Lliteratura

Les traducciones, tan demandaes davezu polos llectores, son l’apueste principal de Trabe pa esta temporada, cola torna de ‘Dellos poemes’ de George Trakl pol escritor Xabiero Cayarga, y ‘Un heroe del nuesu tiempu’ de Mijail Lermontov, traducíu por Cesáreo García Fernández. Ente otres de les novedaes, destaca ‘Unde letras falan, una antoloxía da poesía en galego-asturiano’ de Xose Miguel Suárez Fernández, la colección d’artículos ‘Ríu Deva’ de Xuan Xose Sánchez Vicente y la estrena de cuentos de David Rivas con ‘Xente de perende’. Pero, sobremanera, destaca la espublización d’una completa y necesaria historia de la lliteratura asturiana, esplicada dende estremaes perspectives por un autor de referencia, Antón García, que baxo’l títulu ‘Xeneraciones & Dexeneraciones’.

La traducción de ‘Dellos poemes’ de Georg Trakl, fecha directamente dende l’orixinal alemán, cuerre a cargu de Xabiero Cayarga (Cangues d’Onís, 1967). Narrador y poeta, tien publicaos dellos poemarios (El deliriu d’esclavu, Pequeña Europa y Les llingües de la Hidra), tres volúmenes de cuentos (Les gatileres del cielu, Güelgues sobre’ l llagu y A flor de piel) y dos noveles (El boleru de Xabel y Trastes de bufarda).

Recuperando les traducciones, Cesáreo García torna ‘Un heroe del nuesu tiempu’ de Mijail Lermontov. Mijaíl Lermontov (1814-1841) nació en Moscú de familia noble, descendiente d’escoceses establecíos en Rusia dende’l sieglu XVII. Narrador y poeta románticu ye consideráu ún de los padres de la lliteratura rusa.

Per otra parte, l’historiador y filólogu Xose Miguel Suárez Fernández presenta l’antoloxía ‘Unde letras falan. Antoloxía da poesía en galego-asturiano (1891-2006)’, cola fin d’allegar la poesía en gallego-asturianu a los llectores, dando a conocer una tradición poetica, la biografía de los sos autores pa situalos nel tiempu y nes circunstancies nes qu’escribieron en diferentes xeneraciones de poetes.

Otru de los autores que Trabe presenta esta seronda ye Xuan Xose Sánchez Vicente (Xixón, 1949), nome fundamental del asturianismu, tanto cultural como políticu, que recueye en ‘Riu Deva’ dellos artículos sobre sociollingüística y política asturianista.

David M. Rivas presentase a la consideración de los llectores asturianos con un sorprendente llibru de cuentos, verdaderu despliegue de semeyes d’arquetipos d’homes y muyeres entrañables que siguen siendo y comportándose como asturianos ondequiera que s’alcuentren, que lleva por títulu ‘Xente de perende’.

Pero si hai un llibru que destaca sobremanera ye En ‘Xeneraciones & Dexeneraciones’, nel qu’Antón García fai un relatu vital y bibliográficu de los principales autores asturianos, analizando tendencies creatives, proponiendo periodos que permitan estructurar los cinco sieglos de la so historia, averándose a la llingua lliteraria na que s’espresen o revisando dalgunos de los factores qu’influyen na difusión de la obra, como l’atención que-y empresta la prensa o la situación del mercáu editorial.

‘Al Aldu’, poesía pal segundu ciclu d’ESO esbillada por María Asunción Hevia González y Pablo Rodríguez Medina; ‘Curriverás’, poesía pal primer ciclu de Primaria esbillada por Pablo Rodríguez Medina y Severino Antuña y ‘Eurico’l presbiteru’ d’Alexandre Herculano traducíu por Armando Miranda Iglesias, son otres de les novedaes que Trabe va sacar esta temporada a cai nun xustu repartu de temes y llibros ente toles variedaes de llectores.

La editorial Ámbitu ta a puntu de sacar la segunda tanda de la so colección de narrativa último con seis nuevos títulos nos que vuelve apostar pola lliteratura contemporánea n’asturianu. Xuan Bello, Vanessa Gutierrez, Miguel Rojo, Pablo Texón, Ramón Lluis Bande y Henrique Facurriella firmen seis obres que se van vender primero col periódicu selmanal Les Noticies y más tarde en toles llibreríes.

Xuan Bello, una de les referencies principales de la lliteratura asturiana d’anguaño y l’autor asturianu que más proyección algamó nel ámbitu estatal, onde llogró un exitu notable de públicu y crítica con llibros como ‘Historia universal de Paniceiros’ (publicada n’asturianu por Ámbitu) o ‘Los cuarteles de la memoria’, vuelve pa los sos llectores cola obra ‘La cueva del olvidu’. Nun cruce de caminos nel que s’alcuentren la realidá histórica, la ficción y l’autobiografía, l’autor de Paniceiros somórguiase otra vuelta –guardando siempre una distancia pudorosa que funciona como amplificador d’una emoción poco exhibicionista– na memoria familiar, na memoria d’un país qu’hai tiempu cansó de selo… na memoria del mundu.

‘Les palabres que te mando’ ye la primer incursión na narrativa de Vanessa Gutierrez, que se fixo conocida polos poemarios ‘Onde seca l’agua’ y ‘La danza de la yedra’ que supunxeron una novedá nel panorama lliterariu, tanto pola obra qu’anunciaba como por ser la primer incorporación d’una escritora moza depues d’años ensin novedaes na nómina d’autores. La protagonista de ‘Les palabres que te mando’ ta llantada na vida como eses plantes que nun prosperen yá, que siempre paez que tán morriendo pero nun acaben, qu’esperen el fin de los tiempos en tiestos comíos pol mofu, esperando un principiu o un fin. Una hestoria dura a la fin, nacida na desconfianza, y que medra como yedra pela pare agrietada de la memoria buscado ver lo qu’había al otru lláu de la muria.

Pa la ciudadanía residente nel primer mundu, l’orixe de tou viaxe turísticu, más que descansar, ye la necesidá de cambiar por unos díes, de ser otra persona, de conocer dimensiones nueves interiores y exteriores. Por eso, cuanto más grande ye’l cambiu que se pretende, más exóticu ye’l destín turísticu elexíu. ‘Cuentos pa un turista blancu’ axunta una serie de relatos de Miguel Rojo, escritor de potente capacidá narrativa, qu’empezó con ‘Asina somos nós’ (Premiu Xosefa Xovellanos 1988) una carrera como narrador que lu llevó a convirtise nún de los escritores n’asturianu más activos dende l’entamu del Surdimientu. Dende entós tien publicao títulos que yá son referencies obligaes dientro de la narrativa asturiana, tal como ‘Tienes una tristura nos güeyos que me fai mal’ (1989) o ‘Hestories d’un seductor (Memories d’un babayu)’ (1993), obra que se convirtió nun exitu de ventes total.

Pablo Texón Castañón revelóse como una de les promeses con más futuru dientro de la lliteratura asturiana cola publicación del poemariu ‘Toles siendes’ (2005), merecedor del premiu Nene Losada Rico 2003. Narrador delicáu y cuidadosu, escueye cada palabra d’esta colección de cuentos col bon pulsu d’un reloxeru, y asina fai furrular con exactitú unes hestories protagonizaes por homes y muyeres que se ven, de repente, tarazaos pol desencantu; personaxes con una vida tranquila que descubren d’una manera irremediable la imposibilidá de ser amaos o de siguir amando. Completa esti volume un cuadernu de viaxe coles vivencies del propiu autor na ciudá de Buenos Aires, «capital» d’un continente llenu de contradicciones –casi tantes como les qu’hai dientro d’un mesmu–.

Ramón Lluís Bande, cola so inconfundible manera de contar hestories –valiente, directa y sensible–, constrúi en ‘La muerte de los árboles’ una ponte que xune dos xeneraciones bien distintes. Una ponte que, llevantada sobre los testimonios de los protagonistes del nuestru pasáu, val pa establecer una comunicación necesaria. Nel afán de conocimientu d’un neñu reflesivu al que-y gusten los páxaros y na necesidá d’enseñar d’un güelu mancáu pola Historia ta la clave d’esti homenaxe a los supervivientes y a los muertos de la guerra civil y de la represión de la dictadura n’Asturies. Bande probablemente sía l’escritor asturianu más polifaceticu. Nun ye namás que tenga cultivao tolos xeneros lliterarios, sinón que tien desarrollao una carrera como realizador de cine que lu coloca nos primeros llugares de la creación audiovisual más innovadora del Estáu. ‘La so primer novela, Verdá o consecuencia’ (1997), da entamu a un camín que llevó a Bande pel tarren del teatru ‘De la vida de les piedres’ (1999) o ‘Ágata/Aurelia’ (Ámbitu, 2003) o, l’ensayu ‘Xixón sound’ (1995).

Y finalmente, pa terminar la segunda tanda d’esta colección, Henrique Facuriella, qu’hasta agora publicare dellos poemes en revistes y antoloxíes, como ‘Escritores en Llanes’ (2004), amás de reportaxes y artículos periodísticos n’ El Comercio, La Nueva España o La Ratonera. Revista asturiana de teatru, estrenase na narrativa con una historia que, contanda al travies de pasaxes d’una fuerte pulsión erótica, narra la peligrosa aventura d’un hombre que s’enfrenta a sí mesmu pa, –nun mundu ensin heroes pero cola presencia siempre cercana de los dioses–, dexa atrás el mieu que marcó la so vida. Podía ser esta una hestoria d’iniciación con fustaxe míticu d’arume relixosu o una «nouvelle» mística dientro de la que llate un corazón existencialista.

Xose Nel Navarro, autor del ensayu que lleva por títulu ‘L’Horru: una arquiteutura del sieglu XXI’, va ufiertar una charrar sobre l’horru como graneru de riqueza, el próximu xueves 5 d’ochobre, a les ocho la tarde, na Llibrería Ítaca de Xixón. Con esta conferencia la llibrería asitiada na cai Marques de Casa Valdes vuelve cola so programación de seronda, na que tamien va poder esfrutase de la esposición fotográfica de Paco Buda.

La llibería Ítaca, per otra parte, sigue cola ufierta comenzada nesti mes de setiembre, pola que los llibros de les secciones Frikis, Novela Negra, Ensayu y Lliteratura Xeneral van tener un descuentu del 50% hasta la fin de les existencies.

El ciclu Les Nueches de Palaciu que se celebren nel interior del patiu del Palaciu de Revillagigedo de Xixón van acoyer mañana a les diez y media la nueche la presentación del discu ‘La Voz del Ríu’ qu’axunta los poemes del escritor Xuan Bello cola gaite de Flavio Benito, amás d’otros instrumentos y instrumentistes. La entrada a esta presentación ye gratuita.

L’escritor Pepe Monteserín, conocíu autor d’obres como ‘Matómelo Dumas’ o ‘Mañana perdí los nervios’, presenta esta tarde a les siete y media, na Llibrería Cervantes d’Uvieu, la so última obra ‘Ignorolitos’, editada pola colección Biblioteca d’Autores Asturianos, patrocinada por Caxastur y la Conseyería de Cultura del Principáu d’Asturies.

El popular autor pravianu bautiza esta vez un llibru de singular composición: les anotadures diaries d’un padre almiráu pola infancia del so fíu pequeñu, Andres. Breves miniatures a metá de camín ente la composición poetica y la greguería ramoniana, ‘Ignorolitos’ fai’l volume novenu de la colección Biblioteca d’Autores Asturianos.

Nel actu de presentación, xunto al propiu autor, va tar presente Saúl Fernández, codirector de la colección y Andres Monteserín, personaxe protagonista d’ ‘Ignorolitos’.

L’escritor asturianu Martín López-Vega ta acabante d’espublizar la novela que lleva por títulu ‘El letargo’. La obra, que va ser presentada nel Foru Abiertu de la llibrería Cervantes el próximu día 25 a les siete y media la tarde, cuenta’l viaxe per tierres portugueses d’una moza cansada de la rutina que, acompañada por so padre, va descubrir les milenta formes de la memoria y el deseu.

López-Vega nació en Po el 1 de xineru de 1975. Traductor, poeta, novelista y críticu lliterariu, algamó’l prestixosu Premiu Teodoro Cuesta de poesía nel añu 1996. Trabayó como coordinador de la revista “Reloj de arena” y tien espublizaos abondos llibros de poesía como “Objetos robados” (1994), “Travesías” (1996), “Esiliu” (1998), “La emboscada” (1999), “La visita” (2000), “Equipaje de mano” (2000).

Asinamesmo, tamien tien escrito colecciones d’artículos como ye’l casu del famosu llibru “Cartas portuguesas” (1997), “El sentimientu d’un occidental” (2000). En 1995 sacaba l’ensayu”Tertulia Oliver. Una aproximación bibliográfica” (1995).

El Foru Abiertu de la llibrería Cervantes d’Uvieu acueye esta tarde, a partir de les siete y media, la presentación del llibru ‘El hijo del tejedor’ de la escritora Olga Xiniracs. La historia, ambientada n’Asturies, cuenta la vida d’un texedor de tapices y una concertista d’harpa a los qu’un encuentru macabru emburria a un torrente de situaciones estremes. L’instintu maternal y el descubrimientu d’una sexualidá escondida van formar parte de los secretos de los protagonistes, secretos que los conecten cola mitoloxía astur rellacionada colos sos árboles y los habitantes reales ya irreales de la biesca.

Olga Xiniracs ye una novelista y poeta catalana nacida en Tarragona. De sólida formación artística, ye profesora de pianu, escribió poesía, noveles, cuentos y ensayos. La mar ta presente na mayoría de les sos obres, y munches d’elles foron valedores de premios lliterarios , Interior amb difunts (Josep Pla, 1982), Al meu cap una llosa (Sant Jordi, 1984), Zona marítima (Ramon Llull, 1986) y Llavis que dansen (Carles Riba, 1987).

Son destacables tamien les noveles, Enterraments lleugers (1990), Sense malícia (1994), La tarda a Venècia (1999), Un cadàver per sopar (2000), L’home que mossegava les dones (2000), Pavana per un tauró (2001) y Setmana de difunts (2003); los llibros de poesía, Botons de tiges grises (1977), Clau de blau (1978), Llençol de noces (1979), Llavis que dansen (1987), La pluja sobre els palaus (1990) y La muralla (1993); mesmo que la novela infantil Marina (1987). En 1990 tuvo la Cruz de Sant Jordi, otorgada pola Generalitat de Catalunya y ye xunto a Merçe Rodoreda, la única muyer que llogró’l “Gai Saber dels Jocs de Barcelona”. Tien publicaos más de cuarenta llibros y más de doscientos cuentos p’adultos.

Los alcuentros lliterarios de Verines, dirixíos pol profesor de la Universidá de Salamanca, Luis García Jambrina, van celebrar una nueva edición entegüei y mañana baxo’l lema ‘America desde las dos orillas: sueño, mito, utopía, literatura’. La casona de Quintueles axunta dende la tarde d’ayeri a ventidós escritores en diferentes llingües y nacionalidaes, con presencia per primer añu internacional. Ente los convidaos encuentrense Clara Obligado, Juan Carlos Mestre, Luis Sepúlveda, Jon Kortazar y Flavia Company, ente otros.

Nel quintu centenariu de la muerte de Colón, los organizadores del Alcuentru d’Escritores y Críticos de les Lletres Españoles vieron n’America’l tema más afayadizu pa debatir na casona d’indianos de Verines. Asina, per primer vez na hestoria de los alcuentros tán convidaos escritores d’orixe o vinculación hispanoamericana, como Flavia Company, Luis Sepúlveda, Horacio Vázquez Rial, Adolfo García Ortega, Alfredo Conde, Jorge Volpi o Jose María Merino. Nel encuentru tamien va participar l’asturiana Vanessa Gutierrez.

Tres d’esta esperiencia, los organizadores de los alcuentros piensen n’abrir el conceptu de la lliteratura, convidando, más alantre, a otros escritores europeos que puedan arriquecer los debates de Verines.

Güei, a partir de les siete y media la tarde, l’Aula Abierta de la Llibrería Asturiana de Trabe, na cai Padre Buenaventura de Paredes, 4 d’Uvieu, va acoyer la presentación de l’antoloxía titulada ‘Na boca de todos’. La obra, seleccionada pola escritora Aurora García Rivas y patrocinada pol Ayuntamientu de Vegadeo, trata de facer un retratu poeticu fiel al Occidente Asturianu d’anguaño.

‘Na boca de todos’ ye una completa ya interesenta antoloxía de la poesía que se ta escribiendo anguaño nel occidente asturianu, na que s’inclúin poetes que lo faen en gallego-asturiano xunto a otros que lo faen n’asturianu.

Nel primer grupu tán los poetes Crisanto Veiguela, Victoria Veiguela, Aurora García Rivas, Arturo Álvarez, Jose Ramón Martínez Castro, Xose Miguel Suárez, Fredo de Carbexe, Alfredo Álvarez de Ponticiella, Xaviel Vilareyo y Xavier Frías Conde, mentes que nel segundu figuren: Nene Losada, Taresa Lorences, Xuan Bello, L.luís Fernández, Sabela Fernández, Antón García, Mª Esther García, Miguel Rojo, Elías Veiga, Alfonso Velázquez, Roberto González Quevedo y Naciu ‘i Riguilón.

L’antoloxía cunta amás con una completa nota biográfica de cada autor asina como una rellación de los sos llibros de poesía.

La escritora Rosa Regás va participar esta tarde nel cursu ‘Las novelas de Gijón’ organizáu pola Universidá d’Uvieu na Cátedra Xovellanos de Xixón. La directora de la Biblioteca Nacional va dar a les cuatro y media la tarde una conferencia que lleva por títulu ‘La creación del gusto literario’. Dientro d’estes xornaes van participar otros escritores asturianos como Ricardo Menendez Salmón y Pablo Antón Marín Estrada.