Lliteratura

En declaraciones feches al periódicu Les Noticies, Consuelo Vega, Directora Xeneral de Cultura y Política Llingüística, dio anuncia de la tema de la próxima Selmana de les Lletres Asturianes, la festividá institucional de les nueses lletres, que vuelve cola alcordanza y l’estudiu de la obra de Mª Teresa González al so formatu habitual de centrase nun escritor namás. Con esta anuncia González pasa a tar ente los clásicos asturianos como Xosefa Xovellanos o Teodor Cuesta.

Nos últimos años y dempués de dedicase en 2004 al escritor xixonés Andrés Solar, la Selmana de les Lletres Asturianes tuvo dedicada a la poesía, el teatru y la narrativa contemporanea, lo que pa Vega “consiguía menos impactu pola dificultá de fomentar la obra de tou un movimientu”.

Mª Teresa González ñació en Tremañes, Xixón, nel añu de 1950. A los diecisiete años entra como aprendiz na empresa d’aplicaciones llétriques CRADY; nesta fábrica sigue trabayando hasta’l so cierre en 1987. Foi xunto al so home, tamién escritor, Vicente García Oliva una de les fundadores del nucleu xixonés de Conceyu Bable en 1975.

González escribe los sos primeros poemes alredor del añu 1984. Gana dellos concursos lliterarios y asoleya poesía en diverses publicaciones. En 1987 asoleya’l so primer llibru de poemes: Collaciu de la nueche. En 1989 espubliza la plaquette Ochobre. Algama’l Premiu de Poesía Erótica “Cálamo” 1990 col so llibru en castellano Con húmedos lamentos de felino. En 1993 apaez el so tercer poemariu n’asturianu: Heliocentru y en 1994’l so primer y únicu llibru de rellatos: La casa y otros cuentos. Fallez en Xixón en 1995, depués d’una llarga enfermedá.

Ta representada en delles antoloxíes tanto como poeta y como narradora: Antoloxía poética del Surdimientu (1989), El secretu de la lluvia (1992), La patria de la piel (1992), Antoloxía del cuentu asturianu contemporaniu, (1994), Muyeres que cuenten (1995) y Les muyeres y los díes de la poesía asturiana contemporánea (1995) y amás tovía queden testos inéditos, según anunciava la Directora Xeneral de Cultura.

El profesor titular de Filoloxía Francesa de la Universidá d’Uvieu, Francisco González Fernández ufre esta tarde, a partir de les 20:00 hores nel Club Prensa Asturiana, una conferencia con motivu del 150 aniversariu del xuiciu a Flaubert pola publicación de la novela “Madame Bobary”. “Emma Bovary y las gafas de Woody Allen” ye’l nome d’esta conferencia organizada cola collaboración de l’Alianza Francesa d’Uvieu.

Un añu dempues de la publicación en Francia de “Madame Bovary” en 1857, les autoridaes de la epoca xuzgaron a Flaubert, acusáu d’escribir una novela pornográfica anque resultó inocente de los cargos y “Madame Bovary” pudo siguir distribuyendose.

Tres de la presentación a cargu del presidente del foru Xovellanos, Jesús Menendez Peláez y con hora d’entamu programada a les 20:00 hores, l’escritor llaniscu Jose Ignacio Gracia Noriega va ufrir una conferencia alredor del so últimu trabayu “Don Pelayo, el rey de las montañas” espublizáu l’añu pasáu. L’actu va cellebrase nel centru de cultura Antiguo Instituto y ta organizáu por La Escalerona de San Lorenzo.

Jesús Menendez Peláez ye escritor, collaborador habitual en La Nueva España, cronista oficial de Llanes y miembru del Real Institutu d’Estudios asturianos. Tien espublizada una estensa obra lliteria con títulos como “Asturias en pocas palabras” (1980), “El viaje del obispo de Abisinia a los Santuarios de la Cristiandad” (1987), o “El muro de la eternidad” (1991). Recibió ente otros los premios de novela Tigre Juan, Casino de Mieres y Asturies.

El Centru de Cultura Antiguu Institutu de Xixón acueye esti día a partir de les 20:00 hores la presentación del nuevu llibru del escritor Miguel Ángel San Miguel. “”Desde el Silencio”, ye’l nome d’esta novela editada pola editorial KRK na que l’escritor cunta la historia de Ánges, socialista torturáu durante la guerra civil que’emigra dempues de salvar la vida cuando diben a fusilalu.

Miguel Ángel San Miguel Valduerteles nació en Soria y ye llicenciáu en Filosofía y Lletres, na especialidá de Xeografía e Historia y hasta’l momentu de la so xubilación fue profesor nel instituto Roces de Xixón. Ye sociu fundador del movimiento 0’7% n’Asturies, dio puxu al Movimientu Social pola Escuela Pública y anguaño participa nel Comite de Solidaridá cola Causa Árabe.

De la so xera lliteraria destaquen les sos publicaciones alredor de descubrimientos arqueológicos en “Tierras Altas de Soria”, la ellaboración de llibros de testu de Xeografía e Historia pa escolinos de Secundaria, obres de trabayu escolar como “Transportes y mercancías”, la obra “Una ruta asturiana del Camino de Santiago”. y a novela “Fuego, sendero y fiesta”.

Suburbia Ediciones va facer la presentación de Vía de serviciu n’Uviéu esti martes día 30 d’Ochobre a les 20:30 na Casa Posafuelles d’ Uviéu, cola participación de Pablo Texón y Xurde Fernández. ‘Vía de Serviciu’ ye una antoloxía que fai escoyeta de la narrativa asturiana última con catorce cuentos d’escritores n’asturianu ñacíos depués de 1975. El llibru ta yá a la venta dende’l pasáu mes de setiembre.

Na estela d’otres publicaciones como les revistes Formientu o Reciella Malory, la recién ñacida Suburbia Ediciones sacó en setiembre a la venta’l so primer llibru, una antoloxía que fai escoyeta de la narrativa asturiana última con catorce cuentos d’escritores n’asturianu ñacíos depués de 1975, ‘Vía de Serviciu’.

El llibru inclúi un prólogu del escritor José Luis Piquero nel que espresa que “los autores nuevos preséntense como individualidaes, desprovistos d’una «marca xeneracional» más alló del so billingüismu”. Ente los escritores presentes tán dalgunos yá conocíos pol públicu llector, como Pablo Rodíguez Medina, Quique Faes, Vanessa Gutiérrez, Nicolás V. Bardio y otros que malapenes tienen nada espublizao, como ye’l casu de Carlos Pitcairn o Ecequiel Cala.

Suburbia Ediciones estrena web

El IV Premiu Pepe Campo de monólogu va entregase esti sábadu a les ocho la tarde en Morea d’Ayer y Asturnews.com yá pudo conocer el fallu del xuráu. El monólogu ganador ye esti añu ‘Los homes y les gocheríes’, un testu de Benxa Pérez (Xixón, 1986), un xoven escritor miembru del conseyu de redaición de la revista Formientu y conocíu poles sos actuaciones como monologuista nos certámenes de monólogu modernu de l’Asociación H.a Xareos, de la que foi cofundador.

Pérez comentó p’Asturnews.com tar “mui contentu con esti premiu que demuestra l’afitamientu del monólogu modernu n’Asturies, un xéneru nel que trabayamos dende H.a Xareos pa sacar alantre y que paez que va garrando siguidores”. Y ye que Benxa Pérez participa dende va dellos años, xunto a Inaciu Galán y al traviés de l’asociación H.a Xareos, na renovación del monólogu asturianu y precisamente foi un monólogu echáu nel Tercer Certame de Monólogu Modernu n’Asturianu (pieslle de l’Arribada 2007). organizáu pola asociación H.a Xareos, el que ye agora premiáu.

El premiu lleváronlu l’añu pasáu Isaac de l’Arada ya Inaciu Galán pol monólogu ‘Asturianos al volante…’, lo que pon de manifiestu la intención d’esti premiu de reconocer los testos que faen por remocicar esti xéneru humorísticu. El monólogu de Benxa Pérez, va volver a ser interpretáu pol autor nel programa Al Aldu: La risión nes próximes selmanes.

Lliteratu.com, revista dixital de lliteratura, estrena güei una nueva edición decicada nesti casu al II Congresu Internacional de Lliteratura Asturiana, entamáu pola Academia de la Llingua Asturiana y que va empecipiar el próximu día 5 de payares n’Uviéu. Nesti númberu 14 de Lliteratu.com ufrimos el programa completu del Congresu, noticies rellacionaes cola ALLA, un reportaxe sobre’l cómic de Chechu García y la sección ‘El Personaxe’, dedicada a la figura d’Ana Cano, presidenta de l’Academia de la Llingua Asturiana. En cuantes al espaciu pa la creación Lliteratu.com ufre dos poemes de Xabel de Cea y el rellatu ‘Toblerone’ de Pablo X. Suárez. Amás, la revista dixital inclúi una entrevista de venti preguntes colos escritores Lluis Antón González, Inaciu Galán y Ricardo Candás.

Revista dixital de lliteratura ‘Lliteratu.com’

L’escritor asturianu Xuan Bello, va participar na primer sesión del Festival de Poesía Iberica “Todos los mares-Todos os mares”, que se ta cellebrando nes ciudaes portugueses de Lisboa y Cascais dende’l 25 d’ochobre y que va finar el prósimu 27 del mesmu mes. Xuan Bello va intervenir esti vienres 26 na primer sesión poetica xunto colos escritores Gastão Cruz, Ana Luisa Amaral, Antonio Jose Ponte y Vergílio Alberto Vieira.

Na segunda sesión tamiñen va participar el poeta afincáu n’Asturies Jose Luis García Martín. Completen esta xornada nel festival Francisco Brines, Miguel D’Ors., Pedro Mexia, Jose Manuel Mendes y Jose Manuel Vasconcelos.

El Festival de Poesía Iberica “Todos los mares-Todos os mares” ta organizáu pol Institutu Cervantes xunto cola Asociación Portuguesa d’Escritores y la Fundación D. Luís.

El día 29 d’esti mes va abrise’l plazu pa presentase al III Concursu Lliterariu de Rellatu Curtiu ‘Corvera d’Asturies’, qu’esti añu ta abiertu a presentar obres en castellán o n’asturianu. El plazu va terminar el día 30 de payares y cuenta con trés premios de 300, 150 y 75 euros, amás de la espublización dixital del rellatu.

Nel concursu van poder participar toles persones mayores de 18 años. El rellatu tien de tener una estensión mínima de 5 páxines y máxima de 10 y ha presentase en formatu DIN-A4, a doble espaciu y con tipu de lletra Times New Roman de 12 puntos. El fallu del xuráu va dase a conocer el 18 d’avientu. Han entregase nel Aytu. de Corvera, asitiáu en Nubleo 77, 33416.

Dende’l prósimu 29 d’ochobre al 30 de payares tolos interesaos van poder presentar les sos obres al III Concursu de rellatu curtiu organizáu pol Conceyu de Corvera. El ganador va recivir 300 euros y la publicación del relatu na web del Ayuntamientu de Corvera y los clasificas en segundu y tercer llugar van recibir un premiu en metálici de 150 y 170 euros.

Ta abierta la participación a obres en asturianu y en castellanu con tema llibre y como requisitos pa participar ta estipulao que: los testos han de ser d’un másimu de 10 páxines y un mínimu de 5 en formatu DIN A4a 12 puntos y que sían obres inedites. El xurá va dar a conocer los ganadores el día 18 d’avientu.