Lliteratura

Dende va uno díes ye posible atopar nes llibreríes l’últimu llibru del escritor y ilustrador Enrique Carballeira, un nuevu cuentu infantil ‘Celesta caza cuélebres’, asoleyáu pola editorial Ámbitu na colección El Maletu Máxicu. Los testos y dibuxos son responsabilidá de Carballeira y tán empobinaos pa neños d’ente 5 y 9 años. El cuentu ye “una revisión de les hestories clásiques de príncipes, princeses y personaxes mitolóxicos”.

Celesta caza cuélebres “ye la hestoria d’una rapaza echada p’alantre y atrevida, que propón un tratu chocante a la madre de Miru, príncipe solteru de Mandatonia pal que la reina busca moza casadera. La candidata nun respuende a les espectatives de «bona ama de casa» que requier Armanda II, soberana del reinu, pero ofrez a cambiu del matrimoniu col so fíu acabar cola amenaza qu’esparde la medrana ente’l pueblu: un cuélebre qu’arrampla col ganáu y les finques”. El final, nes llibreríes del país.

L’escritor Xuan Bello presenta esti martes 6 de payares el so nuevu llibru, ‘Al dios del llugar’, espublizáu apocayá na so torna al castellán y nel que fala n’esclusiva per primer vegada de la ciudá d’Uviéu. La presentación va ser a les ocho la tarde na Plaza’l Pescáu d’Uviéu (Trescorrales) y “va garrar la forma d’un alcuentru informal del autor colos llectores”, nel que van poder falar personalmente tanto con Xuan Bello como con Eduardo Carruébano, responsable de les fotografíes.

Un añu más, les editoriales asturianes espublizaron más d’un centenar llargu de llibros en llingua asturiana y la collecha d’esti añu vien cargada en tolos xéneros. 118 llibros que dan pa munchos y a los que la revista de lliteratura Lliteratu.com dedica’l so númberu 13.

Lliteratu.com axunta amás, nesti númberu, un reportaxe colos movimientos del sector editorial a lo llargo d’esti añu, un espaciu dedicáu a la escritora Mª Teresa González, que va ser la protagonista de la Selmana de les Lletres 2008, trés entrevistes a autores qu’esti añu presentaron novedaes editoriales, como ye’l casu de Xurde Fernández Fernández, Pablo X. Suárez y Sergio Gutiérrez Camblor. El númberu axunta delles noticies, poemes y el rellatu ‘Adiós’, de Xurde Fernández.

Revista dixital de lliteratura ‘Lliteratu.com’

La poeta Carmen Guardado Parga (L.luarca, 1961), que ta acabante de sacar al mercáu “Nordes”, presenta la obra el prósimu 3 de payares na sede social de l’asociación cultural “La Regalina” de Cadaveu. El poemariu algamó’l premiu ‘Fernán Coronas’ na edición de 2006.

Carmen Guardado Parga ye diplomada en Maxisteriu y profesora d’asturianu p’adultos y entamó a escribir la so obra en castellán, anque anguaño ye una poeta billingüe. Tien testos espublizaos na ‘Antoloxía poetica de Valdes’, editada pola Asociación de Poetes Valdesanos, a la que pertenez.

«Asturies ye’l país del misteriu: Nun sabemos l’orixe de los nomes de les trés ciudaes más importantes d’Asturies, ¿quién inventó la fabada, d’ónde yera Pelayo?» Con estes pallabres entamaba Xuan Xosé Sánchez Vicente la presentación del so llibru últimu ‘Ficciones y realidaes’. Un llibru d’ensayu lliterariu y políticu, editáu pola fundación Nueva Asturies y la editorial Trabe. Asturnews ufre dos vidios d’esta presentación.

Suburbia Ediciones fizo esti martes 30 d’Ochobre la presentación de Vía de serviciu na Casa Posafuelles d’ Uviéu, cola participación de Pablo Texón y Xurde Fernández, que dieron llectura a los dos cuentos qu’espublizaren nesta antoloxía que fai escoyeta de la narrativa asturiana última con catorce cuentos d’escritores n’asturianu ñacíos depués de 1975. El llibru ta yá a la venta dende’l pasáu mes de setiembre.

La presentación abellugóse nel chigre de la Xunta Pola Defensa de la Llingua, na Cai Vega La Cuesta d’Uviéu, corriendo al cargu de Silvia Junco que presentó a la editorial y a los dos autores presentes ,y cuntando tamién con públicu abondo nuna xornada con munches cites alrodiu de la lliteratura asturiana.

Na estela d’otres publicaciones como les revistes Formientu o Reciella Malory, la recién ñacida Suburbia Ediciones sacó en setiembre a la venta’l so primer llibru, una antoloxía que fai escoyeta de la narrativa asturiana última con catorce cuentos d’escritores n’asturianu ñacíos depués de 1975, ‘Vía de Serviciu’.

El llibru inclúi un prólogu del escritor José Luis Piquero nel que espresa que “los autores nuevos preséntense como individualidaes, desprovistos d’una «marca xeneracional» más alló del so billingüismu”. Ente los escritores presentes tán dalgunos yá conocíos pol públicu llector, como Pablo Rodíguez Medina, Quique Faes, Vanessa Gutiérrez, Nicolás V. Bardio y otros que malapenes tienen nada espublizao, como ye’l casu de Carlos Pitcairn o Ecequiel Cala.

Hasta’l miércoles, próximu día 31 d’ochobre, la Casa Cultura de L.lena, asitiada na Plaza Alfonso X “El Sabiu”, 7, acueye la esposición “Ello yera una vez… un tiempu de traducciones (1974-2006)”, na que se reflexa’l continuu trabayu de traducción a la llingua asturiana nos últimos 30 años.

El conteníu d’esta esposición ye: un cientu d’obres de toa triba, la primer amuesa completa de traducciones al asturianu de narrativa —novela y cuentos curtios— publicaos en volume, y de dellos exemplos del abondoso trabayu fechu en narrativa xuvenil. Los visitantes de la esposición van tener la oportunidá de compartir con narradores como Joyce, Dickens, Saint-Exupéry, Shelley, Kakfa, Camus, Orwell o Wilde, los secretos revelaos de la so obra n’asturianu.

Suburbia Ediciones presenta esta nueche a les ocho y media, l’antoloxía de narraitva moza ‘Vía de serviciu’ na Casa Posafuelles d’Uviéu, el chigre de la Xunta pola Defensa de la Llingua Asturiana. Na presentación van participar los autores Pablo Texón y Xurde Fernández, qu’apaecen na obra. La espublización del llibru sigue la estela d’otres publicaciones, como Formientu o Reciella Malory, que nos últimos tiempos vienen afitanda l’apaición de nuevos autores mozos.

El llibru inclúi un prólogu del escritor José Luis Piquero nel que espresa que “los autores nuevos preséntense como individualidaes, desprovistos d’una «marca xeneracional» más alló del so billingüismu”. Ente los escritores presentes tán dalgunos yá conocíos pol públicu llector, como Pablo Rodíguez Medina, Quique Faes, Vanessa Gutiérrez, Nicolás V. Bardio y otros que malapenes tienen nada espublizao, como ye’l casu de Carlos Pitcairn o Ecequiel Cala.

Xuan Xose Sánchez Vicente presenta, güei martes nel Centru de Cultura Antiguu Institutu a les 20:00 hores, “Ficciones y realidades”. Esti nuevu volumen del ecritor, editáu pola Fundación Nueva Asturies y Trabe, ye una esbilla d’artículos perodísticos espublizaos en dellos medios de comunicación pol escritor y políticu asturianu.

Sánchez Vicente ye políticu, escritor y ensayista, amás de presidente y fundador del Partíu Asturianista y miembro de la Academia de la Lengua Asturiana. Tien espublizaes tanto nel terren del ensayu y la investrigación como de la novela y los escritos periodísticos.

Sánchez Vicente presenta ‘Realidaes y ficciones’

Esti martes 30 d’ochobre, a les ocho la tarde, va presentase’l nuevu llibru de Xuan Xosé Sánchez Vicente, perconocíu escritor y políticu asturianista. L’actu va ser nel salón d’actos del Vieyu Institutu Xovellanos. El llibru, asoleyáu pola Fundación Nueva Asturies ye ‘Realidaes y Ficciones’ y tolos asistentes van llevar un exemplar.

‘Realidaes y ficciones’ atropa dos tipos de trabayos y estudios: los de la primera estaya son trabayos de socioloxía y política, los de la segunda, de mena lliteraria. Na primera faza, «Asturies, dentro de veinte años» dibuxa’l panorama que pal autor ye’l que “nos gustaría topar a los asturianistes: una patria meyor, más grande y más asturiana, y señala los problemes que pa llograr esi sueñu esisten güei (el fundamental, los partíos madrileñistes o centralistes y la so indiferencia y despreciu por Asturies y los asturianos)”. Dientro la mesma faza, «La identidá asturiana» traza un análisis a lo llargo de la hestoria, hasta llegar hasta güei, de cuálos son los parámetros la nuestra identidá y cómo se constituyen hestóricamente.

La segunda faza ta centrada na lliteratura asturiana nos años del Surdimientu, ampliando y matizando lo que fuera’l yá clásicu trabayu de Sánchez Vicente, ‘Crónica del Surdimientu’, discutiendo les diverses interpretaciones critiques de la época y faciendo un estudiu detalláu d’autores, modes, tendencies lliteraries, y arreyamientu sociolóxicu. D’ente esos estudios el primeru entitúlase «N’homenaxe a Andrés Solar: Los años del Surdimientu: tendencies lliteraries y sociedá».

El segundu y el terceru, como los sos nomes indiquen, indaguen, respectivamente, sobre la poesía del Surdimientu y sobre la prosa: «La poesía del Surdimientu», «La narrativa del Surdimientu. La década de los setenta». Un pequeñu trabayu, «Dos notes sobre dos pilancos de llectura en Marirreguera», onde aclara dos testos, hasta agora escuros, del padre les nueses lletres.