Lliteratura

Cola novela “Letras Canallas” l’autor xixonés José Carlos Díaz Pérez fízose col I Premiu Lliterariu Ciudá de Noega.

El xuráu tuvo formáu por Dña. Toti Martínez de Lezea, Dña. Marta Magadán Díaz, Dña. Raquel Rodríguez Friera, D. Antonio Valle Cobreros, D. Justo Vilabrille, Dña. Beatriz Junquera Cimadevilla y siendo Presidente del mesmu D. Vicente Gotor Santamaría, Rector Magníficu de la Universidá d’Uviéu.

Alcordaron que de les cinco noveles finalistes nel I Premiu Lliterariu Ciudá de Noega: “El olor de las camelias”; “Letras canallas”; “El canto de la cacatúa”; “Bucasitios” y “Cuando la bruma se desvanece” otorgar por mayoría’l Premiu a la obra presentada col títulu “Letras canallas” que participó baxo l’alcuñu “Ricardo López Merino”.

L’escritor Xandru Fernández algamó la XIV edición del premiu de poesía en llingua asturiana ‘Xuan María Acebal’, qu’entama la Conseyería de Cultura y Turismu del Principáu, pol poemariu tituláu ‘Les vides incompletes’, según s’asoleyaba esti vienres al mediudía.

El xuráu, presidíu pola directora xeneral de Promoción Cultural y Política Llingüística, Consuelo Vega Díaz, apautóse n’escoyer la obra de Xandru García ente les otres nueve que participaben nesti premiu dotáu con 7.000 euros por unanimidá, destacando la espresividá del llinguaxe y el dominiu y variedá de los recursos formales al serviciu de la construcción de los poemes”.

Xandru Fernández, ñacíu en Turón nel 1970, ye llicenciáu en Filosofía pola Universidá d’Uviéu y profesor nel Institutu d’Enseñanza Secundaria (IES) de Lluanco, considerándose como ún de los autores más productivos de la segunda xeneración del Surdimientu, polos sos cuatro poemarios y ocho noveles en llingua asturiana, que s’axunten a la so faceta de lletrista col grupu de rock Dixebra. Xandru ya fore reconocíu con premios como’l ‘Xosefa Xovellanos’ de novela (en 1994 y 1999) o’l mesmu ‘Xuan María Acebal’ que ganó tamién nel 2000.

L’escritor Dolfo Camilo Díaz fízose col Premiu Xosefa Xovellanos de novela n’asturianu col trabayu titiláu “Advenimientu”. Camilo Díaz ganare yá esti gallardón, que llega esti añu a la so edición XXIX, en trés ocasiones anteriores, la última nel añu 2006 por “Imago”. El xuráu, presidíu pola Directora Xeneral de Promoción Cultural y Política Llingüística, Consuelo Vega Díaz, premió a la novela por mayoría pente los trés trabayos qu’optaben a esti premiu, dotáu con 7.000 euros.

Pal xuráu la obra de Camilo Díaz “supón una renovación temática de la narrativa asturiana”.

Dolfo Camilo Díaz (Caborana, 1963), hestoriador y miembru de l’Academia de la Llingua Asturiana, ye narrador y tien escrites tamién obres de teatru, ensayu, amás de dedicase nel pasáu a la música, el periodismu y sobremanera la xestión cultural. Amás, anguaño, ye miembru del Conseyu Asesor de la RTPA.

La edición dixital d’El Comercio ufre dende esta selmana la edición del nuevu llibru de Vanessa Gutiérrez nel formatu conocíu como “bookclip”. El “bookclip” o “Vidiu-llibru” ye una versión d’un llibru fecha con imáxenes, nesti casu, con un audiovisual dirixíu por Ramón Lluís Bande y producíu por Ámbitu.

Según los autores, esta esperiencia nun ye daqué “a lo que tea mui avezao la lliteratura asturiana, nin tampoco les lliteratures vecines, pero sí dalgo que se vieno faciendo habitual nes lliteratures anglosaxes”.

Bande comentó como “amás de valir de soporte publicitariu, tien una vocación estética inegable, la voluntá de facer una obra d’arte a partir d’otra”, anque aclario que “con too y con eso, nun se trata d’una versión cinematográfica de «La cama»”.

La cama:

El centru asturianu de Madrid ufrió esti martes un homenaxe póstumu al poeta asturianu, Premiu Príncipe d’Asturies de les Lletres, y Mazana d’Oru, Ángel González, nun actu nel que Fernando Beltrán recitó dellos poemes del autor.

L’actu entamó coles pallabres de Cosme Sordo, Presidente del Centru Asturianu de Madrid, que presentó a Miguel Munárriz, Delegáu del Principáu d’Asturies en Madrid y perconocedor de la obra d’Angel González, que faló con gran ciñu de la vida y obra del poeta carbayón. Darréu, d’elli y de la llectura de poemes por Fernando Beltrán, intervino la viuda del poeta, Susana Rivera, que amosó’l so agrademientu y pronunció unes emotives y sonores pallabres sobre la vida del so home, al tiempu que cuntaba delles anécdotes de los sos viaxes a Asturies.

El diariu “El Comercio” entama esti domingu próximu una colección de noveles “onde Xixón y los xixoneses son protagonistes”, un total de 15 noveles ente les que s’atopen delles escrites n’asturianu, como “L’aire les castañes”, de Vicente García Oliva y “La ciudá encarnada”, de Pablo Antón Marín Estrada.

Amás d’estes obres, la colección recueye “Corazón de playu”, de Manuel Vega, “Sonatina gijonesa” de José Fernández Barcía, “La balada del pitbull” de Pablo Rivero, “La borrachera” de Luis Fernández Roces, “Al final del Sendero” de Carlos García, “La polvora y la sangre” d’Óscar Muñiz, “Una semana muy negra” de Pedro de Silva, “Gijonismos” de Pachín de Melás, “Manolita Cálvez” d’Atáulfo Friera, “El onceno mandamiento” de Faustino González-Aller, “Vivimos de noche” de Luciano Castañón y “El calvario de piedra” de Joaquín Alonso Bonet.

El primer númberu, “Rosa de Natahoyo” d’Alfonso Camín, va tar nos quioscos el domingu que vien, 16 de payares, al preciu de 1’95 euros. La colección ta patrocinada pol Conceyu de Xixón y Caxastur.

“El demonio te coma las orejas [1997-2008]. Poesía de no ficción” ye la reedición, revisada y ampliada del primer gran poemariu de David González. Con una llírica estremada de la métrica y la rima, dotada d’un ritmu instintivu, la obra narra la esperiencia vital nos márxenes de la sociedá de quien tropezó con toles piedres que topó al so paso. La delincuencia, la violencia, la cárcel, y la poesía son los capítulos quarrancharon la mocedá de David González, nesta obra que supón l’entamu de la colección “Sensible a les Lletres” de Glayíu Ediciones.

David González, (San Andrés de los Tacones, Xixón, 1964) ye l’autor de En las tierras de Goliat (Baile del Sol, 2008), Algo que declarar (Bartleby Editores, 2007) y Reza lo que sepas (Eclipsados, 2006). Incluyéronlu nuna montonera d’antoloxíes poétiques, ente otres, Resaca/Hankover. Un homenaje a Charles Bukowski (Caballo de Troya, 2008), Poesía para bacterias (Cuerdos de atar, 2008), y La venganza del Inca. Antología de poemas con cocaína (El cangrejo pistolero Ediciones, 2007), antoloxía que coordinó xunto a Vicente Muñoz Álvarez).

El llibru tien 212 páxines y sal al mercáu al preciu de 12 euros, distribuyéndose en centros culturales y llibreríes del país.

L’Asociación Xareos! Xestión Cultural y la editorial “La Cruz de Grau” anunciaron que tán acabante roblar un alcuerdu pa la edición de la revista de lliteratura Formientu, qu’edita Xareos! dende l’añu 2006 cola participación de decenes d’autores mozos qu’escriben en llingua asturiana.

Col alcuerdu, les dos partes, “quieren ameyorar la calidá estética de la edición y la promoción de Formientu”. Según anuncien, nesti momentu Xareos! y La Cruz de Grau “tán rematando los detalles últimos del númberu 4 de Formientu, que saldrá nes próximes selmanes”.

Piloña entrega los premios del Concursu de Cuentos pa Escolinos esti vienres

El Conceyu de Piloña falló estos díes el Concursu de Cuentos pa Escolinos, que s’entama cada añu por mor de les Xornaes de Lliteratura Infantil en Llingua Asturiana. La entrega va celebrase esti vienres, a partir de les siete la tarde, na Casa la Cultura Marqués de Vistalegre de L’Infiestu

Nel certame participaron esti añu más d’un cientu de trabayos presentaos, por escolinos de toles edaes.

Los ganadores d’esti añu son Miguel Llerandi con “El corzu copín”, Juncal Guerrero, con “La castañina aventurera” y Greta García Morán con “El diañu traviesu”.

Amás fueron finalistes los que van darréu: Miguel Sánchez Rodríguez, Celia Méndez, Manuel Espina Monestina, Alejandro Fernández Gutiérrez, Manuel López Gómez, Paula Rodríguez Ortea, Alicia Pavón Blanco, Alejandra Carriles Subirán, Alea de la Parte Fresno, Irene Carreño Varela, Mar Suárez Rodríguez, Natalia González Pérez, Olaya Guerrero Fernández y Yéssica Vargas Barrul.

L’ayuntamientu de Piloña falló güei el so Concursu de Cuentos pa Escolinos del Principáu, que s’entama con motivu de les Xornaes de Lliteratura Infantil en Llingua Asturiana, qu’estos díes se cellebren nel conceyu. El concursu volvió a cuntar esti añu con una bayurosa participación, con más de cien trabayos presentaos, por parte d’escolinos de toles edaes.

Los ganadores d’esta edición fueron Miguel Llerandi con «EL CORZU COPÍN», Juncal Guerrero, con «LA CASTAÑINA AVENTURERA» y Greta García Morán con «EL DIAÑU TRAVIESU».

Tamién resultaron finalistes: Miguel Sánchez Rodríguez, Celia Méndez, Manuel Espina Monestina, Alejandro Fernández Gutiérrez, Manuel López Gómez, Paula Rodríguez Ortea, Alicia Pavón Blanco, Alejandra Carriles Subirán, Alea de la Parte Fresno, Irene Carreño Varela, Mar Suárez Rodríguez, Natalia González Pérez, Olaya Guerrero Fernández y Yéssica Vargas Barrul.

La entrega premios tendrá llugar esti vienres, a partir de les siete la tarde, na Casa la Cultura Marqués de Vistalegre de L’Infiestu, nuna gala, na que los neños y mayores tamién podrán disfrutar d’un cuentacuentos.

Les Xornaes cellébrense dende mediaos d’ochobre na capital del conceyu Piloña, onde se tan entamando, talleres, cuentacuentos, proyeición d’audiovisuales, esposiciones y actividaes de creación lliteraria. Tan entamaes pol Ayuntamientu de Piloña col sofitu d’Asturtoons y la Conseyería de Cultura del Principáu d’Asturies.