Lliteratura

Esti xueves 26 de marzu del 2009 tendrá llugar la presentación en Xixón del llibru d’ensayu de Xaviel Vilareyo tituláu “Los ámbitos de la Nación Asturiana”, editáu recien por Espublizastur. L’actu de presentación tará a cargu del historiador Jabier Cubero, presidente del Atenéu Cultural Xuan María Acebal, qu’ufiertará una conferencia a tolos asistentes. Llueu fairáse un alderique o debate col autor del llibru que firmará exemplares. La cita ye a les 19,30 nel llar del Atenéu Obreru de Xixón na cai Cuadonga 7 – 1u manzorga.

La lliteratura asturiana d’ensayu da un reblagu importante con esta nueva aportación de Xaviel Vilareyo, nun documentáu ensayu sobre l’asturianidá y sobre la historia del territoriu d’Asturies a lo llargo los sieglos y sobre la permanencia de los rasgos identitarios. Ye la historia la que lexitima’l conceptu de l’asturianidá a lo llargo del tiempu. Con esti interesante trabayu, Xaviel Vilareyo pon al algame de toos la verdadera historia tapecida d’Asturies, la historia d’una minoración física y la denuncia d’una usurpación y d’un olvidu colectivu.

El fechu de que l’ámbitu espacial del país asturianu nun coincida coles llendes alministratives actuales nun significa que se tengan qu’asimilar éstes como l’únicu marcu posible de referencia. La historia real ye imposible escaecela nin traicionala porque con esti llibru tará presente a partir d’agora nel nuesu pensamientu colectivu como asturianos. Un ellaboráu ensayu que pon al descubiertu les interesaes mentires que se ficieron alrodiu la historia de los asturianos. Esti llibru dexa n’evidencia que la historia d’Asturies ye una manipulación interesada de los que pretendieron afitar un robu y un expoliu sobre la tierra asturiana.

El llibru de Xaviel Vilareyo servirá p’abrir los güeyos a munchos asturianos sobre la estafa histórica que supunxo la provincialización n’Asturies, o meyor dicho, la imposición a la trágala de la provincia ovetense y la posterior desasturianización de tol país. A los asturianos se nos pretendió ocultar y tapecer la nuesa historia pa evitar que recuperáremos el nuesu lexítimu llugar nella.

Los Derechos Históricos d’Asturies son irrenunciables porque sinón taríemos renunciando al nuesu propiu ser como pueblu. Esti llibru vien a recordánoslo con aciertu yá qu’olvidar la historia de los pueblos, nel casu d’Asturies pue ser sinónimu d’un suicidiu colectivu imperdonable.

Xaviel Vilareyo (Mieres del Camín, 1967) ye llicenciáu en Derechu pola Universidá d’Uviéu. Escritor, poeta y ensayista en llingua asturiana pertenez a la Tercer Xeneración del Surdimientu. Recibió los premios de lliteratura Vila de Sarria, Elvira Castañón, Valentín Andrés y Xeira de narraciones.

Mari Luz Ponton y Angela Fernandez presentaron xunta Cristian Velasco, de Madú Ediciones, “Catuxa la Bruja” nel I Congresu de Cultura Xapones esti miércoles 18 de marzu. Les dos autores ya ficieren otru cómic Manga, el primeru que se facía n’asturianu, col títulu de “La Maldición” y qu’editara tamién madú Ediciones.

María Luz Pontón y Ángela Fernández presentaron la obra nel trescurrir de la conferencia “El cómic manga: ponte ente dos cultures” que s’inxertaba nel Primer Congresu de Cultura Xaponesa que se desendolca nel Edificiu Históricu de la Universidá d’Uviéu dende’l llunes y qu’aporta esti día a la so fin.

El mesmu miércoles estudióse “L’anime xaponés: analís d’un modelu comunicativu nuevu”, a cargu de Javier Fombona Cadavieco, profesor Titular de la Universidá d’Uviéu. Darréu va proyectase la película: “La tumba de las luciérganas”, d’Isao Takahata).

L’escritor y fíu de la escritora, yá finada, presentó xunto a Esther García, l’editor Alberto Suárez, l’etnógrafu Xosé Ambás y la investigadora de la tradición oral, Marta López Fernández, los cuentos completos d’Eva González, un llibru espublizáu por Ámbitu Ediciones. La presentación tuvo llugar esti martes nel Club de Prensa Asturiana.

La primer conferencia del Congresu de Cultura Xaponesa que se celebra estos díes n’Uviéu, cuntó cola presencia d’Inaciu Galán, como presentador y la escritora valdesana María Esther García como conferenciante, presentando’l llibru de haikus n’asturianu “Faraguyas”.

Galán comentó que’l llibru “tien muncho que ver col espíritu d’esti congresu, l’intercambiu cultural ente xapón y asturies”. Asina mesmo dixo ver en Faraguyas “un llibru xaponés escritu n’asturianu, o un llibru asturianu con espírtiu xaponés”, en resume “80 haiukos prestosos, guapos d’oyer, como pequeñes y delicaes gotes d’orbayu”.

Esther García presentó’l llibru al traviés d’un audiovisual sobre’l que diba esplicando la forma na que llegó a escribir haikus, con exemplos de la so producción. L’autora asturiana nun descartó espublizar la obra traducida al xaponés, si xurde la oportunidá.

Esther García comenta les sos impresiones sobre’l Congresu de Cultura Xaponesa:

L’asturianu Jesús Manuel Martínez ganó’l premiu Premiu Internacional d’Ensayo Jovellanos cola obra ‘Salvador Allende’ pola “escelente espresión lliteraria y altu conteníu testimonial” del ensayu” según afitó’l xuráu, presidíu por Sabino Fernández Camp. El xuráu tamién destacó na so acta la “escelente espresión lliteraria y altu conteníu testimonial”, col que la obra galardonada reconstrúi “al filu de la trayeutoria biográfica d’Allende, pasaxes cruciales de la historia de Chile que poseen a la so vez resonancia internacional”.

‘Salvador Allende’ ye un estensu ensayu biográficu del cabezaleru chilenu, que recueye tanto la so vida personal y familiar como la so trayectoria vital, intelectual y política.

El vieyu Teatru Xovellanos de Xixón, asitiáu na cai del mesmu nome, recibió’l 16 de febreru de 1923 la “Fiesta de la Poesía Asturiana”, una celebración del Atenéu Obreru d’El Llano, na que participaron poetes asturianos del momentu, dando llectura a testos propios y d’autores de tola hestoria lliteraria del país. Fabriciano González “Fabricio” abría l’actu col testu “El bable, alma de la poesía asturiana” y el Vizconde de Campo Grande facía a la fin del actu un discursu nel que s’empodera la bandera d’Asturies, colgada nesi actu de la fachada del teatru.

Esi mesmu añu, y col sofitu de la entós Diputación Provincial, l’Atenéu espublizó una antoloxía colos testos yá citaos y los poemes lleíos na Fiesta, con una parte pa los poetes n’asturianu y otra pa los poetes en castellán. Xuan María Acebal, Xosé Caveda y Nava, Teodoro Cuesta, Benito Canella, Marcos del Torniello, Carlos de la Concha, Pachu’l Peritu, Pachín de Melás, ente otros, conformen la parte escrita n’asturianu.

Güei xueves, dempués de más de 75 años de la espublización de la primer edición d’esta antoloxía, l’Atenéu Obreru de Xixón, vuelve a emprentar esta obra dientro de la colección Deva.

Na presentación, que va entamar a les ocho la tarde na sede del Atenéu, van participar, l’escritor y académicu de l’ALLA, Vicente García Oliva, Boni Ortiz, que va da-y llectura a dellos poemes y Balbina Meana, llicenciada en Filoloxía Hispánica y collaboradora na edición de la reedición.

La cuarta edición del Premiu de les Lletres d’Asturies y la edición décima de los Premios de la Crítica d’Asturies tien abiertu’l plazu pa presentar candidatures nes siguientes modalidaes: Novela, Cuentu, Poesía, Lliteratura Infantil y Xuvenil, Narrativa de non ficción y Columnismu lliterariu n’asturianu y en castellán, con categoríes dixebraes.

En cuantes al “Premio de las Letras de Asturias”, que se concede a un autor ñacíu o residente n’Asturies, con una obra que suponga una aportación especial a la lliteratura. Al Premiu puen presentase candidatures col nome del autor, llugar y fecha de ñacimientu, dirección postal, teléfonu de contactu, nota bio-bibliográfica, asina como una esplicación motivada de los méritos que se consideren oportunos pa la so valoración.

Pa presentar propuestes a los Premios de la Crítica han mandase cinco copies del llibru o artículu hasta’l 30 d’abril. Los llibros han tar espublizaos en 2008, o nos premios meses de 2009, siempres que’l depósitu llegal seya de 2008.

Les propuestes han remitise S.C. Algama S.L. cai Sanz Crespo 23 -1u C. 33207 Xixón. Pa cualesquier dulda pue llamase al teléfonu 985176240 o al corréu lletrónicu : info@escritoresdeasturias.es

El Foru de Creación y Llectura de la Biblioteca de Grau, en collaboración cola Conceyalía de Cultura del Ayuntamientu de Grau, organicen la presentación del poemariu “Un hombre por venir” de Fernando Menéndez, pa güei, xueves 12 de marzu, a les 20 hores na Casa Cultura moscona.

El Club de Prensa Asturiana de La Nueva España, asitiáu n’Uviéu, va acoyer esti miércoles 11 de marzu la presentación del llibru de Miguel Solís “Nosotros, los pexes”. Na presentación, que va celebrase a partir de les siete la tarde, van participar, amás del autor, Xosé Antón González Riaño, profesor de la Universidá d’Uviéu y miembru de l’ALLA y Vicente García Oliva, escritor y miembru de l’ALLA.

El Club de Prensa Asturiana recibió esti vienres la presentación del llibru “La edad del óxido, antología de jóvenes narradores asturianos”, na que participaron Manuel García Rubio, escritor y los autores Sofía Castañón, Natalia Calvo, Pablo X. Suárez, Aníbal A. Menchaca y Diego Díaz.

Nel llibru apaecen rellatos de Alba González Sanz, Aníbal Álvarez Menchaca Diego Díaz , Héctor Gómez Navarro, Héctor Tuya, Laura Casielles, Natalia Calvo, Pablo X. Suárez, Sibisse Rodríguez y Sofía Castañón.

http://laedaddeloxido.blogspot.com/