Lliteratura

El bandu de San Antolín de Naves (Llanes) presentó’l septimu númberu de la colección añal ‘Bedoniana’, editada por Alvízoras. Más de venti trabayos relacionaos col ríu Bedón y el monasteriu de San Antolín, reúnen les firmes de Pablo Ardisana, Juan Carlos Villaverde y Pilar García Cuetos, ente otros, y rescata un poema ineditu de Celso Amieva.

El poeta llaniscu Pablo Ardisana, la profesora d’Historia del Arte Pilar García Cuetos, la profesora de Llingua Yolanda Cerra, Jaime Sánchez Merodio, Conchi Vega Obeso, Felipe Fernández, Luis Carrera, Luis Perez Ortiz, Jose Manuel Carrera y Carmen Acebo y el propiu editor, el profesor Juan Carlos Villaverde Amieva son les firmes que completen el septimu númberu de la colección ‘Bedoniana’.

Ente los trabayos hai un artículu monográficu sobre la localidá de Samartín, un estudiu sobre les aves marines de la costa naviza, asina como la trescripción de documentos antiguos de Naves y Villah.ormes.

Amás, esti númberu inclúi un poema ineditu del poeta llaniscu Celso Amieva y dos poemes a la localidá de Los Cariles del poeta navizu Antonio Cantero.

L’asociación de Muyeres de Valdes Siglo XXI convoca’l III Certame de poesía ‘Nene Losada Rico’. Los poemarios, mesmo na modalidá en castellán que n’asturiano, tienen que tener una estensión mínima de 275 versos y másima de 500, ser ineditos, presentase por quintuplicao, con seudónimu y plica.

El plazu de presentación va dende’l 1 de setiembre al 1 d’ochobre. El premiu pa la obra que resulte ganadora de 600 euros.

El xuráu de la modalidá en llingua castellana ta formáu por Carlos León, presidente de l’asociación de poetes valdesanos; Jose Antonio Perez, catedráticu de Llingua y Lliteratura del IES Carmen y Severo Ochoa de L.luarca; Juan Jose Alonso, profesor de Filosofía del IES Galileo Galilei de Navia; Ana Suárez, presidenta del colectivu Milenta Muyeres y l’escritor Gonzalo Moure. Mentes qu’el xuráu en llingua asturiana ta compuestu polos poetes Xuan Bello, Antón García, Consuelo Vega, Ánxel Álvarez y la propia Nene Losada Rico, que va poco foi galardonada cola medalla de plata del Principáu.

El Conseyu pa la Cultura y les Artes del estáu de Nuevo León, el Centru Asturianu y el Consuláu d’España develaron una placa conmemorativa en honor a Garfias, poeta de la Xeneración del 27 que s’esilió en México tres de la Guerra Civil española. El poeta ye l’autor del famosu cantar “Asturias” popularizáu po Víctor Manuel.

Garfias, qu’en 1938 diéron-y en España’l Premiu Nacional de Lliteratura pola so obra “Poesía de la guerra española”, ye remembráu como ún de los más grandes poetes que vivieron en Monterrey.

Escritores, pintores y persones que lu conocieron personalmente diéronse cita na Casa Cultura de Nuevo León pa recordar al autor. Alfonso Vera, que llegó nel últimu barcu que truxo esiliaos españoles a México, faló sobre l’arribu de Garfias al país. “El 13 de xunu de 1939 llegó al puertu de Veracruz el barcu francés Sinaia tresportando 1.620 pasaxeros”, buque qu’anició l’ésodu de los esiliaos de la Guerra Civil a México, precisó Vera. Mencionó qu’ún de los pasaxeros yera Pedro Garfias y que la travesía inspirólu pa facer ún de los sos versos más guapos.

Saúl Reyes, catedráticu de la Universidá de Nuevo León, fixo un reconocimientu a la contribución de los refuxaos españoles a la cultura mexicana. “Los desterraos dexaron la tierra, pero trixeron la palabra”, citó Reyes una frase céllebre ente los refuxaos españoles. Agregó que la principal contribución de los esiliaos fue nel campu de la cultura, coles publicaciones de la Casa d’España, anguaño Colexu de México, centru académicu d’altos estudios. “Amás, diverses editoriales que contribuyeron a la formación d’estudiantes mexicanos nes lletres españoles, como Porrúa, Joaquín Mortiz y Era, ente otres”, añedió Reyes.

Tres de la velada lliteraria, el cónsul d’España, Daniel Chamorro, y Rangel Guerra, del Centru de les Artes, desvelaron una placa nun céntricu bar de la ciudá, frecuentáu por Garfias. Nel eventu tamién recordose al “entrañable amigu” Angel Sotomayor, tesoreru del Centru Asturianu de Monterrey, fallecíu va poco.

La conmemoración del centenariu del pasu de Ruben Darío per Asturies cellebrase estos díes cola inauguración de diferentes exposiciones nes que se fai repasu tanto de la vida del autor como de la sociedá de la epoca. Asinamesmo, esta selmana varios profesores de la Universidá d’Uvieu van dedica-y un cursu ‘interdisciplinar’ a la personalidá del escritor nicaragüense.

Juan Mejica, profesor de la Universidá d’Uvieu, presentó ayer esti cursu en San Esteban de Pravia destacando’l so carácter ‘interdisciplinar’. Nel participarán quince profesores y catedráticos de la universidá, como Jose María Martínez-Cachero y Antonio Jimenez Millán, qu’a lo llargo de les ponencies dirán exponiendo la personalidá del poeta y los detalles de la so estancia na comarca.

Les diferentes charles del cursu van facese en Pravia, San Esteban de Pravia y Soto del Barcu. Y precisamente nes cais d’esta localidá, el grupu de teatru Margen va representar esta tarde ‘Estampa celeste’.

Xunto col cursu inauguróse una exposición denominada ‘Un siglo con Ruben Darío’ na que se recueyen aspectos de la vida de la epoca y de los llugares pelos que pasó’l poeta. Y pa esta tarde, a les ocho, ta prevista la inauguración d’otra exposición, llamada ‘Ruben darío y su epoca nalona’, en Soto del Barcu.

L’escritor Hilario Barrero presentó ayer na Llibrería Central de Xixón el so últimu llibru: “De amores y temores”(Llibros del Pexe, 2005), un percorríu emocionáu pelos trabayos y los díes de la vida na ciudá de Nueva York, el so llugar de residencia dende 1978.

Barrero tuvo acompañáu na presentación pol poeta y críticu José Luis García Martín que definió al autor de “De amores y temores” como un “tertulianu neoyorquín de Oliver, un home que vive en Broocklyn y de vez en cuando agospia ellí a los sos amigos d’Uviéu o vien a Uviéu a tomar un café con nós y a falar de llibros o de la última mirada que lu estremeció nel Metro de camín pa Princeton!.

Ente’l públicu asistente munchos escritores asturianos: Martín López-Vega, Paco Álvarez Velasco, Enrique Bueres, Sivia Ugidos, Marcos Tramón, José Havel, Pelayo Fueyo, Fernando Menéndez o Paquita Suárez Coalla. L’autor de “De amores y temores” definió los sos diarios como “una manera de nun dexar escapar los momentos fugaces d’una vida fugaz” y lleó varios poemes col enfotu “de facer más lixera esta presentación y dar pie a que la práctica se sobreponga a toa la autopromoción valera”.

Hilario Barrero vive en Nueva York dende 1978 onde da clases d’español nel Borough of Manhattan Community College. Ye autor ente otres obres de “Siete sonetos, In tempore belli”(Premiu Gastón Baquero, 1999) y “Las estaciones”(Llibros del Pexe, 2003). En “De amores y temores” cuenta los díes d’un habitante de la ciudá de Nueva York que deprendió a buscar la felicidá nes coses pequeñes: un esguil que pasa veloz xunta él per Central Park, unos versos entelleíos nuna estación de Metru, el vaivén del agua camudante nel ferry de Stanten Island, la voz de la soprano María de los Ángeles una tarde d’orpín.

El prósimu xueves, 4 d’agostu, va presentase na Llibrería Central de Xixón, el llibru ‘De amores y temores’ (Editorial Llibros del Pexe) del escritor toledanu, afincáu en Nueva York, Hilario Barrero. La presentación que va ser a les siete y media la tarde, va correr a cargu de Jose Luis García Martín.

Hilario Barrero (Toledo, 1948) vive en Nueva York dende 1978. Ye doctor pola Universidá de la ciudá de Nueva York y ensiña español na Universidá de Princeton. Quedó finalista del Adonais en 1977 y tien ganado varios premios lliterarios. Fixo traducciones de Robert Frost, Jane Kenyon, Donald Hall y otros poetes norteamericanos contemporáneos. Ye autor de Siete sonetos, In tempore belli (Premiu de poesía Gastón Baquero) y Siete postales del sur y una postdata. Foi incluyíu en Líneas urbanas. Lectura de Nueva York (Llibros del pexe, 2002), editáu por Jose Luis García Martín y na antoloxía Miradas de Nueva York. (Mapa poetico), de Juan Luis Tapia. Dalgunos de los sos poemes foron traducíos al ingles por Gary Racz y publicaos na revista Downtown Brooklyn de la Universidá de Long Island. Collaboró, ente otres, nes siguientes revistes: Aldonza, Clarín, Calandrajas, El Súmmum, Grama, Helice, Hermes, Hueso Húmero, Manxa, Poesía española, Reloj de arena, Revistatlántica y Turia.

‘De amores y temores’ ye la última entrega de los sos diarios, editada por Llibros del Pexe.

Web d’Hilario Barrero

L’arxentín Raul Argemí y el mexicanu Rafael Ramírez Heredia foron los ganadores del premiu Dashiel Hammet a la meyor novela que concede tolos años l’Asociación Internacional d’Escritores Policiacos na Selmana Negra. El periodista mexicanu Eduardo Monteverde, pela so parte, cola obra “Lo peor del horror”, algamó’l premiu Rodolfo Walsh, dedicáu a distinguir a la meyor obra de non ficción. Col fallu d’estos premios pesllóse la edición dieciocho del festival xixonés, una edición na que se vendieron más de cincuenta y cuatro mil llibros según fizo público la organización.

La cifra diola a conocer el responsable del eventu, Paco Ignacio Taibo, na recapitulación de lo que foi esti añu la Selmana Negra. Taibo volvió arremeter contra los detractores del festival, a los qu’invitó a visitar el prósimu añu’l recintu de l’atopada “pa qu’esta xente que nunca compró un llibru, compre ún polo menos”.

Los otros premios concedíos nel festival lliterariu fueron el Memorial Silverio Cañada, que premia la meyor primer novela negra y que nesta ocasión algamó Francisco Pérez Gandul pola so obra “Celda 211”. Pel so llau el xixonés David Barreiro por “La noticia” y el cubanu Lorenzo Lunar por “El lodo y la muerte” consiguieron el premiu internacional de relatos entamáu pola Selmana Negra y l’Atenéu Obreru. Alfonso Mateo Sagasta algamó’l premiu Espartaco concedíu a la meyor novela hestórica pola so obra “Ladrones de tinta”.

El periodista catalán Carles Quílez presentó na Selmana Negra la so última obra: “Psicópata”, una recopilación de reportaxes y entrevistes a asesinos en serie y reincidentes de delitos violentos cola que tenta adientrase nel mundu del horror cotidianu. Al so llau, na mesma mesa, el mexicanu Eduardo Monteverde falaba del so últimu llibru: “Lo peor del horror”, una crónica personal de la so esperiencia como reporteru de sucesos en México D.F. Pa entrambos el llabor d’escribir sobre’l delitu y conocer de cerca la violencia cotidiana “nun insensibiliza énte’l sufrimientu humanu”, dixo Monteverde.

El mexicanu, doctor en Medicina y redactor del diariu federal La Prensa na sección nomada “Crónica roja”, afirmó que la realidá cotidiana del so país “supera cualquier ficción del géneru policial o de la lliteratura de terror y la más espantible que pudiera haber imaxinao una mente enferma”. En tonu de sarcasmu Monteverde evocó dalgunos de los casos que-y tocó convertir en noticia: el de la güelina devorada por venti cocodrilos, el de la muyer aparecida muerta y col vientre esvanciáu o el de la banda más célebre d’atracadores de México, comandada por un antigu caxeru de supermercáu y l’ex xefe de la policía de la capital federal.

El catalán Carles Quílez -colaborador d’Iñaki Gabilondo na SER y veteranu redactor de sucesos de la prensa barcelonesa- al falar del so llibru “Psicópata”, remembró les palabres d’un vieyu policía qu’estremaba a estos criminales violentos d’otra clase de delincuentes: “a cualquier delincuente pa facelu falar hai que da-y lleña, a los psicópates hai que da-yos pa que callen”. Quílez, sicasí, recalcó que nos últimos tiempos el mesmu llabor de la policía cambiara muncho n’España y que los profesionales de la investigación xudicial preferíen el trabayu científicu al “vieyu recursu a la bofetada”, afirmó. Xunta él, Monteverde, apostielló refiriéndose a la realidá de México qu’ellí “a lo llargo de tolos años que llevo tratando y conociendo a toa clase de criminales y sobretoo de policíes, lo que puedo dicir, y falo como médicu, ye que los psicópates nel mio país tán na policía, la mayoría de policíes que conocí podíen diagnosticase como psicópates”.

La reflexón final diola Monteverde, énte l’asentimientu de Carles Quílez: “de tolo que vi nel mio trabayu como redactor de “Crónica roja” nunca dexé d’estremeceme ente’l sufrimientu humanu, nun soi quien a blindame pa ello, por eso nun me gusten los asesinos que maten a ritmu de Mariachi nin los narco-corridos”.

La Selmana Negra de Xixón entama la segunda velada de poesía esta nueche cola presencia de dos autores ya avezaos a participar nel festival lliterariu: Ángel González y Luis García Montero. Xunta ellos, pela Selmana xixonesa circula dende va unos díes la información de que va tar un invitáu sorpresa del que se barrunten dellos posibles nomes, el más repetíu el de Joaquín Sabina, que como González y Montero ya protagonizó una de les llectures poétiques n’anteriores ediciones. Ente les propuestes musicales del programa pa esti xueves 14 na Selmana Negra van tar La Escepción nel escenariu central y Xabel Vegas ufiertando un conciertu acústicu na carpa de Radio Kras a les 12 la nueche.

Los poetes Ángel González y Luis García Montero entamen la llectura de los sos poemes a la 1 de la madrugada. Enantes a les 21.00 González presenta el so últimu llibru d’ensayos lliterarios: “La poesía y sus circunstancias” nun alcuentru con Paco Ignacio Taibo.

La programación de güei na Selmana Negra escomienza a les 17.00 hores con una tertulia alrodiu de la novela hestórica na que participen ente otros José Manuel Fajardo, Fernando Marías, Juan Bas y Rodolfo Martínez. A les 18.00 un nuevu debate: “De la novela blanca a la novela negra” con José ÁNgel Mañas, José Ovejero, José Carlos Somoza y Manuel García Rubio. Una hora más tarde va presentase la esperada obra escrita en colaboración ente’l Subcomandante Marcos y Paco Ignacio Taibo: “Muertos incómodos”. Darréu va presentase’l proyectu “Salgariana”, un homenaxe de diversos creadores lliterarios y artísticos al autor de Sandokán.

La Excepción protagoniza’l conciertu del escenariu central y Xabel Vegas ufierta a medianueche un acústicu del so nuevu proyectu musical “Las Uvas de la Ira” na carpa de Radio Kras.

L’escritor mierense Miguel Barrero presentó va unos díes na Selmana Negra de Xixón y de la mano de Xuan Bello la so primer novela: “Espejo”(KRK ediciones, 2005), cola que recibió’l Premiu de Narrativa Asturias Joven na so última edición. Barrero cuenta en “Espejo” una hestoria de fracasos y humildaciones, na que’l pasu del tiempu vien marcáu na vida d’un home pola so esperiencia como miembru d’una comunidá de derrotaos na guerra civil y que tien como llendes xeográfiques y hestóriques un llugar indetermináu de les cuenques mineres.

Pal autor d’esta novela nun ye casual el qu’escritores de les últimes xeneraciones s’interesen pola memoria de la guerra civil: “ye una memoria reciénte tovía, na que les feríes inda nun tan cerraes del too y nun tiempu nel que sobreviven munchos de los que vivieron esa esperiencia -talo’l protagonista de la novela- como una derrota colectiva que foi tamién la suya como individuos”. El personaxe central de “Espejo” vive una infancia señalada poles consecuencies de la derrota republicana y la represión posterior a los vencíos: “a lo llargo de los tres ciclos vitales nos que trescurre la narración, el personaxe va viendo como la propia hestoria, la infancia na postguerra nun llugar onde toos yeren derrotaos, va confundiéndose cola so propia vida y col mesmu trecursu del tiempu”, desplica Barrero.

A lo llargo de la infancia, la madurez y la vieyera del personaxe central de “Espejo” y al pesar de los cambios esperimentaos, el protagonista conserva un oxetu de la so infancia, un espeyu: “les tres partes escomiencen col personaxe mirándose nesi espeyu”, cuenta Miguel Barrero, “l’home que se reflexa nél nun ye él mesmu nunca, ye’l rostru d’un vencíu poles circunstancies de la so vida, la infancia como parte d’una comunidá humildada, la so fuxida posterior a una gran ciudá y la so vuelta al final de la vida al llugar natal pa completar el so ciclu vital”. Nesa evolución vital, el personaxe de “Espejo” pasa, en palabres del so autor de “una infancia frustrante a una madurez crispada y polo último a la resignación de la vieyera”.

La novela de Barrero recibió el premiu Asturias Joven de narrativa na so edición de 2004, pal so autor “premios como ésti tienen abonda importancia porque sirven pa publicar a nuevos autores y dar a conocer la so obra, sicasí non tolos premios son necesarios, hailos que son perfectamente prescindibles dende’l puntu de vista del interés lliterariu como los premios comerciales de los grandes grupos editoriales”. Barrero sicasí echa de menos nel casu del Asturias Joven “una mayor implicación de l’Administración a la hora de difundir la obra”, inda la suya de mano va saliendo bien como llibru tres la so publicación pola editorial asturiana KRK: “va vendiéndose y cumpliendo asina’l camín natural de cualquier llibru que ye’l de llegar a los llectores”.

Miguel Barrero (Uviéu, 1980) ye llicenciáu en Periodismu pola Universidá Pontificia de Salamanca y colaborador del diariu El Comercio. Ye autor de diversos relatos, dalgunos publicaos como serie en La Nueva España. Anguaño trabaya na preparación d’un volume de relatos, qu’inda nun tien títulu y que podía publicase a finales d’esti añu, y acaba d’empezar una novela.