Lliteratura

El revistín “El Espinete”, espublizáu por un colectivu de lliteratos mozos dende’l conceyu de Cuaña, llega nesti mes de marzu al so númberu 19, celebrando siete años d’actividá del “fanzine cultural de El Espín”.

La revista tien por llingües vehiculares el gallego-asturianu y el castellán, asoleyando la obra d’autores n’eonaviegu, asturianu o castellán, ente otres llingües, según-y pete al mesmu.

Nesti númberu apaecen testos en castellán d’Esther Rubio Díaz y Emilio Ramón Pérez García y Pedro Gilthoniel, de L.luarca; Quino Romero, de Madrid; Randi Montero, de Granada; Javier García López, de Navia; Xurde P. Lejarza de Cuaña; y José Luis Checa de Córdoba. En gallego-asturianu espubliza un testu Moisés Cima Fernández, de Cuaña; y n’asturianu, Inaciu Galán y González, de Xixón.

La revista distribúyese de baldre per biblioteques y llocales d’ociu d’Asturies.

Esti xueves 26 de marzu, a les 19 hores na sede del Atenéu Obreru de Xixón (Cai Covadonga, 7), va desendolcase la presentación del llibru “Los ámbitos de la Nación Asturiana”, de Xaviel Vilareyo. L’actu tá organizáu pol Atenéu Cultural Xuan María Acebal.

Esta nueva aportación de Xaviel Vilareyo ye documentáu ensayu sobre l’asturianidá y sobre la historia del territoriu d’Asturies a lo llargo los sieglos y sobre la permanencia de los rasgos identitarios. Ye la historia la que lexitima’l conceptu de l’asturianidá a lo llargo del tiempu.

Con esti interesante trabayu, Xaviel Vilareyo pon al algame de toos la verdadera historia tapecida d’Asturies, la historia d’una minoración física y la denuncia d’una usurpación y d’un olvidu colectivu. El fechu de que l’ámbitu espacial del país asturianu nun coincida coles llendes alministratives actuales nun significa que se tengan qu’asimilar éstes como l’únicu marcu posible de referencia.

La historia real ye imposible escaecela nin traicionala porque con esti llibru tará presente a partir d’agora nel nuesu pensamientu colectivu como asturianos. Un ellaboráu ensayu que pon al descubiertu les interesaes mentires que se ficieron alrodiu la historia de los asturianos.

Esti llibru dexa n’evidencia que la historia d’Asturies ye una manipulación interesada de los que pretendieron afitar un robu y un expoliu sobre la tierra asturiana. El llibru de Xaviel Vilareyo servirá p’abrir los güeyos a munchos asturianos sobre la estafa histórica que supunxo la provincialización n’Asturies, o meyor dicho, la imposición a la trágala de la provincia ovetense y la posterior desasturianización de tol país.

Pa Vilareyo “el fechu de que l’ámbitu espacial del país asturianu nun coincida coles llendes alministratives actuales nun significa que se tengan qu’asimilar éstes como l’únicu marcu posible de referencia”. Pa camudar esti marcu, Vilareyo “pon al descubiertu les interesaes mentires que se ficieron alrodiu la historia de los asturianos”. Lo que pal autor ye “una manipulación interesada de los que pretendieron afitar un robu y un expoliu sobre la tierra asturiana”. El llibru de Xaviel Vilareyo, comenten dende la editoral “servirá p’abrir los güeyos a munchos asturianos sobre “la estafa histórica que supunxo la provincialización n’Asturies, o meyor dicho, la imposición a la trágala de la provincia ovetense y la posterior desasturianización de tol país”.

Xaviel Vilareyo (Mieres del Camín, 1967) ye llicenciáu en Derechu pola Universidá d’Uviéu. Escritor, poeta y ensayista en llingua asturiana pertenez a la Tercer Xeneración del Surdimientu. Recibió los premios de lliteratura Vila de Sarria, Elvira Castañón, Valentín Andrés y Xeira de narraciones en gallego-asturianu, llingua na que tamién escribe.

Esti miércoles 25 de marzu, a les 19 hores, na Llibrería Asturiana d’Ediciones Trabe va presentase’l llibro “Desandando. Tras las huellas de mi padre, un emigrante asturiano”, de Juan Bautista Velasco, poeta astur-colombiano, fiu d’un emigrante asturianu de Socolinas, conceyu de Salas, a la Colombia de principios del sieglu XX.

Nel actu van intervenir Ángel Valentín Velasco, Francisco Javier García ValledorGonzalo Olmos, Luis Miguel Romero, Inaciu Iglesias y Ánxel Nava.

La Sociedá Humanitarios de Samartín de Morea (Ayer) convoca’l Sestu Concursu de Monólogos “Pepe Campo”. El monólogu tendrá de tratar sobre un tema d’actualidá social, política o cultural, pudiendo tar en versu o prosa, pero siempres n’asturianu, valorándose la correición llingüística y gramatical, asina como’l so calter normalizador.

El llargor de los trabayos tendrá de ser d’un máximu de cuatro fueyes. Premiaráse con 600 € aquel monólogu, ensin asoleyar, qu’a xuiciu del xuráu presente más valir lliterariu.

El plazu d’entrega de los monólogos fina’l 30 d’abril y tienen que se mandar a estes señes: Humanitarios de Samartín, apartáu correos 8, 33.670 – Morea (Ayer-Asturies).

Bases completes del Concursu de monólogos

Esti xueves, a les siete la tarde, la escritora xionesa Cristina Muñiz Martín va tar nel Atenéu de Turón, comentando colos llectores el so primer llibru de rellatos “Onde pisen poques güelles”. L’actividá celébrase dientro de los “Alcuentros col autor” que celebra dende va meses el Serviciu de Normalización Llingüística de Mieres.

El Teatru Toreno va acoyer a partir de les 20,30 hores la obra “La trastienda de los enredos” de l’Asociación Cultural “El Horreo de Barcia” dientro de la Selmana Cultural qu’organiza esti conceyu hasta’l 28 d’esti mes. Mañana miércoles, nel mesmu llugar, a les 20,30 hores va celebrase un recital con testos de Basilio Garrido recoyíos por Neto na obra “Cuentos, paruladas ya versos”, actividá a la que va sumase l’actuación de los cantautores Rafa Lorenzo y Pedro Pereira. Darréu van entregase los premios del concursu cuentos del conceyu.

El xueves, a les 20,30 va celebrase un conciertu del grupu Tuenda. Mientres que’l vienres va ser el momentu pa recordar al homenaxeáu esta selmana, Basilio Garrido.

El sábadu 28 a la mesma hora, va proyectase la película “Carne de gallina” y va ser l’últimu día pa ver la esposición Basilio Garrido” na Sala d’esposiciones de la Casa Conceyu.

Según anunciaron al traviés del blogue de l’asociación, la edición de 2009 de l’Arribada yá tien feches marcaes. Les actividaes d’esti congresu cultural van entamar el 18 de setiembre, llegando al so fin el 3 d’ochobre. La primer xornada va celebrase en Villaviciosa, “abriendo asina la participación d’otros conceyos d’Asturies”, anque’l núcleu de les actividaes va siguir tando nel Centru de Cultura Vieyu Institutu de Xixón.

El Conceyu de Bimenes convocó estos díes la edición doce del so Concursu de Cuentos pola Oficialidá, que fai alcordanza de la declaración del asturianu como llingua oficial del conceyu en 1997. Los cuentos han tar redactaos n’asturianu, ser inéditos y de tema llibre, con una estensión máxima de 10 fueyes.

Unviaránse un orixinal, tres copies y una copia en versión informática. Cada autor o autora nun podrá presentar namás qu’una obra. Les obres, ensin firma, tienen de presentase con nomatu. Ésti apaecerá nuna plica, en sobre zarráu, onde constarán nome y apellíos del autor o autora, númberu del DNI, teléfonu de contautu, señes y currículu (con semeya).

Los cuentos han d’unviase a la Casa Cultura de Bimenes (pal XII Concursu de Cuentos pola Oficialidá del Asturianu), asitiada en Santuyano, s/n. CP 33527 – Bimenes. El plazu de presentación fina’l día 5 de xunu de 2009.

El concursu ta dotáu con trés premios, de 800, 500 y 350 euros.

Bases completes del Concursu de Cuentos

L’Academia de la Llingua Asturiana (ALLA) acaba de fallar el so concursu de lliteratura infantil y xuvenil, ‘Llectures pa rapazos’, 2009. El xuráu decidió premiar nesta ocasión la novela curtia ‘Pelegrinos del abismu’, de la que ye autor Lluís Portal Hevia, dirixida a un públicu xuvenil.

Trátase nesti casu d’una obra de temática policiaca na que’l protagonista, Enol, un neñu que pasa les vacaciones col so güelu Seve nel pueblu pesqueru de Puertu Sable (que podría ser Llastres -aparecen los topónimos reales de La Fragua, El Cantu, El Castiellu…-), investiga la estraña muerte d’un pelador d’ocle. Pa poder llegar al fondu del casu, resultará imprescindible l’ayuda de la so amiga Alicia y del perru Lulo, a más de dellos vecinos del puertu que guarden un gran secretu.

El premiu tien una dotación económica de seiscientos euros y conlleva la publicación de la obra.

El conceyal de Cooperación, Cultura Tradicional y Política Llingüística del Ayuntamientu de Xixón, Jesús Montes Estrada, presentó esti día la convocatoria pa la segunda edición del ‘Premiu d’ensayu y trabayos d’investigación Fierro Botas’, que destaca los testos d’análisis sobre la rellación de la llingua asturiana y el desarrollu sociocultural de la ciudá y del conxuntu d’Asturies. El ganador va recibir 4.000 euros y la publicación de la obra a cargu del Ayuntamientu.

La convocatoria va tar abierta hasta’l 31 d’agostu, ampliándose’l plazu en dos meses sobre l’anterior edición, pa ufrir más participación. El conceyu del xuráu va celebrase’l 27 de payares y demientres los próximos meses van repartise 30.000 exemplares del dípticu del premiu polos centros municipales y biblioteques de la ciudá.