Lliteratura

Con 968 páxines, el Diccionariu Asturianu-Castellanu de Xuan Xosé Sánchez Vicente, apaeció’l pasáu Día de les Lletres nes llibreríes del país, convirtiéndose asina nel diccionariu asturianu-castellanu más completu espublizáu hasta’l momentu. Nél, Sánchez Vicente amplia los sos trabayos lexicográficos anteriores, qu’entamaron a salir a lluz nel añu 1988.

La obra, espublizada por Trabe, y con un volume asemeyáu al del Diccionariu de la Llingua Asturiana de l’Academia de la Llingua Asturiana, arrecueye miles d’entraes n’asturianu, cola equivalencia y definición, cuando ye necesario, en castellanu.

El diccionariu caracterízase por enxertar nél pallabres de fruxe lliterariu o dialectal qu’otros refuguen y términos non atopaos n’otros repertorios. La obra ta la venta al preciu de 55 euros y va presentase publicamente proximamente.

El Salón de Plenos del Ayuntamientu de Castrillón recibió ayeri la presentación del llibru “Menú de Versos”, del que ye autora M.ª Esther García López. L’actu de presentación del llibru, asoleyáu por Pintar-Pintar, cuntó cola presencia de la propia autora; con Nuria Delmiro Santana, Direutora del Colexu de La Carriona d’Aviles; y Ángel Sánchez Vallina de la editorial.

.

L’escritor de Paniceiros va presentar esta tarde la so novela última, «La Confesión Xeneral», una obra asoleyada por Ámbitu Ediciones pa la qu’escueye como llugar de presentación la FNAC del centru comercial Parque Principáu, asitiáu en Siero.

L’actu va entamar a les ocho la tarde y va cuntar cola presencia del autor, que yá espublizare otros llibros de narrativa como Hestoria Universal de Paniceiros, la so obra más conocida.

Esti xueves, 14 de mayu, a les 20 hores, nel domiciliu social del Atenéu Obreru de Xixón (Cai Covadonga, 7 – 1º Izda.), va tener llugar la presentación del últimu númberu de la Revista de Arte y Literatura Lunula. L’actu va cuntar cola participación de Sibisse Rodríguez Sánchez (escritora ya integrante del Conseyu de Redacción de Lunula) y de Rosario Hernández Catalán (escritora y collaboradora nesti nuevu númberu de la revista).

La dirección de la revista corre al cargu de Jesús R. Castellano ya integren el Conseyu de Redacción Roxana Popelka y Sibisse Rodríguez Sánchez.

La revista cunta con trabayos fotográficos, de comic, poesía, relatos breves, etc. Los autores que collaboren nesti númberu son: Roberto Cabrera, Ramón Hernández Armas, Alicia Colmenar Oruga, Nieves Correa, Sergio C. Fanjul, Julio Rodríguez, Luis Aylwin, Sofía F. Castañón, Charo Hernández Catalán, Mercedes Comendador, Alberto R. Torices, Ausias Navarro, Pepe Murciego, Maite Fernández Urquiza, Sibisse Rodríguez, Libertad Kaiser, Juana Munuce, José Ángel Barrueco, Alberto Linares Orlando Cova, Hilario Álvarez, Marcelino Marichal y Marcos Zafra.

La Llibrería Bertrand d’Uviéu allugada nel Centru Comercial Espacio Buenavista va acoyer la presentación del llibru «Histories familiares», de Marta Mori esti xueves, 7 de mayo a les 20 hores. Esta colección de rellatos, mui curiosa, titulada va presentala l’estudiosu y escritor Antón García

Marta Mori d’Arriba (Xixón, 1965) yá ye bien conocida pol públicu llector como poeta. Ganadora en dos ocasiones del Premiu Teodoro Cuesta (con Pórticu y El tiempu de la espera) la so poesía inscríbese na estela figurativa de la segunda promoción del Surdimientu. Agora vien acabante publicar una colección de rellatos, mui curiosa, titulada Histories familiares (Ámbitu, 2008). Esti llibru va presentalu l’estudiosu y escritor Antón García.

Mori adiéntrase nesta ocasión nunos rellatos curtios onde l’afán memorialísticu collabora na creación de personaxes rotundos y atmósferes envolventes. La Guerra Civil –l’alcordanza tresformadora de la Guerra Civil– ocupa’l sitiu del protagonista en rellatos tan impactantes como «La llechera», «Concha» o «El mieu» (cuasi l’apunte d’una nouvelle de mayor intensidá). Xunto a estos rellatos, aparecen n’Histories familiares retayos llíricos, acotaciones de la realidá o del suañu. Nesta segunda parte, la escritora fai con un aciertu y naturalidá almirable un cantu «a los distintos», a les vivencies particulares y intimistes que la soledá o l’angustia orixinen nuna neña, nuna familia o nuna sociedá entera, componiendo unos cuentos onde una prosa poética bien rica lleva al llector hasta’l complexu, y cada día más escasu, disfrute de lo auténtico.

El cuentu ‘Ella y Ariel’, del candasín David Artime Coto, foi’l ganador d’esta segunda edicición del concursu lliterariu Arbidel de cuentos eróticos n’asturianu, que convoca l’Ayuntamientu de Ribesella dientro les actividaes de la Selmana de les Lletres Asturianes y que foi entregáu pela tarde. El xixonés Pablo Rodríguez Alonso algamó l’áccesit, col cuentu ‘El confesor’, presentáu baxo l’alcuñu de Guillaume de Vielhà, cuntó tamién col interés del xuráu, compuestu por Ana Luz Prieto Vega, Roberto González-Quevedo González y Xandru Martino Ruz, faciendo de secretariu con voz, pero ensin votu, el Conceyal de Cultura del Ayuntamientu.

La entrega diplomes foi esti prósimu miércoles, 6 de mayu, a les 19hores, na Casa de la Cultura de Ribeseya, nun actu incluyíu dientro de la programación de la Selmana de les Lletres.

Editorial AsturtOOns presenta esta selmana’l so nuevu canal de cuentos audiovisuales n’Internet col oxetivu de dir ufriendo conteníos que los llectores y maestros puedan emplegar nos colexos. Desta forma, dalgunos de los títulos de la editorial podrán siguise nesti nuevu formatu qu’amesta música, voz ya ilustraciones.

El canal de cuentos pue siguise na direición: www.cuentosdelacuruxa.blogspot.com El proyeutu cuenta cola collaboración de la Conseyería de Cultura del Principáu. La presentación d’esti canal tendrá llugar en dos colexos asturianos. -Asina, esti xueves, día 7, l’autor y coordinador de la editorial, Enrique Carballeira, tará nel colexu Evaristo Valle, de Xixón, onde participará nun alcuentru colos escolinos y desendolcará un taller de creación y ilustración. -El vienres, esta actividá allegaráse al colexu Llerón-Clarín de Mieres, onde tamién tará l’autora de la coleición, Paula Pulgar.
Canal de cuentos n’asturianu d’AsturtOOns

Alumnos y profesores del “Campus Catalunya” de la Universitat Rovira i Virgili, onde s’asitien la Facultá de Lletres, la de Ciencies Xurídiques y la d’Enfermería, van celebrar esti xueves 7 de mayu la so fiesta añal con actividaes culturales, deportives y sociales de toa triba.

Ente les actividaes va celebrae una llectura en más de trenta llingües del llibru “El Principín”, incluyendo la torna al asturianu, que va lleer Mireia Guarque Rus, filóloga conocedora de la llingua asturiana y técnica de Sofitu a la Calidá Docente de la Facultá de Lletres.

Güei, martes 5 de mayu, a partir de les siete la tarde, el Forum de la FNAC de Parque Principáu va acoyer la presentación de la colección 0-3 años de Publicaciones Ámbitu. Nel actu van intervenir les autores de los llibros espublizaos yá pola editorial, Sabel Tuñón y Lourdes Álvarez, y l’ilustrador Enrique Carballeira.

Los llibros yá espublizaos nesta colección didáctica y educativa son “Animales”, “Los animales”, “Animalinos” y “La primavera”.

Güei martes y como parte de los actos oficiales de la XXX Selmana de les Lletres Asturianes va presentase na Casa Cultura de Llanes, a partir de les siete la tarde, la edición facsimilar de la novela atopada l’añu pasáu nesti conceyu, y hasta entós perdida, “Viaxe del tíu Pacho el Sordu a Uviedo”.

La novela, escrita por Enriqueta González Rubín, espublizóse n’Uviéu nel añu 1875, anque hasta l’añu pasáu nun s’atopó nengún exemplar. Esta obra ye la primera del xéneru narrativu en volume propiu espublizada na hestoria de la lliteratura asturiana.

Nel día de güei va celebrase, amás una conferencia de la escritora Ángeles Caso col títulu “Las olvidadas: una historia de mujeres creadoras”, tamién na Casa Cultura de Llanes.

Mañana miércioles 6, los actos treslládense a Uviéu, onde los políticos asturianos van facer una llectura pública de testos n’asturianu nel Salón Europa de la Xunta Xeneral; y yá pela tarde, a partir de les 19 hores, va entregase’l Premiu Arbidel de cuentos eróticos en Ribeseya.

24/10/2008 Apaez un exemplar de la primer novela n’asturianu “El viaxe del tíu Pacho el Sordu a Uviedo” espublizada por Enriqueta G. Rubín en 1875