Lliteratura

La Conceyalía de Cultura Tradicional y Valores Autóctonos del conceyu lleonés d’Astorga ta acabante convocar, a comuña cola asociación cultural La Caleya y l’Institutu Lleonés de Cultura de la Diputación de Lleón, la tercer edición del Certame Lliterariu “La Caleya”, al que se puen presentar rellatos y poemarios escritos n’asturianu.

Al concursu puen presentase tolos ciudadanos de la Unión Europea a títulu individual y con un únicu trabayu, sacantes los ganadores na mesma modalidá (rellatu/poesía) del primer premiu nes ediciones anteriores del certame.

Los trabayos han tar escritos n’asturianu, usando cualesquier variante dialectal del dominiu llingüísticu asturlleonés y con tema llibre, anque van valorase especialmente los trabayos alredor de la conmemoración del Reinu de Lleón.

Almítense rellatos curtios y poesía, siendo la estensión mínima del poemariu de 100 versos y máxima de 250; y la del rellatu de 10 páxines. El plazu de presentación acaba’l 30 de setiembre de 2009 y los trabayos tienen que s’unviar a “Certame Lliterariu La Caleya” Apartáu de Correos 187, 24700 Astorga (Lleón).

Pa cada categoría establécense cuatro premios, de 400, 225 y 100 euros; y diploma.

La Conceyalía de Cultura del Ayuntamientu de Grau organiza estos díes na Biblioteca Municipal, y en collaboración cola editorial Everest y la canal Historia, una esposición titulada “Xulio Verne: de la imaxinación a la realidá”. L’amuesa va tar abierta hasta’l 30 d’abril na sala d’esposiciones de la Casa Cultura de la villa moscona.

Dientro de la esposición pue conocese la vida del autor, la ciencia y la tecnoloxía imaxinada por Verne y les principales obres del autor, cola posibilidá de lleer llibros como La vuelta al mundu n’80 díes, La islla misteriosa, Viaxe al centru la Tierra, 20.000 llegües de viaxe somarín, Los fíos del capitán Grant o Miguel Strogoff.

L’escritor Andrés Trapiello va dar una conferencia esta tarde, a les 19:30 hores, titulada “La vida como novela”. L’Aula Magna del Edificiu Hestóricu de la Universidá d’Uviéu va acoyer esti actu d’entrada llibre.

Como parte de los actos del Día del Llibru 2009 en L’Entregu, l’estudiosu de la lliteratura y miembru del Real Institutu d’Estudios Asturianos, Xosé Lluis Campal, va dar llectura d’una conferencia titulada “Perfil del escritor Ovidio Gondi en su centenario”. L’actu va entamar güei llunes, 20 d’abril, a les seis de la tarde.

Ovidio González Díaz, conocíu como Ovidio Gondi, ñaz en 1909 en L’Entregu y trabaya tola so vida nel campu de la lliteratura y el periodismu, primero como secretariu de la biblioteca del Atenéu Popular, en Llangréu, más tarde como director la revista Orbayo, y posteriormente n’El Noroeste en Xixón y en Atlántico en Madrid. Taién diba trabayar n’otres publicaciones como Avance, El Heraldo de Madrid y la revista Así, ente otres.

nNa so estancia nos estaos xuníos tornó películes de la Metro Goldwyn Mayer a castellán y en 1948 pasó a formar parte como asesor n’asuntos hispanoamericanos de la misión d’Israel nes Naciones Xuníes. Morrió años más tarde en México.

Güei, vienres 17 d’abril, la Cultura d’A Veiga, acueye la presentación del llibru en gallego-asturianu “Domingo y os animales”. Un llibru de Belén Rico Prieto, asoleyáu por Nóbel con ilustraciones de Lulas Somoza.

La obra va presentala Juan José Lage Fernández, especialista en lliteratura infantil, amás de cuntar cola presencia de Juan Santiago, conceyal de Cultura d’A Veiga, y de Consuelo Vega, directora xeneral de Política Llingüística.

El músicu Abel Méndez va interpreta un tema fechu a costafecha pa esti llibru.

L’escritor Ignaciu Llope va presentar güei, vienres 17 d’abril, a partir de les siete la tarde, el poemariu tituláu “El combate melancólico”, espublizáu por Suburbia Ediciones. Nel actu va tar presente l’escritor Adolfo Camilo Díaz.

El Conceyu Abiertu pola Oficialidá (CAO) quier llamentar la muerte de dos escritores asturianes que nos dexaron nesti fin de selmana: Corín Tellado y Nené Losada Rico, dos muyeres, que pal CAO “suponen un exemplu de compromisu”.

Nené Losada Rico, escritora n’asturianu, a pesar de pertenecer a una xeneración mui anterior, axuntóse con entusiasmu al movimientu de recuperación del asturianu nel planu lliterariu y collaboró en toles iniciatives que se-y propunxeron en defensa de la llingua.

Corín Tellado, escritora en castellanu, nun tuvo nengún problema en sumase a la campaña qu’entamó’l CAO en defensa de los derechos llingüísticos pal asturianu. Tovía recordamos con cariñu la visita que l’equipu de grabación fixo a so casa y el rodaxe del videu pa la campaña. El so exemplu de compromisu ye dignu de destacar, destaquen dende’l CAO.

El CAO quier sumase con esta nota al dolor de les lletres asturianes pola muerte d’estes dos escritores exemplartes y unviar un abrazu a los sos familiares y amigos.

El Gremiu d’Editores d’Asturies va presentar güei, 15 de abril, nos salones de la Federación Asturiana d’Empresarios (FADE), el llibru non venal, respaldáu por Cedro, que lleva por títulu “Libr09”. La obra ta formada por uan esbilla de testos escritos, n’asturianu y en castellán, por Henrique G. Facuriella, Javier Maqua, Luis Ricardo Alonso, Antonio Valle, Cristina Muñiz Martín, Marisa López Diz y Elena Fernández.

Los rellatos recupérense d’obres yá espublizaes poles editoriales Ambitú, KRK, Madú, Septem, Trabe y Pintar-Pintar.

Libr09 ñaz, según cuenten los sos impulsores, “col oxetu de regalase a quien, el Día del Llibru, 23 d’abril, visiten les biblioteques, les llibreríes de la rexón y los Centros asturianos repartíos per tol mundu y al mesmu tiempu promocionar la llectura como actividá d’ocio y amosar l’actividá lliteraria y editorial d’Asturies”.

La obra espublizada pol Gremiou d’Editores d’Asturies y Cedro recueye una escoyeta de rellatos y fragmentos, tanto en castellán como n’asturianu, d’autores asturianos que fueron espublizaos por editoriales pertenecientes al Gremiu d’Editores d’Asturies.

Nel actu van entregase 2000 exemplares repartíos ente’l Conseyu de Comunidaes Asturianes, la Biblioteca d’Asturies y Biblioteca Xovellanos, biblioteques municipales d’Uviéu, Xixón, Avilés, Grau y Siero, asina como a les llibreríes del país.

El colectivu Xente Gai Astur (XEGA) convoca una edición más del so concursu de rellatos curtios “28 de xunu”, día internacional de gais, lesbianes, bisexuales y transexuales. Los rellatos han ser creaciones inédites qu’aborden la temática gai nun máximu de seis fueyes per una sola cara.

Los rellatos puen presentase n’asturianu o en castellán. Valoraráse la calidá lliteraria del rellatu y la presentación d’una visión positiva de la cuestión LGTB.

Los rellatos han presentase per triplicao y firmaos con nomatu dientro d’un sobre zarráu. N’otru sobre interior han escribise los datos y un disquete o CD-ROM cola versión dixital del rellatu, pa la so edición en casu de resultar ganador.

El plazu termina’l 3 de xunu a les 16 hores. Han mandase a la sede de Xega, asitiada na cai Gascona 12, 3u, 33001 Uviéu.

Bases completes del concursu de rellatos

En setiembre de 2007 Nené Losada Rico recibía en Xixón el Premiu Timón, díes dempués Inaciu Galán entrevistábala na Cadena Ser, recordando con ella la so vida, dende la infancia en San Fliz (Valdés) hasta la publicación de los primeros testos n’asturianu y la reconocencia pública recibida de los sos vecinos y d’instituciones como’l Gobiernu d’Asturies, que-y concedió la medaya de plata d’Asturies.