Lliteratura

Grau, nel espaciu del Aula de les Metáfores “Fernando Beltrán”, va acoyer la presencia del poeta realista Joan Margarit esti llunes 19 de marzu. El catalán va facer una llectura de dalgunos poemes de la so coleición de magar les 20:00 hores. Esti actu va cuntar cola participación del escritor asturianu Xuan Bello, que va oficiar de presentador del autor d’obres como “Cálculo de estructuras” o la última “Barcelona amor final”.

Antonio Gamoneda va falar sobre poesía esti xueves nel Aula Magna del Edificiu Históricu de la Universidá d’Uvieu. “Poesía: tradición, lenguaje, pensamiento”, ye’l nome d’una conferencia que va entamar de magar les 19:30 hores. Gamoneda, ganador del premiu Cervantes en 2006 (con “Edad”, compendiu de tola so obra hasta’l 87) y del Nacional de Poesía en 1998, ye una de les más destacaes figures poetiques españoles.

La figura de Clarín vuelve a ser motivu d’estudiu cola espublización de la obra “Leopoldo Alas, Clarín, en sus palabras (1852-1901)” d’Yvan Lissorgues, especialista na obra de Leopoldo Alas. Esti llibru va presentase nel Aula Magna de la Universidá d’Uvieu de magar les 19:30 hores d’esti martes 4 de marzu. Nel actu, van tar acompañando al autor, el bisnietu de Clarín, Leopoldo Tolivar Alas y el profesor de lliteratura española, Álvaro Ruiz de la Peña. La presentación de los participantes va correr al cargu del rector Juan Vázquez.

Ta acabante d’espublizar un llibru pa neños, pero la escritora en gallego-asturianu, Aurora García Rivas tien yá nel mercáu un nuevu llibru, el so segundu poemariu na so llingua materna, la fala del Eo-Navia. El llibru ta formáu por cuarenta y dos poemes dixabraos en dos estayes “O tempo dos álamos” y “O tempo dos cipreses”.

Aurora García Rivas tien llibros espublizaos tamién en castellán y “O viaxeiro da noite”, editáu en 2004 con Trabe, y el, yá citáu, de cuentos pa neños “Contos, ducia e media d’eles”. Amás ye responsable de l’antoloxía “Na boca de todos”, que recueye la obra de los poetes del occidente, en gallego-asturianu y nel dialectu occidental del asturianu.

El Súmmum, la revista cultural y de tendencies d’Ámbitu, ta acabante sacar a la cai’l so númberu 27, el segundu dende qu’estrenara un formatu nuevu. La revista pue descargase completa dende la páxina de la editorial publicadora d’esta revista billingüe.

Esti nuevu númberu d’El Súmmum cunta con entrevistes al escritor y críticu lliterariu Vicente Luis Mora, el cineasta José Luis Guerin y el músicu Xabel Vegas, y tamién inclúi testos de creación de Cristina Grande, Agustín Fernández Mallo y Fernando Beltrán. Esti nuevu númberu, qu’ilustra la so portada con una foto de Carlos Quintana, complétase con artículos de Jesús Ordovás, Miguel Cane, Susana Carro Fernández, Rafael Rodríguez Valdés, Juan Carlos Gea y Chus Fernández, ente otros.

Mañana, vienres 29 de febreru, a les 20:00 hores, na Capiella de los Dolores de Grau, va tar el cantante y compositor asturianu Víctor Manuel San José, que va presentar el so llibru “Vivir para cantarlo” y va lleer dalguna de les sos lletres nel Aula de les Metáfores “Fernando Beltrán”.

El llibru inclúi canciones escrites dende va más de 40 años ya inclúi dellos de los temes qu’escribió o cantó n’asturianu nos sos primeros años de carrera musical.

Esti xueves 28 de febreru a les ocho la tarde, nun actu entamáu pola Cátedra Emilio Alarcos, el poeta Luis García Montero, ganador del Premiu Nacional de Lliteratura, va dar una conferencia titulada “Defensa de la poesía” nel Aula Magna del Edificiu Hestóricu de la Universidá d’Uviéu.

L’escritor Armando Murias va presentar la so última novela, “El día que me quieras”, esti prósimu xueves 28 de febreru en Xixón. Nel actu, que se va cellebrar de magar les 20:00 hores nel Ateneu Obreru de Xixón, van tar presentes xunto col autor, dos compañeros de trabayu: los profesores de lliteratura del Institutu Xovellanos de Xixón, Carlos Prieto y Fernando Bello.

Murias, natural de Cagual.les (L.laciana) y Doctor en Filoloxía Hispánica, espubliza con esti nuevu llibru lo que supó el so tercer trabayu nel terren de la novela, tres “Los zapatones del quinceañero” y “Nómadas”.

La escritora del estremu occidental asturianu, Aurora García Rivas, saca a la cai un nuevu llibru na fala eonaviega, un llibru infantil tituláu “Cinco contos pra xogar coa música”, editáu por Trabe na so colección Montesín, con ilustraciones d’Helena Reyero Martínez. El llibru ta formáu por cinco cuentos qu’enllacen temáticamente ente ellos.

Aurora García tien publicos llibros como “O viaxeiro da noite” o “Contos, ducia e media d’eles”, amás de ser responsable de l’antoloxía “Na boca de todos” y participa de la vida cultural y lliteraria de la ciudá de Xixón, onde reside dende va años.

Xuan Bello va presentar el so últimu llibru, “Al dios del llugar”, esti vienres na Casa la Cultura de L’Entregu. El actu va entamar a les 20:00 hores y va cuntar cola presencia, amás del propiu autor, de la poeta Ana Vanessa Gutierrez pa fecer les llabores de presentación. Amás tienen confirmada l’asistencia l’alcalde del conceyu de Samartín del Rei Aurelio, Ignacio Fernández; y el representante de l’asociación Cauce, Carlos Fernández.

“Al Dios del llugar” cunta hestories de personaxes y llugares de la ciudá na que vive Xuan Bello dende va 30 años. Ye en bona midía un documentu d’agradecimientu a Uvieu y al mesmu tiempu un piñu de memories del escritor. El llibru ta ilustráu poles semeyes del fotógrafu Eduardo Carruebano.