Lliteratura

Ediciones Trabe, igual que fixera l’añu pasáu col de Narraciones Trabe, recupera agora’l premiu que convocara ente 1994 y 1996 de lliteratura xuvenil col nome «MONTESÍN», n’homenaxe al cabritín qu’inmortalizó n’asturianu María Josefa Canellada nel llibru del mesmu nome, y que s’usa cola autorización que diera l’autora. Convócase pa llibros escritos n’asturianu ensin qu’importe’l xéneru (narrativa, poesía, teatru…) con una dotación económica de 2.500 euros y la publicación de la obra ganadora.

Trabe cuenta dir alternando añu a añu esti premiu col de Narrativa Trabe, al que-y correspondería la convocatoria del 2007. Nes convocatories anteriores los premiaos fueron: Enrique Carballeira, con Un carbayu cocoteru, Xosé Lluís Rodríguez Alberdi, con El fervíu máxicu de medrar, y Carme Martínez Pérez, con Cuentos pa una nueche ensin lluz. Montesín, amás, da nome a les más emblemátiques colecciones de llibros infantiles que publica Trabe, que tán dividíes en tres grupos: «Montesín», pa los que yá saben lleer (29 titulos publicaos), «Montesín redrueyu», a partir de primeros llectores (33 titulos), «Montesín mayor», pa los que lleen bien (4 titulos). Les bases del premiu

Primera: puen participar toles persones interesaes, soles o en grupu, ensin límite d’edá, con obres de lliteratura xuvenil en llingua asturiana, yá seyan noveles, recopilaciones de cuentos, poemes o obres de teatru.

Segunda: los trabayos presentaos, a excepción de la poesía, nun tendrán menos de trenta páxines DIN A-4 o foliu mecanografiaes a doble espaciu per una sola llana (1.800 caracteres). Han ser inéditos y han tar ensin premiu n’otros concursos como conxuntu, quier dicise, puen presentase obres de les qu’apaecieren fragmentos publicaos.

Tercera: el premiu tien una dotación de 2.500 euros en conceptu de drechos d’autor, la so publicación dientro de dalguna de les colecciones de la casa editorial. El xuráu pue partilu, conceder accésit, recomendar la publicación d’otres obres o dexalu desiertu según aconseye la calidá de los trabayos presentaos.

Cuarta: les obres han mandase, per corréu o en mano, en cuatro copies a Ediciones Trabe, S. L., c/ Padre Buenaventura de Paredes, 4, 33001 d’Uviéu, enantes de les 24 hores del día 30 de payares de 2006, faciendo constar la siguiente lleenda: PREMIU MONTESÍN DE LLITERATURA XUVENIL 2006. Puen presentase de dos xeitos: firmando col nome, dirección y teléfonu o baxo plica, quier dicise, figurando dientro d’un sobre zarráu los datos del autor y fuera’l títulu de la obra presentada y l’alcuñu col que se presenta, d’habelu.

Quinta: el xuráu tará formáu por persones relacionaes col ámbitu de la lliteratura asturiana. Como secretariu o secretaria, con voz pero ensin votu, actuará un representante d’Ediciones Trabe.

Sexta: al fallu del xuráu nun se pue retrucar. Fairáse públicu enantes del día 31 de xineru de 2007. El xuráu queda autorizáu a abrir la plica de les obres premiaes y de les que recomiende pa publicar. Pal casu de les obres que nun reciban premiu económicu, Ediciones Trabe tien que se poner d’alcuerdu col autor o autores enantes d’entamar la so edición.

Sétima: los trabayos que nun se premien volveránse a los autores, en pidiéndolos éstos, nos tres meses siguientes a que se dea conocencia del fallu. Desque pase esti plazu ensin que naide los reclame pasarán a formar parte del archivu editorial.

Octava: presentase al premiu supón tar d’alcuerdu coles bases. Les cuestiones que se plantexen y que nun tuvieren establecíes nestes bases podrá resolveles el xuráu.

El premiu Montesín, que la editorial Trabe convocara ente 1994 y 1996, n’homenaxe al cabritín qu’inmortalizó n’asturianu María Josefa Canellada nel llibru del mesmu nome, y que s’usa cola autorización que diera l’autora; ta abiertu a tolos llibros escritos n’asturianu ensin qu’importe’l xéneru (narrativa, poesía, teatru…). Ta dotáu con 2.500€, amás de la publicación de la obra ganadora.
La editorial Trabe cuenta con dir alternando esti premiu col de Narrativa Trabe, al que-y correspondería la convocatoria del 2007.
Nes ediciones pasaes los ganadores del premiu Montesín fueron:

• Enrique Carballeira, Un carbayu cocoteru
• Xosé Lluís Rodríguez Alberdi, El fervíu máxicu de medrar
• Carme Martínez Pérez, Cuentos pa una nueche ensin lluz

Montesín amás d’a esti premiu da’l so nome a tres colecciones de llibros de la editorial Trabe onde se puen consultar les bases

Seis meses depués d’apaecer nes llibreríes la prosa de Naciu Varillas reedítase y vuelve a les cais. La bona acoyida d’esti llibru ye una perbona amuesa de la calidá y madurez del mercáu lliterariu asturianu.

L’indianu Anxel Santianes de Rozada nunca pensara que diba perder la segunda de les apuestes qu’echara col so collaciu Carlos al salir de casa pa facer les amériques. Tampoco que diba acabar morriendo en medio l’océanu ensin tornar a Les Ablanales, el pueblu que lu viera ñacer, pa disfrutar de la casería que lu taba esperando y que se mercara coles perres que fuera mandando. Y muncho menos que la so muerte diba trayer una maldición pa tolos sos descendientes, hasta los díes d’anguaño.
Con una prosa áxil, cenciella y fresca, Naciu Varillas compón una novela ambiciosa na que’l desaniciu del mundu rural ye l’asuntu central. Al rodiu d’Ana, una moza que torna dende Madrid a Les Ablanales naguando por afayar dalgo que-y dea sentíu a la so vida, vamos dir conociendo una bayura personaxes bien perfilaos y el so enfrentamientu colos planes urbanísticos que quieren destruyir el pueblu y la so forma de vida, hasta acabar nuna espiral d’amor, llocura, incestu y ambiciones qu’algama un final inesperáu.
Una novela moderna, que trata un tema de rabiosa actualidá (l’urbanismu qu’invade lo rural cola disculpa de meyorar la calidá de vida de la xente de los pueblos, obligándolos a marchar), pero prácticamente escaecíu hasta agora na nuestra narrativa, entevenada con un puñáu de cuentos que nun son un añadíu más pol caprichu del autor, sinón que van dir apurriéndonomos delles claves pa entender la hestoria principal.
“Carretera ensin barru” ta espublizada pola editorial Trabe. Naciu Varillas (Xixón, 1975), periodista profesional, ganador de diferentes premios de relatos, tien dellos de los sos cuentos espublizaos en variaes publicaciones, como la revista Reciella Malory.

Tres l’aparición del llibru ‘Literatura y minas en la España de los siglos XIX y XX’ del catedráticu de lliteratura Benigno Delmiro Coto, la llamada ‘lliteratura minera’ foi garrando puxu y interes dientro y fuera de les llendes asturianes. Por esta razón, la Selmana Negra de Xixón presta’l so espaciu pa un debate sobre esti xeneru tan cercanu a la realidá del país nel que van participar l’escritor Alejandro M. Gallo, autor de la novela ‘Una mina llamada infierno’, Francisco Prado Alberdi, presidente de la Fundación Juan Muñiz Zapico, Benigno Delmiro Coto y l’escritor bolivianu, afincáu en Suecia, Victor Montoya.

Esti sábadu, día 15 de xunetu a les cinco la tarde, l’Espaciu AQ (Carpa A Quemarropa) va acoyer una charra presentada por Alejandro M. Gallo, autor de la obra ‘Una mina llamada Infierno’, na que van participar Francisco Prado Alberdi, presidente de la Fundación Juan Muñiz Zapico, el catedráticu de lliteratura Benigno Delmiro Coto, autor de ‘Literatura y minas en la España de los siglos XIX y XX’ y l’escritor bolivianu Victor Montoya, autor de la maraviosa obra ‘Cuentos de la mina’.

Victor Montoya que visita Asturies per primer vez, ta consideráu en Suecia como ún de los meyores narradores sudamericanos asina como un renovador de la moderna lliteratura boliviana. Montoya reside en Suecia desque Amnistía Internacional lu reclamare como ‘presu de conciencia’, sacándolu del so cautiveriu na dictadura boliviana.

La editorial asturiana Llibros del Pexe ta acabante d’espublizar entrambos llibros de Miguel Postigo (Aviles, 1976) y Alfonso López Alfonso (Moncóu, Cangas del Narcea, 1977) que lleven por títulu ‘Precipitados’ y ‘El aliento en la nuca’. Con ‘Precipitados’ Miguel Postigo fai un xuegu lliterariu qu’entemez la poesía, con ensayu y la narrativa, mentes qu’Alfonso López presenta cola so primer novela, ‘El aliento en la nuca’, un analís de la intrahistoria colectiva.

‘Precipitados’ ye un volume de Miguel Postigo qu’axunta narración, ensayu y poesía, volviendo del reves los xeneros lliterarios y faciendolos sonar como nuevos, baxo un ampliu dominiu de la tradición. Mentes que ‘El aliento en la nuca’ ye la primer novela d’Alfonso López Alfonso, que xira alrodiu d’un diariu de los años cuarenta atopáu al azar nun rastrillu pa entemecer la so historia personal cola intrahistoria colectiva.

Miguel Postigo (Aviles, 1976) ye profesor de Llingua y Lliteratura nun institutu madrilanu. Autor del llibru No más belleza (AMG Editor, Logroño, 2004), foi escoyíu por Jesús Munárriz n’ «Un siglo de sonetos en español» y por Juan Abad n’«El origen del mundo», antoloxíes espublizaes por Hiperión.

Alfonso López Alfonso (Moncóu, Cangas del Narcea, 1977) ye llicenciáu n’Historia pola Universidá d’Uvieu y collabora na revista Clarín. Participó nel volume colectivu Nuevas maneras de contar un cuento (Llibros del Pexe, Xixón, 2005).

Na madrugada del martes día 11 de xunetu, la Selmana Negra de Xixón va acoyer nuna de les sos tradicionales velades poetiques la presentación de l’antoloxía de poetes asturianos ellaborada pol profesor húngaru András Keri. Los poemes de Berta Piñán, Pablo Antón Marín Estrada, Ines Toledo, Jose Luis Piquero, David González, Vanessa Gutierrez, Nacho Vegas, Roxana Popelka, Jordi Doce y Aurelio González Ovies van ser recitaos nun actu nel que se va cuntar cola intervención del prologuista de la obra, el críticu lliterariu Enrique Vilagrasa.

L’antoloxía preparada pol profesor húngaru András Keri recueye, nes sos cuasi doscientes páxines, la traducción de los poemes al húngaru, pa darreu aparecer los orixinales n’asturianu y castellanu. Editada pol Ateneu Obreru de Xixón na colección Zigurat, ‘Poesía Astur de hoy – Mai Asztúr Költeszet’ ta prologada pol críticu lliterariu Enrique Vilagrasa.

L’ayuntamientu de Samartín del Rei Aurelio fai una donación a la biblioteca del Hospital de Riañu pa que s’inaugure a mou la sección de lliteratura en llingua asturiana. La entrega tendrá llugar esti llunes 7 de xunetu.

L’Ayuntamientu, al tresviés de la so Oficina de Normalización Llingüística y en collaboración cola Oficina de Política Llingüística, respuende asina al pidíu que se facía de parte de la institución que tenía como fin la creación d’una biblioteca pa usu y disfrute de los enfermos.

Comprometíu cola cultura y cola llingua asturiana, esti ayuntamientu ricu n’escritores, quier siguir asina semando pa dempués poder recoyer los frutos mauros. Una de les maneres de facelo ye la de dotar d’un corpus amañosu la sección de lliteratura en llingua asturiana pa que garre consistencia y los llectores puedan alcontrar la diversidá y calidá que se dan anguaño na lliteratura en llingua asturiana. D’esta manera, l’Ayuntamientu de Samartín del Rei Aurelio quier dar un mensaxe d’optimismu y allegría poner a mano de los enfermos la posibilidá de recuperase y espoxigar de la mesma manera que lo fai la lliteratura en llingua asturiana que ta pasando pel meyor momentu de la so hestoria dempués d’atravesar per momentos perdifíciles.

La donación compónse de más d’una veintena de volúmenes nos que se recueyen tolos xéneros: la poesía más nueva de la mano de Marta Mori y Xosé Ánxelu Gutiérrez, el sabor costumista de Mánfer de la Llera o les propuestes de Pablo Texón Castañón; el panorama teatral nel últimu númberu de La Ratonera; estudios como dlos de Xulio Viejo, ensayu de la mano de Xosé Nel Navarro y obres de lliteratura infantil y xuvenil, al empar que les noveles y traducciones de clásicos a la llingua asturiana, amás de dos DVDs con pieces teatrales en llingua asturiana y un llibru CD con histories y cuentos tradicionales.

Como yá andelantáremos n’Asturnews, el primer premiu, dotáu con 800 euros, del IX Concursu de Cuentos pola Oficialidá qu’organiza’l conceyu de Bimenes foi pa un relatu del periodista y escritor Quique Faes (Xixón, 1975) que llevaba por títulu ‘¿Por que tuvisti que tirar el pianu cuando yo pasaba perbaxo?’. Pablo Rodríguez Medina y Pablo X. Suárez llevaron el segundu y tercer premiu d’esti certame.

El pasáu 30 de xunu tuvo llugar na Casa la Cultura de Bimenes la entrega de premios del IX Concursu de Cuentos pola Oficialidiá del Asturianu, al qu’asistieron l’alcalde de Bimenes, Jose Emilio González Aller, el teniente d’alcalde de Miranda del
Douro, Antonio Carçao, y el xefe de la Oficina de Política Llingüística, Ramón d’Andres Díaz.

El primer premiu, dotáu con 800 euros, foi pa Quique Faes Díaz, pola obra “¿Por que tuvisti que tirar el pianu cuandu yo pasaba perbaxo?”, basáu na rocambolesca historia d’un home que se ve estrapáu y reteníu nel interior d’un pianu de cola. Mentes que Pablo Rodríguez Medina algamó’l segundu premiu, de 500 euros, col cuentu “Segundes oportunidaes”, y el tercer premiu, dotáu con 350, foi pal relatu “Tocaba nun grupu de rock alternativu”, de Pablo X. Suárez Fernández.

El xuráu del concursu, al que se presentaren 22 cuentos, tuvo formáu nesta ocasión por Xulio Vixil Castañón, Xose Ramón Martín Ardines y Naciu Varillas Alonso.

El prósimu xueves, día 6 de xunetu, a les 19.30 hores, na Llibrería Asturiana de Trabe n’Uvieu (c/Padre Buenaventura de Paredes, 4) la escritora y profesora de la Universidá New York City, Paquita Suárez Coalla, va presentar l’antoloxía ‘Aquí me tocó escribir (antología de escritores y escritoras latinos en Nueva York). Nel actu va cuntase cola presencia, amás de la propia autora, de dos de los antologaos: Hilario Barrero y Margarita Drago.

‘Aquí me tocó escribir (antología de escritores y escritoras latinos en Nueva York)’ de Paquita Suárez Coalla, axunta catorce escritores que, anque son estremaos nes temátiques y estilos de les sos obres, comparten una posición fronteriza que según l’autora ‘dio-yos la llibertá d’escribir lo que seguramente nunca escribiríen nos sos países d’orixe’.

L’escritor d’orixen chilenu asitiáu en Xixón y promotor del Salón del Llibru Iberoamericanu, Luis Sepúlveda, ta acabante de ser nomáu caballeru de la Orden de les Artes y les Lletres de Francia, como reconocimientu al so llabor como embaxador del mundu de la lliteratura. La distinción va ser entregada nun actu que se va celebrar na Embaxada francesa en Madrid el prósimu 13 de xunetu.

Otros escritores que tienen esta distinción del Gobiernu galu son Arturo Perez Reverte, Manuel Vázquez Montalbán, Juan Carlos Onetti, Alfredo Bryce Echenique, o los chilenos Jorge Edwards y Armando Uribe, amás d’artistes como Javier Bardem, Victoria Abril, Carmen Maura, Marisa Paredes, Carlos Saura, o’l periodista Juan Luis Cebrián, y la ex-ministra Carmen Alborch, ente otros.