Lliteratura

Cualquier poesía que nun axite mentes y cuerpos nun ye más qu’un meru exerciciu de soníu. El poeta Ignaciu Llope enunció ayeri esi alegatu lliterariu na presentación en Xixón de ‘Una casa tendida al océanu’, una esbilla de poemes ya ensayos na que l’escritor pixuetu reivindica’l valor “proletariu” de los testos na construcción collectiva d’una comunidá.

Nesi sen, Llope declaróse señaldosu de los ‘dazibaos’ -periódicos murales popularizaos pol réxime comunista chinu- y señaló’l manifiestu que llamaba n’Asturies a la fuelga xeneral revolucionaria d’ochobre de 1934 como la obra lliteraria más estaordinaria ente les que conoz.

Nel trescursu del actu de presentación de ‘Una casa tendida al océanu’, editada pol Atenéu Obreru de Xixón dientro de la so colección ‘Tiempu de cristal’, el poeta pixuetu duldó na sé del Atenéu de que l’ensayu y la poesía seyan “males compañíes”, y precisó qu’en dambos xéneros, “que son dos principios de conocimientu, falo de lo mesmo”.

Pol so llau, el tamién escritor Adolfo Camilo Díaz, qu’exerció xunta Xulio Vixil Castañón de presentador de la obra de Llope, ensalzó’l nuevu llibru del pixuetu como “tremendamente recomendable” y destacó los ensayos de Llope como “testos vivos que siguen siendo doliosamente reales”, n’oposición a lo qu’ocurre con otres obres del mesmu xéneru escrites en castellán.

Según Camilo Díaz, que definió a Ignaciu Llope como “gran cronista de lo que posiblemente tendríemos qu’haber sío”, los ensayos qu’agora publica l’autor pixuetu tienen inda más valor por tar concebíos “nos delirantes campos de Mordor del asturia-onanismu”, n’alusión a la fechura de la mayoría d’esos testos nos años ochenta, “cuando yéremos especialistes na invención de problemes”.

‘Una casa tendida al océanu’ recueye ventitrés poemes -seis d’ellos inéditos- y ocho ensayos qu’aborden temes como la “esquizofrenia” del pensamientu asturianista, la militancia nel Surdimientu y la cuestión llingüística na franxa comprendida ente los ríos Navia y Eo. Llope trabaya nun nuevu poemariu que prevé asoleyar baxo’l títulu ‘El combate melancólicu. Poemes proletarios’.

Una amuesa de la creación lliteraria n’asturianu con periodicidá cuatrimestral y a un preciu de 3 euros. La revista ‘Reciella Malory’, asoleyada por un grupu d’escritores qu’aconceyen nun establecimientu hosteleru de L’Entregu, naz col envís de pervivir nel tiempu y d’abri-yos les puertes a los testos d’autores del país.

Nel númberu inagural de la revista, que se presentará formalmente a les 19,30 hores del prósimu vienres na Casa Cultura de L’Entregu, inclúinse trabayos de Manuel Asur, Xulio Arbesú, Xosé Ramón Martín Ardines, Antonio y Guillermo Riopedre, Martín López-Vega, Roberto Corte, Juan Carlos Crespos Lanchas, Ana Rosa Fernández, Chechu García, Henrique G. Facuriella y Vanessa Gutiérrez, autores estos tres últimos qu’asumen la cordinación de la publicación.

L’equipu editor de ‘Reciella Malory. Cartafueyos de lliteratura asturiana’ cifra en 200 exemplares la primer tirada de la revista, que tará a la venta en distintes llibreríes d’Asturies y que, con un presupuestu modestu, pretende dir completándose en númberos posteriores con reseñes de llibros.

El nome de la publicación qu’agora ve la lluz correspuéndese col establecimientu entreguín onde los promotores de la revista vienen reuniéndose con calter periódicu dende l’añu 1998 pa entamar alderiques lliterarios.

Los escritores Claudio Magris, Milan Kundera y Paul Auster son, por esi orde, los tres grandes favoritos pa recibir el Premiu ‘Príncipe de Asturias’ de les Lletres, que se fallará esti mediudía y qu’abre la concesión de los galardones na so XXIV edición. Los miembros del xuráu aconceyaron dende primera hora d’ayeri n’Uviéu pa decidir el nome’l ganador ente 30 candidatos de 16 nacionalidaes.

Nun alcuentru colos medios de comunicación previu a la constitución del xuráu como tal, tres de sos miembros -los escritores Fernando Sánchez Dragó y Juan José Armas Marcelo, y el presidente de la Real Academia de la Lengua, Víctor García de la Concha- señalaron al novelista Juan Marsé como merecedor del galardón, pesie a que caún d’ellos declaró tener el so propiu favoritu.

Sánchez Dragó, partidariu de premiar a un autor de sonadía internacional, adelantó que defenderá les opciones de la escritora india Arundathi Roy, mientres qu’Armas Marcelo decantóse por galardonar a José Manuel Caballero Bonald y el presidente de l’Academia de la Lengua Española dixo preferir, en tóu casu, a un autor hispánicu como ganador.

Magar d’eses preferencies, el nome del escritor centroeuropéu Milan Kundera sonó yá dende la mañana como’l d’un candidatu de pesu al ‘Príncipe’ de les Lletres 2004, que’l xuráu concederá, según declaraciones de los sos propios miembros, con plena independencia y ensin idegues prefixaes que puean condicionar la votación final.

Web oficial de la Fundación ‘Príncipe’

L’escritor y profesor italianu Claudio Magris, espertu en Lliteratura xermánica y autor d’una bayurosa obra de narrativa y ensayu, foi galardonáu esti mediudía n’Uviéu col Premiu ‘Príncipe de Asturias’ de les Lletres 2004, depués d’imponese nes últimes votaciones a los finalistes Paul Auster y Milan Kundera.

A los güeyos del xuráu, Magris encarna na so escritura la meyor tradición humanista y plural de la lliteratura europea, “dispuesta al diálogu de cultures”. Nos sos llibros, entiende’l xuráu, l’escritor italianu amuesa “espacios que componen un territoriu de llibertá nos que se configura’l deseyu de la xunidá europea na so diversidá hestórica”.

Darréu de conocer la concesión del galardón, Magris declaróse enforma “contentu y sorprendíu” por ser l’adxudicatariu del prestixosu premiu, y defendió dende Italia la reflexón crítica nuna lliteratura concebida como busca de la verdá, nun contestu nel que, asegura l’autor galardonáu, hai ciertu marxe pal optimismu.

La candidatura del escritor italianu fora presentada por Hans Magnus Enzensberger y Ryszard Kapuscinski, premios ‘Príncipe de Asturias’ de Comunicación y Humanidaes 2002 y 2003, respectivamente. Pa llegar a la so decisión final, el xuráu, presidíu pol presidente de l’Academia de la Lengua Española, Vícitor García de la Concha, descartó a otros 34 candidatos de 16 países.

Nacíu na llocalidá de Trieste en 1939, Claudio Magris ta consideráu como ún de los principales mediadores ente les cultures italiana y alemana. Ye profesor titular na Facultá de Filosofía y Lletres de la Universidá de Trieste y afitóse como una de les figures más relevantes de la lliteratura italiana contemporánea con obres de narrativa y ensayu como ‘El Danubio’, ‘Conxetures sobro un sable’, ‘Microcosmos’ y la más reciente ‘La Esposición’, asoleyada en 2002 como reivindicación de la figura’l pintor triestín Timmel, fallecíu nun manicomiu.

El concursu de cuentos curtios de la Tertulia cultural El Garrapiellu, qu’algama esti añu la so edición númberu trece y que s’afita como ún de los certames más veteranos na so estaya, premia a un autor de Xixón y a otru de L’Entregu.

El xuráu alcordó concede-y el primer premiu, dotáu con 900 euros, al periodista Quique Faes, redactor d’Asturnews, pola obra ‘Paco depués del trauma’, mientres que l’accésit, de 300 euros, otorgóse-y al escritor Pablo Rodríguez Medina, que presentara a concursu el cuentu ‘De penalti’.

Según informó El Garrapiellu al traviés d’un comunicáu públicu, el xuráu tuvo formáu pola escritora y mayestra Iris Díaz Trancho; l’académicu de la Llingua Vicente García Oliva; l’autor Pablo Tejón Castañón, ganador de l’anterior edición del concursu; la responsable de la Oficina de la Llingua de Xixón, María Xosé Rodríguez; y el profesor y traductor Octavio Trapiella.

Faes, qu’algamara el segundu premiu na anterior edición del concursu de cuentos curtios d’El Garrapiellu, tien asoleyaes dos noveles cola casa editorial Trabe, la última d’elles nel añu 2000. Pol so llau, Pablo Rodríguez Medina ye ún de los escritores más premiaos y prolíficos en llingua asturiana, con una decena de llibros nel mercáu.

La VIII Feria’l Llibru d’Avilés barre pa casa. El certame abre les sos puertes con especial protagonismu de los autores asturianos, que representen casi la totalidá de los escritores que firmarán obres nel recintu de la feria: Ventiocho de trenta. ‘Libroavilés’ ocuparáse hasta’l 20 de xunu de la tonada y la gastronomía, y dedicará-y una güeyada especial a los conceyos de Muros, Castrillón y Amieva.

El primeru d’ellos protagonizará’l certame a lo llargo’l domingu 6 de xunu cola presentación d’un llibru sobro la fisonomía’l conceyu. Castrillón garrará’l relevu al día siguiente, llunes 7, y Amieva centrará les actividaes el sábadu 12, con una esposición de quesos y embutíos de la zona.

La VIII Feria’l Llibru d’Avilés, que se cellebra en paralelo a XVII Feria’l Llibru Vieyu y d’Ocasión, arranca güei con una actuación de la Banda de Gaites de la villa a les 18,30 y la presentación, darréu, de la obra ‘Avilés, ciudad milenaria’.

En díes sucesivos ta previstu el pasu pol recintu ferial, allugáu en Les Meanes, de Pepe Monteserín y Xuan Bello, ente otros autores asturianos, a los que van sumase procedentes de fuera’l país Fernando Sánchez Dragó, conductor del programa televisivu ‘Blanco sobre negro’, ya Íñigo González, concursante de la primer edición del espaciu ‘Gran Hermano’.

La parte musical pondrála una representación de cantantes de tonada asturiana, que van ufrir un recital el sábadu 12 de xunu nel que participarán los intérpretes José María García, Laudelina Hortal, José Luis Valle y Urbano Prieto.

Un total de trenta candidatos de 16 países opten a algamar el Premiu ‘Príncipe de Asturias’ de les Lletres 2004, cuyu xuráu aconceya n’Uviéu a partir del prósimu xueves cola presencia, ente otros, d’Andrés Amorós, Luis María Ansón, Fernando Sánchez Dragó, José María Martínez Cachero y Víctor García de la Concha. El so fallu dará’l nome del primer ganador de la XXIV edición de los galardones.

A una selmana del asoleyamientu’l veredictu, la Fundación ‘Príncipe de Asturias’ acumula trenta candidatures firmes llegaes de Bolivia, Cuba, España, Estaos Xuníos, Francia, India, Italia, México, Perú, Portugal, República Checa, Rumanía, Sudáfrica, Suecia, Turquía y Venezuela.Magar d’ello, los miembros del xuráu tamién podrán añadir a esa llista los sos propios candidatos nos momentos previos al empiezu de les deliberaciones.

Pa decidir a quién va a parar esti añu el ‘Príncipe’ de les Lletres, qu’en 2003 compartieron les escritores Fátima Mernissi y Susan Sontag, aportarán a Uviéu lliteratos como Juan José Armas Marcelo y Fernando Sánchez Dragó; espertos como José María Martínez Cachero y Andrés Amorós; y miembros de la Real Academia de la Lengua, ente ellos el periodista Luis María Anson y el presidente de la institución, Víctor García de la Concha.

El xuráu asoleyará la so decisión al mediudía’l vienres 11 de xunu, como reconocencia a la persona, grupu de trabayu o institución cuyu llabor creador o d’investigación represente una contribución relevante a la cultura universal nes estayes de la Lliteratura o de la Llingüística.

L’actor, escritor ya ilustrador madrilanu Enrique Gracia Trinidad ye’l vencedor del III Premiu Emilio Alarcos de Poesía en castellán, instauráu pol Gobiernu asturianu n’alcordanza del llingüista’l mesmu nome y dotáu con 15.000 euros. El xuráu premió güei la obra de Gracia, ‘Sin noticias de gato de Ursaria’ n’atención a la so capacidá pa divertir ya ironizar dende l’inxeniu y la imaxinación

Nesti sen, el presidente’l xuráu, el poeta Ángel González, eloxó’l poemariu ganador darréu de la llectura’l fallu, que s’asoleyó esta tarde n’Uviéu, y refirióse a la obra vencedora como una bona amuesa de sentíu l’humor y llinguaxe novedosu, propia d’un autor orixinal.

Pol so llau, el tamién miembru’l xuráu y poeta Luis García Montero destacó l’acertada invención del personaxe que-y da continuidá al poemariu -el ‘gato de Ursaria’-, cuyes meditaciones van llevando’l pesu y el filu del llibru.

Enrique Gracia Trinidad, nacíu en 1950, acaba espublizar la so obra poética realizada ente 1973 y 2004. Antes d’escoyer la so obra como’l poemariu ganador del III Premiu Alarcos, el xuráu tuvo qu’esbillar ente un total de 115 obres concursantes, de les que se fexo una última selección d’once finalistes.

Promocionar la llectura envede la edición y equiparar el tratamientu de la lliteratura n’asturianu al que tien la creación en castellán. Son dos propuestes qu’esti mediudía quedaron enriba la mesa de L’Academia de la Llingua Asturiana, depués de que los escritores premiaos na última edición resuelta de los concursos de la institución reclamaren una mayor atención real de les autoridaes p’hacia les lletres asturianes.

Nesti sen, los autores aconceyaos n’Uviéu llamentáronse de ser creadores d’unos llibros “que nun sabemos si tienen llectores” y denunciaron la desigualdá cola que s’atopen los escritores n’asturianu respecto a los qu’asoleyen la so obra dafechu en castellán. Según apuntó Pablo Rodríguez Medina, autor qu’acumula dellos premios en dambes llingües, les autoridaes “faen dalgo, pero non lo que debieren”, y esa galbana alministrativa provoca, por exemplu, que la Sociedá d’Autores cobre los drechos de les obres teatrales n’asturianu “mientres l’asturianu nun tá presente nos Premios Max”.

La opinión de Rodríguez Medina, qu’atribuyó a la ignorancia l’acusación de qu’hai dellos llibros “malos” espublizaos n’asturianu y precisó qu’en tóu casu tamién los hai en castellán, suscribióla el tamién escritor Xurde Álvarez, qu’alitó a los poderes públicos a potenciar, “más que a nosotros, a los llectores”, pa lo que sorrayó la oficialidá del asturianu como un primer pasu “imprescindible”.

Álvarez y Rodríguez Medina acudieron güei a la sé de L’Academia -qu’asoleyó una patente falta d’espacios p’actos con asistencia de públicu- pa recoyer los sos premios de los concursos de la institución llingüística na so edición de 2004, nos que tamién resultaron galardonaos los creadores Miguel Rojo Martínez ya Iris Díaz Trancho, y los investigadores Inaciu Hevia, Pedro Busto, Andrés Martínez, Borja Martínez, Xabiel Fernández, Trinidad Larré, Jonathan Rodríguez, Rafael Rodríguez y Xosé Lluis Campal. Les estayes de curtios cinematográficos, recoyida de material lliterario oral y narrativa, los premios quedaron ermos.

La presidenta de L’Academia de la Llingua Asturiana, Ana Cano, destacó nel actu d’entrega de los premios el puxu de los autores mozos, qu’esti añu tuvieron una estimable representación ente los premiaos.

L’arxentín Guillermo Orsi ye’l ganador del II Premiu Umbriel-Selmana Negra de novela policiaca, depués de que’l xuráu del certame reconociera el so “manexu maxistral del llinguaxe” pa edificar una visión despiadada de l’Arxentina d’anguaño na obra vencedora, ‘Sueños de perro’. L’autor sevillanu Juan Ramón Biedma resultó finalista cola novela ‘Luz poniente’ y quedó a les puertes del premiu, dotáu con 15.000 euros.

Según l’acta redactada polos miembros del xuráu, Orsi algama construyir un manual de perdedores qu’habiten un país nel qu’en apariencia nun sufren grandes carencies pero que conduz a los sos ciudadanos a la frustración ensin remediu.

El veredictu de la segunda edición del premiu Umbriel-Selmana Negra, que pretende da-y puxu a la lliteratura’l xéneru policiacu, foi asoleyáu pol director de la Selmana Negra, Paco Ignacio Taibo II, que na so comparecencia pública tuvo flanqueáu por varios integrantes del xuráu, ente ellos l’escritor cubanu José Latour y la reaponsable de la casa editora Umbriel, Aránzazu Sumalla.