Lliteratura

Esti vienres pasáu inaugurosé la 67 Feria del Llibru de Madrid, qu’esti añu acueyer 364 casetes, venti más qu’en 2007, y cola novedá de que la feria tien como convidada d’honor a Asturies y a la so lliteratura. Hasta’l 15 de xunu y cola presencia d’autores como Ricardo Menéndez Salmón, Xuan Bello y José Luis García Martín, ente otros. Asturies protagoniza l’actualidá cultural del estáu nesti mes de xunu.

El puestu d’Asturies llévalu’l Gremiu d’Escritores Asturies d’Asturies, que ta conformáu por cerca de venti editoriales del país, con fondu editorial n’asturianu y en castellán.

La Conseyera de Cultura y Turismu, Encarna Rodríguez Cañas y otres autoridaes inauguraron la Feria esti vienres, xunto a la Infanta Elena de Borbón, que recibió dellos llibros n’asturianun como presente.

La caseta 360 acueye a los editores, que van amosar más de 400 títulos de temátiques que van dende la gastronomía a la lliteratura infantil, la narrativa n’asturianu y castellán, guíes, mitoloxía, cultura asturiana, ensayu y llibros de gran formatu de pintores asturianos.

Ente les actividaes programaes, una conferencia del escritor y cineasta Gonzalo Suárez, baxo’l títulu “Asturies, el llibru y la mirada”, asina como una tertulia sobre’l panorama lliterariu na que van participar los escritores Ricardo Menéndez Salmón, Xuan Bello y José Luis García Martín, el profesor Álvaro Ruiz de la Peña y la presidenta del Gremiu d’Editores d’Asturies, Marta Magadán.

Tamién va celebrase un alderique sobre la prensa cultural na que van intervenir responsables de diarios estatales y asturianos. Na xornada de pieslle va intervenir el ganador del Premiu Asturies Xoven de Narrativa 2007, David Barreiro Rodríguez, autor de “Relatos posindustriales”, y va celebrase un recital dedicáu al poeta Ángel González.

L’escritor y profesor candasín Xurde Fernández algamó con “Díes d’Iviernu”‘l premiu del Concursu de Creación Lliteraria “Llorienzu Novo Mier” 2008 que, sigún anunció Ana Cano na comunicación del fallu va dedicase tamién a la poesía na convocatoria añal de 2009.

El xuráu del galardón d’esti añu formáronlu Miguel Ramos Corrada como presidente, Carlos Rubiera Tuya como vocal y Xosé Ramón Iglersias Cueva como secretariu.

L’escritor Josep Carlos Laínez ganó’l Concursu Teatru de l’Academia con Thule por decisión d’un xuráu formáu por Miguel Ramos Corrada como presidente, Adolfo Camilo Díaz como vocal y Marta Moria como secretaria.

Inaciu Galán, Xosé Lluis Campal y Aurora Sánchez foron respeutivamente los galardonaos col premiu Federico Fierro Botas polos sos trabayos “Poesíes asturianes en Nostalgia” y “Cosiquines de pocu más o menos, qu’algamaron accésit de 150 euros, nel casu de Galán y “Poesíes non recoyíes de Marcos del Torniello de 1899 a 1930” ganador d’un accésit de 300 euros por Campal.

El xuráu del premiu tuvo formáu por Ana María Cano, como presidenta, José Luis García Arias como vocal y Corsino García faciendo de secretariu.

La Feria del Llibru de Madrid, qu’entama esti vienres, va acoyer delles actividaes rellacionaes cola lliteratura asturiana, yá qu’Asturies, ye la comunidá autónoma convidada nesta edición.

El Pabellón Carmen Martín Gaite va acoyer trés actividaes que tienen como fin amosar la cultura d’Asturies. En primer llugar, Gonzalo Suárez va impartir la conferencia inaugural d’estes actividaes, que continuarán con una mesa redonda que llevará por títulu “Asturies, los llibros y la mirada”, na que s’abordará’l panorama actual de la lliteratura que se fai nel país.El Gremiu d’Editores d’Asturies va tener el so espaciu, onde presentarán y firmarán llibros autores como María Luisa Prada y Miguel Rojo.

L’autora xixonesa ta acabantes espublizar “Ventiocho díes”, la so primer novela, la hestoria d’una llucha, de la llucha pola vida. Vivir o morrer ye’l dilema que Teo, tres ventiocho años en coma, ha decidir en ventiocho díes. Siguir siendo un muertu viviente o morrer dafechu. Parábola de la vida, metáfora de la muerte, Ventiocho díes sabe mantener la tensión en quien s’adientra peles sos páxines dures y al empar amables, buscando peles vueltes de la vida, lo que la fai digna de vivila y, a la contra, lo que pue facer al ser humanu naguar por dexar el mundu.

Cristina Muñiz Martín (Xixón, 1953) ye, amás de narradora, creadora de monólogos, escritora de guiones radiofónicos y amante del teatru. Nesta mesma editorial tien publicaos dos volúmenes de cuentos (Onde pisen poques güelles, 2005 y El buscador d’hestories, 2007) y dellos monólogos nos llibros conxuntos Ente muyeres (2007) y Pa echar unes rises, antoloxía de monólogu modernu (2008).

La editorial “La Cruz de Grado”, asoleyó un llibru dedicáu a los páxaros asturianos escritu pol espertu ornintólogu Miguel Ángel García Lado. Nel llibru fálase de les diverses aves que se pueden atopar n’Asturies y de toles sos característiques, siempres con bones ilustraciones y esquemes fechos a costafecha pal manual.

L’autor “Naturaleza de Asturias: Aves” ñació en Bisuyu (Cangas del Narcea) en 1949. De formación autodidacta ye un apasionáu naturalista y collaborador del ornitólogu Alfredo Noval. Amás, ye miembru de la Sociedá Española d’Ornitoloxía. Tien dellos ensayos de temática asturiana.

L’asociación Cambalache, con sede na cai Martínez Vigil d’Uvieu, cellebra esta selmana, del 21 al 24 de mayu la so particular Feria del Llibru con dellos actos culturales. El miercoles 21 a les 19:30 hores, entama’l programa cola presentacion del documental Itoitz hustu arte (Hasta vaciar Itoitz) d’Eguzki Bideoak alredor de la llucha escontra la construcción del pantanu d’Itoiz en Navarra.

Pal xueves 22 de mayu ta prevista la presentación del llibru “Frontera sur. Nuevas políticas de gestión y externalización del control de la inmigración en Europa” col co-autor Eduardo Romero. La cita ye a les 19:00 hores pa darreu siguir con un recital de poesía al cargu de Silvia Cuevas.

El vienres a les 19:00 hores va presentase’l llibru “Mi cuerpo es un campo de batalla. Análisis y testimonios”, del Colectivu Ma Colère; a les 21:00 hores hai homenaxe a Eva Forest y la editorial Hiru, con Santiago Alba Rico y el grupu de teatru de Cambalache “Otra tierra”.

La última xornada, ya de sábadu, va cuntar (19:00 hores)con un debate sobre capitalismu nel que van participar Carlos Fernández Liria y Santiago Alba Rico. A les 21:00 hores van presentase en públicu tres poemarios de la editorial Libros de la Herida: “Todas las puertas abiertas”, de Pedro del Pozo; “Compañero enemigo”, de Juan Antonio Bermúdez, y “La criminal pasión de poseer”, de Manuel Fernando Macías. A les 22:00 hores y pa pone-y el ramu a la selmana, los poetes Miguel Ángel García Argüez, Jose María Gómez Valero y David Eloy Rodríguez, del colectivu andaluz “La Palabra itinerante” ufren un recital.

El Conceyu de Piloña convocó’l Primer Concursu de Narraciones Curties n’Asturianu “Conceyu Piloña”, un compromisu del actual equipu de gobiernu municipal formáu pol PSOE, y que preside l’Alcalde, Camilo Montes, y el conceyal del Grupu Mistu “Allende”.

El concursu ta abiertu a toles persones que quieran participar y los trabayos presentaos tendrán que tener ente trés y cinco fueyes. Los mesmos tendrán de presentase na Casa Cultura de L’Infiestu, enantes del 15 de xunu. El fallu del xuráu va dase a conocer ente la selmana del 14 al 20 de xunu y la entrega del premiu, va facese’l 24 de xunu, na Casa Cultura. El primer premiu ta dotáu con 1.000 euros y el segundu con 700 euros, amás d’un terceru en llibros.

El concursu ta patrocináu pola Caxa Rural y el periódicu El Fielato.

BASES I CONCURSU DE NARRACIONES CURTIES “Conceyu Piloña”

L’Ayuntamientu Piloña, axuntando los buenos puxos pol xorrecimientu del asturianu oriental, del periódicu del Oriente “EL FIELATO” y de la CAJA RURAL d’INFIESTU, convoca el Primer Concursu de Narraciones Curties “Conceyu de Piloña”con igua a les siguientes

1/ El primer premiu tien 1.000 euros de dotación y el segundu 700. Tales cantidaes podrán dividise’n dos partes iguales si al xuráu -y cuaya. Habrá tamien un premiu en llibros d’una cuantía paecía. Tamien podrán dexase ensin dar,si la calidá de los trabayos nun aportase l’altor camentáu

2/ Presentase ye llibre pa toles presones que quieran. Los trabayos tienen que ser orixinales, nun tar asoleyaos en daque sitiu y nun tar premiaos n’otros concursos.

3/ El xuráu tará nomáu ente presones arreyaes al ámbitu de la llingua asturiana

4/ Los trabayos tarán escritos en llingua asturiana, nun tendrán menos de tres fueyes ni más de cinco, en lletra 12, per un solu llau.

5/ Apurriránse o empobinaránse los trabayos a la Conceyalía de Cultura del Ayuntamientu Piloña, C/ Covadonga, númberu 9, antes del día 15 de xunu en dos sobres zarraos nos que s’escribirá perfuera “I Premiu Conceyu Piloña de Narraciones Curties”, faciendo costar l’ entitulamientu del trabayu y el nomatu l’autor. Nun sobre enxertarase el trabayu por triplicáu y nel otru los datos del autor y númberu del telefonu de contautu. Puen mandase pel correu, pero nun s’almitirán los que lleven nel matasellos fecha de dempues de la dicha enriba.

6/ El Periódicu “El Fielato” asoleyará el premiáu cuando -y pete. L’Ayuntamientu Piloña reservase el drechu d’asoleyar los trabayos premiaos. Tamien podrá asoleyar les obres non premiaes, previu acuerdu col autor.

7/ Los trabayos que nun se premien tornaránse a los autores, si lo piden, nel mes siguiente a dar a conocer el fallu. Despues d’esti plazu nun habrá que guardalos.

8/ Los tracamundios, enquívocos y escaezos que nun tuvieren nestes bases, resolveralos L’Ayuntamientu y escontra la so decisión nun cabe retruque daque.

9/ El fallu del xuráu darase a conocer nos medios de comunicación la selmana del 14 al 20 de xunetu. El premiu entregarase nun autu na Casa Cultura el Xueves 24 de Xunetu, a les 20 hores, onde los premiaos tan obligaos a lleer la so obra en públicu.

Faustino Zapico, historiador natural de Mieres, va presentar el so llibru “La revolución de 1808 o l’aniciu de la historia contemporanea d’Asturies” esti xueves a les 20:00 hores na sala de conferencies del Antiguu Institutu de Xixón. Esti volume, editáu por Trabe, fai un repás de tolo qu’aconteció en mayu de 1808 n’Asturies, dando-y especial relevancia al fechu de qu’aquello foi’l puntu de partida de la hestoria contemporanea d’Asturies.

Faustino Zapico Álvarez ye licanciáu n’Hestoria y Xeografía na Universidá d’Uvieu y profesor d’hestoria en dellos centros de secundaria. Ta preparando una tesis doctoral sobre les corrientes federalistes y autonomistes na Asturies contemporánea. Otramiente ye, dende 2007 el secretariu xeneral d’Izquierda Asturiana (IAS).