Lliteratura

El Conceyu de Xixón, dientro del marcu del pactu ciudadanu “Xixón pola Llectura”, que representa a los diferente axentes que trabayen nel conceyu de Xixón a favor del llibru y la llectura, nos ámbitos de la creación, la edición, la comunicación, les librerías, les biblioteques, la enseñanza, les asociaciones y empreses, y qu’alcordaron convocar unos premios que sirvieran d’estímulu a les iniciatives más destacables dientro d’esti ámbitu fundamental de la cultura.

Foi tamién alcuerdu unánime del Conseyu Asesor de “Xixón pola Llectura” que los premios lleven el nome de la profesora María Elvira Muñiz Martín, en reconocencia a la “exemplar traxectoria profesional y a les cualidaes humanes d’esta estudiosa y catedrática de lliteratura, qu’arimó a munches xeneraciones d’alumnos gijoneses el so amor polos llibros y la so pasión pola llectura”.

Los premios van convocase añalmente baxo a denomación Premiu María Elvira Muñiz de promoción de la llectura y tendrán trés modalidaes: A. Reconocencia a una persona, entidá o empresa por tola so trayectoria (creativa, investigadora, divulgadora, educadora) o por iniciatives especialmente destacaes a favor del llibru y la llectura. B. Premiu a una artículu, collaboración, reportaxe o programa, espublizáu nos medios de comunicación (tanto los impresos como los audiovisuales o digitales), que contribuya especialmente a la promoción del llibru y la llectura; y C. Premiu pa una iniciativa singular desenvolvida por un centru educativu del conceyu de Xixón en favor de la llectura.

Bases completes

“Cácabos d’adoquín” ye una obra poética del autor xixonés Iván Cuevas, “Cácabos d’adoquín” ye poesía urbano, reflexón a pie de cai sobre’l poder de la poesía, sobre les lluches y los enfotos nos que’l poema s’implica y sobre les zunes y los ídolos de barru llevantaos pola sociedá post-industrial. En cierta midida, “Cácabos d’adoquín” tien muncho de recapitulación sobre’l valor de cada pallabra nel nuevu mileniu. La obra va presentase estos díes en Xixón, Uviéu y Avilés.

La xira de presentaciones va entamar güei llunes, llunes 25 de xineru nel Centru Social Sestaferia (Xixón) a les 20 hores, cola participación del autor y de Rafael Rodriguez Valdés.

Mañana, martes 26 de xineru la presentación va ser na Casa Posafuelles (Uviéu) a les 20 hores, incluyendo la presentación d’otru llibru de la editorial, “Les vides incompletes” de Xandru Fernández, y cola participación de la filóloga María Cueto.

La mini xira zárrase’l miércoles 27 de xineru nel Cafetón d’Avilés, a les 21 hores, y cola intervención del filólogu Fernando Alvarez-Balbuena.

En pallabres del hestoriador Rafael Rodríguez Valdés, autor del prólogu del llibru, lo guapo d’esta obra ye “cómo l’autor recupera los axentes colectivos como materia poético; agora que yá nun se respira’l fumu de les manifestaciones, presta afayase ente pallabres onde vive y se tresmite’l sentir de lo colectivo al encruz d’una voz personal que contién y sostién la fuerza de les que nun se dieron”.

La Dirección Xeneral de Política Llingüística ta acabante asoleyar na rede’l Catálogu de publicaciones n’asturianu y en gallego-asturianu correspondiente al añu 2008 “col envís de dar un serviciu a la ciudadanía asturiana”. Esta publicación non venal de la que ye responsable l’hestoriador y postgráu n’Archivística Rafael Rodríguez Valdés, el catálogu del 2008 inclúi 168 referencies de publicaciones n’asturianu y en gallego-asturianu y va poder consultase nes biblioteques asturianes, amás d’en pdf.

Catálogu de publicaciones n’asturianu 2008

“Abismos, adicciones y papeles azules” ye’l títulu del llibru nuevu del escritor xixonés Xuan Carlos Crespos. Trátase d’una colección de cuentos d’esti autor que cuenta con premios como’l Nené Losada Rico de poesía (2004) o l’Érase una vez… de cuentos (2004). Tamién ganó certámenes de cuentos como’l de Llaviana (2004, 2005, 2006 y 2007), el de Cangas del Narcea, o’l de la Fundación de Derechos Civiles (2005 y 2006).

La obra ta asoleyada por Espublizastur y presentóse nos actos de la Xunta d’Escritores Asturianos 2010, celebrada la selmana pasada n’Uviéu. “Abismos, adicciones y papeles azules” ye’l so tercer llibru, dempués del poemariu “Poemas raros (de sangre prieto)” (Trabe, 2005) y el cuentu infantil ilustráu “Lías aprendiz de contador d’histories” (autoedicción, 2007).

Xuan Carlos Crespos tien espublizaos tamién cuentos y poesíes en delles publicaciones como Lletres Asturianes, Lliteratura, Ágora, Clarín o nes antoloxíes de Centropoético o Reciella Malory. Nesti volume nuevu axunta los sos trece meyores cuentos, faciéndola imprescindible pa conocer y disfrutar la so lliteratura.

Mañana martes, a les 19 hores, nel Club de Prensa Asturiana d’Uviéu, va facese la presentación del llibru de Miguel Rojo “La ponte y otros cuentos”. Nel actu, amás del autor, van tar la tamién escritora Vanessa Gutiérrez y una representación de la editorial Suburbia Ediciones, qu’asoleya’l llibru.

Miguel Rojo (Zarracín, Tinéu, 1957) ye un nome esencial de la lliteratura asturiana del Surdimientu. Nesti volume recuéyense los sos cuentos más conocíos, revisaos y correxíos pol autor a costafecha pa esta edición hasta’l puntu de que munchos d’ellos tán cásique re-escritos. Xunto a estos, recupérense dalgunos relatos difíciles d’atopar actualmente y dellos cuentos inéditos. Un llibru que según la editorial ye “imprescindible pa comprender y esfrutar la obra d’un autor orixinal y sorprendente”. El prólogu ye d’Antón García.

Mañana, vienres 15 de xineru a les 19.30 hores tendrá llugar na sala d’ámbitu cultural d’El Corte Inglés de Xixón la presentación de la novela “Lobos de luna negra” del periodista teberganu Celso Peyroux. La presentación va tar a cargu del escritor José María Ruilópez y amás intervendrá l’editor de la obra, César García Santiago, responsable d’Ediciones La Cruz de Grau.

La obra recueye la hestoria d’un mineru apresáu poles Fuerces de busca y captura una vez terminada la Guerra Civil nes tierres del norte y encarceláu nos suétanos d’una casona palaciega. Nel tiempu que duró’l so cautiveriu escribe un diariu- El manuscrito azul- sobro la vida en cautividad al par d’otros presos y los sos meditaciones en soledá. Una nueche ye conducíu, con otros collacios de celda, énte un pelotón de fusilamientu el que graciés al so remangu y axilidá llogra afuxir “tirándose al monte” onde permanez escondíu a lo llargo de dellos años. La esencia d’esta novela-texida con acontecimientos hestóricos y fabulosos.

L’escritor y periodista Celso Peyroux ñació en Samartín de Teberga. DUEL pola Universidá de Poitiers (Francia), Diplomáu pola Escuela Normal Superior de Saint Cloud (París), pola Escuela Oficial d’Idioma de Madrid y polla Universidá d’Uviéu, foi profesor titular nel Distritu Universitariu de d’esta ciudá y Xefe del Departamentu de Ordenación y Promoción Turística del Gobiernu del Principáu d’Asturies. Tien una franca obra publicada que toma dende la novela y la poesía, al ensayu y a les guía turístiques. ganó dellos certámenes lliterarios, cuatro de les sos guía turístiques y culturales fueron declaraes de “Interés Turísticu Nacional” y ente los sos poemarios atopa “Los clamores del vientu” llibro editáu pol Ayuntamientu de Peñascosa y la Diputación Provincial de Albacete que da’l so nome a la Biblioteca Pública del conceyu. Ta en posesión de la insignia d’oru del conceyu asturianu de Morcín y de les plaques institucional de los ayuntamientos de Confolens (Francia) y Goïs (Portugal). Amás nos ochenta publicó dellos libros y rellatos n’asturianu.

La xornada cabera de la Xunta, va celebrase güei miércoles, a partir de les cinco la tarde, en Villa Madalena, Uviéu, entamando cola presentación del númberu 72 de la revista LA SIDRA por Llucía Fernández Marqués. A les 17,30 hores Xaviel Vilareyo va falar de “La lliteratura dialectal de los escritores de Santiyana”.

El presentador del programa Al Aldu na TPA, y redactor d’ASTURNEWS, Inaciu Galán va falar, a partir de les 18,30 hores de los problemes y les cuestiones a la hora de facer “periodismu nuna llingua minorizada”, faciendo delles reflexones alredor del casu asturianu.

Remátase la Xunta con una antoloxía de la nomada “Xeneración del Compromisu (1967-1982)” y la presentación, a partir de les ocho, del llibru “Historia del Cine Asturianu”, de Xaviel Vilareyo, a cargu del médicu y militante nacionalista Marcos Abel Fernández.

La revista Formientu, asoleyada por Xareos! Xestión Cultural y la editorial La Cruz de Grau, va presentar el númberu 6 de la so trayectoría, qu’entamó en 2007 y que busca espublizar la obra de los autores más mozos de la lliteratura asturiana y dala a conocer. L’actu va celebrase güei martes nel palaciu Villa Madalena d’Uviéu, a partir de les 19:30 hores cola presencia de los autores qu’apaecen nesti númberu, la dirección y l’editor de la mesma.

Nesti númberu seis apaecen autores avezaos de la revista, amás de delles novedaes, como ye’l casu d’Abel Martínez, Daniel Estrada, Llucía Di Salvo León, fía d’emigrantes asturianos en Bonos Aires, y Manuel Fernández García, qu’escribe a comuña col so hermanu Jorge, habitual de Formientu. Amás de Javier Cayado Valdés, Benxa Pérez, Héctor Pérez Iglesias, Fran Melero «Frantxu» y Ricardo Candás.

Súmense tamién a la edición los rellatos ganadores del I Certame de Microrrellatos Mozos «FORMIENTU», que convocaron esti añu Xareos! y la editorial La Cruz de Grau col envís d’afalar “la creación lliteraria y ayudalos a afondar nes sos posibilidaes creatives”. A los rellatos que llevaron premiu o accésit, súmense los escoyíos pol xuráu pa la so espublización.

Los ganadores van recibir un premiu y diploma acreitativu nun actu que va celebrase al empar d’esta presentación del númberu 6, en Villa Madalena. Nel mesmu va facese un recital, a partir de les 20 hores, nel que van participar: Pablo X. Suárez, Alejandra Sirvent, Abel Martínez, Frantxu Melero, Rubén Rey y Jorge Fernández García.

Formientu ta dirixida por Inaciu Galán y el so Conseyu de Redacción ta formáu pol escritor Benxa Pérez y l’editor César García, coordinaos pola escritora y filóloga Laura Marcos.

La Xunta d’Escritores Asturianos 2010 entamó ayeri llunes a la hora prevista y cola presencia de Xaviel Vilareyo y d’Esther Prieto, de la Editorial Trabe, que presentaron el llibru d’actes de la Xunta celebrada en 2008. L’actu convirtióse nun animáu alderique sobre la normativa actual y les cuestiones más polémiques del mesmu.

Nel mesmu Xaviel Vilareyo reconoció que nun-y gusta la normativa castellana “y poro, nun me presta la norma del asturianu, que ta copiada con tolos errores”. Esther Prieto, que ye del oriente d’Asturies dixo reconocese na normativa actual y nun entender “la necesidá d’un subestándar, cuando ye posible escribir toos igual y lleelo según la zona d’una forma o otros, como s’asumió cuantayá n’otres llingües como’l catalán”. La escritora comentó la necesidá de “simplificar” la norma actual, que “ta enllena de posibilidaes asemeyaes y una montonera d’escepciones”.

Carlos Rubiera, asistente a la Xunta y miembru de l’Academia dende’l tiempu nel que se creó la normativa comentó la situación que se dio nos años ochenta: “teníemos munches posibilidaes pero la más válida pa la situación sociollingüística del momentu yera la que se fizo, porque si llegamos a facer una ortografía al estilu vascu, tendríemos qu’escribir Villaviciosa asina: BILHABIZIOSA, el procesu hubiere fracasao dafechu”.

Helena Trexu recordó les dificultaes a la hora d’escribir testos técnicos, poniendo como exemplu les enfermedaes mentales, qu’usó nun testu y pal qu’atopó dificultaes bien importantes, como escoyer la forma pa poner n’asturianu la “demencia”.

La crónica del restu de les conferencies y presentaciones de la primer xornada de la Xunta pue consultase n’otres entraes d’Asturnews.

“L’asturianu ye la llingua propia de les Asturies de Santiyana”, con esta afirmación abrió Vilareyo la so intervención na Xunta d’Escritores Asturianos 2010. Pal autor de Mieres l’asturianu de Santiyana “merez más atención per parte de toos”. Na mesma, describió hestóricamente al vieyu territoriu d’Asturias de Santiyana que xunto cola Llébana formen parte pa Vilareyo “del ámbitu del asturianu oriental”.

Xaviel Vilareyo pasó a desplicar los elementos o característiques fonétiques, morfolóxiques y sintáctiques del asturianu de Santiyana que básicamente son pal autor “los mesmos rasgos llingüísticos que definen al asturianu tal y como yá lo dexó escrito Ramón Menéndez Pidal na so monografía de 1906 sobre’l “dialecto leonés” y la unidá intrínseca de tolos territorios que formen la llingua asturiana”.

De los trés dialectos del asturianu, l’oriental, “al que pertenez tol territoriu d’Asturias de Santiyana” ye’l que sufrió una mayor castellanización, según comento Vilareyo “yá que se tien por seguro que na Edá Media, por exemplu los plurales femeninos -es (qu’anguañu se conserven nel valle de Pas y en Salamanca) n’epoques anteriores debieron ser más xenerales y non sólo reducíos al asturianu central como anguaño”.

Vilareyo denunció los pocos estudios llingüísticos que se tienen fecho sobre la fala de Tresmiera y los posibles restos del asturianu en Bizcaya. Tamién criticó’l desdén o desinterés esistente “nes Asturies d’Uviéu hacia la llingua d’Asturias de Santiyana y en xeneral hacia una tierra ximielga y un cultura tradicional cola que los asturianos d’Uviéu compartimos muncho más qu’un nome y una llingua”.