante Javier Antonio Marines García ye’l ganador de la cuarta edición del Premiu Alfonso Iglesias de cómic en llingua asturiana, que concede’l Gobiernu d’Asturies y que na pasada edición foi pa Isaac del Rivero Sr. El testu premiáu esti añu titúlase ‘Homes’, y presentóse embaxo’l nomatu d’’El Rapiegu’.

El xuráu tuvo compuestu polos especialistes en cómic Isaac del Rivero, Ruma Barbero y José Antonio García Fernández, y presidíu pola directora xeneral de Política Llingüística, Ana María Fueyo.

Javier Antonio Marinas ye un autor de reconocíu prestixu. Ganó premios d’ilustración y cartelismu, ente ellos el Premiu Urriellu d’Ilustración nes sos ediciones de 1991 y 1992, o’l Primer Premiu d’Ilustración d’ámbitu estatal concedíu pola Universidá Popular de Castuera (Badayoz) en 1995.

La revista cultural y lliteraria d’Antón García, asoleyada pol so sellu Saltadera Ediciones, llega a les llibreríes col númberu 3, un Dossier de poesía norteamericana. Ente los conteníos Martín López-Vega dando “Dos coordenaes de la poesía norteamericana”, la torna de 10 poetes modernistes norteamericanos baxo la selección y traducción d’Héctor Fernández o 5 poemes d’Ezra Pound tornaos al asturianu por Xuan Xosé Sánchez Vicente.

José Luis Argüelles echa “una parolada sobre Poe y Whitman”, mientres Pablo Antón Marín Estrada presenta los trabayos “Un cosmos: Walt Whitman” y “Emily Dickinson, la voz cómpliz”. Esther Prieto torna 5 poemes de Marianne Moore, Silverio Moreda a Frank O’Hara, Berta Piñán a Linda Pastan y Lucille Clifton, Pablo Texón torna nueve pieces de Raymond Carver, y Xosé Anxelu Gutiérrez Morán pon n’asturianu a Ted Kooser y Billy Collins.

Amás Antón García y Jaime Priede tornen a siete poetes norteamericanos y una canadiense; José Luis Piquero fala de “Weldon Kees: l’amargu misteriu” ya Iván Cuevas presenta “We ain’t AmeriKKKa. Muestrina de poesía del Black Arts Movement”. Tornen tamién al asturianu Ramón Lluís Bande, que lo fai con siete poemes de The Four Queens y Back in America, de Barry Gifford; y Laura Marcos que firma “Sherman Alexie: embaxo les plumes y les pintures de guerra”.

Apaecen tamién los artículos “San Francisco. Espacios revisitados”, de Teresa Soto y “The State of the (Poetic) Union: la poesía norteamericana del siglo XXI a partir de sus principales antologías” de Carlos X. Ardavín Trabanco.

No que cinca a la Lliteratura asturiana la revista recueye dos collaboraciones “Un cuento y tres poemas” de Rosario Neira y “El reinu de les coses”, de Xosé Manuel Valdés, amás de la torna de “Cuatro cuentos de Verd paradis” de Max Roqueta, a cargu de Javier Martínez Concheso, y un artículu “Paisaxe, tiempu, estaciones y emoción en Marta Mori”, por Xuan Xosé Sánchez Vicente.

Na sección “Goleta de los Patos” apaecen les siguientes pieces: Toma de tierra. Poetas en lengua asturiana. antología (1975-2010), José Luis Argüelles (ed.) [Leopoldo Sánchez Torre]. Bouleversement, Jean Genet [Marina Pangua Cuesta]. Amarraza. 102 díes baxo la llei antiterrorista, Fernando González Rodríguez (Fer) [Rafael Rodríguez Valdés]. El Paséu/El Paseo, Miguel Rojo [Jon Kortazar]. Azurriangamelamelonga, Xuan Xosé Sánchez Vicente [Vicente García Oliva]. Redacciones, Ernesto Castro, Jara Calles, Miguel Espigado, Raúl Quirós [Javier García Rodríguez]. La mio voz, Marta Mori [Severino Antuña].Sk8 is not a crime, kso [Antonio Alonso de la Torre García]. Les hores escrites/Las horas escritas, Armando Vega Rodríguez [Ricardo Candás]. Revista de Filoloxía, volume 6/7/8, varios [Miguel Allende]. Campo de los Patos, nu 1-2, Cultura Xermánica, varios [Manuel Darriba].Historia del Cine Asturianu, Xaviel Vilareyo y Villamil [Iván Cuevas].

L’escritor José Ángel Gayol ye’l ganador de la decimoctava edición del Premiu de poesía en llingua asturiana Xuan María Acebal, que concede añalmente’l Gobiernu d’Asturies. El xuráu tuvo formáu polos escritores Xosé Anxelu Gutiérrez Morán, Pablo Texón y Lourdes Álvarez, baxo la presidencia de la directora xeneral de Política Llingüística, Ana María Fueyo, y alcordó’l premiu por unanimidá. El gallardón ta dotáu con 4.000 euros, dempués de la baxa dende los 7.000 euros que llegare a algamar n’ediciones pasaes.

El testu premiáu lleva por títulu ‘El llibru de les coses misterioses’ y foi presentáu embaxo’l nomatu Tenysson. El xuráu destacó que ye un poemariu que, “basándose na memoria y el viaxe, apurre l’ecu personal de les voces ayenes”.

José Ángel Gayol (Mieres del Camín, 1977) ye escritor y críticu lliterariu, collaboró con revistes lliteraries como Clarín, Reloj de Arena, Paralelo Sur, Formientu, esTandoriu y medios de comunicación como La Nueva España.

Realizó la edición ya introducción del volume colectivo “Nuevas maneras de contar un cuento” (Llibros del Pexe, Xixón, 2005) y col llibru Con el velo de una sonrrisa (Ed. Nobel, Uviéu, 2006) ganó’l Premiu Asturies Mozu de Poesía 2005.

En llingua asturiana publicó la novela Argonautes (Ámbitu, Uviéu, 2007), la obra de teatru Ensin noticies del fin del mundu (Universos, Mieres del Camín, 2011) ganadora del Premiu Asturies Mozu de Testos Teatrales 2010, amás d’artículos y cuentos en prensa y antoloxíes. Tien dos poemarios en víes de publicación: Los poemes del oriental (XX Premiu Elvira Castañón, 2011) y Los suaños y los díes (XVIII Premiu Fernán Coronas, 2011).

Ye llicenciáu en Derechu pola Universidá d’Uviéu, llicenciáu n’Antropoloxía Social y Cultural pola UNED y Máster n’Hestoria y Analís Sociocultural pola Universidá d’Uviéu.

La ganadora en castellán del Concursu de microrrellatos mineros de la Fundación Juan Muñiz Zapico, foi nesta ocasión Mara Meroni, italiana que vive en Madrid y que firma’l testu «Madrid obrero, saluda a los mineros».

L’accésit asturianu foi pa “L’esbarrumu” de Rubén Rey, y l’accésit xoven p’Alicia Calvo Panera. El gallardón «Testimoniu Hestóricu», foi pa «Exilios» de Charo Cuba.

Nesta ocasión recoyéronse 191 microrrellatos de tol estáu y de Méxicu, Estaos Xuníos, Nicaragua, Hondures, Perú, Colombia, l’Arxentina y Suecia, ente otros países.

El xuráu otorgó una mención especial a Pablo Rodríguez Medina, José Muñoz, Sara Díez, Ana y Francisco Javier López, Ana Isabel González, Beatriz Gómez, Francisco Lorenzo, Pilar Añibarro y Manuel David Arce. El xuráu formáronlu Benigno Delmiro Coto (presidente), Casimiro Palacios García, Vicente Bernaldo de Quiros, Ana Alonso Cabrera y Marcelino Álvarez.

Hasta’l 10 d’avientu van Poder participar nesti concursu toes aquelles persones mayores d’edá residentes nel conceyu de Cuideiru, siempres que les obres que presenten tean escrites en castellán, asturianu o la variedá pixueta d’esta última llingua, y seyan orixinales ya inédites y nun fueren premiaes con anterioridá en nengún otru concursu. Van poder presentase un máximu de dos microrrellatos.

El conteníu va tener qu’aludir necesariamente a dalgún aspeutu (motivos temáticos, personaxes, argumentu o ambientación) rellacionáu coles muyeres y l’ámbitu de lo rural. La estensión nun va entepasar de les trés fueyes escrites una sola cara en lletra de cuerpu 12 y tipu Times New Roman o asemeyao, anque tamién puede ser escritu a mano, como última opción, siempres que tampoco supere les trés fueyes per una cara.

Les obres van presentar nel Rexistru Xeneral del Conceyu de Cuideiru, Plaza de San Pedru e/n CP 33150 de Cuideiru, n’horariu de llunes a vienres de 9 a 15 hores.

Los concursantes van apurrir un sobre col testu o testu. Y un sobre de la plica col nomatu y títulu o títulos na so portada; según tolos datos personales del autor o autora nel interior (nome y nomatu, apellíos, casa, númberu DNI o equivalente, títulu del microrrellatu o microrrellatos, teléfonu y, si tien, corréu lletrónicu).

Tamién podrán unviase los relatos via corréu lletrónicu ayuntamiento@cudillero.es, indicando’l nomatu y los datos personales del autor/a.

Los rellatos van espublizase na páxina web del Conceyu, na que podrán votase los distintos rellatos, siendo los trés más votaos los ganadores del concursu lliterariu.

Va premiase a los trés rellatos más votaos con un llote de llibros.

Bases completes del concursu

Na Xunta pola Defensa de la Llingua Asturiana, espliquen como se vieron “obligaos a convocar, de forma escepcional, y dempués de la negativa a facelo per parte de l’asociación d’Escritores d’Asturies, como n’otres ocasiones, los Premios Críticos de les Lletres Asturianes”, que reconocen esti añu a cuatro categoríes: lliteratura infantil y xuvenil, narrativa, poesía y ensayu. L’actu d’entrega de premios sedrá na tarde de güei, vienres 30 de payares, a les 19:30 hores, na galería d’arte El Texu, asitiada na cai El Postigo Baxo 13, d’Uviéu. Ente los ganadores, Berta Piñán, Xabiergo Cayarga y Pablo Rodríguez Alonso.

Na tarde de güei, xueves 22, a les 20:00 hores, el recital lliterariu Compañeru dame tira va rematar los Xueves de Castilletes y Carbón en Ciañu. Esti recital enmárcase dientro de les III Xornaes Culturales De Castilletes y Carbón qu’organicen la Fundación Nuberu y l’Ayuntamientu de Llangréu. Nesta edición de Castilletes y Carbón qu’hoi se remata, la Casa los Alberti de Ciañu acoyó les charres: Dellos conceptos de pedagoxía económica, a cargu d’Enrique Fernández; Gastronomía y mina, con Christian González; y La Universidá d’Uviéu y la llingua asturiana, que punxo Ana María Cano.

Compañeru dame tira ye un recital lliterariu que, con guión y dirección de Chechu García, va presentar Pablo Rodríguez Medina y nel que van participar los y les escritores Manuel Asur, Xurde Álvarez, Pablo Texón, Lurdes Álvarez, Henrique Facuriella, Xosé Ramón Martín Ardines y Roberto Corte. Va ponese’l ramu a estes xornaes culturales con un conciertu del grupu Nuberu nel Teatru L’Entregu’l 4 d’avientu, día de Santa Bárbola, patrona de la minería.

L’investigador y escritor Vicente García Oliva va falar esti xueves, día 29, a les 8 de la tarde, nel Club de Prensa de La Nueva España en Xixón del escritor Enrique García-Rendueles. El llocal del Club ta asitiáu na Caxa Aforros y Monte de Piedá, na Plaza d’esi nome. L’actu va a presentalu María Xosé Rodríguez, responsable de la Oficina Municipal de Normalización Llingüística de Xixón.

Pa Oliva, “García-Rendueles ye un importante intelectual, non abondamente reconocíu”. L’autor cultivó l’ensayu, la crítica, la poesía y la investigación. “Pero, lo que ye quiciás ye más importante, too lo fizo dende una perspeutiva asturiana y asturianista”, esplica Oliva. Na so conferencia va esplicar como “los ensayos, sobre temes y personaxes d’equí; la crítica, a los poetes que emplegaben la llingua sólo pa coses festives o ensin importancia; la investigación sobre una gramática y un diccionariu del bable y la poesía que cultivó foi nesa mesma llingua, la nuestra”.

Vicente García Oliva lleva años estudiando la obra del intelectual xixonés y tien dellos artículos y llibros asoleyaos sobre la figura de Rendueles.