Lliteratura

La novela El Principín del escritor francés Antoine de Saint-Exupéry ya tien una versión en llingua aranesa. Jaume Arbonés, un empresariu barcelonés de 32 años que colecciona traducciones d’esta obra, financió personalmente la edición.

Arbonés xustificó la so iniciativa na pasión que siente pol relatu de Saint-Exupéry, del que tien exemplares en más de 150 idiomes, y pol interés que tien hacia les llingües minorizaes. El xoven empresariu pagó del so bolsu los 8.000 euros que costó la edición y afirmó que-y presta el que los neños que tan deprendiendo aranés puedan lleer la obra nesta llingua.

La versión en llingua aranesa de El Principín lleva’l títulu de “Eth Petit Prince” y tien una tirada de 1.500 exemplares, puestos a la venta tanto en llibreríes del Vai d’Arán como por internet, de los que se mercaron 750.

El Principín publicóse per primer vez en 1943 y dende entós ye una de les obres más traducíes de la lliteratura universal. En 1983 publicóse la primer versión en llingua asturiana a cargu de Xosé Lluis García Arias.

Los tradicionales alcuentros de Verines, qu’esti añu cumplen la so XX edición, van celebrase na casona de Pendueles los prósimos díes 15 y 16 de setiembre con más d’una trentena d’autores invitaos, que van teorizar alredor de ‘La herencia del Quixote y de Cervantes na lliteratura actual’. Ente los escritores participantes destaquen nomes como los de Jon Kortazar, Chantal Maillard, el gallegu Alfredo Conde y l’asturianu Xuan Bello.

El coordinador d’estos alcuentros, el profesor Luis García Jambrina, considera obligáu esti alderique, anque nesti casu l’enfoque nun va tratar de discutir directamente sobre la obra cervantina, sinón sobre la influencia que queda d’ella na lliteratura que se ta escribiendo anguaño.

Unos trenta participantes, ente escritores y críticos lliterarios, van tar concentraos na casona llanisca pa esponer les sos idees sobre esti tema. Jon Kortazar (miembru de l’Academia Vasca y catedráticu de Lliteratura na Universidá del País Vasco), Chantal Maillard (Premiu Nacional de poesía 2004), Juana Salabert (premiu Biblioteca Breve 2001), Joaquín Verdú (premiu Jaime Gil de Biedma), Antonio Orejudo (premiu Tigre Juan 1996), la catalana Ada Castells (autora de ‘El dedo del ángel’), el gallegu Alfredo Conde (autor de ‘Xa vai o Griffón no vento’, Premiu Nacional de Lliteratura) y Andres Ibáñez (autor de ‘La música del mundo’, premiu Ojo Crítico), son dalgunos de los participantes. Nesta edición solo va haber ún escritor asturianu, Xuan Bello (autor de ‘Paniceiros’ y de ‘La vida perdida’), que vien siendo un habitual d’estos alcuentros.

L’añu pasáu la edición tuvo dedicada a la poesía actual, escrita baxo’l signu de la pluralidá. Y ente los escritores que participaron, amás de Xuan Bello y Jon Kortazar, tuvieron Elena Medel, Kirmen Uribe y l’asturiana Esther Prieto.

Web del Ministeriu de Cultura sobre los alcuentros

Lluis Álvarez “Texuca” acaba de publicar ‘Voces d’Asturies'(Trabe, 2005), una recopilación d’artículos periodísticos publicaos ente 1986 y 1988 nos que la mirada crítica sobre la realidá asturiana ye’l filu empobinador. El volume ufierta les reflexones y opiniones d’una de les figures intelectuales más inquietes del Surdimientu.

Nacíu en Llangréu en 1948, Lluis Álvarez, foi xunto a Xosé Lluis García Arias y Xuan Xosé Sánchez Vicente fundador de Conceyu Bable y un de los principales teorizadores del actual movimientu de recuperación cultural asturianu. Académicu de la Llingua y profesor d’Estética na Universidá d’Uviéu, publica agora ‘Voces d’Asturies’, un compendiu de columnes periodístiques onde la visión crítica y meditada de la realidá más inmediata nun refuga la evocación lírica o sentimental.

Lluis Álvarez ye autor d’obres como’l volume “Poemes y tornes” y d’ensayos como los conteníos en “Diálogu de Pumarín”. Amás de los sos trabayos en llingua asturiana, l’autor de ‘Voces d’Asturies’, colabora selmanalmente nel diariu “La Voz de Asturias”.

Avilés acueye ente esti xueves 1 y el 11 de setiembre los III Encuentos, unes xornaes dedicaes a la narrativa oral nes qu’una veintena de cuentistes van echar les sos hestories de viva voz per diversos bares de la villa. Autores como l’arxentìn Eduardo Franzetti o los asturianos Miguel Rojo y Milio del Nido participen nestes xornaes.

La tercera edición de Encuentos, organizada pol colectivu Ventanilla 69, va convertir Avilés a lo llargo de diez díes nuna ciudá onde los cuntadores d’hestories tienen parroquia asegurada en diversos establecimientos hosteleros y centros culturales de la villa.

Una veintena de narradores orales van participar nestes xornaes. Hasta agora tienen confirmada la so presencia Edgardo Franzetti, Miguel Rojo, Nelson Calderón, Carlos Ortiz (Caoz), Pablo Albo, Milio´l del Nido, Manolo de la Cabén, Anselmo Herrero, Susana Tornero, Carlos Alba, Mario San Miguel, Diego García, Susana Fu, Patricia Picazo, Alberto Sebastián, Virginia Imaz, Blai Senabre i Ribes y Gamba & Ginny.

III Encuentos d’Avilés

Ediciones Trabe vuelve convocar el so Premiu de Narraciones pa obres en llingua asturiana. Dende 1996 llevaba ensin convocase esti premiu, nel que n’anteriores ediciones resultaron ganadores escritores tan reconocíos como Miguel Rojo, Santi F. Ochoa, Pablo Antón Marín Estrada y Berta Piñán.

Nesta nueva edición del premiu pueden participar toles persones interesaes, soles o en grupu, ensin llímite d’edá, con obres de narrativa en llingua asturiana, yá sían noveles, recopilaciones de cuentos o cualquier otra forma posible de narración. Los trabayos han de tener al menos sesenta páxinas DIN A-4, menanografiaes a doble espaciu per una sola cara, col requisitu de ser ineditos na so totalidá como conxuntu.

La dotación económica del premiu asciende a 3000 euros en conceptu de derechos d’autor y inclúi la so publicación dientro de dalguna de les colecciones de la casa editorial.

Les obres han mandase enantes de les 24 hores del día 30 de payares a Ediciones Trabe SL. C/ Padre Buenaventura Paredes, 4. 33001 d’Uvieu, indicando que ye pal Premiu de Narraciones Trabe 2005. Pa cualesquier información complementaria sobre les bases completes del premiu puen ponese en contactu cola editorial (985208206)

L’ayuntamientu d’Ayer, a traves de la conceyalía de Cultura, convoca la XV edición del premiu de poesía en memoria de la poeta ayerana Elvira Castañón. El plazu de presentación de los orixinales, que pueden ser n’asturiano o castellán, termina’l 30 de payares.

Los poemarios presentaos deben tener ente 250 y 500 versos. La entrega de premios, dotada de mil euros pa cada modalidá, va facese coincidir cola celebración del Día del Llibru, n’abril de 2005.

El premiu de poesía ‘Elvira Castañón’ tien distinguío otros años a autores como Xose Lluis Campal, Xandru Fernández y Xabiero Cayarga. Na edición del añu pasáu decidióse que’l premiu na modalidá de llingua asturiana quedare desiertu.

L’escritor d’orixe asturianu pero afitáu en Brasil José Luiz Tejon Megido, presentó esti 24 d’agostu nel so país d’acoyida “O Beijo na Realidade”, un nuevu llibru que quier repetir l’ésitu del so caberu trabayu “O Vôo do Cisne”. Como elli mesmu describe, el llibru quier llamar l’atención sobre la ilusión na que se vive entá nel Estáu de Brasil onde fain el so agostu los que merquen coles ilusiones de la xente: “As pessoas não beijam suas realidades e não tiram da vida o que ela lhes oferece. Decidi escrever este livro de tanto ver triunfar vendedores de ilusões e arquitetos de egos superpoderosos e assombrar-me com candidatos a intermediários da magia, do secreto e dos poderes desconhecidos. Eu quis homenagear também os anônimos, que passam noites, fins de semana e horas de descanso dedicando-se às obras e às causas da evolução”.

José Luiz Tejon Megido, orixinariu del conceyu alleranu onde tien entá familiares ya collacios, ufierta-y al llector hestories exemplares de persones que superaren los sos drames personales, como asocede nel casu de los músicos João Carlos Martins e Tony Melendez e a nadadora paraolímpica Ádria Santos. La verdá d’autores de fama mundial como Ronald R. Tolkien, creador de “El Señor de los aniellos” y de Joanne K. Rowling, autora de la saga de Harry Potter, tamién apaecen nel trabayu, ente otres coses porque’l so autor atalanta que “eles criaram um imaginário de sucesso em cima de experiências traumáticas vividas na infância e juventude”.

Esti “O Beijo na Realidade” tamién cunta hestories d’homes que contribuyeren a camudar el mundu, como Isaac Newton, Albert Einstein, Louis Pasteur, Charles Darwin, Nicolau Copérnico, ente otros. El llibru ta editáu pola Editora Gente y tien 120 páxines, mercándose al preciu de 19,90 reales brasileñor, con una tirada de na menos que 10 mil ejemplares. El llanzamientu foi esti 24 d’agostu, presentándose na Saraiva Mega Store del Shopping Eldorado, com noite d’autógrafos. José Luiz Tejon Megido ye tamién l’autor de “O Vôo do Cisne” una historia autobiográfica onde cunta les dificultaes de só, exemplu vivu de les torgues atopaes por munchos de los emigrantes asturianos que quedaron sólos n’América y tuvieron d’abrise camín a base de trabayu y enfotu.

Más información na web del autor

Esta mañana abrió les sos puertes la tercer edición de la Feria del Llibru Asturianu que’l gremiu d’editores d’Asturies organiza na cai Tomás y Valiente. L’horariu va ser de 11 a 14 hores de la mañana y de 17 a 21.30 de la tarde.

Na edición del añu pasáu más de 1200 llibros foron ufiertaos nel catálogu colectivu del gremiu d’editores, cola intención de suplir la falta d’espaciu nos escaparates de les llibreríes y poner al alcance del públicu obres de tolos xeneros.

Na feria tolos años tien una presencia destacada la lliteratura n’asturiano, contando cola presencia d’editoriales como Azucel, Madú, Nobel, Trabe, Trea, Alborá, Losada, Gea 2000. Grupu Norte, Hercules, KRK, Llibros del Pexe, VTP y El Oriente de Asturias.

El Conceyu L.lena convoca un añu más el certame de teatru popular asturianu, Vital Aza, en collaboración cola Conseyería de Cultura, nel que pueden participar toles persones que lo deseen con obres inedites escrites n’asturiano. La pieza ganadora tendrá un premiu de 1200 euros.

Un añu más, el conceyu de L.lena convoca’l so premiu de teatru popular Vital Aza. Los interesaos podrán participar col númberu d’obres que quieran, siempre y cuando sían inedites y tean escrites n’asturiano. Anque ente los requisitos diz que tien d’axustase a lo que ye’l teatru popular asturianu, tamien pueden desarrollase nel ámbitu perifericu de les ciudaes. Dientro d’esti tipu de teatru podrán dase les modalidaes de monólogu, diálogu escenicu, cuadros costumistes asturianos, comedies o zarzueles.

Los orixinales deberán presentase en sobre zarráu con plica, dirixíu a la Casa Cultura del Ayuntamientu de La Pola, enantes del 13 de setiembre.

Bases completes del premiu

Nene Losada Rico va dar esta tarde un recital na sala Álvaro Delgado de L.luarca a les ocho la tarde, nel que repasará y fairá presentación de los sos últimos llibros: ‘Obra poetica en castellano’ y ‘Fueyas que reverdecen’, antoloxía de la so obra poetica n’asturiano.

La escritora valdesana, Nene Losada Rico (L.luarca, 1921), autora de llibros tan conocíos como ‘Cantares valdesanos’ o ‘El nome de las cousas’, presenta esta tarde los sos últimos llibros. ‘Obra poetica en castellano’, va acompañada d’un CD nel que l’autora recita dalgunos de los sos poemes en castellán y n’asturiano. Nel reúnense 444 poemes escritos a lo llargo de la vida de la poeta, que ye la primer vez que ve publicada la so obra en castellán. Mentes que ‘Fueyes que reverdecen’ ye una antoloxía de la so obra n’asturiano editada na colección Tiempu de Cristal del Ateneu Obreru de Xixón.

Considerada una de les autores más significatives de la poesía de la posguerra, emplega les formes populares pa reflexar la tresparencia de la vida cotidiana, marcada pol pasu del tiempu y la certeza de la muerte, a la vez que llogra la unión ente’l ser humanu y la naturaleza.