Lliteratura

La novela más conocida del escritor Armando Palacio Valdés convirtiérase yá va tiempu en cómic col guión y los dibuxos d’Isaac del Rivero. Agora, el llavianés Vicente Rodríguez Hevia, ta acabante tornar al asturianu esti trabayu por encargu de Francisco Trinidad, vicepresidente de l’Asociación d’Amigos de Palacio Valdés.

La obra presentóse ayeri en Llaviana cola presencia de la directora xeneral de Política Llingüística, Consuelo Vega, y l’alcalde del Conceyu de Llaviana, Adrián Barbón.

Espublícense alredor de 2.000 exemplares, que van llegar a les aules de les Cuenques nes que se curse l’asignatura d’asturianu.

L’escritor y filólogu candasín Xurde Fernández presenta esti xueves 25 na so villa natal el recopilatoriu de cuentos ‘Díes d’iviernu’, col que ganó la edición 2008 del concursu de creación lliteraria ‘Llorienzu Novo Mier’, de l’Academia de la Llingua Asturiana. L’actu va tener llugar a les 20 hores, na Biblioteca Carlos González Posada de Candás, y nél intervendrán Carmen Dintén (responsable de la Biblioteca), Xosé Ramón Iglesias Cueva (miembru de númberu de l’Academia de la Llingua Asturiana) y el propiu autor.

‘Díes d’iviernu’ ye un conxuntu de relatos que “conformen una paleta de claros y escuros onde personaxes ¿inventaos? caminen y viven llugares ¿reales?, engarzaos nun collar dacuando afogadizu dacuando señaldosu, onde’l denominador común ye l’espertar y l’enfrentase a la vida cada día”.

Xurde Fernández nació en Candás en 1975 y ye Llicenciáu en Filoloxía Hispánica, Especialista en Filoloxía Asturiana y profesor d’Enseñanza Secundaria.

Na madrugada del vienres al sábado pasáu, nun actu cultural organizáu nel chigre de la Xunta Pola Defensa de la Llingua Asturiana (XPDLA), La Casa Posafuelles, diose a conocer el ganador del concursu Declara’l to amor pola llingua. Y d’ente los cerca de cien testos qu’entraron a concursu, y después de la escoyeta pol xuráu de los diez meyores, el ganador escoyíu polos veceros y veceres que pasaron pel chigre a lo llargo de tola selmana que duró la votación foi pa’l nomatu Sogallardi, que correspuende a Javier Cayado Valdés.

Tanto la obra ganadora, como les otres nueve finalistes pueden lleese na páxina web de la XPDLA. Xunta Moza fai una valoración positiva en cuantes a la participación nel concursu: mediu centenar de persones quixeron dexar la so declaración d’amor pola llingua y hubo xente que participó con más d’una creación.

Dende la XPDLA queieren agradecer a toles persones que sofitaron y participaron nesti concursu, amás de nel actu cultural en La Casa Posafuelles.

CONCURSU LLITERARIU “DECLARA’L TO AMOR POLA LLINGUA” BASES PRIMERA: Institúise un premiu únicu dotáu con un llote de productos de Xunta pola Defensa de la Llingua Asturiana y Xunta Moza. Amás, el trabayu que resulte gallardonáu pue ser imaxe de campañes de sensibilización y/o reivindicación de dambes organizaciones. SEGUNDA: La estensión máxima ha ser de 160 caracteres, mecanografiaos (ordenador o máquina d’escribir) o manuscritos per una sola cara y perfectamente lleíbles. TERCERA: Ha presentase l’orixinal, escritu n’asturianu, firmáu con nomatu, y hai que lu acompañar cola plica (sobre) correspondiente onde tien que figurar el nome, apellíos, corréu eletrónicu y teléfonu del autor o autora. Cada participante pue presentar tantes obres como-y paeza. CUARTA: El tema ye “Declara’l to amor pola llingua” y los trabayos tienen que tar vinculaos col tema de la convocatoria. Pueden tar escritos en prosa o versu. La obra ha ser rigorosamente inédita, non premiada anteriormente, nin suxeta a compromisu nengún d’edición. QUINTA: El plazu de presentación de trabayos acaba’l trece de febreru de dos mil diez a les 20:00 hores. SEXTA: Una comisión formada por militantes de Xunta Moza va escoyer les diez meyores obres y éstes van esponese en La Casa Posafuelles ente los díes catorce (San Valentín) y diecinueve (fecha na que vamos festexar el Día Internacional de la Llingua Materna) de febreru de dos mil diez. Ellí van ser los veceros y les veceres quien voten la obra ganadora, ente los díes catorce y diecinueve (dambos incluyíos). Xunta Moza reserva’l derechu d’esparder la votación popular per otros medios. SÉPTIMA: La obra premiada va lleese públicamente nun actu cultural que se va facer en La Casa Posafuelles, el día venti a les 00:00 hores. OCTAVA: Los trabayos presentaos van pasar a ser propiedá de la Xunta pola Defensa de la Llingua Asturiana y Xunta Moza. NOVENA: Nun se van volver los trabayos presentaos. DÉCIMA: Los trabayos han presentase nun buzón instaláu en La Casa Posafuelles [Cuesta la Vega 12, Uviéu] o per corréu electrónicu a la dirección de Xunta Moza[amorpolallingua@gmail.com]

La revista, asoleyada pola Conseyería de Cultura va presentase güei vienres, a les 19:30 hores, nel complexu cultural d’As Quintas d’A Caridá (El Franco) nun actu que va contar cola presencia de Cecilia Pérez Sánchez, alcaldesa d’El Franco; Consuelo Vega, directora xeneral de Política Llingüística; José Antonio Fernández Vior, filólogu veigueñu; y Xosé Miguel Suárez Fernández, coordinador de la publicación, que tamién forma parte del conseyu de redacción con Luis Casteleiro Oliveros, Aurora García Rivas y María Antonia Pedregal Montes.

La revista repártse de baldre per biblioteques, cases de cultura y centros educativos, amás de poder descargase na web de Política Llingüística. Nesti segundu númberu escriben autores como José Manuel Martínez Castro (Xixón, 1962), Moisés Cima (Uviéu, 1983), Arturo Álvarez Tangueiro (As Campas, Castripol, 1973), Alba González Fernández (Valdepares, El Franco, 1985), Rafael Cascudo Noceda (Tapia, 1958), Alfredo Álvarez de Ponticella (Ponticella, Villayón, 1948), Emma Méndez (Cartavio, Cuaña, 1973) y Xosé Miguel Suárez, que traduz al gallego-asturianu un cuentu de Katherine Mansfield. Tamién, de la mano de Luis Casteleiro, recupérase un poema de 1917 de José Manuel Campoamor de Lafuente (A Veiga, 1882 – Munro, Arxentina, 1961).

Esti vienres, a les 8 la tarde, la editorial Universos va presentar el númberu dos de la revista lliteraria esTandoriu, na Casa Cultura Teodoro Cuesta de Mieres del Camín.

El nuevu númberu entama con un artículu d’Ismael María González “Dende les terraces de Mieres”, empobináu a evocar l’ambiente lliterariu en llingua asturiana de mediaos de los 70, y deles obres poétiques d’autores como de Vanessa Gutiérrez y Xuan Santori. La prosa vien de la mano de Miguel Rojo, Ánxel Álvarez Llano, Xavier Frías Conde o Xabiero Cayarga.

La Conseyería de Cultura yá tomó la decisión sobre l’autor que va protagonizar la que va ser la XXXI Selmana de les Lletres Asturianes. Dempués de dos ediciones con voces femenines (les de María Teresa González y Enriqueta González Rubín), l’autor escoyíu nesta ocasión ye l’escritor Xosé Antonio García, que ñació en Santa Bárbara, Mieres, nel añu de 1961 y morrió en 1997, dexando una obra non mui amplia pero sí interesante.

Xosé Antonio García cursó estudios de Filoloxía Románica y Hispánica na Universidá d’Uviéu, interesándose pol afondamientu nes llingües clásiques: llatín, griegu y árabe. Collaboró en revistes lliteraries como “El cuélebre literario” , “Mallku” y en “Lletres Asturianes”.

En 1989 espublizó’l poemariu “Cuartetu de la criación” y nel 95 “Alcordances d’un home muertu”, un llibru que paecía predicir la so murnia y prematura muertes, namás dos años dempués, en 1997. Dexando una obra “fonda, personal y enigmática”.

Güei xueves, a les 20:15 hores, el Palaciu de Valdecarzana, allugáu na cai del Sol d’Avilés, va acoyer la presentación del llibru d’Elma S. Vega “El enigma del palacio de Bao”. Amás de l’autora van participar Ramón Antonio Álvarez, conceyal de cultura del Ayuntamientu avilesín y Esther Prieto, en representación d’Ediciones Trabe.

Los ganadores del concursu de cuentos del Conceyu de Cangas del Narcea na so edición cabera son Xuan Carlos Crespo y Diego Rodríguez, con un cuentu escritu na variedá occidental del asturianu nel casu últimu.

“Too ye absurdo (menos la muerte)” ye’l cuentu del xixonés Xuan Carlos Crespos, mientres que’l cangués Rodríguez ganó con “De filandón”. El xuráu destacó tamién como finalistes, a “Traxectu”, de Rafael Rodríguez Valdés, y “Los carreirinos de Barrocande”, de Julio González Rodríguez, siendo esti últimu escritur tamién na variedá occidental del asturianu.

El xuráu agradeció un añu más “la cantidá y calidá de les obres presentaes nesta VII edición de cuentos, y animó a la participación nes ediciones vinientes”.

Hasta’l 19 de febreru l’Ayuntamientu de Llaviana tien abiertu’l plazu pa participar na oncena edición del concursu rellatos curtios pa muyeres, nel que pueden mandar rellatos toles muyeres mayores de 18 años que lo deseyen, pudiendo presentar caúna d’elles un máximu de trés obres, en castellán o asturianu.

El tema ye llibre, valorándose de mou especial, amás de la calidá de la obra, l’emplegu d’un llinguax non sexista y un tratamientu de los temes estremáu de los estereotipos femeninos y masculinos tradicionales.

Concederáse un primer premiu, na categoría xeneral de 1.200 euros. Asina mesmo daráse un accésit de 300 euros a la meyor obra fecha por una autora del Conceyu de Llaviana.

Los trabayos han mandase al Edificiu CIDAN, asitiáu na cai Xuaquín Iglesias 1, 33980 La Pola Llaviana, Asturies. Pa más información pue llamase al teléfonu 985 602 525.