Lliteratura

Güei, xueves 22 de xineru a les 19:00 hores na Llibrería Asturiana d’Ediciones Trabe va presentase’l llibru “Recetes con cuentu” de Milio’l del Nido, qu’inclúi les recetes y hestories que cunta del Nido nel so programa de cocina de la TPA. Amás del autor, van tar presentes Blanca Fumanal, ilustradora, y Fernando’l del Paragües. La Llibrería Asturiana ta asitiada na cai Padre Buenaventura de Paredes, 4, Uviéu.

Milio’l del Nido tien espublizaos otros llibros con hestories como “Cuntáronmelo pa que lo cuntara” o la “Hestoria del Club Balmonano Ciudá Naranco”, amás de participar en multitú d’actividaes culturales como cuentacuentos.

L’asociación de Grau ta acabante convocar el so concursu internacional de cuentos nes categoríes internacional y escolar. Los cuentos, de temática llibre van poder escribise n’asturianu y en castellán. El concursu ta dotáu, na categoría internacional, con un primer premiu de 2.000 euros, diploma y espublización del cuentu y un segundu gallardón que consta de 1.000 euros, diploma y espublización del cuentu.

En cuantes a la categoría escolar, esta va dixebrase en dos apartaos, con trés premios caún . La «A», empobinada a los escolins d’Educación Primaria y la «B» a los estudiantes d’ESO, Bachiller y Ciclos Formativos de Grau Mediu.

Los cuentos han unviase a l’Asociación Cultural Valentín Andrés (Apartáu de Correos númb. 7, 33820 Grau, o al Ayuntamientu de Gradu, faciendo constar nel sobre «XVIII Concursude cuentos “Valentín Andrés». El plazu ta abiertu hasta’l 30 d’abril próximu.

Según comenten dende la organización, “el concursu ye tou un ésitu y l’añu pasáu volvió a superar la cifra de trabayos presentaos”, en total presentáronse 800 “procedentes de tol mundu”.

Bases completes del concursu

La editorial Pintar-Pintar ta acabante ceder gratuitamente a les escueles y Cases de Cultura asturianes interesaes les esposiciones de cuatro de los sos álbumes ilustraos n’asturianu, montaes en llámines de 50 por 70 centímetros. Los títulos disponibles son «Chispina» d’Aurelio González Ovies, «Poemes de Carambelu» de Marisa López Diz, «De qué tará fecha la lluna» de Miguel Rojo y «El poema que cayó a la mar» d’Aurelio González Ovies.

Con esta propuesta, patrocinada pola Conseyería de Cultura d’Asturies, Pintar-Pintar Editorial quier animar a los neños a esfrutar tamién cola llectura de llibros n’asturianu y qu’estos llibros resulten más visibles nos centros escolares, les sos biblioteques y les biblioteques públiques de cualquier puntu d’Asturies.

Les persones o instituciones interesaes puen apuntase a esta iniciativa nel teléfonu 985 22 91 55.

L’escritor Miguel Allende, va presentar güei, viernes 16, a les ocho la tarde, el so poemariu “Güelgues del gallón”, col que ganó en en 2007 el prestixosu premiu de poesía “Teodoro Cuesta”.

L’actu organízalu l’asociación Cauce del Nalón nel CIDAN de La Pola (Llaviana)

La editorial gallega “Edicións Positivas” ta acabante asoleyar la última de les ediciones d’Hestoria universal de Paniceiros, tornada nesti casu a la llingua gallega. La obra, asoleyanda orixinalente n’asturianu, viere yá impresa edición en castellán y catalán.

Pal editor gallegu, Francisco Macías, la obra ye “ún de los testos, dientro de les lliteratures peninsulares, más emocionantes escritos nos últimos tiempos”.

La obra ye una de les más vendíes de la lliteratura asturiana y algamó ésitu de crítiques na so salida al mercáu en castellán, dando a conocer al autor n’Asturies, con muncha más sonadía que colos sos llibros n’asturianu, en pallabres del propiu Bello.

Según anunció estos díes la Conceyalía de Cultura del Ayuntamientu de Mieres, que preside Diana González, el fallu del xuráu del XVIII Premiu de Poesía Teodoro Cuesta de poesía, dio como ganador d’esta edición al escritor Xosé Ánxelu Gutiérrez Morán, que yá nel 2004 ganare, ex aequo con Marta Mori, el mesmu gallardón, col poemariu “Países”.

El poemariu ganador titúlase “Diversa memoria”. Formaron el Xuráu: Miguel Allende, como ganador exaequo de la pasada edición d’esti Premiu; Luis Casteleiro por parte de la Oficina de Política Llingüística d’Asturies; Esther Prieto per parte de la Editorial Trabe; Vicente García Oliva per parte de l’Academia de la Llingua Asturiana ya Ismael González Arias de la Casa Cultura de Mieres, actuando como presidenta Diana González, Conceyala de Cultura del Ayuntamientu de Mieres y como secretaria Laura Marcos, técnica del Serviciu de Normalización Llingüística del conceyu.

L’avilesín Gutiérrez Morán ye Doctor en Bioloxía nel Centru Oceanográficu de Xixón, compaxinando esti llabor col cultivu de la poesía. Nel añu 2002 algamó’l segundu premiu nel Concurso de Cuentos pola Oficialidá de Bimenes

Pa estos primeros díes del añu l’Asociación cultural zamorana Furmientu fai anuncia de l’apaición del nùmberu 15 d’El Llumbreiru con interesantes noticies y artículos sobre la realidá llingüística en Zamora y notros territorios asturfalantes y que va poer descargase na so web.

El Llumbreiru consta de varios apartaos, con unu dedicáu a les noticies y otru dedicáu a la lliteratura y a la investigación. Nel apartáu de la lliteratura atopamos nel últimu númberu nun artículu sobre la lliteratura n’asturllionés de Zamora:”El malvís”, por J.Alfredo Hernández; un artículu sobre Arcaísmos de Pedro Gómez y otru sobre “Nombres de calles y plazas en leonés en la provincia de Zamora: La Carballeda” de J.Alfredo Hernández.

Amás úfrense delles noticies sobre distintes cuestiones:

– “Furmientu solicita que’l llionés seyá declaráu Bien d’Interés Cultural”

– “A la venta na llibrería Semuret las últimas publicaciones en llionés”

– “I Conceyu Internacional de Llingua Asturiana”

– “Curso de asturleonés en Astorga”.
Web de l’asociación Furmientu

La escritora barcelonesa Maruja Torrres ganó esti día’l Premiu Nadal 2009, dotáu con 18.000 euros, pola novela ‘Esperadme en el cielo’, escrita en primer persona por una escritoria qu’al morrer se xunta nel cielu colos sos amigos, Terenci (Terenci Moix) y Manolo (Manuel Vázquez Montalbán).

El finalista d’esta edición foi’l vallisoletanu Rubén Abella con ‘Libro del amor esquivo’. El premiu Josep Pla 2009 de prosa en catalán tamién s’entregó esti dia y foi pal presentador de radio Gaspar Hernández con ‘El silencio’.

La editorial La Cruz de Grau y Xareos! Xestión Cultural tán acabante asoleyar el númberu 4 de la revista de lliteratura Formientu, una publicación que busca espublizar la obra de los autores más mozos de la lliteratura asturiana, dando a conocer a les nueves promeses de les nueses lletres. La primer presentación va celebrase esti sábadu 3 de xineru de 2009, a les cinco la tarde, nel I Salón del Llibru Asturianu de Grau.

Nel númberu cuatro vuelven a asoleyase les voces de munchos de los mozos escritores que yá vienen collaborando nel pasáu con Formientu, como Verónica Canel, Xaime Menéndez Llope, Héctor Pérez Iglesias, Ricardo Candás, Benxa Pérez, Elizabeth Felgueroso y Jorge Fernández García. Pero al mesmu tiempu síguense abriendo nueves siendes lliteraries con voces nueves nesta revista como les de Xurde Fernández, Inacio Rodríguez-Solar o Berto García, y con otres inédites dafechu, como les de Laura Marcos Domínguez, Javier Cayado, Celia Fernández Loredo o Fran Melero «Frantxu».

Formientu ñació nel añu 2006 dirixida por Inaciu Galán y embaxo la edición de Xareos! y dende entós vien espublizándose con regularidá, axuntando a los escritores más mozos del panorama asturianu d’anguaño. En 2008 Ediciones La Cruz de Grau asumió la xestión editorial de Formientu.

La presentación del númberu cuatro va tener llugar esti sábadu, 3 de xineru, a les cinco la tarde nel I Salón del Llibru Asturianu de Grau y va cuntar cola presencia de dellos autores, amás del director de la publicación, Inaciu Galán, y el responsable d’Ediciones La Cruz de Grau, Cesar García Santiago.

El I Salón del Llibru Asturianu va celebrase en Grau dende güei vienres y hasta’l domingu que vien, 4 de xineru. El Salón ta organizáu pola Conceyalía de Cultura de Grau y el Gremiu d’Editores d’Asturies, cola participación de les seis llibreríes de Grau (Santa Ana, Trasgu, Orbayu, Las Dos Vías, Ana y Sandra) asina como la Biblioteca Municipal de Grau “Valentín Andrés Álvarez”, CEDRO y el Gobiernu d’Asturies. Nel mesmu van presentase les últimes novedaes del 2008 y les primeres apaiciones lliteraries del añu entrante.

El Salón del Llibru va instalase nuna gran carpa de 160 metros cuadraos na Plaza de Los Dolores, cabo la Casa Cultura y La Capiella de Los Dolores, precisamente esti espaciu polivalente municipal de la Capiella de los Dolores tará integráu tamién nel Salón, con horariun de 11 a 14 hores y de 17:30 a 21 hores el vienres; de 11 a 14 y de 16:30 a 21 hores el sábadu y el domingu, de 11 a 15 y de 17:30 a 20:30 hores.

Na inauguración van participar, l’Alcalde de Grau, Antonio Rey, el Viceconseyeru de Cultura, Jorge Fernández León y Marta Magadán, Presidenta del Gremiu d’Editores d’Asturies.

Programa completu:

VIENRES 2
12:00 Inauguración
18:30Ámbitu Hermanos Valle Roso
Mini conciertu”Un pasu más”
20:00 Septem Armando Murias
Presentación y firma”El día que me quieras”

SÁBADU 3
12:00TrabeMilio del Nido
Presentación y firma”Recetes con cuentu”
13:00SeptemXuan Xose Sánchez Vicente
Firma”No mireis al mar”
17:00La Cruz de Grau Revista Formientu
Presentación
18:30SeptemLuis Arias Argüelles-Meres
Presentación y firma¿Volver?
20:00Trabe¡Pa echar unes rises¡
Presentación y actuación

DOMINGU 4
12:00 SeptemJavier García Cellino
Presentación y firma “Círculos de Tiza”
13:00SeptemAntonio Valle
Presentación y firma “Solos”
14:00La Cruz de Grau Estefanía Suárez
Presentación“Idioma sportinguista”
18:00Pintar-PintarGrupo Mestura
Conciertu infantil”Poemes de Carambelu”
19:00Pintar-PintarMarisa López Diz
Presentación”Malva y el paraguas mágico” y “Binoca”