Lliteratura

Esta selmana pasa aconceyó’l xuráu del II Premiu Asturnews de Lliteratura Infantil y Xuvenil pa decidir los gallardonaos d’esta edición. Dempués d’aldericar na sede d’Asturnet n’Uviéu, empresa editora d’Asturnews, llegóse al alcuerdu de declarar ganador al rellatu «El Club de los Valientes», que resultó ser Lluis Portal Hevia. El primer premiu ta dotáu con 1.000 euros.

El xuráu decidió, amás, dar trés accésits de 200 euros a los rellatos «El misteriu de Vassilius Destounis», Jorge Fernández García; «Unos cuentos de muerte», d’Abel Martínez González; y «Febreru, 29» de Xurde Fernández y Marián García.

La entrega de premios va facese’l próximu llunes, 8 de xunu de 2009, na Llibrería Alborá Llibros de Xixón, asitiada na Plaza Alvargonzález, de magar les 19:30 hores.

El xuráu d’esta primer edición taba formáu pol director d’Asturnews, Próspero Morán, Joaquín Morán Pérez d’Asturnet ya Inaciu Galán y González, redactor del diariu Asturnews, como secretariu del mesmu.

Los ganadores:

-Lluis Portal Hevia (Villaviciosa, 1964) Llicenciáu en Filoloxía Hispánica, escritor, periodista ya investigador de la lliteratura asturiana, fai un importante llabor d’axitación cultural nel so conceyu, espublizando delles revistes en llingua asturiana. Tien, en volume propiu, narrativa y ensayu, algamando premios como’l de “Llectures pa rapazos” de l’Academia de la Llingua, esti mesmu añu, ente otros munchos.

-Jorge Fernández García (Uviéu, 1978) Maestru, pedagogu y Espertu en Llingua Asturiana pola Universidá d’Uviéu. Autor de testos teatrales y de narrativa curtia, algamó premios nos dos xéneros. Destaquen el «IX Concursu de Teatru» de l’Academia de la Llingua Asturiana, el «Certame Internacional de Cuentos Curtios, Curtios» 2005, na modalidá de cuentos n’asturianu y l’«Art Nalón Lletres 2006» de cuentos curtios. Participa en revistes lliteraries como Formientu, La Ratonera, Lletres Asturianes o Lliteratura.

-Abel Martínez González (Uviéu, 1976) Collaborador habitual de revistes como Lletres Asturianes, algamó gallardones tan importantes como’l Premiu Uviéu de narrativa nel añu 2007, l’Art Nalón de cuentos curtios y na so primer edición, el Premiu Asturnews de Lliteratura Infantil y Xuvenil, ex aequo con Nicolás V. Bardio.

-Xurde Fernández (Candás, Carreño, 1975) Xurde Fernández. Nació en Candás (Carreño) en 1975. Profesor de llingua asturiana n’enseñanza secundaria y collaborador de l’Academia de la Llingua Asturiana y del diariu El Comercio, vio publicada en 2007 la so primer colección de cuentos curtios, titulada Volver.

-Marián García (Xixón, 1975) Filóloga y Esperta en Llingua Asturiana pola Universidá d’Uviéu. Anguaño ye profesora de Llingua Asturiana en Candás. Espublizó a comuña con Xurde Fernández la novela «El color del escaezu», espublizada por Trabe en 2008.

La escritora d’A Caridá, ta acabante espublizar el llibru infantil n’eonaviegu “Como el can y el gato”, con ilustraciones de Neto. La obra publícala l’Academia de la Llingua Asturiana al traviés de la Secretaría Llingüística del Navia-Eo.

Esta ye la sétima obra infantil espublizada dientro de la colección «Os Llibros d’Entrambasauguas», qu’axunta lliteratura en gallego-asturianu pa toles edaes.

Bermúdez Nava ye profesora d’educación primaria con bien d’esperiencia nel enseñu del asturianu y del gallego-asturianu. Ganó nel añu 2006 el XVI Premio Xeira de narracióis curtias col rellatu «Tempo de dolor» y tien espublizaes collaboraciones lliteraries nes revistes Entrambasauguas y Lletres Lliterariu.

La Parrilla Antonio I va acoyer esta tarde, a partir de les ocho, la entrega de los premios del I Concursu de Microrrellatos Sidreros, organizáu pola revista La Sidra. El primer premiu correspondió a Mercedes Alonso Blanco pol rellatu “Viaje de Ida”, mientres que “Las tres mentiras de Sidora”, de José Luis Rendueles, algamó la segunda posición, recibiendo 500 y 300 euros respectivamente.

Fueron finalistes Rubén Díaz Méndez, por “La colección de corchos”, Abel M G. por “Nun queriendo quedar mal” y Gabriel Martínez González por “Hestoria d’un viaxe”. Estos últmes reciben un llote de llibros cedíu pola revista La Sidra.

Dempués de la entrega va celebrase una espicha colos autores y otros convidaos.

El Festival Internacional de Poesía de Barcelona, qu’esti añu cumple 25 ediciones, acueye a nueve poetes y la so obra nel Palau de la Música Catalana. El mallorquín Josep Lluís Aguiló, la madrilana Marina Oroza, el catalán Màrius Sampere, la cubana Reina María Rodríguez, el colombianu Darío Jaramillo, l’arxentinu Arturo Carrera y el portugués Pedro Tamen van formar la representación internacional de poetes, a los que van sumase los asturianos Xuan Bello y Olvido García Valdés.

La dirección del espectáculu ta al cargu de los poetes Àlex Susanna, Gabriel Planella y Víctor Obiols, tando representaes la llingua catalana, la castellana y l’asturiana.

El Club de Prensa Asturiana, asitiáu na sede de La Nueva España n’Uviéu, acueye güei a les ocho la tarde la presentación de dos llibros; “La flauta del sapo” d’Aurora García Rivas, y “Otros viajes con letra y música” d’Ángel García Prieto y Miguel Ángel Fernández, editaos dambos dos por DG Ediçoes.

L’actu va entamar a les ocho la tarde y van participar l’editor Daniel Gouveia, la folóloga Marían Suárez, Cristina M. Ramos, de la Llibrería Cervantes; Manolo D. Abad, periodista y escritor y los autores.

Güei, miércoles 27 de mayu, a les 19:00 hores, l’Atenéu de Turón (Mieres) va recibir la visita del escritor y periodista Naciu Varillas, que va comentar colos sos llectores la novela “Carretera ensin barru”. L’actu encóntase dientro del ciclu “Alcuentros con autores”, qu’organiza’l Serviciu de Normalización Llingüística de Mieres.

Naciu Varillas (Xixón, 1975), tien cuentos espublizaos en delles publicaciones, amás de la novela El camín de Dios (Ámbitu, 2008), Carretera ensin barru foi la so primer obra asoleyada en formatu llibru, y lleva dos ediciones emprentaes.

L’Asociación Cultural l’Arribada ta acabante anunciar la convocatoria del III Premiu Timón, col que faen reconocencia d’una trayectoria lliteraria en llingua asturiana d’especial valir. El plazu de presentación de candidatures va tar abiertu hasta’l 30 d’agostu viniente. Les candidatures puen tar presentaes por una persona o un colectivu al corréu larribada@gmail.com

Al certame puen presentate candidatures d’autores ñacíos nel añu 1.959 o anteriormente. Al efectu de fallar el premiu, l’asociación convocante aconceyará un xuráu integráu por persones venceyaes a la cultura del país. Esta distinción, que consiste nuna obra del escultor y ceramista xixonés Jesús Castañón, va entregase demientres la celebración de l’Arribada 2009. Los ganadores anteriores fueron, en 2007, la va poco fallecida Nené Losada Rico y, en 2008, Xuan Xosé Sánchez Vicente.

Hasta’l 5 de xunu ta abiertu’l plazu pa presentase al concursu de narraciones curties de Llaviana, al que puen presentase trabayos, tanto en prosa como en versu, en llingua asturiana y respetando les normes ortográfiques y gramaticales de l’Academia de la Llingua Asturiana, con un llargor másimu de 10 folios.

Los premios son de 600, 300 y 150 euros. Los rellatos han presentase mecanografiaos a doble espaciu, per una sola llana, ensin firma, y embaxo seudónimu. Esti va apaecer na plica axunta, en sobre zarráu, onde va costar el nome completu del autor, DNI, señes, teléfonu de contautu y currículum.

Los cuentos tienen de ser inéditos, non premiaos n’otros concursos lliterarios y ensin tar suxetos a nengún compromisu d’edición. El tema sedrá llibre valorándose los trabayos que recueyan tradiciones, costumes, llugares, fechos, paisaxe d’Asturies y, sobre manera, del conceyu de Llaviana y el Valle del Nalón.

Les obres van remitise, en sobre zarráu al: Ayuntamientu de Llaviana. Concursu de Narraciones Curties. Edificiu CIDAN. Oficina d´Información a la Moceda. C/ Joaquín Iglesias s/n. 33980 La Pola El plazu d’almisión de trabayos finaliza’l vienres 5 de xunu de 2009 a 14:00 hores.

La Casa Cultura de Llanes acueye dende esta selmana y hasta’l 29 de mayu la esposición «Ello yera una vez… un tiempu de traducciones (1974-2006)», qu’organizó la Conseyería de Cultura por mor de la Selmana de les Lletres Asturianes de va dos años. L’amuesa llega al conceyu oriental col envís de dar a conocer la torna de narrativa al asturianu, que tuvo’l so momentu de mayor puxu, nos últimos trenta años, los que repasa esta esposicion.

Dende mañana miércoles y hasta’l llunes que vien, el Vieyu Institutu Xovellanos va acoyer una edición nueva del Salón del Llibru Iberoamericanu, una cita cultural afitada na villa de Xovellanos que se centra na lliteratura escrita en castellán a un llau y a otru del atlánticu. El Salón tien, como cada añu, un espaciu acutáu pa la lliteratura asturiana, cola participación nun recital poéticu, d’Antón García, Ana Vanessa Gutiérrez y Armando Vega, ente otros autores.

El programa del Salón, que nesta edición ta dedicáu a la rellación ente la mar y la lliteratura, apaecen una montonera d’actos que van celebrase nes escueles de Xixón y nel propiu Institutu, con foros, alderiques, presentaciones de llibros, esposiciones y otres iniciatives.

Luis Sepúlveda dirixe esti Salón nel que Xixón ye ponte, un añu más, ente dos continentes peralloñaos.

Programa completu del XII Salón