Lliteratura

L’Asociación Cultural l’Arribada anuncia la convocatoria del IV Premiu Timón, p’autores en llingua asturiana y n’eonaviego, y del I Premio Timón p’autores asturianos en castellano, colos que se fai reconocencia de trayectories lliteraries d’especial valir. Pa ello, ábrese dende güei’l plazu de presentaciones de candidatures que trescurrirá hasta’l 1 de mayu viniente.

Les candidatures puen tar presentaes por una persona o un colectivu nes señes de corréu electrónicu que siguen: larribada@gmail.com.

Pa esta edición, opten a los gallardones los/es escritores que nacieren nel añu 1.960 o anteriormente. Al efectu de fallar el premiu, l’asociación convocante aconceyará dos xuraos , unu por cada modalidá, integraos por persones venceyaes a la cultura del país. Esta distinción, que consiste nuna obra del escultor y ceramista xixonés Jesús Castañón, entregaráse demientres la celebración de L’Arribada 2010. Los ganadores anteriores fueron, en 2007, Nené Losada Rico, en 2008, Xuan Xosé Sánchez Vicente y, en 2009, Manuel García ‘El Galano’.

El xuráu del gallardón decidió por unanimidá, d’ente un total de seis poemarios, que’l ganador yera’l poemariu “Cilurnión”, presentáu baxo’l nomatu de “Cilurniu”. Abierta la plica, resultó ser ganador l’artista y escritor Ánxel Nava, más conocíu nos sos facetas de pintor y escultor. El próximu añu cumplirá los sos primeros venti años. La cuantía del Premiu ye de 4.000 euros y conlleva la so publicación al traviés de la Editorial Trabe.

El Premiu Teodoro Cuesta de Poesía, unu de los más prestixosos de cuantos se celebren n’Asturies, ganáronlu n’anteriores ocasiones poetes como Xuan Bello, Berta Piñán, Esther Prieto, Antón García, Pablo Antón Marín Estrada, Anxelu Gutiérrez Morán, Vanesa Gutiérrez…

El Xuráu de la XIX edición del Premiu Teodoro Cuesta de Poesía axuntóse ayeri na Casa de Cultura Teodoro Cuesta de Mieres, integráu polos escritores Esther Prieto (de la Editorial Trabe, responsable de la publicación), Xuan Bello (periodista de Les Noticies), Vicente García Oliva (de l’Academia de la Llingua Asturiana), Ánxelu Gutiérrez Morán (ganador de la pasada edición) y Luis Casteleiro (per parte de la Dirección Xeneral de Política Llingüística). Interviniendo como secretaria del de xuráu María Eugenia González, responsable del Serviciu de Normalización Llingüística del Conceyu de Mieres, y como presidente del Diana González, Conceyala de Cultura de Mieres.

Ganadores anteriores del gallardón

El Foru de Creación y Llectura de la Biblioteca de Grau presenta la novela “Un mundo así” de Fernando Martínez Álvarez el próximu xueves día 17 d’avientu a les 19:30 hores na Sala polivalente de la Casa de Cultura. Esta ye’l primer llibru que publica’l Foru, que yá edita la revista de creación lliteraria y plástica “Las Hojas del Foro”, amás d’entamar otres munches actividaes culturales como’l concursu de cartes d’amor, los alcuentros añales de lliteratura y arte, presentaciones de llibros, esposiciones, etc.

El llibru ta editáu na colección Valkenburg de la editorial KRK y cuenta col patrocinio de la Conceyalía de Cultura del Ayuntamientu de Grau. Fernando Martínez Álvarez ñació en Pravia, pero vive en Grau dende va años. Terceru de cuatro hermanos, nuna familia de madre maestra y padre veterinariu, foi educáu por dambos na conocencia y procuru del llinguaxe y l’amor pola natura. Trabaya dende va más de venti años como guarda del Mediu Natural d’Asturies.

La novela narra la vida, siempres ocupada, de los guardaviesques del Parque de los Montes de La Vela (nuna comarca imaxinaria). El procuru de los recursos naturales, de la flora y de la fauna del Espaciu Protexíu; la xestión de les especies cinexétiques, los estudios que se realicen d’animales xabaces protexíos y en peligru de etinción o la llucha contra’l furtivismu, son toles xeres qu’enllenen los díes d’esa difícil vida. Como la de Bruno, un guardabosques con esperiencia, que dende va dellos años sofita la so obra.

El vienres, pasáu, 11 d’avientu, entregóse’l XVIII Premiu del concursu de Cuentos Curtios El Garrapiellu nun cenciellu actu cellebráu en Xixón. El ganador foi’l rellatu “Lentu”, que resultó ser de José Luís Rendueles. El primer premiu ta dotáu con 900 euros.

Decidióse amás, dar un accésit de 300 euros al rellatu “(Solo) un besu”, de Pablo Texón Castañón.

El xuráu d’esta XVIII edición taba formáu pol académicu de la llingua Vicente García Oliva, pola escritora y maestra Iris Díaz Trancho, pol escritor Humberto Gonzali, pol anterior ganador d’esti premiu Pablo Rodríguez Mediana y pol maestru y director del programa de la RPA “Nomes d’Asturies”, Chechu García.

El premiu tien el sofitu de la Conseyería de Cultura y Turismu del Principáu d’Asturies.

El palaciu municipal de Villa Madalena n’Uviéu va acoyer la Xunta d’Escritores Asturianos 2010. La convocatoria ta abierta pa participar nesta nueva Xunta d’Escritores Asturianos 2010 que tendrá llugar n’Uviéu los díes 11, 12 y 13 de xineru. La convocatoria pública pa participar nesta Xunta ta dirixida a tolos y toles escritores en llingua asturiana de cualaquier estaya interesaos en participar y aportar les sos idees mediante un ciclu de conferencies, debates, alderiques, presentaciones de llibros y otres actividaes culturales alrodiu del fechu d’escribir n’asturianu. Nesta edición el lema de les xornaes sedrá “Lliteratura asturiana, identidá y nación” y cómo estos aspectos afecten al fechu d’escribir nuna llingua minorizada y non oficial como l’asturiana frente a otres de más prestixu institucional y los medios pa superar cola lliteratura esta situación de desventaya, asina como les relaciones esistentes ente identidá y lliteratura, cara al futuru de los nuevos escritores, ente otros temes. Los animaos a participar nesta Xunta d’Escritores Asturianos 2010 pueden facelo comunicando les sos propuestes pela seña electrónica xuntadescritores@wanadoo.es.

El palaciu de Villa Madalena, onde se va celebrar la Xunta, ye un diseñu del gran arquitectu asturianu Juan Miguel de la Guardia (1849-1910), construyíu en 1902 por encargu de Victoriano Campomanes, un bayurosu comerciante d’ultramarinos de la cai Uría d’Uviéu, no qu’entós yeren les afueres de la ciudá nel Paséu de la Siella del Rei, na surtida hacia Grao. Un industrial de Mieres compró la finca hacia 1915 que llueu d’arruinase quedó embargáu el palaciu adquiriéndolu l’industrial Alfredo Figaredo Herrero casáu con María Argüelles, la so cabera propietaria y güéspede. Nos años 1940 Villa Madalena tuvo reformada polos arquitectos Somolinos. Ye un exemplu magníficu de l’arquitectura burguesa uvieína d’entesieglos que foi tan abundante hasta hai poco cuando la mayoría de los palacios burgueses capitalinos cayeron esbarrumbaos pola piqueta baxo les garres de la especulación inmobiliaria. Bon exemplu de l’arquitectura ecléctica academicista, destaca nél un bon equilibriu formal y el correctu emplegu del llinguaxe eclécticu nos elementos que lu ornien, con una gran escalera d’influencia inglesa y refinaos cuartos interiores de claru estilu francés. Los xardinos de Villa Madalena, abriéronse al públicu en 1999 llueu de la espropiación municipal col derribu de la muria que los separtaba de les cais llendantes. Los xardinos tán presidíos pola escultura d’un pífanu d’inspiración romana y por un románticu cenador con columnes que sobresal al paséu principal de la entrada.

El martes 1 de decembre fallóuse na Caridá el XIX Premio Xeira de narracióis curtias en gallego-asturiano. El xurao, formao por D. Refael Cascudo Noceda, D. Manuel García Galano, D. José Manuel Martínez Castro, y Dña. M.ª José Fraga Suárez, y actuando como secretario D. Rubén Rodríguez Gayol, acordóu, por mayoría, concederye el primeiro premio al relato titulao «Amazonas». Despóis d’aberto el sobre cos datos del autor, éste resultóu ser D. Miguel Rodríguez Monteavaro.

Miguel R. Monteavaro é ún dos escritores máis novos de todo el panorama asturiano. Nacéu en Bual el 28 de xeneiro de 1990. Ten colaborao en dalgúa revista lliteraria como Trabatel, Entrambasauguas ou Lletres asturianes. Ta aguardando pola publicación del poemario Trenta razóis pra nun medrar cua editorial Trabe. Anguano, estudia Filoloxía Hispánica na Universidá d’Uvieo y compaxina este llabor cua música, unde, col sou grupo Mezá, é ún dos referentes culturales máis destacaos d’este arte nel Navia-Eo.

El premio, creao pola Asociación Cultural Xeira pra promocionar el uso lliterario del gallego-asturiano y axudar asina á súa normalización social, ten úa dotación de 600 euros. A posibilidá del accésit nun ta contemplada nas bases peró, así y todo, el xurao quixo tamén destacar a calidá del conto «Pequena», de Moisés Cima, de Mouguías (Cuaña).

Entre os premiaos en edicióis anteriores, dende a primeira, que se convocóu en 1991, tán os nomes dos máis dos autores de llibros en gallego-asturiano dos últimos anos: escritores como Manolo Galano, Jacinto Díaz, Alejandro Antúñez, Fredo de Carbexe, Rafael Cascudo, Xaviel Vilareyo, María José Fraga, Aurora García Rivas ou Marisa López Diz.

La editorial xixonesa Suburbia ta acabante poner nes llibreríes la obra “Les siete novies del rei”, del escritor de la Cuenca’l Nalón, Xulio Arbesú. Na obra, el rei va casase y el problema ye que-yos prometió matrimoniu a siete mozes, agora les afortunaes (?) tienen que pasar por diverses pruebes pa saber quien ye la elexida.

Xulio Arbesú demuestra qu’a veces, la meyor manera de conocer el presente ye reise del pasáu. En pallabres del propiu autor: (…) equí me teníes a mi, que soi de los de tarariar l’himnu de Riego tolos catorce d’abril, escribiendo una obra monárquica dedicada a aquel rei asturianu que, según remotes cróniques, vivió nel valle del Nalón, y valió pa da-y apellíu al conceyu de San Martín. Con un protagonismu tan femenín y numberosu, nun podía asemeyase muncho a La venganza de don Mendo. Hubi de renunciar a tan prestosu modelu, pero vive Dios que nun contaba renunciar a tres coses: Que la obra diba ser cómica, y escrita en versu, y con una escena a base de pallabres esdrúxules (…)

L’autor de la obra tien escrites noveles tan estremaes como la hestórica “Potestas”, la xuvenil “Misión Pelayo”, la interiorista “Un raposu en Tresmonte”, amás de la costumista a lo moderno “El pisu d’enriba”. Ente les sos obres ta tamién una colección de cuentos y dellos discos, como músicu.

L’Alianza Francesa de Xixón, asitiada na cai Cabrales 92, va acoyer esti xueves, 10 d’avientu, la presentación de la novela en francés “Toi, Brésilien”, de la reconocida autora Florence Camus. L’actu va entamar a les ocho la tarde cola participación de l’autora y de miembros de l’Alianza.

Güei, vienres 4 d’avientu, a les ocho la tarde, los “Encuentros poéticos en el antiguo Instituto”, dirixíos por Antonio Merayo nel Vieyu Institutu de Xixón, va acoyer un recital de poesíes de Xuan Xosé Sánchez Vicente, que va presentar testos que van dende’l más tempranu poemariu del autor, “Camín de señardaes” (1980), al caberu “As de corazon/es/y/es” (2001), pasando per otros como “Poemes de Xixón” (1981), “De reidores costes” (1988), “…Y de llastientes picos” (1999). La muestra va tar, según comenta l’autor, “ordenada por materies y va buscar muestres d’estilos estremaos y de temática variao”. Va presentar al autor, Humberto Gonzali.

La Fundación Cultural Asturias, venceyada a UXT, ta acabante anunciar el fallu del xuráu del so concursu lliterariu, que declaró ganadores a David Fernández Fernández pol rellatu n’asturianu “¡Quiero ser astronauta!” (un bon rellatu que xuega col llenguaxe y un remana bien los diálogos n’asturianu, según el xuráu) y “Travelling de una lección de anatomía”, del autor Fernando de Luxán Delgado (en castellán), que’l xuráu calificó como “rellatu nada convencional que xuega col llinguaxe y remana con ésitu recursos d’otros xéneros.

En cuantes a los rellatos pertenecientes a talleres lliterarios, fueron escoyíos “Las paredes oyen” del autor Rubén Rey Menéndez, “Con que sueñan las princesas” de l’autora Silvia Argüelles Robles.

El xuráu tuvo presidíu por Antonio Masip Hidalgo, abogáu, escritor y eurodiputáu del PSOE; y formáu por Carmen Caballero Díaz, periodista, y directora d’Edicom; Antón García Fernández, escritor; Cristina Huerta Villanueva de la Conseyería d’Educación y Ciencia; Manuel Díaz Cancio, Secretariu de Formación y Empláu d’UXT Asturies. Amás, como secretariu d’actes, participó Manuel Díaz Cancio.