Lliteratura

La nueva editorial Araz, anunció güei la presentación, pal próximu xueves, 10 de xunetu, nel Salón d’Actos del Centru Municipal de L’Arena y a les ocho la tarde, del so proyectu editorial. La empresa esplicó que ye “un proyeutu que naz col enfotu d’ufiertar a los llectores asturianos una serie d’obres que pol so valir científicu y rigor metodolóxicu van merecer l’atención del públicu”.

Según los responsables de la casa, “la prioridá d’Araz Llibros ye abrir al llector a nuevos campos de conocimientu, hasta agora mui poco o nada trataos na nuesa llingua y, a lo menos na so primer etapa d’esistencia, con dos oxetivos claros: el xéneru ensayísticu como exa de les obres (l’ensayu na so estaya científica, técnica o humanística) y l’usu de asturianu como llingua vehicular de les publicaciones”.

Nel actu tarán los autores de los trés primeros títulos editaos por Araz Llibros: Faustino Zapico Álvarez, autor de “El nacimientu d’una nación. Historia de Sudáfrica”; Xabiel García Pañeda y Rubén Sánchez Antuña, autores de “Dos visiones asturianes de les nueves tecnoloxíes”; y David Guardado Diez, autor de “Llingua estándar y normalización llingüística”.

Esta selmana apaecía nes llibreríes el primer estudiu sobre’l Mirándés y primera obra de Leite de Vasconciellos, que namai tenía 24 años cuando espublizare esti “Dialecto Mirandez”.

La obra foi premiada aen Francia en en 1883 poles informaciones qu’ufría sobre la nueva llingua descubierta pala ciencia llingüística nel territoriu portugués.

El MIrandés ye la variante de la llingau asturiana que se fala en Miranda de Douro y ta reconocida como oficial pa esi territoriu na llexislación del estáu vecín.

Enllaz al llibru de Leite de vasconcellos

“Lliteratura”, la revista lliteraria asturiana espublizada pola Academia de la Llingua Asturiana y dirixida por Xosé Bolado, ta acabante de ver un númberu nuevu nel mercáu, el correspondiente al añu 2008, que suma 25 volúmenes a la llarga trayectoria de la publicación y qu’inclúi rellatos, poesía, ensayu y una entrevista d’Elena González a Milio R. Cueto.

La revista, ilustrada n’esti casu con semeyes de Tino Álvarez, ábrela’l rellatu “Sidro” d’Alberto Álvarez Peña, siguiendo con “Nun tocar” d’Iris Díaz Trancho, Impresiones d’Henrique Facuriella y “L’encuentru” de Pablo Texón Castañón, que pieslla la estaya de narrativa.

La estaya de poesía ta conformada polos poemes “Voluntá d’andarina”, “Llaves”, “Había” y “Les señes” de Lourdes Álvarez García; “Al compañeru”, de Xosé Bolado y “Tornar per Felipe V”, “18:44”, “El silenciu de la muerte”, “Lo efímero” y “Tierra Podre” d’Inaciu Galán y González.

Carlos Rubiera con “El compromisu del escritor asturianu más p’allá de lo estético” y Xuan Xosé Sánchez Vicente con “Sobre Don Enrique y el so Los nuevos bablistas”, conformen la estaya d’ensayu.

Pieslla la publicación una prestosa entrevista d’Elena González a Milio Rodríguez Cueto y dos crítiques, una de Paz Fonticiella sobre la novela de Dolfo Camilo Díaz “Imago” y un comentariu sobre la obra de Paquita Suárez Coalla, de Marta Mori.

L´Asociación de Vecinos “L´Horru” del Carabayedo ta acabantes d’abrir el plazu pa presentase al segundu concursu de micorrellatos n’asturianu. El certame cunta col sofitu de la Estaya de la Llingua d´Avilés y faise por mor de les fiestes de San Roque, que se celebren nel barriu avilesín ente’l 23 y el 24 de xunu.

Cada persona podrá participar con un máximu de trés rellatos. Nengún testu podrá pasar de les 500 pallabres. El tema de los mesmos ye llibre y los interesaos en participar van tener que los unviar enantes del 4 d´agostu a les 14.00 hores al corréu avvelhorreo@yahoo.es

Los testos tendrán que tar en formatu word y tar encabezaos pol títulu y roblaos con nomatu. El ganador del concursu recibirá un premiu de 300 euros.

Daniel Estrada Gómez-Acebo foi el ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so undécima edición. El primer premiu, dotáu con 800 euros, foi pa la so obra “La mano na ventana”. L’autor, cántabru emigráu en Barcelona, yá ganare esti añu’l XI Concursu de Cartes d’Amor del Conceyu d’Ayer na categoría de llingua asturiana.

El segundu premiu, dotáu con 500 euros, foi pal cuentu “Vaciáu de copes”, de l’avilesina Luisa Méndez Fernández, y el maliayés David Manuel Rivas Infante algamó’l tercer premiu, al que se-y apurren 350 euros, con “Un mediudía de xunetu”.

La entrega de premios va tener llugar na Casa la Cultura de Santuyano, de magar les 19’45 hores, el prósimu vienres, día 4. L’actu, nel que se fadrá llectura pública del cuentu ganador y que cuntará cola presencia de José Emilio González Aller, Alcalde de Bimenes, finará cola actuación de Lluis Antón González, que representará los monólogos “Los asturianos al volante” y “Les vacaciones”.

La editorial de Lisboa “Apenas Livros” ta acabante espublizar le primer llibru de poemes en portugues, del escritor asturianu, investigador y miembru del RIDEA, Xosé Lluis Campal.

El cuaderu titúlase “A paixão” (La pasión) y ye pal autor “un modestu cuadernu con testos escritos cola mayor veneración hacia la llingua de Camões”. Campal escribió los poemes, según cuenta, “nuna estancia braniega en Coimbra”.

El conceyu lleonés d’Astorga y l’asociación La Caleya convocaron l’añu pasáu’l primer Certame Lliterariu “La Caleya”, n’aquel casu pa rellatu curtiu. Les dos organizaciones repiten esti añu “nes puertes del 1100 aniversariu de la capitalidá lleonesa del nuesu reinu hestóricu y col envís de promocionar la creación lliteraria na nuesa llingua” la convotoria, añadiendo nesti casu una categoría de poesía.

El certame entamó a convocase en coincidencia cola nueva reconocencia del lleonés pol Estatutu d’Autonomía de Castiella y Llión y col sofitu la Conceyalía de Cultura Tradicional y Valores Autóctonos del Ayuntamientu d’Astorga y del Institutu Lleonés de Cultura de la Diputación de Llión.

Nel Certame puen participar tolos ciudadanos de la Unión Europea a títulu individual y con un únicu trabayu que nun seyan ganadores na mesma modalidá (rellatu/poesía) del primer premiu nas cuatro ediciones anteriores d’esti certame. Los trabayos han de tar escritos en llonés; almítense en cualquiera de las variedaes dialectales del dominiu llingüísticu asturllionés.

El tema, nesta convocatoria, ye llibre masque se valorarán especialmente los trabayos al rodiu de la conmemoración del Reinu de Llión. La obra ha de ser orixinal, inédita y non galardonada anteriormente en nengún concursu lliterariu nin con outru premiu o distinción.

La extensión mínima de los poemarios presentaos ha ser de 100 versos y la máxima de 250. Nel casu de los rellatos, la máxima ye de 10 páxines.

El plazu de presentación acaba’l 30 de setiembre de 2008 y los trabayos tienen que s’unviar a “Certame Lliterariu La Caleya” Apartáu de Correos 187 – 24700 Astorga (Lleón)

Los premios son de 400 € y diploma pal primeru de poesía y rellatu; 225 € y diploma pa segundu premiu de les dos categorías; 100 € y diploma pa los terceros y un diploma pa dambos dos cuartos gallardonaos.

L’añu pasáu ficiéronse colos premios participantes de tol dominiu llingüísticu asturianu: Xosepe Vega, autor d’Astorga, Emilio Gancedo Fernández de la ciudá de Lleón, Francisco Javier Pozuelo Alegre, de la llocalidá lleonesa de Villarejo, l’autor xixonés Inaciu Galán y González, Álvaro Lobato Fuertes, de Lleón, María Rosario Martínez Domínguez de La Bañeza, Lleón, María José Zurrón de Estal, de Zamora, y José Alfredo Hernández Rodríguez, tamién zamoranu.

Güei, a les seis de la tarde, el “LABcafé” del Centru d’Arte y Creación Industrial de la La Universidá Llaboral de Xixón va acoyer güei la celebración d’un actu d’homenaxe de los poetes asturianos al poeta fináu va dellos meses, Ángel González. L’actu ta organizáu pol Gobiernu d’Asturies y va cuntar cola participación d’autores n’asturianu y en castellán, ente los que van tar Antón García, Xuan Bello o Alejandra Sirvent, amás de dellos cantantes: Miguel Ríos, Pedro Guerra, Toli Morilla, Luis Pastor y Paco Ortega.

L’actu va tar presentáu Tete Bonilla y va cuntar cola presencia del Presidente Vicente Álvarez Areces. Caún de los autores va recitar un poema de so, mientres que los cantantes van musicar poemes de González y cantar dellos temes d’ente los asturianos preferíos pol poeta.

Nel recital participen Francisco Álvarez Velasco, José Luis Argüelles, Javier Almuzara, Juan José Barral, Xuan Bello, Aurelio González Ovies, Sofía Castañón, Alejandro Céspedes, Pelayo Fueyo, Antón García, Javier García Cellino, Herme G.Donís, Julio Rodríguez, Javier Lasheras, Natalia Menéndez, José Luis Piquero, Miguel Rojo, Rubén Rodríguez, Alejandra Sirvent, Inés Toledo y Miguel Alarcos.

El mozu escritor Rubén d’Areñes, va presentar esta tarde a les 20 hores na Llibrería Bertrand d’Uviéu, asitiada nel Centru Comercial Espaciu Buenavista, el so primer llibru, el poemariu “Los venticinco pasos”, que ganó la V edición del Premiu “Nené Losada”.

La obra edítala la editorial Universos y xunto al autor van tar Pablo Rodríguez Medina, escritor y editor d’Universos y como presentador, l’escritor José Luis Rendueles.

Mañana xueves, a les ocho la tarde, Cristina Muñiz va presentar el so últimu llibru, el volume de rellatos “Kárias”, nel Centru Social de Les Vegues, en Corvera. L’autora xixonesa ta acabantes espublizar tamién “Ventiocho díes”, la so primer novela.

Cristina Muñiz Martín (Xixón, 1953) ye, amás de narradora, creadora de monólogos, escritora de guiones radiofónicos y amante del teatru. Nesta mesma editorial tien publicaos dos volúmenes de cuentos (Onde pisen poques güelles, 2005 y El buscador d’hestories, 2007) y dellos monólogos nos llibros conxuntos Ente muyeres (2007) y Pa echar unes rises, antoloxía de monólogu modernu (2008), acabante de salir al mercáu.