Lliteratura

La escritora Helena Trexu Fombella va presentar el so llibru últimu “Olaya n’África”, una narración que foi premiada pola Academia de la Llingua Asturiana en 2008 y qu’espubliza agora esta institución dientro de la colección “Escolín” con ilustraciones de Violeta Mateu.

La presentación va tener llugar el xueves 25 de marzu a les ocho la tarde na Llibrería “La buena letra”, asitiada nel númberu 12 de la cai Casimiro Velasco de Xixón. Amás de l’autora, va tar presente Pablo Xuan Manzano, miembru de númberu de l’Academia de la Llingua Asturiana.

Un añu más el Conceyu de Bimenes convoca’l Concursu de Cuentos pola Oficialidá del Asturianu, con plazu abiertu pa presentar trabayos hasta’l 2 de xunu. El certáme celébrase col envís de facer alcordanza de la declaración d’oficialidá del asturianu nesti conceyu, que desficieron los tribunales darréu, anque la tema del mesmu ye de llibre escoyeta per parte l’autor.

Los cuentos han unviase al Ayuntamientu de Bimenes (pal XIII Concursu de Cuentos pola Oficialidá del Asturianu). Martimporra, s/n. CP 33527, en Bimenes. Han tar redactaos en llingua asturiana (con una estensión máxima de 10 folios), respetando les normes ortográfiques de l’ALLA, inéditos, de tema llibre, non premiaos n’otros concursos lliterarios y ensin tar suxetos a nengún compromisu d’edición.

Establécense trés premios de 800, 50o y 350 euros. El xuráu tará compuestu por tres miembros cualificaos y presidíu pol Alcalde de Bimenes. Los sos determinos nun podrán retrucase. Cualesquiera de los premios podrá quedar desiertu, según determín del mesmu.

La entrega fadráse l’1 de xunetu, coincidiendo coles cellebraciones de la Fiesta de la Oficialidá de la Llingua Asturiana en Bimenes, onde se fadrá una llectura pública del primer premiu na voz del so autor o autora. Pa más información pue llamase al teléfonu 985 700 367.

La editorial Maxtor, de Valladolid, espublizó va dellos meses la que ye la segunda reedición de la “Poesías Selectas en Dialecto Asturiano”, asoleyada por Fermín Canella en 1887 ampliando’l llibru orixinal de 1839, editáu por Xosé Caveda y Nava. Con esta reedición, la segunda del primer llibru espublizáu na hestoria de la llingua asturiana, torna a les llibreríes la poesía de los nuesos clásicos nun llibru cenciellu col que se pue tener nes manes una reproducción fiel de la obra. Asturnews faló con Miguel García Cernuda, de la editorial Maxtor sobre esta edición.

Na entrevista, cuéntanos el llabor d’espublización de llibros asturianos fechu por esta editorial dende Castiella, y la so forma de trabayu y escoyeta d’obres pa la so reedición.

-¿Cómo una editorial de Valladolid acaba publicando la primer obra de la hestoria escrita n’asturianu?

-Conociendo un poco la hestoria de la nuesa editorial voi tratar de responder a esto. Desque nacimos, fai yá dellos añinos (dende’l 2000 venimos operando, pero’l proyectu foi xestándose adulces unos años enantes, cuayáu dende la conocencia que tien el xerente, Maximiano San José, que trabaya nel mundu del llibru vieyu dende fai más de 35 años), l’oxetivu fundamental de Maxtor Editorial foi rescatar llibros antiguos por que puedan llegar a toos, curiando diversos aspeutos. La selección de les obres (nun se trata de publicar tol que caiga nes nueses manes, como puedan faer otros, sinón de buscar obres con un conteníu siempres interesante), formatu afechu (l’acabáu, papel, sobrecubierta de papel apargaminao, edición,… en too esto procuramos qu’otorgue a los llibros una calidá alta) y too ello xunío a un preciu bien bonu, fundamental pal espardimientu de les obres; de nada sirve rescatar un llibru interesante si dempués namás lu pueden mercar unos pocos.

Al ver tou esto puese entender que, una obra tan interesante como esta, pudiera interesanos pa publicar, y contribuyir en pequeña midida, a poner en manos de munchos amigos asturianos o de lo asturiano esti llibru. El fechu de ser de Valladolid la editorial ye porque se tien una sede, anque la verdadera sede de les persones que formamos l’equipu que trabaya por rescatar estes obres atópase por tolos requexos d’España, incluyíos toos aquellos que formen parte del entrañable y arrogante Principáu.

-El so interés pola edición de llibros asturianos nun ye nuevu, asoleyaron yá otros…

-N’efectu, el publicar esta obra n’asturianu supon una contribución más a los títulos rellacionaos con Asturies que tenemos en Catálogu. Pero entamamos nel 2002 cola Crónica del Principáu de Evaristo Escalera. Dempués siguimos cola estensa obra de Ciriaco Miguel Vigil “Asturias Monumental y Epigráfica”, na que se detallen les obres más importantes d’esa tierra con numeroses esplicaciones y grabaos. Más obres que se pueden atopar son “Antiguedades y cosas memorables del Principado…” de Luis Alfonso de Carvallo, “El Fuero de Avilés”, “Cancionero Musical Asturiano”, “Asturias.Recuerdos y Bellezas de España” y otres munches.

Dende l’añu 2008 publiquemos delles obres estupendes, xunto a la cirada de “Poesías selectas…”. Destacamos les “Bellezas de Asturias. De Oriente a Occidente” na qu’Aurelio de Llano rellata un viaxe pelos requexos más guapos d’Asturies. Otra de les obres ye’l magníficu Diccionariu de Pascual Madoz nel so tomu d’Asturies, que recueye aspeutos xeográficos, estadísticos y hestóricos como indica’l mesmu títulu.

Los títulos más recién son “Paisajes de Reconquista” de Juan Diaz-Caneja, la “Historia de la villa de Gijón” d’Estanislao Rendueles y dos de les obres que componen la triloxía de la mitoloxía asturiana de Constantino Cabal.

-La llista ye llarga, ¿dalgún proyectu nuevu sobro llibros asturianos?

-Por supuestu vamos siguir emprestando especial atención a obres de temática asturiana, como por casu completar la triloxía de mitoloxía col “Sacerdocio del Diablo”. Amás pa nós supón un gran prestu ver como’l públicu respuende fenomenalmente a estos llibros, que siempres susciten un gran interés y una bona respuesta comercial, lo que contribúi a que’l nuesu llabor siga adelantre.

-¿Cómo se pue consiguir la obra, hai dalgún puntu de venta n’Asturies?

-Dende va dellos años venimos trabayando pa que los llibros qu’espublizamos tean, a lo menos nun puntu de venta próximu a toos. Por eso pue atopase les “Poesías selectas” y otros títulos de Maxtor en bastantes puntos de venta. En librerías importantes como por casu Ojanguren o Llibrería Trabe n’Uviéu, La Casa del Libro en Xixón. Amás dende va un tiempu cuntamos cola collaboración de Asturlibros, que tán contribuyendo a qu’estos llibros puedan tar en munchos más puntos de venta por toa Asturies. Y siempres los interesaos pueden realizar los sos pidíos al traviés de la web de Maxtor, una canal cada vegada más importante nel mundu del llibru.

Catálogu de llibros asturianos d’Ediciones Maxtor

Nel BOPA de 5 de marzu del 2010 publíquense bases y convocatoria de les subvenciones a empreses editoriales pa la promoción del llibru n’asturianu y en gallego-asturianu. L’oxetu d’estes subvenciones ye la concesión d’ayudes económiques a la publicación d’obres lliteraries o de llibros de cualquier materia d’interés, n’asturianu o en gallego-asturianu, en cuantes, según la Conseyería “qu’elementu indispensable pa dar prestixu y relevancia a la llingua y que tien gran importancia na escolarización y na formación de los ciudadanos”.

Amás, tamién hai una partida específica dirixida al fomentu de la traducción y edición n’otres llingües d’obres asturianes. Con estes ayudes búscase, según pue lleese na web de Política Llingüística “apoyar la publicación d’obres que pol so interés y calidá contribuyan a la normalización social de la llingua asturiana y al arriquecimientu de la nuestra cultura, permitiendo de la mesma la constitución d’un fondu bibliográficu n’asturianu y en gallego-asturianu”.

Les bases y convocatoria, mesmo que’l modelu de solicitú, tán disponibles nel BOPA del 5 de marzu del 2010 y na páxina de la Dirección Xeneral de Política Llingüística. L’últimu día pa presentar proyectos a esta convocatoria ye’l 5 de abril de 2010.

Bases de la convocatoria

El artículo «Grao, mercancía astur», del escritor salense Luis Arias Argüelles-Meres, espublizáu en LA NUEVA ESPAÑA’l 19 de xunetu de 2009, foi declaráu ganador del VI Certamen periodísticu “Moscones en Xixón” por un xuráu formáu por Luis Alfonso Fernández, José Manuel Puente, Jesús Lazcano y Vicente Díaz Peñas. El concursu tien como obxetivu premiar los trabayos que difundan los valores culturales, cívicos y éticos de Grao.

Miembros de Xuventú Asturianista y PAS aconceyaron xunto a Pilar Robles, fía de Pachín de Melás, y la ñeta del mesmu, y dellos ciudadanos más, pa facer un homenaxe cabo los restos de la cárcele d’El Coto, esti sábadu a les 12:30 hores. L’actu entamó col son del “Corri-corri” al clarinete de Jesús Garmón pa siguir darréu cola llectura d’un manifiestu per parte d’Inaciu Galán, nel que se recordó la vida de Milio Roblés Muñiz, “Pachín de Melás” y se reclamó “una mayor reconocencia de la so figura per parte de les instituciones”.

La Xuventú reconoció a Pachín de Melás “pol so exemplu pa tolos asturianos, pol so talante democráticu y la so defensa d’Asturies”, un escritor y ciudadanu al que los mozos asturianistes calificaron nel actu como “patriota asturianu”. Un autor, que recordaron “enfrentóse a los que quixeron robar la democracia a Asturies” y que sufrió la represión “pasando los sos últimos díes nes peores condiciones imaxinables por defender a Asturies y la llibertá”.

La llectura d’una poesía del autor “Alma asturiana” sirvió pa rematar l’actu, xunto col himnu d’Asturies al clarinete. Énte’l reconocimientu de los asistentes y de los familiaries asitentes, Pilar Robles, fía de Pachín de Melás, y Ángeles, nieta del escritor, que nun pudieron evitar emocionase.

Galería de semeyes del actu

El Conceyu de Piloña, en collaboración col periódicu del oriente El Fielato y la Caxa Rural de L’Infiestu, convoca’l Tercer Concursu de Narraciones Curties “Conceyu de Piloña”, dotáu con dos premios de 1.000 y 700 euros.

Bases completes

Dempués de centrase nestos últimos años na narrativa, Xuan Bello vuelve a la poesía con “Colección d’identidaes” (Ámbitu), un llibru que la escritora Vanessa Gutiérrez-y presenta güei, xueves 4 de marzu, na Llibrería Cervantes (19.30 hores).

Nesta obra, l’autor de Paniceiros traduz la obra de dellos de los sos poetes de cabecera pa “trazar un mapa de coordenaes referenciales qu’espliquen les sos influencies pasaes y presentes al tiempu qu’abren caminos nuevos pa la tradición lliteraria asturiana”.

La escritora en gallego-asturianu Aurora García Rivas ta acabante sacar al mercáu un llibru, espublizáu orixinalmente por Trabe n’eonaviegu, y qu’agora apaez n’edición billingüe, xunto cola nueva versión en portugués. Ye’l llibru de narrativa curtia “Contos. Dúzia e meia deles”, tornáu pol escritor portugués Daniel Gouveia.

El llibru espublícenlu les editoriales portugueses Chaves Ferreira y DG y l’asturiana Fundación Méjica, que van encargase de la distribución nos sos respectivos países, cuntando col apoyu de la Conseyería de Cultura y Turismu d’Asturies.

El Club Xeitu convoca’l segundu Certame Lliterariu en Pal.luezu Guzmán Álvarez, col que se tentará de revitalizar la variedá de la llimngua asturiana del cordal occidental lleonés. El certame, abiertu a cualesquier interesáu en participar, tendrá una modalidá de poesía y una de prosa.

Les obres podrán presentase enantes del 15 de mayu, momentu nel cualu sedrán evaluaes por un xuráu, que presidirá Roberto González-Quevedo, escritor y secretariu de l’Academia de la Llingua Asturiana. El fallu fadráse públicu’l día 1 de xunetu y la entrega premios tendrá llugar el próximu branu, demientres la cellebración del “Recital de Patsuezu” que s’organizará, per tercer añu consecutivu, na Casona de San Miguel. Les obres premiaes espublizaránse nel boletín del club.

Esti certame lleva’l nome del filólogu babianu Guzmán Álvarez, ún de los primeros investigadores de la variedá pal.lueza del asturianu.