Lliteratura

Esti xueves remata la programación de Los xueves de castilletes y carbón que vien desenvolviéndose esti mes na Casa los Alberti de Ciañu. D’esta forma, mañana día 28 de payares a les 20:00 hores va tener llugar un recital lliterariu de la mano de destacaos y destacaes escritores en llingua asturiana.

Esti recital enmárcase dientro les xornaes culturales De Castilletes y carbón que per cuartu añu consecutivu, organicen la Fundación Nuberu y l’Ayuntamientu de Llangréu y nél van participar Sofía Castañón, Pablo Antón Marín Estrada, Ana Rosa Fernández, Rubén d’Areñes y Chechu García. L’actividá de De castilletes y carbón remata’l 4 d’avientu, día de Santa Bárbara, con un conciertu del grupu Nuberu na Casa la Cultura de La Pola Llaviana.

Esti xueves 28, a les 20 hores, na Plaza del Sol 2 de Uviéu, va celebrase otru Xueves Lliterariu de La Consistorial cola presentación del poemariu “Todos os tristes de mayo” de Miguel Rodríguez Monteavaro, editau por Trabe, dientru del ciclu “Lliteratura na seronda”.

L’empiezu d’esti nuevu ciclu lliterariu, que quier otra vuelta averar la lliteratura a los llectores en redolaes tan próximes a ellos como una cafetería o un chigre, entamó otra vuelta esti mes de Payares y ye la mesma fórmula que fuera empecipiada’l pasáu añu pol café uvieín La Consistorial (Plaza del Sol, 2), que xunto coles editoriales asturianes Septem Ediciones y Trabe entamaron dellos ciclos de conxustes lliteraries pa la tarde nueche de los xueves, qu’agora tornen con esti nuevu ciclu col títulu “Lliteratura na seronda”.

“Lliteratura na seronda” va dexar l’alcuentru con destacaos autores y autores asturianes, nun espaciu abiertu d’alcuentru y reflexón alrodiu de la producción lliteraria. “Muyeres nel arte” foi’l títulu de la primera de les conxustes, que se celebró’l esti xueves 14 de noviembre cola participación de la escritora Aurora García Rivas y la galerista Lucía Falcón García.

El II Congresu d’Escritores Noveles yá tienen cerráu’l so programa, con autores de la talla de Juan Bolea, Carmen Posaes, Luis García Jambrina o Eloy Moreno y un granible grupu d’especialistes, correctores, editores, periodistes, consultores en comunicación profesional, profesores universitarios y autores, que van trayer a la ciudá de Xixón a cientos d’escritores noveles. La cita, entamada pola Asociación d’Escritores Noveles (AEN) cola collaboración de Xixón-Turismu y el sofitu de diverses empreses, va desenvolvese nel Palaciu de Congresos de la cortil ferial “Luis Adaro” de Xixón, mientres los díes 6 al 8 d’avientu del presente añu.

L’Asociación organizadora abrió un capítulu especial d’inscripciones pa facilitar la participación de la mayor xente posible, con cuotes especiales por xornada y descuentos pa socios. Quixeron abrir les posibilidaes de participación a cualesquier comenenciudu, percima de les llimitaciones presupuestaries, asina nos lo comenta José A. Jarne, Presidente del Comité Organizador: “somos conscientes de la difícil situación sociu-económica que tamos careciendo y por esta razón, más allá d’estes condiciones xenerales, si dalguna persona tien especiales dificultaes pa cumpliles, rogamos que lo comuniquen a esti Comité Organizador al traviés de corréu electrónicu, plantegando’l so problema, que va ser tratáu lo más llueu, buscando una solución vidable pa dambes partes”. Pueden descargar el formulariu d’inscripción y consultar les tarifes d’asistencia al eventu dende la web del Congresu.

Web del Congresu con tola información

La periodista Beatriz R. Viado ye la ganadora del caberu premiu que quedaba por fallar ente los que convoca añalmente la Conseyería de Cultura del Principáu. El XIX Premiu Máximo Fuertes Acevedo d’ensayu foi pal trabayu ‘Yá cuasi nunca lo facemos por amor. Conciencies mercenaries’, una obra que’l xuráu camienta “bien estructurada, que se sirve de la llingua asturiana pa reflexonar sobre un tema relevante y d’actualidá, como ye’l de les rellaciones ente poder y medios de comunicación”.

El xuráu designáu pa esti premiu, y qu’escoyó la obra de l’autora naveta por unanimidá, tuvo formáu polos escritores ya investigadores Rafael Rodríguez Valdés, Cristóbal Ruitiña Testa, Lourdes Álvarez García, Hugo Cortina Fanjul y Marta Mori de Arriba, y pola direutora xeneral de Política Llingüística, Ana Fueyo, como presidenta.

Beratriz R. Viado ñació n’El Remediu en 1976 y reside anguaño n’Inglaterra como muncha otra mocedá asturiano que tien dir a la gueta trabayu especializáu lloñe d’Asturies. Ye llicenciada en Ciencies de la Información pola Universidad Complutense de Madrid y en Filosofía pola UNED. Ex direutora del selmanariu n’asturianu ‘Les Noticies’, tamién tien trabayao en ‘AtlánticaXXII’ o ‘Muyeres Ateyabana’, el periódicu Diagonal Asturies o Onda Cero Radio. Tien espublizaosd dellos llibros, como’l destináu pa mozos y moces ‘Qué ye que ye’l Tercer Mundu. Un viaxe del centru a les periferies’ (2004) o l’ensayu documental ‘El país del silenciu’ (2007), del que ye coautora xunta Vanessa Gutiérrez. Nel añu 2003, algamó’l Premiu Enriqueta González Rubín de periodismu n’asturianu pol reportaxe ‘El campu asturianu, en víes d’estinción’ espublizáu nel diariu ‘Les Noticies’.

Esti vienres 29 de payares a les 18 h. na Casona del Bravial ponse puntu y final a les XII Xornaes de Lliteratura Infantil y Xuvenil que se celebraron nel conceyu de Samartín a lo llargo de tou esti mes, nel qu’hubo espaciu pa esposiciones, talleres de llectura y teatru infantil.

L’actu, que va tar presidíu pola conceyala de Cultura, Gema Suárez Torre, va contar cola participación de los dos grupos de neños y neñes que participaron nos talleres de llectura que se celebraron tolos vienres d’esti mes de payares. Asina, per un llau van tar presentes los neños del grupu de 3 a 6 años que trabayaron sobre’l llibru “Marta y el peludín de Carrandi” de Chechu García, y los del grupu de 7 a 10 años que trataron los conteníos del llibru “Tapín de Picupáu”, de Pablo Rodríguez Medina.

Tamién van asistir, amás de los autores, los ilustradores d’estos dos llibros, Enrique Carballeira y David Fernán. Tolos neños y neñes participantes van recibir un diploma y varios llibros de regalu por cortesía de l’asociación cultural Reciella Malory. Amás, van entregase dellos premios a los ganadores del concursu de dibuxos que s’entamó con motivu d’estos talleres. Termina asina un mes enllenu d’actividaes pa los más pequeños, nos que los llibros, el teatru, los escritores y los ilustradores se convirtieron nos protagonistes de la programación cultural del conceyu.

Dende la Oficina de Normalización Llingüística de Samartín del Rei Aurelio quier agradecese la collaboración nestes xornaes a l’asociación cultural Bocina Nalón que llevó a cabu los talleres de llectura, a la Oficina d’Información Xuvenil del conceyu que collaboró nellos, asina como a l’asociación Reciella Malory, a l’Academia de la Llingua Asturiana, a Ediciones Trabe, a la Conseyería d’Educación, Cultura y Deporte, a la Editorial Pintar-Pintar y al Colexu El Bosquín pola so implicación en toes estes actividaes que se ficieron col enfotu d’averar a los neños y neñes a la llectura dende un enfoque llúdicu y d’entretenimientu.

“En campu abiertu” d’Ángeles Carbajal sedrá protagonista nel Club de Prensa de La Nueva España esti xueves a les 19 hores nun actu de presetación del que fora en 2012 el Premiu “Teodoro Cuesta” de poesía que convoca añalmente la Conseyería de Cultura del Principáu d’Asturies.

Nel actu presentación van participar Marta Mori, escritora; Xuan Bello, escritor y Esther Prieto, d’Ediciones Trabe.

La presentación va tener llugar nel Club Prensa Asturiana de La Nueva España (Calvo Sotelo 7, Uviéu)

“En campu abiertu” foi’l poemariu ganador del Premiu «Teodoro Cuesta» del añu 2012, y ye una obra “homoxenia na qu’una voz fecha, madura y personal ye a emocionar al traviés d’unos poemes n’apariencia cenciellos, nos que los temes qu’interesen y angustien al ser humanu (el pasu del tiempu, l’amor o la muerte) van apoderando los versos y señoriando’l conxuntu”.

Si la bona lliteratura (y, poro, la bona poesía) ye aquella que nos vuelve distintos en lleéndola, esti poemariu cumple por demás con esta premisa sigún la Editorial Trabe: “naide nun va quedar indiferente ente versos como estos: «Que me parta un rayu; ¿a quién-y lo pido? / Que la muerte nun m’agarre a un goteru / que xuegue llimpio, / que me pille en campu abiertu»”.

Ángeles Carbajal (Argüelles, Siero, 1959) ye llicenciada n’Historia del Arte pola Universidá d’Uviéu. Collaboradora na revista Clarín, ye autora de los poemarios en castellanu “La caligrafía de la distancia” (1993) y “La sombra de otros días” (2002).

L’escritor de Samartín del Rei Aurelio Pablo Rodríguez Medina algamó esta mesma tarde’l premiu Xosefa Xovellanos de novela n’asturianu, que concede la Conseyería d’Educación, Cultura y Deporte, cola so obra “Fame d’amor, determín de pasión”, pol “sólidu esfuerzu narrativu, l’ambición y l’oficiu” que demuestra l’autor na obra. Pablo ye un perpremiáu autor, tantu en poesía como en narrativa, y yá ganara, ex aequo, la edición de 2001 del Premiu Xosefa Xovellanos cola novela “L’arna de San Atanás”.

El xuráu, qu’adoptó la decisión por mayoría, valoró “el sólidu esfuerzu narrativu, l’ambición y l’oficiu” que demuestra l’autor na so obra, presentada sol seudónimu Solombres de Casiano, sigún informó’l gabinete de prensa de la Conseyería nun comunicáu.

Podíen optar al galardón, dotáu con 3.000 euros, noveles inédites en llingua asturiana de tema, xéneru y estructura llibres, con una estensión mínima de setenta y cinco página y non premiaes n’otros concursos.

El xuráu encargáu de valorar los trabayos taba presidíu pola directora xeneral de Política Llingüística del Principáu, Ana María Fueyo, y tuvo formáu polos escritores Quique Faes, ganador de la edición anterior del galardón, Xuan Bellu, Miguel Barreru y Lourdes Álvarez, amás de María Esther Castro, técnica en materia llingüístico.

Pablo Rodríguez Medina (San Andrés de Llinares, Samartín del Rei Aurelio, Asturies, 1978) ye llicenciáu en Filoloxía Hispánica y especialista en Filoloxía Asturiana pola Universidá d’Uviéu. Escritor n’asturianu y en castellán, llogró numberosos galardones en dellos xéneros, como ensayu, cuentu, novela, teatru o poesía.

Ente los premios que ya tien algamaos alcuéntrense’l Premiu a la creación lliteraria de l’Academia de la Llingua Asturiana por “Les vueltes, toles vueltes”, el Premiu Asturies Xoven de Poesía por “Los desconocedores del agua”, el Premiu de teatru de l’Academia de la Llingua Asturiana por “Orbaya” y el Premiu Teodoro Cuesta, añu 2006, pol poemariu “Aires de mudanza”, ente otros.

Ente les sos obres tan poemarios tan nomaos como “Aires de mudanza”, “Nel dialeutu del grisú”, “Tiempu d’esiliu y povisa ayeno” o “Los desconocedores del agua”.

Esti vienres na Casona del Bravial de Blimea tuvo llugar un nuevu taller de llectura infantil entamáu pola Oficina de Normalización Llingüística del conceyu en collaboración cola asociación cultural Bocina Nalón y la Oficina d’Información Xuvenil.

Si los dos vienres anteriores un grupu de neños d’ente 7 y 10 años s’averaren al argumentu y el pallabreru del llibru “Tapín de Picupáu”, de Pablo Rodríguez Medina, esta selmana tocó-y el turnu a un grupu d’edaes ente 4 y 6 años, que pudieron conocer en persona al escritor Chechu García, que-yos cuntó’l so llibru tituláu “Marta y el peludín de Carrandi” (Ámbitu). Amás de charrar col autor llevaron a cabu distintes actividaes rellacionaes con esti llibru, ente les que s’incluyeron manualidaes y dibuxos, too ello dende un enfoque llúdicu y d’entretenimientu.

Chechu García dase a conocer como escritor en 1996 col llibru infantil “Vieyu Trasgu”, col qu’algamó’l primer premiu de “Llectures pa rapazos” de l’Academia de la Llingua. Nesi mesmu añu algama tamién el premiu Teodoro Cuesta de poesía col llibru tituláu “Les coraes de la roca”. Tamién tien escrites distintes obres teatrales, rellatos curtios, antoloxíes, estudios sobre la historia del cómic y llibros infantiles. Ye ún de los fundadores de la tertulia lliteraria “Tom Malory” y el coordinador de la revista que surde d’ella.

Estos talleres son una de les principales novedaes que presenten les Xornaes de Lliteratura Infantil y Xuvenil d’esti añu, y que se suma a les esposiciones y les representaciones teatrales que se tán celebrando nel conceyu a lo llargo del tol mes.

Mañana vienres 22 de payares a les 6 de la tarde na Casona del Bravial de Blimea va tener llugar un nuevu taller de llectura infantil entamáu pola Oficina de Normalización Llingüística del conceyu en collaboración cola asociación cultural Bocina Nalón y la Oficina d’Información Xuvenil.

Si los dos vienres anteriores un grupu de neños d’ente 7 y 10 años s’acercaben al argumentu y el pallabreru del llibru “Tapín de Picupáu”, de Pablo Rodríguez Medina, esta selmana va ser otru grupu d’edaes ente 4 y 6 años los que van poder conocer en persona al escritor Chechu García, que-yos va cuntar el so llibru tituláu “Marta y el peludín de Carrandi” (Ámbitu). Amás de charrar col autor van facer distintes actividaes rellacionaes con esti llibru, ente les que s’incluyen manualidaes y dibuxos, too ello dende un enfoque llúdicu y d’entretenimientu. Chechu García dase a conocer como escritor en 1996 col llibru infantil “Vieyu Trasgu”, col qu’algamó’l primer premiu de “Llectures pa rapazos” de l’Academia de la Llingua. Nesi mesmu añu algama tamién el premiu Teodoro Cuesta de poesía col llibru tituláu “Les coraes de la roca”.

Tamién tien escrites distintes obres teatrales, rellatos curtios, antoloxíes, estudios sobre la historia del cómic y llibros infantiles. Ye ún de los fundadores de la tertulia lliteraria “Tom Malory” y el coordinador de la revista que surde d’ella. Estos talleres son una de les principales novedaes que presenten les Xornaes de Lliteratura Infantil y Xuvenil d’esti añu, y que se suma a les esposiciones y les representaciones teatrales que se tán celebrando nel conceyu a lo llargo del tol mes.

Ayeri llunes, 18 de payares de 2013, abriose la convocatoria de los Premios Timón 2014 entamaos pola Asociación Cultural L’Arribada y destinaos a reconocer la trayectoria lliteraria de los escritores d’Asturies. Pa esta edición, nes estayes lliteraries, opten a los gallardones quienes nacieren nel añu 1.964 o antes Les candidatures, razonaes, puen ser presentaes por una persona o un colectivu nes señes de corréu electrónicu de l’asociación hasta’l 2 de marzu de 2014.

Los Premios Timón destínense a reconocer la trayectoria lliteraria de los escritores d’Asturies. Pa esta edición, nes estayes lliteraries, opten a los gallardones los/es escritores que nacieren nel añu 1.964 o antes. Trátase del VIII Premiu Timón, p’autores en llingua asturiana y n’eonaviego, y del V Premio Timón, p’autores asturianos en llingua castellana.

Igualmente, prémiase tamién a asociaciones, sociedaes y fundaciones con sé n’Asturies que tengan como fin la conservación y promoción de la identidá cultural de nueso, per aciu del II Premiu Timón de Cultura Asturiana.

P’alcordar los gallardones l’asociación convocará trés xuraos, ún por cada modalidá, formaos por persones venceyaes a la cultura y la lliteratura del país. Estes distinciones, consistentes nuna obra del escultor y ceramista xixonés Jesus Castañón pa cada premiu, entregaránse mientres la cellebración de La Vagamar 2014.

Los ganadores anteriores fueron, del Premiu Timón, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012) y Miguel Rojo (2013); del Premio Timón, Luis Fernández Roces (2010), Juan Méjica (2011), Fernando Menéndez (2012) y Gonzalo Suárez (2013); y del Premiu Timón de Cultura Asturiana l’Asociación Cultural Ensame Sidreru (2013).