Lliteratura

L’entamu de la décima edición de la Vagamar allúgabase esti añu nel domingu 2 d’agostu, cola cellebración del actu d’entrega de los Premios Timón 2015, un actu qu’entamó a les 12:30 nel patiu del Centru de Cultura Antiguu Institutu de Xixón y que tuvo conducíu pol actor Félix Corcuera y musicalmente amenizáu pol grupu Taranus. Esther Prieto, Francisco García Pérez y l’Asociación pola recuperación de los Sidros y les Comedies “El Cencerru” de Valdesoto foron los galardonaos d’esti añu,

L’Asociación Cultural L’Arribada vien convocando añalmente unos premios col envís de facer reconocimientu a una trayectoria lliteraria. Son el Premiu Timón, p’autores en llingua asturiana y n’eonaviego, y el Premio Timón, p’autores asturianos en llingua castellana. Dende 2013 tamién se convoca’l Premiu Timón de Cultura Asturiana destináu a asociaciones, sociedaes, fundaciones y otres entidaes que tengan como fin la conservación y promoción de la identidá cultural de nueso.

Los gallardonaos de 2015 son Esther Prieto (IX Premiu Timón pa escritores n’asturianu y eonaviego), Francisco García Pérez (VI Premio Timón pa escritores asturianos en castellanu) y l’Asociación pola recuperación de los Sidros y les Comedies “El Cencerru” de Valdesoto (III Premiu Timón de Cultura Asturiana). Y los gallardones de los Premios Timón son obres del escultor y ceramista xixonés Jesus Castañón.

El IX Premiu Timón entregolu Ana Montserrat López, conceyala delegada d’Educación y Cultura del Ayuntamientu de Xixón; la entrega del VI Premio Timón va facela Humberto Gonzali, coordinador de L’Arribada; y la correspondiente al III Premiu Timón de Cultura Asturiana corrió al cargu de Xosé Nel Riesgo, director de la FMCEyUP de Xixón.

Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013) y Xosé Bolado (2014).

El Premio Timón foi llográu anteriormente por Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013) y Carmen Ruiz-Tilve (2014).

El Premiu Timón de Cultura Asturiana consiguiéronlu n’otres Ediciones l’Asociación Cultural Ensame Sidreru (2013) y la Xunta pola Defensa de la Llingua Asturiana (2014).

Les Actividaes del Arcu Atlánticu Lliterariu van tener nesta fin de selaman una bayurosa presencia nel Festival. Esti vienres 31 de xunetu, a les 17:30 hores na Carpa Arcu lliterariu nel Puertu Deportivu de Gijón/Xixón, van entamar eses actividaes presentándose’l llibru infantil Nora na viesca los milenta güeyos, d’Helena Trexu Fombella, con ilustraciones a color de Violeta Mateu.

Tres del llibru d’Helena Trexu va presentase tamién “Curandeiros, compostores y outros sanadores”, de Martín Pérez Álvarez; obra ganadora del sétimu premiu Fierro Botas, a les seis de la tardi; y una hora depués la “Crónica de la lluz y la solombra”, d’Antón García.

Les actividaes van siguir na carpa cola conferencia “De Cunqueiro a Pimentel pasando por Ramón Piñeiro”, pol mesmu Antón García y a les ocho con una tertulia sobre “Lliteratura gallega n’asturianu”.

Pa finar la xornada a les nueve ta prevista una conferencia sobre “La música tradicional nes comarques llioneses,” por Fran Allegre.

Les Xornaes Lliteraries del Festival del Arcu Atlánticu van desenvolvese otra vuelta dende’l llunes 27 nel Centru Cultura Antiguu Institutu. Ente teatru, proyeiciones de cine y delles otres actividaes, destaca una esposición n’homenaxe a a Juliana Constructora, empresa fundamental na construcción naval de Xixón, coincidiendo col so centenariu. Compleméntase con una conferencia, el martes 28 de xunetu, a les 19.00 h, del historiador Rubén Vega y Daniel Ordóñez, antiguu trabayador de Juliana Constructora, sobre «Astilleros y cultura del trabajo. Memoria histórica de la construcción naval».

La programación entamará el llunes 27 a les 19 hores nel Patiu del Centru de Cultura Antiguu Institutu con teatru y van seguir el martes 28 a les 19:30 nel Salón d’Actos, CMI Xixón-Sur “José Gonzalo Fernández Mieres”cola proyeición cinematográfica de ” Todo el tiempo del mundo” y l’alcuentru col director, José Antonio Quirós.

El miércoles a les 19 hores nel Salón d’Actos, CMI Xixón-Sur “José Gonzalo Fernández Mieres” habrá cine otra vuelta con “A Esmorga” y l’alcuentru col director, Ignacio Vilar, y Víctor F. Freixanes, Director Xeneral d’Editorial Galaxia/Mar Maior.

El xueves 30, les actividaes treslladaránse a la es 18 hores a la Carpa Arcu Lliterariu, nel Puertu Deportivu, onde se va presentar la obra “Catalina de Santiss”, d’Aurora García Rivas, pa media hora dempués presentase tamién “ROB ZOMBIE. Las siniestras armonías de la sordidez”, de Daniel Rodríguez Sánchez.

A lo llargo de los demás díes presentaránse tamién “Cuando enero fue pasto de las llamas”, de Juan Ignacio González; “Bajo el viaducto”, de Xuan Xosé Sánchez Vicente; ” A Esmorga (La Parranda)”, d’Eduardo Blanco Amor (cola intervención de Víctor F. Freixanes, Director Xeneral d’Editorial Galaxia/Mar Maior); “Nora y la viesca de los milenta güeyos”, d’Helena Trexu; “Curandeiros, compostores y outros sanadores”, de Martín Pérez Álvarez; obra ganadora del sétimu premiu Fierro Botas; y “Crónica de la lluz y la solombra”, d’Antón García. y la obra del mesmu autor “De Cunqueiro a Pimentel pasando por Ramón Piñeiro”.

El vienres 31, a les 21 hores habrá na Carpa Arcu Lliterariu, Puertu Deportivu la conferencia “La música tradicional en las comarcas leonesas”, por Fran Allegre. Y el sábadu 1 a les 17:30 nesa mesma Carpa Arcu Lliterariu, del Puertu Deportivu presentaráse “Yo, la to llingua”, de Damián Barreiro” y “Isidru”, de Carla Menéndez Fernández, pa finar la xornada cola conferencia que va pronunciar sobre “Mitos y tradiciones de la mar atlántica” Alberto Álvarez Peña y la que sobre “Patrimoniu cultural de Llión”, ufrirá Ricardo Chao Prieto.

La xornada finará con otra conferencia sobre “Patrimoniu cultural de Zamora”, por Alfredo Hernándezy la que dará Marcial Tenreiro Bermúdez sobre “Ritos, sacrificios y territorio de la Hispania Céltica”.

Tamién habrá Sones y Lletres d’Asturies nel Arcu Atlánticu, del 24 de xunetu al 2 d’agostu, de 12.00 h a 15.00 hores y de 17.30 h a 22.30, no que vien siendo un espaciu pa güeyar, conocer, y mercar lliteratura, música y cine en llingua asturiana, embaxo la organización de l’Asociación de Libreros del Principado de Asturias.

Pa finar, del 24 de xunetu al 2 d’agostu, de 12.00 hores a 15.00 h y de 17.30 h a 22.30, podrá vese la esposición n’homenaxe a a Juliana Constructora, empresa fundamental na construcción naval de Xixón, coincidiendo col so centenariu. Compleméntase con una conferencia, el martes 28 de xunetu, a les 19.00 h, del historiador Rubén Vega y Daniel Ordóñez, antiguu trabayador de Juliana Constructora, sobre «Astilleros y cultura del trabajo. Memoria histórica de la construcción naval».

Esti prósimu vienres 10 de xunetu entregaránse los premios del XVIII Concursu de Cuentos pola Oficialidá del Asturianu, convocáu pol Conceyu Bimenes. L’actu, nel que participará Salvador Gutiérrez Ordóñez (yerbatu y miembru de la RAE), va tener llugar a les 20’00 hores énte la capiella de San Xuan, en Tabayes y nel trescursu del mesmu fadráse una llectura pública del cuentu ganador na voz de la so autora. L’actu pesllarálu’l monologuista maliayés Marcos SL, qu’interpretará’l monólogu “Xente mozo”.

ganadora del certame foi Ana Esther Martínez Sierra, algamando’l primer premiu, dotáu con 600 euros, pola so obra “Ensin fades, ensin perdices”. El segundu premiu, dotáu con 450 euros, foi pal cuentu “Stylommantophora”, de Laura Marcos Domínguez, y Héctor Pérez Iglesias (Llanera, 1978) algamó’l tercer premiu, al que se-y apurren 300 euros, con “Si verde”.

En casu de mal tiempu l’actu desarrollaráse na Casa Cultura de Bimenes, sita en Santuyano.

Preséntase esti día 10 nel so pueblu de nacencia

“Deixándo’l cuerpu” ye tercer llibru, el segundu de poemes, dispuéis de una obra de teatru, del tamién músicu llionés Fran Allegre (Franciscu Xavier Pozuelu Allegre) que tien una bona riestra de trabayos espublizaos, amás de ser un nomáu concertista na vecina rexón llionesa y per muchos llugares del esternu.

El llibru veino acabante aportar a les llibreríes y so autor quier “presentalu de momentu nel mieu pueblu, Villareiyu d’Órbigu, nel salón comunal esti vienres a les 22:00, y el sábadu en Ñogare de Cabreira na carpa apreparada pal Seranu cabreirés”.

Depués dirá presentando’l llibru por dellos llugares d’Asturies.

Fran Allegre entamó en 1995 a esperimentar cola música y dos o tres años dempués empezó a dedicase a la música, l’espardimientu cultural y artesanía de construcción de preseos musicales tradicionales lleoneses. De formación autodidacta, basada na esperimentación, Fran construye zanfoñes, chifles, tamborines, gaites lleoneses, rabeles, pitos, panderos cuadráivos, panderetes , arpes y otros tradicionales de menor dificultá, ya inventos.

Investiga de cutio la reforma y meyora de dichos preseos en diseños, afinaciones, pero fai tamién reproducciones basaes en preseos antiguos o tradicionales.

Nel planu lliterariu tien abondos trabayos espublizaos como Poemes pa nun ser lleidos (Ediciones Filandón en 2008), l’antoloxía poética “Esto non rima” (2012), l’antoloxía d’autores n’asturlleonés (editorial Origami) y neditorial Suburbia: “Onde la palabra pousa” (2012). Tamién s’autoeditara la obra de teatru: “Sentir, y nun sentir sentire” (2012) y esta nueva antoloxía poética: “Deixando’l cuerpu”.

La Tertulia Malory, de L’Entregu, escoyó la selmana pasada como meyor llibru n’asturianu de tolos que s’editaron nel 2014 el conxuntu de cuentos arrecoyíos embaxo’ltítulu “Más espeso que l’agua”, obra de la escritora ayerana Consuelo Vega. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 26 de xunu del 2015.

El xuráu destacó nel acta del fallu «una magnífica coleición de cuentos qu’algamen con voz sensible, firme y poderosa’l terrén de la maestría narrativa, amosando al llector el delicáu misteriu que s’escuende tres de lo cotidiano, siempre con una prosa esencial, guapa, ensin aditivos. Histories de xente corriente, vides comunes que, gracies a l’habilidá d’una observadora atenta, resulten aventures estraordinaries.».

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en prósimes feches.

Esta ye la cuarta vez que’l grupu concede esti premiu, l’añu anterior resultó ganadora Carne de melandru, novela xuvenil de Milio Rodríguez Cueto. Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.

Como se diz nel acta del Xuráu y na nota de prensa asoleyada pola Tertualia, “Más espeso que l’agua” ye una coleición de cuentos onde se recueyen narraciones escrites nel espaciu de venti años, con una voz personal que nos regala maxistrales discursos demográficos como nel relatu Llevaben la comida, o la emocionada señalda del qu’aporta a una patria estraña, qu’atopamos nel cuentu Gouda. Cada relatu va dir enseñando fragmentos de la esistencia de xente cola que topamos a diario, xente que, tres d’una aparente normalidá, escuende traxedies, enormes sacrificios, amores…

Consuelo Vega (Bustillé, Ayer, 1961). Llicenciada en Filoloxía. Como narradora diose a conocer nel añu 1995 cola obra Cera frío, relatu curtiu col qu’algamó en 1994 el Primer Premiu María Xosefa Canellada de Narrativa. Ye coautora, xunto con Antón García, del ensayu Del centru a la periferia (1993), una interesante reflexón sobre’l procesu hestóricu y cultural que llevó a Asturies de ser centru d’ella mesma a ser periferia d’una entidá superior, amás del trabayu Una mirada a la muyer na historia, del añu 1999. Ye tamién autora de traducciones de Peter Handke y Christine Nöstlinger, ente otros.