Lliteratura

L’Academia de la Llingua Asturiana acaba asoleyar estos díes d’avientu’l segundu volume de les “Propuestes etimolóxiques” del ex-presidente de la institución y profesor de la Universidá d’Uviéu Xosé Lluis García Arias. El trabayu quier ser un allargamientu y complementu de los conteníos del so Diccionariu Etimolóxicu de la llingua Asturiana y estudia, per orde alfabéticu, delles palabres entesacaes de los materiales del léxicu de la llingua.

Nel añu 2000 García Arias asoleyó’l primer volume de “propuestes etimolóxiques” nel que recoyía una riestra de trabayos, en castellanu y n’asturianu, fechos ente 1975 y 2000 nos qu’estudiaba cuestiones etimolóxiques. Y agora axunta a aquel traayu esti segundu volume, que tien cásique 500 páxines.

Miguel Solís Santos, ganador del premiu “Enriqueta González Rubín”que otorga la Conseyería de Cultura del Principáu al meyor artículu peridísticu en llingua asturiana faló ayeri de la importacia del llabor periodísticu pa la supervivencia del asturianu al mesmu tiempu que quiso recordar que la normalización social del idioma tien que tar amparada pola oficialidá. “Si esto nun ye asina la realidá asturiana siguira siendo diferiente, como yera la españa de los años 60”.

L’escrito tamien quieso recordar la figura d’Enriqueta González Rubín, a la que calificó de verdadera precursora de la lletres y del periodismu asturianu, el cual nun ye más que un herederu de los sos escritos nel sieglu XIX.

Mañana xueves, a les ocho la tarde, na Casa Cultura de L.luarca, Esther García López va presentar el so llibru últimu, una obra orixinal por demás, con ochenta poemes pequeños, como los haikus xaponeses, nos que llogra mui bien esa capacidá pa formar el so universu estéticu, con poques pallabres, pero con muncha fondura. Siguiendo’l círculu de las estaciones, quier Esther llegar al corazón de los neños dexando estes estampes enllenes de significáu y de guapura y siempres, na variante occidental del asturianu.

La presentación del llibru va tar a cargu d’Emilio Menéndez Menéndez, filólogu y párrocu de La Montaña, presidiendo Juan Fernández Pereiro, Alcalde de Valdés y cola intervención de Néstor Fernández, Conceyal de Cultura de Valdés, Cristian Velasco d’Ediciones Madú, editora del llibru, l’ilustrador del llibru, Migule Solís Santos y la propia autora, Mª Esther García López, qu’esti añu algamó dellos premios tan importantes como l’Uviéu de Poesía.

“Una güeyada a la diversidá idiomática d’Europa”, ye’l nome de la conferencia que va pronunciar el Profesor de filoloxía na Universidá d’Uvieu, Ramón d’Andres, esti miercoles n’Uvieu. La cita ye a les 20:00 hores nel local “La Escandalera Llugar d’Alcuentru” (C/San Francisco, 21, 3º). Ramón de Andres ye l’autor d’obres divulgatives como “Gramática práctica d’asturianu”, tres llibros de “Cuestiones d’asturianu normativu”, o “Diccionariu temáticu asturianu” y del ensayu “Llingua y xuiciu” , col que algamó’l premiu Fuertes Acevedo na edición de 1998.

Eduardo Romero presenta esta tarde en La Felguera el llibru “Quien invade a quien. El Plan África y la inmigración”, editáu pola asociación Cambalache y que xira alredor de la política imperialista del mundu occidental n’Africa. L’actu va ser na Casa la Cultura de La Felguera a les 20:00 hores y nel memu tamien se va emitir el documental “La valla de la vergüenza”. Esti ye un trabayu de l’asociación colectivu “La Plataforma” de Madrid que denuncia les alambreres en Ceuta y Melilla y les polítiques pa col problema de la inmigración

Cambalache tamien va aprovechar esti actu pa presentar el cursín “Quien invade a quien. Capitalismu, inmigración y precariedá”, que l’Asociación Cambalache va dar nel Centru de Mocedá de Ciañu, a partir del 14 del prósimu mes y cola matriculación de baldre. L’horariu del mesmu ye de 20:00 a 22:00 hores,tolos llunes hasta completar venti hores.

El martes a les ocho la tarde, nel Atenéu Obreru de Xixón, na cai Cuadonga, 7 1u Izda., tuvo llugar la presentación del llibru “La mirada aliella”, del que ye autor Antón García. Esti llibru ye l’undécimu númberu de la “Coleición Tiempu de Cristal” qu’asoleya l’Atenéu Obreru de Xixón.

Antón García ñaz en Tuña, conceyu de Tinéu, en 1960. Dende 1981 escribe n’asturianu, dempués d’una breve etapa en castellán. Nesa época inicial editó dos revistes de lliteratura, Criterios (1977-1979) y Gávula (1981), amás de participar na puesta en marcha de la tertulia lliteraria “Oliver” n’Uviéu. En 1983 funda “Llibros de Frou”, la primer esperiencia editorial privada n’asturianu, que camina hasta 1987. Foi secretariu de la revista Adréi (1986-1992) que codirixíen Xuan Bello y Berta Piñán, y Coordinador de Política Llingüística nel últimu gobiernu de Pedro de Silva (1989-1991).

En 1992 funda y dirixe Ediciones Trabe, referencia indispensable de la edición n’asturianu, de la que se desprendió esti añu pa dedicase a la escritura y a la producción audiovisual. Anguaño produz pa la TPA’l programa “Al Aldu” y dirixe y presenta’l magacine radiofónicu “Paraísu Natural”, na RPA.

Poeta, narrador, ensayista, traductor, críticu, Antón García tien una bayurosa y variada obra.

La presentación corrió a cargu de Leopoldo Sánchez Torre, cola presencia del autor. La entrada foi llibre.

“Güelgues de gallón” de Miguel Allende y “Como crecieres tu” d’ Hector Perez foron los poemarios que algamaron el primer premiu na edición d’esti añu del Teodoro Cuesta. El premiu, un de los más ponderaos polos escritores, ta organizáu pol Conceyu de Mieres y reparte 4.000 euros ente los dos ganadores,

Miguel Allende ñació en Llaviana nel añu 1960 y ye filólogu. Tien nel mercáu el llibru “Pallabres de payaso”, una esbilla de poemes de tola carrera. Hector Perez Iglesias (Llanera, 1978) foi’l ganador del premiu Asturies Moza de poesía en castellanu nel 2003 pola obra “Las tardes baldías”. Otres obres suyes son “Prisión de náugrafu” y dalgunos cuentos en castellanu y asturianu, dellos premiaos nel concursu Art Nalón.

El debuxante moscón Javier Marinas García presenta, esta tarde na Casa de Cultura de Lluanco (18:30 hores), la segunda edición en castellanu del cómic DOMNO (la historia de Gonzalo Peláez), que editara n’asturianu Trabe. El cómic xira alredor de les las aventures de Gonzalo Peláez y los sus enfrentamientos escontra Alfonso VII nel primer terciu del sieglu XII. Cunta col prólogu del catedráticu de Hestoria Medieval de la Universidá d’Uvieu, Javier Fernández Conde.

Javier Antonio Marinas collabó en revistes como EEl Llapiceru” y “Tapón”. En 1996 espublizó “Ballenas”, un interesante libro de cómic sobre la caza de ballenes nel sieglu XVI. Amás tien algamao dellos premios pol so llabor, ente ellos: el Urriello d’Ilustración del Principáu en 1991 y en 1992 ya’l Universidá Popular de Castuera en Badajoz. Tamien salió premiáu en dellos festivales de carteles como’l del Descensu folklóricu del Nalón en 1996 o el de La Regalina en 2002.

Blog del cómic

L’escritor Antón García, fundador d’Ediciones Trabe, va presentar esti martes en Xixón el llibru “La mirada aliella”, una esbilla poetica que recueye la produdicción del ator dende 1981 a 2006. L’actu de presentación va tener llugar a les 20:00 hores na sade del Ateneu Obreru de Xixón (C/Cuadonga, 7) y nel mesmu va tar presente’l profesor de lliteratura de la Universidá d’Uvieu Leopoldo Sánchez Torre.

Antón García ye poeta, narrador, ensayista, traductor y críticu. Ente les sos obres destaquen les noveles “Díes de muncho” y “El viaxe”, coles que algamó’l premiu Xosefa de Xovellanos en 1998 y en 1986. Como poeta tien espublizao tres llibros de poemes, “Estoiru”, “Los díes repetíos” y “Venti poemes” que son los que se recueyen agora en “La mirada aliella”. Como investigador de la lliteratura asturiana recuperó y editó la obra de diversos autores, ente los que destaquen los narradores (asoleyando dos antoloxíes del cuentu n’asturianu), y poetes como Xuan González Villaro Xuan María Acebal.. Fizo la torna al asturianu de obres d’Álvaro Cunqueiro, Federico García Lorca y dellos poetes gallegos, catalanes, brasileños o ingleses.

Esti llunes continuen los actos de cellebración del 400 cabudañu de la Universidá d’Uvieu con una llectura poetica al cargu de la escritora asturiana Olvido García Valdes, Premiu Nacional de Poesía del añu 2007. L’actu va entamar a les 19:30 hores nel Edificiu Hestóricu que la Universidá d’Uvieu tien na cai San Francisco de la capital asturiana. Amás de la llectura la escritora va dar una conferencia.

Olvido García Valdes, ñació en Santianes de Pravia en 1950. Poeta, ensayista y traductora ye co-directora de la revista “Los Infolios” dende 1987 y miembru del conseyu editor de “Hablar/Falar de Poesia” dende la so creación en 1996; asimesmu foi fundadora de la revista “El signo del gorrión”. Ente les sos obres destaquen llibros como “El tercer jardín”, de 1986; “Exposición”, de 1990; “Caza nocturna”, de 1997, ya’l reciente “Y todos estábamos vivos”, de 2006.