Lliteratura

Ricardo Candás ganó ayeri 18 de payares la decimonovena edición del Premiu Xuan María Acebal de poesía n’asturianuu pol so poemariu ‘Superficie del silenciu’. El premiu, con una dotación de 3.000 euros, ye’l primeru de 2013 que concede la Conseyería d’Educación, Cultura y Deporte del Principáu d’Asturies d’ente los qu’entama tolos años pa dar aliendu a la creación lliteraria en llingua asturiana.

El xuráu decidió conceder por mayoría el Premiu a esti poemariu, Superficie del silenciu, destacando “la solidez d’una obra unitaria que crea una atmósfera de sensaciones alredor de la memoria, el destín y el presente, estableciendo un diálogu ente la voz y el silenciu”.

La obra foi presentada baxo’l seudónimo Oswaldo y el xuráu encargáu de valorar les nueve obres finalistes tuvo formáu por persones rellacionaes col ámbitu de la lliteratura asturiana: los escritores José Ángel Gayol, ganador de la edición anterior del premiu, ya Irma González-Quevedo Pedrayes; la profesora de Filoloxía de la Universidá d’Uviéu, Elena de Lorenzo Álvarez y el filólogu adscritu a la Dirección Xeneral de Política Llingüística, Xosé Miguel Suárez Fernández.

A esti galardón, que ye’l primeru que se falla de los convocaos pola Conseyería, podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, inéditos y non premiaos n’otros concursos.

Ricardo Candás, nacíu en Xixón en 1970, ye llicenciáu en Filosofía pola Universidá d’Uviéu y ya algamare dellos premios lliterarios, como’l Fernán Coronas en 2005, col poemariu “Quiciás seya payares”, el Llorienzu Novo Mier en 2010, cola obra “Nos díes pensatibles” y el Nené Losada Rico* en 2011 col poemariu “Naufraxos”. Como narrador publicó’l llibru de relatos “Les últimes pallabres” na editorial Trabe en 2010).

La escritora británica Doris Lessing, Premio Nobel de Lliteratura y Premio Príncipe d’Asturies de les Lletres, finó a los 94 años a primer hora d’esti domingu, según informó la editorial HarperCollins. Doris Lessing yera una escritora estraordinaria con una mente fascinante y orixinal, sigún dixo so axente Jonathan Clowes pal que “foi un privilexu trabayar pa ella y vamos echala de menos descomanadamente”.

Lessing Nació en 1919 en Persia (actual Irán), de padres británicos, y criose en Rhodesia, actual Zimbabue. Dende 1937 vivía en Reinu Uníu. Lessing foi l’autora d’obres como ‘Canta la yerba’ (1950), ‘El cuadiernu doráu’ (1962), ‘Hestories de Londres’ (1992) y munches otres que-y fixeron merecedora d’un gran númberu de premios, ente los que destaca tamién el Príncipe d’Asturies de les Lletres, en 2001.

L’Academia Sueca, al momentu d’otorga-y el Nobel en 2007, describió a Lessing como esa narradora épica de la esperiencia femenina que con escepticismu, ardor y un poder visionario esaminó con minuciosidad a una civilización estremada”.

La casa natal del Padre Galo, en Cadavéu (Valdés), acoyó esti sábado, 16 de payares, la V edición de la Xunta d’Escritores en Llingua Asturiana, que desenvolvió un programa d’actividaes nel que xugó un papel destacáu l’análisis de la presencia de la llingua asturiana nos medios de comunicación, asina como nes escueles, nes biblioteques y na familia.

La Xunta tuvo organizá pol Ayuntamientu de Valdés, al traviés de la so Casa de Cultura y Biblioteca “Joaquín Rodríguez” y nesta edición tuvo tamién un llugar destacáu’l Premiu de Poesía “Fernán Coronas”, con un alcuentru de los poetes ganadores del mesmu a lo llargo de los últimos años, que realizaron un recital poéticu con poemes de los sos trabayos galardonaos.

La Xunta entamó a les 10,30 hores cola presencia de Gumersindo Cuervo García, Conceyal de Cultura del Ayuntamientu de Valdés.Balbino Suárez Cortina, Conceyal del Ayuntamientu de Valdés, ya Alcalde de Barriu de Cadavéu.Xosé Ramón Iglesias Cueva, en representación de L’Academia de la LLingua Asturiana, Rubén Díaz García, Presidente de Grupu de Montaña “El Estoupo”, Blanca Peláez, Presidenta de la Sociedad Popular “La Regalina” (Cadavéu), Ana Fueyo, Direutora Xeneral de Política L.lingüística de la Conseyería d’ Educación Cultura y Deporte del Principáu d’Asturias y Simón Guardado Pérez, Alcalde del Ayuntamientu de Valdés.

Tres de l’actuación musical del dúu “Mestura” y de Rafa Lorenzo fízose entrega de los premios lliterarios falando del orixe del Concursu por parte de Mari Rico y Alberto Fernández Arias, de la Sociedad Popular “La Regalina”, desendolcándose darréu un alcuentru de los poetas ganadores del Premiu “Fernán Coronas”, con una llectura de poemes.

La mesa redonda colos poetas y miembros del Xuráu Mar Madera y Félix Ferreiro, ya representantes de los fundadores del premiu, La Sociedad Popular “La Regalina”, Mari Rico ya Alberto Fernández Aria dio pasu a una alcordanza pa Nené Losada, Presidenta del Xuráu hasta’l sou fallecimientu.

La llingua asturiana y los medios de comunicación foi’l tema del alderique nelq ue participaron Inaciu Galán y González, escritor y periodista, Mari Luz Pontón, escritora, collaboradora davezu na Televisión y na Radio, Mª Esther García, escritora y miembru correspondiente de l’Academia de la Llingua Asturiana, y col.laboradora habitual en La Nueva España y na Radio, y Paula Fernández Suárez-Coronas, periodista.

Y la “L.lingua Asturiana na escuela, na familia, nas bibliotecas” foi la tema del otru alderique que peslló la Xunta y nel qu’intervinieron Carolina Castro Fernández, Presidenta del Grupu etnográficu y folclóricu “La Fonte La Faya”, d’El Faedal, y Norberto Martín, profesor ya direutor del Colexu de Muñás (Valdés).

Esti sábadu, 16 de payares, a les 18’00h, el Hotel Palacio de Meras de Tinéu va acoyer la presentación del llibru “Testamentu”, d’Elías Veiga, responsable de la Biblioteca de Navelgas, poeta y escritor. Con esti poemariu algamó la XXI edición del Premiu Teodoro Cuesta de Poesía, el más prestixosu de tolos que se fain n’Asturies y que fueran ganando a lo llargo d’estos últimos años los autores más nomaos de la lliteratura asturiana.

Nel actu de presentación Veiga tuvo acompañáu pol escritor Adolfo Camilo Díaz y pola editora Esther Prieto y cuntó cola actuación musical de Nicolás Fernández Suárez. Los asistentes tamién pudieron esfrutar d’un recital poéticu, con poemes del propiu poemariu al cargu de Manuela Fernández Suárez.

Esti xueves 14 de Payares trai n’Uviéu l’empiezu d’un nuevu ciclu lliterariu, que quier otra vuelta averar la lliteratura a los llectores en redolaes tan próximes a ellos como una cafetería o un chigre. Ye la mesma fórmula que fuera empecipiada’l pasáu añu pol café uvieín La Consistorial (Plaza del Sol, 2), que xunto coles editoriales asturianes Septem Ediciones y Trabe entamaron dellos ciclos de conxustes lliteraries pa la tarde nueche de los xueves, qu’agora tornen con un nuevu ciclu col títulu “Lliteratura na seronda” .

“Lliteratura na seronda” va dexar l’alcuentru con destacaos autores y autores asturianes, nun espaciu abiertu d’alcuentru y reflexón alrodiu de la producción lliteraria. “Muyeres nel arte” va ser el títulu de la primera de les conxustes, que se va celebrar esti xueves 14 de noviembre a les 20 hores cola participación de la escritora Aurora García Rivas y la galerista Lucía Falcón García. L’oxetivu de “Muyeres nel arte” ye poner sobre la mesa “el llabor realizáu por muyeres nel mundu del arte y fomentar l’afición a la llectura”. Nesta primer sesión, xuntu cola conxusta temática va presentase la última novela d’Aurora García Rivas, La lluriga.

Esti vienres 15 de payares a les 6 de la tarde na Casa de la Xuventú de Sotrondio va celebrase la segunda sesión d’unu de los talleres de llectura entamaos pola Oficina de Normalización Llingüística del conceyu en collaboración cola asociación cultural Bocina Nalón y la Oficina d’Información Xuvenil. Los neños y neñes van poder conocer en persona al escritor, Pablo Rodríguez Medina, y al autor de les ilustraciones del llibru “Tapín de Picupáu”, David Fernán, y durante una hora esti grupu de 13 neños y neñes d’ente 7 y 10 años van convertise en periodistes y van poder entruga-yos lo que-yos pete.

Si’l vienres pasáu s’acercaben al argumentu y el pallabreru del llibru “Tapín de Picupáu”, esta selmana van poder conocer en persona al so escritor, Pablo Rodríguez Medina, y al autor de les ilustraciones, David Fernán. Durante una hora esti grupu de 13 neños y neñes d’ente 7 y 10 años van convertise en periodistes y van poder entruga-yos lo que-yos pete. Tamién van facer un dibuxu rellacionaú cola historia, actividá que va tener premiu pal que faiga’l meyor o’l más orixinal. Al final del actu dibuxante y autor van firma-yos los llibros como recuerdu de la so participación.

Pablo Rodríguez Medina ye ún de los escritores asturianos más premiaos tanto a nivel rexonal como nacional. Tien escritos cuentos, noveles, poemes, obres de teatru o trabayos d’investigación. Na so amplia obra destaquen títulos como “Los paraísos perdíos”, “Les vueltes, toles vueltes” o “Al aldu la memoria”, por citar dalgunes. “Tapín de Picupáu”, el llibru col que se ta trabayando nesti taller, algamó’l premiu “Llectures pa rapazos” de l’Academia de la Llingua Asturiana nel añu 2005. David Fernán, pela so parte, tien trabayao nel mundu del cómic y delles historietes asoleyaes como “Xustiniano”, “L’home Marín” o “Azincourt”, con guiones de Chechu García. Tamién fizo ilustraciones pa varios llibros de Pablo Medina y nestos últimos años tien entamaes dalgunes esposiciones de la so obra pictórica.

Lo que se pretende con estos talleres ye atrayer a les xeneraciones más moces al mundu de la llectura fuera del horariu escolar, dando-y asina un enfoque llúdicu y d’entretenimientu.

Esta actividá ye una de les principales novedaes que presenten les Xornaes de Lliteratura Infantil y Xuvenil d’esti añu, y que se suma a les esposiciones y les representaciones teatrales que se tán celebrando nel conceyu a lo llargo del tol mes.

El Serviciu de Normalización Llingüística de la Contorna de la Sidra, col Conceyu de Villaviciosa, pon en marcha talleres de llectura n’asturianu. Ufiértase la llectura mensual d’una obra de lliteratura asturiana actual y un alcuentru col so autor.

Estos alcuentros van tener llugar nel Centru Cultural Capistrano de La Villa, y los interesaos pueden apuntase directamente na biblioteca municipal t. 985891257, t. 637897356, o bien a normastur-arroba-lacomarcadelasidra.com.

El primeru de los alcuentros ta previstu pal miércoles 27 de Noviembre, a les 18 hores, y va tar dedicáu a ‘Unos fatos que morrieron por un apueste y otres histories series’, de Jorge Fernández García.

La obra “Homes”, últimu Premiu Alfonso Iglesias de cómic, de la que ye autor Javier Antonio Marinas y que publica la editorial Trabe, va ser presentada esti xueves 14 de payares a les 19 hores nel Club de Prensa de La Nueva España, n’Uviéu, tres delles presentaciones notres ciudaes d’Asturies. “Homes” ye la obra más recién del hoi prestixosu dibuxante, diseñador y guionista de cómics, Javier Antonio Marinas. Nel actu presentación, amás del autor, van participar l’escritor, guionista y periodista José Martínez, periodista, escritor y guionista y Samuel Castro, d’Ediciones Trabe.

Javier Antonio Marinas ye un historietista de formación autodidacta, que debutaba como dibuxante a finales de los años ochenta na revista Tapón, y que nestos años fue colaborando en publicaciones como El Gomeru, El Llapiceru, Sauco o Orbayando. Tien tamién dellos galardones, como l’Urriellu d’Ilustración, que, convocáu pol Principáu d’Asturies, consigue en 1991 y 1992, o’l de la Universidá Popular de Castuera (Badajoz) en 1995. Ye tamién autor de la obra Ballenes; de los debuxos de la Hestoria de la monarquía Asturiana, publicada por La Nueva España; lo mesmo que de la novela gráfica Domno, que tien como protagonista a Gonzalo Peláez; asina como de la historieta sobre l’Adelantáu de La Florida, Pedro Menéndez d’Avilés, con guión del periodista y escritor avilesín José Martínez.

L’actu organizáu esti xueves pol Club de prensa de La Nueva España, na Cai Calvo Sotelo d’Uviéu, tien como oxetu la presentación de la última obra de Marinas que lleva por títulu Homes, y que-y valió esti añu’l Premiu Alfonso Iglesias de cómic, siendo reconocida pol xuráu pol so “valor didácticu que destaca pol tratamientu dixital de les imáxenes”.

Esti vienres pela tarde na Casa de la Xuventú de Sotrondio celebróse la primera sesión d’unu de los talleres de llectura entamaos pola Oficina de Normalización Llingüística del conceyu en collaboración cola asociación cultural Bocina Nalón y la Oficina d’Información Xuvenil. Nesti taller un grupu de 13 neños,-es ente 7 y 10 años lleeron, xugaron y ficieron actividaes rellacionaes col llibru “Tapín de Picupáu” de Pablo Rodríguez Medina. Nesta primera sesión comentáronse-yos delles cuestiones rellacionaes col conteníu del llibru, col so argumentu y pallabreru.

Amás, convirtiéronse en periodistes, siendo ellos mesmos los que prepararon les entrugues que-y van facer al autor na siguiente sesión. Tamién pintaron y participaron nun xuegu rellacionáu con una esposición sobre los escritores del conceyu de Samartín, lo que-yos permitió conocelos un poco más. Lo que se pretende con estos talleres ye atrayer a les xeneraciones más moces al mundu de la llectura fuera del horariu escolar, dando-y asina un enfoque lúdicu y d’entretenimientu.

Esta actividá ye una de les principales novedaes que presenten les Xornaes de Lliteratura Infantil y Xuvenil d’esti añu, y que se suma a les esposiciones y les representaciones teatrales que se tán celebrando nel conceyu a lo llargo del tol mes.

El Conceyu de Cangas del Narcea vieno acabante d’anunciar qu’a partir del día 5 de payares tilos interesaos en participar no XI Concursu’i cuentos curtios del Conceyu Cangas puen entamar a presentar los orixinales a esti concursu cuentos, que cumple la once edición y que premia las meyores obras escritas n’asturianu estándar ya occidental. Al concursu puede presentase cualisquier persona mayor de 16 años. Las obras han tener cinco fueyas cumo mínimo ya venti a lo máximo, han ser orixinales, anónimas ya tar escritas a espaciu doble en formatu DIN A-4.

El plazu pa presentar orixinales acaba’l día 15 d’avientu. El xuráu va tar formáu pola responsable del Serviciu de Normalización L.lingüística, por personal del Aria de Cultura del Conceyu Cangas, por un/a representante de la Rede de Normalización L.lingüística nos Conceyos ya por maestros/es ya escritores en llingua asturiana, y va dar a conocer ente esi mes y ell siguiente’l so determín a los ganadores.