Lliteratura

El Foru Abiertu de la llibrería Cervantes d’Uvieu expón estos díes una muestra formada por 48 obres d’artes d’una doce de grabadores y poetes nacíos n’Asturies ente los años sesenta y setenta. Coordinada por Fermín Santos, la muestra de carpetes axunta la obra gráfica de los grabadores María Cervero, Beatriz Corredoira, Jose Alvarez Cabrero, Isabel Cuadrado, Jorge Lorenzo, y el propiu Fermín Santos; y la petica de Jesús Santos, Silvia Ugidos, Martín López Vega, Pelayo Fueyo, Nazare Cuadrado y Javier Almuzara.

La esposición va tar abierta al públicu hasta’l prósimu día 31 de mayu.

Unes tropes franquistes perdedores de la guerra civil van ser les protagonistes de la tertulia lliteraria de ciencia ficción qu’abrirá les puertes esti añu a la Selmana Negra de Xixón. Javier Negrete, Juan Miguel Aguilera, Rafael Marín, Eduardo Vaquerizo, Pedro Pablo May, David Soriano, Jose del Valle, Ramón Muñoz, Santiago Eximeno y el frances Jerome Leroy van ser los encargaos d’estrenar una selmana dedicada a remembrar la Guerra Civil española fuxendo del ‘revisionismu mandanga, conservador y aristocratizante’ que, na opinión de los sos organizadores, centró’l recuerdu d’esta efemeride en tol estáu español.

La tradicional esposición de cómic recoyerá obres de Víctor Mora, Annie Goetzinger, Antonio Parras, Alfonso Font, Vittorio Giardino, Jorge García, Marchante, Gallardo, Roger, Ameziane, Carlos Ezquerra, Felipe Hernández Cava, Beroy, Pepe Gálvez, Laura, Federico del Barrio, Warren Ellis y Hernández Palacio. Mentes que les meses redondes sobre narrativa contemporánea van acoyer a Juan Eslava Galán (Una historia de la guerra civil que no va a gustar a nadie), Fernando Marías (Cielo Abajo), Benjamín Prado (Mala gente que camina), Ramón Pernas (Del viento y la memoria), Ramón Chao (Las travesías de Luis Gontán), Jorge Martínez Reverte (La batalla del Ebro, La batalla de Madrid), Francisco Galván (Cuando el cielo se caiga) y Eduardo Pons Prades (Los republicanos españoles en la segunda guerra mundial).

Ente los invitaos especiales d’esta edición de la Selmana Negra de Xixón va tar Tariq Alí, novelista pakistaní británicu qu’aporta una visión diferente de la historia dende una perspectiva árabe y antifundamentalista; Joe Haldeman, ún de los clásicos de la ciencia ficción del sieglu XX; Barry Eisler, autor de la serie ‘Sicario’; Jacques Tardi, creador del cómic frances más importante de los años 80; y el novelista italianu Carlo Lucarelli, ente otros.

Documentales, fotoperiodismu y velades poetiques completen el programa d’una Selmana Negra que quier ver la Guerra Civil española d’una manera diferente.

El poeta xixones David González y la onubense Eva Vaz presenten esti sábadu día 27 de mayu, a les nueve y media la nueche, nel bar La Sal de Xixón los sos últimos poemarios, que lleven por títulu ‘Reza lo que sepas’ y ‘Metástasis’. Na presentación participarán los tamien escritores Jose Luis Piquero y Diego Medrano, amás del cantautor asturianu Toli Morilla.

Eva Vaz (Huelva, 1972) ye llicenciada en Filosofía pola Universidá de Sevilla. Directora de la empresa de xestión cultural Ex Libris, ye autora de poemarios como ‘Ahora que los monos se comen las palomas’, ‘Leña’, ‘La otra mujer’ y ‘La ternura de los lobos’. Pela so parte, el poeta David González (Xixón, 1964) tien publicaos llibros como ‘Sparrings’, ‘Sembrando hogueras’, ‘La carretera roja’ y ‘El demonio de coma las orejas’.

L’escritor xixones Xose Nel Caldevilla (1963) va presentar güei a les ocho la tarde na llibrería Ítaca de Xixón la so traducción de la pieza teatral ‘El soldáu babayu’ de Plautu, autor llatín del sieglu III e.C., dientro de la colección ‘El Globu’, númberu 3, de la editorial VTP. L’entamu de la obra, un trabayu onde se recueyen datos mesmo del autor y de la obra, que del teatru romanu de la epoca, correspuende tamien a Caldevilla. La presentación d’esta tarde cuerre a cargu de Mael Caldevilla, hermanu del autor.

Xose Nel Caldevilla trabaya como profesor de Llatín y de Griego nun institutu xixones. Como narrador, en 1994 ganó’l Premiu Xosefa Xovellanos cola novela ‘La Llosa’, una historia ambientada nuna comunidá rural del oriente asturianu que’l narrador va esgranando al filu de l’alcordanza: la propia y la de la xente que tien más cerca.

L’Academia de la Llingua entregó na mañana d’esti xueves, 18 de Mayu, los sos premios 2006 d’investigación ya creatividá lliteraria nun actu que tuvo llugar na so sé na Cai San Francisco d’uviéu. Inaciu hevia, Conceición Vega, Jorge Alberto García, Miguel Solís, Alberto Menéndez, Pablo Rodríguez Medina, Xosé Nel Riesgo, Rafael Rodríguez, ente otros.

Nel concursu d’investigación de recoyida de material toponímicu premióse con 600 euros el trabayu “Toponimia de la parroquia de Gobiendes (Colunga)” del que ye autor Inaciu Hevia Llavona y diéronse accesits de 300 euros al trabayu “Toponimia de les parroquies de Cuadonga y La Riera con la Montaña de Cuadonga, del que ye autora conceición Vega Obeso, y de 150 a los trabayos “Toponimia d’El Valle (Candamu), del que son autores el grupu de trabayu Estaferia, y al tituláu “Estudiu de la toponimia del Altu Ayer. Parroquies de Conforcos y L.lamas”, del que ye autor Jorge Alberto García Fernández.

Nel concursu de Llectures pa Rapazos dióse el premiu ex-aequo a les obres “La guaxa”, de la que ye autor Miguel Solís Santos, y “Benxamín el perrucuspín”, de la que ye autor Alberto Menéndez García. El xuráu aconseyó amás la publicación de la obra “Ello ye too la xente, que nun mos compriende” de Pablo Rodríguez Medina.

Mientres que’l premiu de teatru y el de recoyida de material lliterario oral quedaben ermos, el xuráu premió con 600 euros la narración titlada “Escrito na ceniza” de Xosé Nel Riesgo col Llorienzu Novo Mier y dió un accésit de 300 euros al trabayu “Rimas en astur-leonés de Casimiro Cienfuegos” del que ye autor Rafael Rodríguez Valdés.

No que cinca al Concursu de Curtios Cinematográficos premióse con 1200 euros el trabayu tituláu “Suena’l camín”, del que son autores Efrén Álvarez, Laura Pola, Carmen Bernardo, Fernando Farpón y Jorge Fernández.

L’escritor llangreanu Alberto Vega, fundador de revistes como “Luna de Abajo” o “Cauce”, que vieno a bautizar al colectivu cultural del mesmu nome, morrió ayeri en La Felguera a los 49 años d’edá, tres d’una complicada enfermedá dexenerativa. Conocíu y estimáu dientro del mundu de les lletres, Vega ye autor de poemarios como “Memoria de la noche”, “Cuaderno de la ciudad” o l’ultimu d’ellos, editáu por Visor con prólogu d’Ángel González, “Estudio melódico del grito”.

Pesie a la enfermedá que lu tenía impedíu, Alberto Vega siguió trabayando hasta l’últimu día como articulista d’opinión na so famosa columna “La cuarta pared” nel periódicu La Nueva España, dende la qu’escribía baxo reflexones d’alta carga poetica sobre la vida cotidiana. Consideráu por esti estilu como poeta de la experiencia, foi un importante animador cultural na Asturies de los años 70, editando obres d’Ángel González, y organizando tou tipu de recitales y actos culturales. Llabor que continuó hasta los últimos díes.

El mundu de la cultura del Valle del Nalón llamenta güei la perda d’esti autor, que va ser despidíu a les cinco la tarde na ilesia parroquial de La Felguera.

L’Aula les Metáfores “Fernando Beltrán” de Grau, dientro del so ciclu de “Poetes nel Aula”, va ufiertar un recital a cargu de Ricardo Labra (Llangreu, 1958) esti xueves día 18 de mayu a les ocho la tarde na Sala Polivalente de la Casa la Cultura. Ricardo Labra foi miembro fundador de diferentes publicaciones lliteraries (como ‘Cauce’ y ‘Luna de Abajo’) y coordinador del Aula de Poesía de la Biblioteca d’Asturies “Ramón Perez de Ayala”.

Tien publicaos los siguientes llibros de poesía: ‘La danza rota’ (1984), ‘Último territorio’ (1986), ‘Código secreto’ (1988), ‘Aguatos’ (1990), ‘Tus piernas’ (2002) y ‘Los ojos iluminados’ (2003).

Amás ye responsable d’antoloxíes como ‘Muestra corregida y aumentada de la poesía en Asturias’ (1989), ‘Las horas contadas’ (1993) o ‘La calle de los doradores’ (1997). Coordinó’l llibru ‘Ángel González en la Generación del 50. Diálogo con los poetas de la experiencia’ (1998), asina como collaboró n’estremaes revistes lliteraries y periódicos.

Los herederos de Pin de Pría ufiertaron ayeri al Real Istitutu d’Estudios Asturianos (RIDEA) un documentu manuscritu del autor, tituláu ‘La media cama’, una pieza teatral escrita n’asturianu qu’hasta agora taba inedita. El RIDEA yá espublizare les obres completes del autor llaniscu.

Énte la polemica abierta col RIDEA tocante a la llingua asturiana, la familia de Pin de Pría nun quixeron manifestase adelantando acontecimientos, pero sí dixeron que si la istitución ‘lu rechaza buscaremos otra editorial’. La bisnieta del poeta, indicó que so bisgüelu escribía mesmo en castellán que n’asturianu, pero que fue nesta llingua ‘onde meyor se proyectó como escritor’.

Antonio Gamoneda (Uvieu, 1931) algamó ayeri un reconocimientu a tola so trayectoria poetica al facese cola XV edición del premiu Reina Sofía de Poesía Iberoamericana, a la qu’optaben más de 71 candidatures. El xuráu, del que formaben parte’l premiu Nobel de Lliteratura Jose Saramago y l’arxentín Juan Gelman, estimó ‘la poderosa obra y fonda buelga etica’ del escritor asturianu.

Consideráu el Cervantes de la poesía, esti premiu tien reconocío a otros autores como Gonzalo Rojas, Jose Hierro, Álvaro Mutis, Claudio Rodríguez, Pere Gimferrer, Nicanor Parra, Jose Manuel Caballero Bonald o la única muyer na llista, la portuguesa Sophia di Mello.

L’Ateneu de Turón acueye esta tarde, a les siete y media, un Recital Internacional de Poesía nel que van participar la chilena Carmen Yáñez, l’escritor salmantín afincáu n’Italia Eloy Santos y Ondjaki, una de les mayores promeses de la lliteratura portuguesa. L’actu, organizáu pola Conceyalía de Cultura del Ayuntamientu de Mieres en collaboración cola Rede Municipal de Biblioteques, enmárcase dientro del IX Salón del Llibru Iberoamericanu de Xixón.

Carmen Yáñez (Santiago de Chile, 1952) ye autora de los poemarios ‘Al Aire’, ‘Habitata dalla memoria’ y ‘Alas al viento’. Eloy Jose Santos (Salamanca, 1963) vive en Roma y ye traductor de los poemarios ‘Lingue di terra, lingue di mare (antología de poetas del Mediterráneo)’ y ‘Nettunaria’. Nel añu 2003 ganaba’l premiu Alonso de Ercilla col poemariu ‘Donde nadie dice’. Pela so parte, Ondjaki (Luanda, 1977) ta calificáu como autor revelación de les lletres portugueses. Ye autor de poemarios como ‘Actu Sanguíneu’ y ‘Há predinsajens com o Xâo’, y de les noveles ‘Bom día camaradas’ y ‘O Assobiador’.

Mañana vienres, a les seis de la tarde, l’Ateneu va recibir a los escritores Jose Manuel Fajardo y Victor Andresco (director del Institutu Cervantes de Moscú) que van presentar la obra ‘El país de las palabras’ del fotógrafu arxentín Daniel Mordzinski. Tres d’esti actu, Marco Lagunas, bibliotecariu de la Biblioteca Real de Suecia, va dar una charra sobre’l llabor nestes grandes biblioteques que son un referente a nivel mundial.