Lliteratura

Esti xueves 10 d’abril a les siete la tarde, va na librería Treito de Cangas del Narcea el llibru “Cousas del mio pueblo” del autor cangués Tito Casado Agudín. La obra ta asoleyada pola editorial La Cruz de Grau y ta conformada por una esbilla d’obres teatrales ambientaes nel Val.le de Rengos (Cangas del Narcea).

Una publicación indicada especialmente pa grupos d’escolinos y aficionaos qu’inclúi les obres: Las farturas de Servando, La suegra de Lulo, Pin vuelve de las Américas, Xuaco quier ser torero y ¡Uy qué miedo!. Una riestra d’obres que se desenrrollen nel mundiu rural.

Les ilustraciones son obra de la maestra somedana Inés Gómez Feito y cueta col prólogu de Luis Miguel Rodríguez, sobrín d’Alejandro Casona. El preciu de la obra, que tará en pocu tiempu nes llibreríes, ye de 15 euros.

L’autor ñació en Cangas en 1962 y ye maestru y director del colexu público Vega de Rengos en Cangas del Narcea, zona na que tán los sos raigaños familiares. Ye autor de dellos llibros y publicaciones de calter hestórico-artísticu. Fizo guiones de vídios divulgativos, rellacionaos cola natura, la hestoria, y sobre manera, la etnografía pa diverses entidaes, lo mesmo públiques que privaes. Tamién coordinó la edición de publicaciones y guíes didáctiques pa escolinos, basaes en difundir el conocimientu de la rodiada y les tradiciones rurales. Autor de cuentos infantiles y obres de teatru pa los sos alumnos.

El sábadu 12 d’abril, a les ocho la tarde, nel Salón d’Actos de la Casa da Cultura de Grandas de Salime va facese l’actu d’entrega del Premiu Xeira de narracióis curtias, que na edición XVII foi pa la escritora xixonesa Marisa López Diz pol so rellatu “A fiya del xastre”. La organización decidió entregar el premiu nesti conceyu por mor “ del so venceyu familiar con Grandas de Salime”. L’actu va incluyir una actuación musical de la propia autora y el so dúu “Mestura”, aprovechando la doble ocupación artística de la premiada. Pero amás va sentise la Música de “Mezá”.

Les actividades van entamar enantes del propiu actu lliterariu, con una visita a les 16:45 hores al castru y aula didáctica del Chao Samartín, nel llugar de Castro. La entrega del premiu va cuntar, amás de coles intervencines de la premiada, del presidente de Xeira y de les autoridaes presentes, con dos actuaciones musicales. Los primeros en xubir al escenario van ser os rapaces de Mezá, el sestetu folk de Bual que yá tocó nel Auditoriu d’A Caridá na edición anterior del premiu y que tan bon sabor de boca dexó.

Va poner el ramu a la xornada el dúu Mestura, formáu pol guitarrista Luis Suárez y la premiada, la cantante Marisa López Diz. Esti dúu, con dos discos nel mercáu, preparó un reportoriu especial pal actu escoyendo los temes cantaos pol grupu nos sos discos en gallego-asturianu.

L’Asociación Cultural l’Arribada convocó esta selmana la segunda edición del Premiu Timón, un certame que convoca esti añu “col envís de facer reconocencia d’una trayectoria lliteraria y/o’l llabor de promoción de la lliteratura asturiana”. El premiu quier convertise nuna referencia na reconocencia de la carrera lliteraria de los autores más veteranos de la lliteratura asturiana y l’añu pasáu recibiólu la escritora Nené Losada.

El premiu entrégase cada añu na Arribada, la “vagamar lliteraria” qu’enllena Xixón de lliteratura asturiana al traviés d’actividaes abiertes al públicu asturianu a lo llargo de más de diez díes cada mes de setiembre.

Les candidatures van poder presentase por una persona o per aciu d’un coleutivu al corréu lletrónicu arribada_sectec@yahoo.es . Pa esta edición opten al premiu los/es escritores y/o promotores de la lliteratura n’asturianu que nacieren nel añu 1958 o enantes.

La candidatura constará d’un informe de l’activida lliteraria del autor lo más completu posible y una xustificación de les razones de la presentación de candidatura y el plazu pa presentar candidatures va tar abiertu hasta l’1 de setiembre de 2008.

Al efeutu de fallar el premiu, l’Asociación Cultural l’Arribada aconceyará un xuráu integráu por persones venceyaes a la cultura del país. El fallu nun va poder recurrise y la entrega del mesmu va ser en Xixón demientres la celebración de l’ARRIBADA 2008 y va constar d’una escultura diseñada a costafecha por un artista asturianu.

D’otra banda, l’Asociación L’Arribada prepara yá dende va meses la tercer edición de l’Arribada y mañana xueves van celebrar un conceyu de la directiva nel que va escoyese la nueva directiva y nel que van decidise delles novedaes del añu que vien.

Amás, apocayá, l’Asociación estrenó un blogue nel que van dir dando anuncia de les novedaes y abriendo un espaciu pa les propuestes y les opiniones.

Blogue de l’Asociación Cultural l’Arribada

La poeta asturiana Sofía Castañó va participar xunta’l aragones Fernando Sanmartín nuna nueva sesión del ciclu poeticu que se vien desendlcando na Universidá de Zaragoza. La cita cola poeta y realizadora ye esti miercoles, a les 20:30 hores, na Sala de Xuntes de la Facultá de Filosofía y Lletres de dicha Universidá.

La Conseyería de Cultura ta acabante convocar los premios lliterarios n’asturianu qu’entama cada añu y qu’esti añu conformen les siguientes ediciones: XXIX Premiu “Xosefa Xovellanos” de novela, XIV Premiu “Xuan María Acebal” de poesía, XIV Premiu “Máximo Fuertes Acevedo” d’ensayu y I Premiu “María Josefa Canellada” de lliteratura infantil/xuvenil.

Estos premios busquen, según diz la convocatoria “afitar, arriquecer y dar prestixu a la llingua y a la cultura asturianes, amás de dinamizar l’actividá cultural n’Asturies, sobre manera na creación lliteraria”.

Tolos premios tienen una dotación de 7.000 euros, nun siendo’l «María Josefa Canellada», que ye de 3.000 euros. El plazu de los concursos acaba nes cuatro categoríes l’1 de setiembre de 2008.

Bases completes de los premios

La Conseyería de Cultura anunció que la I Xunta d’Escritores en gallego-asturianu va celebrase a la fin esti mes de xunu nel conceyu d’A Veiga y embaxo la dirección de la escritora Aurora García Rivas.

La Xunta va suponer el primer alcuentru d’escritores d’esta fastera del occidente asturianu y n’ella va presentase una nueva revista lliteraria na fala d’etreambasauguas, dirixida por Xosé Miguel Suárez.

Esti mes d’abril los talleres de escritura Sinjania, n’Uvieu, ufren una convocatoria p’apuntase a dalguna de les munches atividaes y talleres rellacionaes col mundu de la escritura y de la creación lliteraria. Los cursos tan empobinaos a escolinos con interes pola escritura y a profesionales que quieran meyorar la espresión escrita y l’estilu y van tocar les siguientes materies: narración, poesía, narrativa y como novedá, un taller de narrativa on line

Los profesores encargaos de los cursos son: Jose Ángel Gayol, el de narrativa (vienres de de 19 a 21 hores dende’l día 11); Ana Vega (poesía, llunes de 19 a 21 horas dende’l día7) y Beatriz Fernández (redacción, miercoles de 17 a 19 hores dende’l 9). El cursu on-line de narración entama el día 7 d’abril. P’apuntase o solicitar información pue llamase a los númberos 984 182 519 y 984 182 565 o acudir a les oficines de Sinjania (C/Martínez Marina 3, 1ºD, Uvieu), de llunes a vienes de 10 a 14 y de 17 a 20 hores.

Web de Sinjania

El clú de llectores “Llibros de Nó” qu’apuesta, según los responsables “pola independencia editorial como rempuesta a un mercáu del llibru asturianu cada vuelta más condicionáu poles sovenciones” ta acabante d’estrenar la so web, que quier sirvir de catálogu y forma de dase a conocer énte los llectores en llingua asturiana.

La páxina inclúi la sección “¿Quién somos?”, “Furrulamientu”, “Noticies de Lliteratura” y “Catálogu” que pretender atropar tolos llibros qu’ufierten a los sos socios y a los llectores en xeneral”.

La editorial Espublizastur, responsable d’esti clú, edita llibros y “trabaya especialmente en dos ámbetos malapenes atendíos anguaño: l’ensayu y la producción científico” y tien ente les sos publicaciones la revista d’ensayu N’ast, la revista La Sidra y llibros como “La Nación Asturiana”.

La Casa Conceyu de Xixón acoyó la presentación de los miembros del I Premiu d’ensayu y trabayos d’investigación “Fierro Botas”, convocáu pola Conceyalía de Cultura Tradicional y Llingua Asturiana del Ayuntamientu de Xixón, col oxetivu de “perpetuar y recordar la figura de Federico González-Fierro Botas y la so querencia pola llingua asturiana y la so normalización social n’Asturies”.

El xuráu presentáu ta formáu por Jaime González-Fierro Huerta, sobrín de Fierro Botas; Jesús Ángel Fernández Fernández, xesuita y miembru de la comunidá d’El Natahoyo a la que pertenecía Fierro Botas; Ana María Cano González, presidenta de l’Academia de la Llingua Asturiana; Xuan Cándano, periodista; María Xosé Rodríguez López, responsable de la Oficina Municipal de la Llingua de Xixón; Francisco José Llera Ramo, catedráticu de Ciencia Política de la Universidá del País Vascu; Carmen Rúa, asesora de la Xunta de Gobiernu del Ayuntamientu de Xixón y exconceyala d’Educación; Humberto Gonzali, escritor y miembru pol PP de la Xunta Rectora de la Fundación Municipal de Cultura del Ayuntamientu de Xixón; ya Ismael María González Arias, director de la Casa de Cultura “Teodoro Cuesta” de Mieres.

Les bases permiten presentar obres hasta’l 30 de xunu y el premiu cunta con 4.000 euros y la publicación de la obra.

Bases completes del Premiu

Xuan Bello va presentar esti xueves 3 d’abril, a les 20:00 hores, na llibrería Bertrand d’Uviéu, nel Espaciu Buenavista, la so última entrega lliteraria, “La hestoria tapecida”. La poeta Vanessa Gutiérrez va ser la encargada de presentar l’actu.

Xuan Bello (Paniceiros, 1965) ye ún de los autores más conocíos y reconocíos de l’actual lliteratura asturiana, tanto n’Asturies como nel Estáu. Autor de llibros de poemes como “Los nomes de la tierra”, “El llibru vieyu” o “Los caminos secretos»”. La so obra ta traducida al castellán y dende va poco al catalán. Amás esisten proyectos en marcha pa la traducción a otres llingües.