Lliteratura

El llunes 13 de setiembre a les doce la nueche, termina’l plazu de presentación d’orixinales pal Premiu “Montesín” de Lliteratura Xuvenil 2010, que convoca Ediciones Trabe en Collaboración cola Conseyería de Cultura y Turismu. En 2008 fízose col gallardón Vicente García Oliva, cola novela Fontenebrosa: la rebelión de los homosaurios, mientres qu’en 2009, cuando tocaba dedicalu a la novela, ganó David Artime Coto cola novela La bufanda, yá publicada.

Nel concursu pue participase con obres de lliteratura xuvenil en llingua asturiana, yá seyan noveles, recopilaciones de cuentos, poemes o obres de teatru inéditos y ensin premiu n’otros concursos como conxuntu, quier dicise, puen presentase obres de les qu’apaecieren fragmentos publicaos.

El premiu tien una dotación de 2.000 euros en conceptu de drechos d’autor y la so publicación dientro de dalguna de les colecciones de la casa editorial. El xuráu pue partilu, conceder accésit, recomendar la publicación d’otres obres o dexalu desiertu según aconseye la calidá de los trabayos presentaos.

Bases completes de la convocatoria

Según da anuncia’l Serviciu de Normalización L.lingüística del Conceyu Cangas, convocóse yá la edición octava del so “Concursu de cuentos curtios n’asturianu p’adultos”, que, como cada añu dende la so primer convocatoria, vien cuntando con dos categoríes, denomaes pol Conceyu como “asturianu estándar y asturianu occidental”, siendo premiada caúna con 400 euros.

Como cada añu, el xuráu, que se dará a conocer una vez conocíu’l determín tomáu nel concursu, va tar formáu por persones representantes de la Conceyalía de Cultura, l’Academia de la Llingua Asturiana, maestros y escritores en llingua asturiana.

Tolos trabayos han presentase por cuatriplicáu, ensin pasar les venti fueyes en DIN A4 a espaciu doble, baxo l’autoría d’un nomatu y axuntando plica nel interior. Mandaránse al Serviciu de Normalización L.lingüística de Cangas, asitiáu en La Plaza la Oliva, e/n, 33800 Cangas del Narcea. El plazu remata’l 13 d’avientu d’esti añu.

Bases completes del concursu

El Conceyu de Mieres convoca esti certame destináu a mozos ente 16 y 30 años. La obra presentada va tener una estensión máxima de diez fueyes, presentándose enantes del 31 d’ochobre na Oficina d’Información Xuvenil de Mieres.

El primer premiu ye de 1.200 euros y el segundu ye de 400, amás de la espublicación de dambos. Pa más información pue escribise a oij@ayto-mieres.es o llamar a 985 542 745.

Bases completes

La VIII edición del Salón del Llibru Asturianu, asitiáu dende’l pasáu vienres 20 d’agostu nos Xardinos d’El Náutico de Xixón, acueye la mayor parte del fondu bibliográficu del total de les venti editoriales asturianes que se dan cita nel alcuentru cultural.

El Salón, que tará abiertu hasta’l próximu día 29 d’agostu n’horariu de mañana y tarde, tien l’envís de dar a conocer la bayura y calidá del llibru asturianu. D’esta miente, el Gremiu d’Editores d’Asturies, organizador del eventu, cifra nunos 5.000 los exemplares que podrán comprase nos diferentes stands. Al empar rescampla’l fechu de que la metá de los títulos presentaos tán escritos n’asturianu, circunstancia que s’esplica pola presencia d’editoriales como Asturtoons, Trabe, Trea, Pintar-Pintar o Editorial Universos. No tocante a l’axenda del Salón, el vienres 27 d’agostu a les 19.00 hores va tener llugar la presentación de la novela del periodista y escritor David Artime Coto “La Bufanda”, obra ganadora del Premiu de Narraciones Trabe 2009.

El BOPA dio anuncia de la resolución de la Conseyería de Cultura y Turismu del Gobiernu d’Asturies pola que se conceden y denieguen sovenciones pal fomentu de la traducción y/o edición n’otres llingües d’obres escrites orixinalmente n’asturianu o en gallego-asturianu. En total, 20.000 euros que van sirvir pa que vean la lluz n’otros idiomes la obra d’autores como Xuan Bello, Esther Prieto, Migue Rojo o Xuan Santori.

Ente les obres sovenciones, la torna al castellanu d’“Advenimientu” d’Adolfo Camilo Díaz, fecha pol propiu autor y espublizada por Libervox. Esta mesma editorial van espublizar tornes d’Ismael González Arias y Miguel Rojo, “El tiempu de Manolo” y “Memories d’un seductor”, respectivamente.

Xuan Santori va espublizar la torna de la “La fábrica de Lluz”, poemariu de so n’asturianu, con Universos. Pintar-Pintar va sacar en llingua catalana “El poema que cayó a la mar” d’Aurelio González Ovies-traducción, “De qué tará fecha la lluna” de Miguel Rojo y en castellanu “Arroz, agua y maíz” de Berta Piñán.

Recibe ayuda “La nieve y otros complementos circunstanciales” de Xuan Bello pola traducción al catalán de Jordi Raventos Barlan y la torna al gallegu de“Güelu Ismail”, d’Esther Prieto Alonso, fecha por Esperanza Mariño.

El testu de la resolución pue descargase

Esta tarde a les 19 hores preséntase nel Salón del Llibru Asturianu (carpa del Gremiu d’Editores d’Asturies asitiada nos Xardinos del Náutico) el poemariu ”Diversa memoria” (premiu Teodoro Cuesta, Ediciones Trabe) de Xelu Morán. Presenta, xunto al autor, el profesor de la Universidá d’Uviéu, Xulio Viejo.

La Conseyería de Cultura acaba facer pública la resolución de les sovenciones pa la edición de llibros n’asturianu. El llistáu de llibros que reciben ayuda oficial permiténos conocer la gran mayoría de les novedaes editoriales que van espublizase a lo llargo de los meses vinientes. Ente les editoriales beneficiaes colos 190.000 euros otorgaos tán Trabe, Asturntoons, Universos, Espublizastur, VTP, Ámbitu, Trea, Pintar-Pintar…

Ámbitu va espublizar “La casa gris”, d’Ignaciu Llope, “Ornamentación na gaita asturiana”, de Balbino Menéndez Suárez, “Onde viven los amigos”, de Roberto González Quevedo; y otres obres de Pablo Texón, Francisco Pimiango, Xuan Bello ya Iris Díaz Trancho. Amás, van espublizar la torna de “Londres nevao”, de Jordi Llavina, fecha por Ramón d’Andrés.

Suburbia Ediciones reedita dellos llibros, como “Añada pa un güeyu muertu”, d’Adolfo Camilo Díaz; y “De les coses del mundu”, que col mesmu nome que l’ensayu espublizáu en 1989 por Ignaciu Llope axunta agora nuevos testos, y agora ampliáu. Amás d’obres de Xurde Fernández y Marián García o Pablo X. Suárez, xunto a una antoloxía de dellos autores, titulada, “Contadores de Lluz”.

La editorial infantil Asturtoons espubliza nesta ocasión obres de Cristina Muñiz Martín, Amparo y Jorge Fernández, Enrique Carballeira y Xavier Frías Conde. Mientres que Trabe, un añu más, ye la editorial con más novedaes previstes nel so catálogu. “Azurriángamelamelonga”, de Xuan Xosé Sánchez Vicente; “Ana Ozores y la so estraña manera d’entender el sexu”, d’Adolfo Camilo Díaz; “El cordobeyu y otros cuentos”, de Joaquín Fernán¬dez García; “Cilurnión”, d’Ánxel Nava; “Lo peor del bon tiempu”, d’Héctor Pérez Iglesias; la “Obra completa n’asturianu”, de Nené Losada Rico; “El sol negru de Wewelsburg”, de Xabiero Cayarga; “Ambos mundos “, de Xuan Bello; “Tiempu de render”, de Sofía Castañón; “Fina la parrochina”, de Carla Menéndez Fernández; “Cómo soi”, d’Esther Prieto o la redición de “Malia, Mariantia y yo. Cuentos”, de M.ª Josefa Canellada.

Trabe va encargase tamién de la reedición d’obres como “De Corinto de Grecia”, de Xilberto Llano; “Asina somos nós”, de Miguel Rojo y “La muerte amiya de nueche”, de Xuan Xosé Sánchez Vicente. Van espublizar tamién “¡Qué vos preste!”, de Cristina Muñiz Martín; “El Norte y otros cuentos”, de Vicente García Oliva; “Diariu de viaxe”, d’Adolfo Camilo Díaz; “El cuartu negociu”, d’IsmaelGonzález Arias. La música va tener espaciu tamién nes sos novedaes, col llibru técnicu “Alborada. Métodu de gaita asturiana”, de Flavio R. Benito.

Ediciones Trea sigue apostando poles ediciones billingües (castellán/asturianu) con “La mancadura/ El daño”, de Berta Piñán y “Restauración. Antología poética bilingüe (1993-2009)”, de Xandru Fernández. Pela so parte, Espublizastur, va sacar al mercáu “Doña Terina”, de Xaviel Vilareyo Villamil y l’ensayu “Incompetentes y autoritarios. La industria de Xixón dende l’autarquía al desmantelamientu”, de David M. Rivas.

Universos tien previsto espublizar esti añu la tercer entrega de la so revista lliteraria “Estandoriu”, amás d’una colección de biografíes pa rapazos con obres como “Evaristo Valle”, de Sidoro Villa Costales, “Einstein”, de Jorge Fernández García y Amparo E. Sarrión Fernández-Diestro o “Urraca”, de Cristina Muñiz Martín. Amás, recibieron ayudes tamién, pa “El camín que mos marca”, de Xosé Ramón Martín Ardines. La torna d’“El reiseñor chinu”, de Hans Christian Andersen (traducción d’Irene Riera), “Arguyu y prexuiciu”, de Jean Austen, con traducción d’Eloy Antuña; o l’“Antoloxía de la poesía occitana “, de dellos autores y con tra¬ducción de Javier Martínez Concheso, son otres de les obres qu’esta editorial tien sovencioanes pa la so salida a les llibreríes.

CH Ediciones saca al mercáu “Suenos. Versos cunqueiros”, de Rosa Rodríguez. VTP va espublizar “¿Aqué nun sabéis lo que pasó?”, de M.ª Jesús R. Guillón y “La metamorfosis de la caxa tonta”, de Rubén Sánchez Antuña. Bocarte espubliza la torna de la “La verdadera historia inventada de Paca y Tola”, d’Isabel de Ron Rodríguez, fecha por Xosé Miguel Suárez “Tapia”. Pintar-Pintar tien preparaes delles novedaes pal so tradicional públicu infantil: una torna de la obra en castellán “El libro del bosque”, de María Josefa Canellada, y obres orixinales d’Aurelio González Ovies, Carmen Gómez Ojea, M.ª Luz Pontón, David y Xurde Fernández, Vicente García Oliva, Berta Piñán y dellos autores más.

Resolución de les sovenciones nel BOPA

La Sociedá Popular de La Regalina dio anuncia del resultáu del so concursu de poesía, dedicáu al padre Fernán Coronas, escritor clásicu asturianu. La Casa Natal del Padre Galo sirvió d’espaciu pa dar a conocer al ganador, que nesti casu foi Ánxel Álvarez Llano, pol poemariu “Ensin salir de casa”.

El xuráu tuvo formáu por José Luis Rendueles, Carmen Guardado, Dori Méndez, Mar Marena y Félix Ferreiro, que destacaron “el precisu y estrictu usu de la llingua, la coherencia formal de tolos poemes y l’algame d’un ritmu tresparente y sonoru”.

L’autor ye un poeta bien conocíu na lliteratura asturiana. Ñació en Bo (Conceyu d’Ayer) nel añu 1958. Ye llicenciáu en Filoloxía Española y Especialista en Filoloxía Asturiana pola Universidá d´Uviéu. Collaborador en delles publicaciones como “Lliteratura”, “Lletres Asturianes”, “Rey Lagarto”, “Suplementos del Norte”, “El Fondo de la Verdad”, y “Suplemento de Cultura” del periódicu La Nueva España.

Ye xuráu de los premios lliterarios “Pepe Campo”, “Elvira Castañón” y “Cartes d´Amor” del conceyu d´Ayer, y del Premiu “Fernández Lema”, de L.luarca (Valdés). Davezu tien participao en presentaciones de llibros y alcuentros lliterarios aportando conferencies y comunicaciones: Feria del Llibru d´Uviéu, Feria del Llibru Asturianu de Xixón, Cursos de Branu de l´Academia de la Llingua cellebraos en Cangas de Narcea, na Xunta d´Escritores reuníos en Villaviciosa, etc. Como integrante del Colectivu Poéticu “Dazibao” participó n´acciones poétiques na Feria de Muestres de Xixón, Facultá de Filoloxía d´Uviéu, Foguera de San Xuan de Corvera, Selmana Cultural de La Felguera, etc. La so obra poética céntrase nel campu poéticu algamando los principales premios poéticos n´asturiano: “La mar con nome de muyer” (Premiu Elvira Castañón 1993); “El silenciu la viesca” (Premiu Vital Aza 1994); “Vieyos fuebos, fresques cenices” (Premiu Fernán Coronas 1995); “Na mesma piedra” (Teodoru Cuesta 2001).

Arriendes d´estos concursos tien publicaos los llibros de poesía “Les agües muertes” (1994); “Vieyos fuebos, fresques cenices” (1995) y “Güéspede del silenciu” (1996), y “Na mesma piedra” 2002. Ye, destamiente, antoloxista, editor y traductor de delles obres al asturián. Los primeros poemes d´Ánxel Álvarez Llano nacen de la necesidá d´espresar unos sentimientos onde l´intimismu xuega un importante papel, reflexando situaciones anímiques de desasosiegu, de falta d´esperanza y d´escasu enfotu.

Esta tarde a les siete y media, na Llibrería Trabe d’Uviéu, va presentase’l llibru “Les histories prohibíes de Marta Veneranda”, que foi Premiu Casa de las Américas, 1997, y que tornó al asturianu Paquita Suárez Coalla. Na presentación van participar, amás de la traductora; Sonia Rivera Valdés, autora; Consuelo Vega Díaz, Directora Xeneral de Política Llingüística ya Inaciu Iglesias, editor.

Les histories prohibíes de Marta Veneranda son el resultáu de la lliteraturización de los testimonios que Marta Veneranda Castillo Ovanda recoyó pa facer un trabayu que-y valiera pa obtener un doctoráu.

Esta ye una obra coral, na que les muyeres protagonistes falen en primera persona y conformen un universu mestizu, cosmopolita y feminista. Subversivu, porque toes elles ruempen col canon sexual y de xéneru establecíos: munches d’elles suañen con y amen a persones del mesmu sexu y toes elles son, amás, resultáu d’un cruce de cultures: d’una parte beben de lo llatino de la so cultura materna y d’otra arrecostinen cola cultura neoyorquina que les abelluga de manera más o menos caldia.

Oriundes d’un país o d’otru toes elles tienen en común –amás d’un mundu enguedeyáu de rellaciones nes que toes tienen daqué que ver con toes– el ser conscientes de la so autonomía vital y romper colos determinismos toos qu’aten la muyer pol fechu simple de ser muyer.

Sonia Rivera Valdés nació en Cuba y vive na ciudá de Nueva York, onde ye profesora de Llingua y Lliteratura española nel York College. Amás d’esta obra, pola que recibió’l premiu Casa de les Amériques de Lliteratura Hispánica nos Estaos Uníos, tien publicada “Historias de mujeres grandes y chiquitas”.

Paquita Suárez Coalla, asturiana en Nueva York, ye la responsable de la traducción d’esta obra. Como autora n’asturianu tien publicaos los llibros de relatos “Pa nun escaeceme” (traducíu al inglés y al castellanu) y “La tarde que nos llevaron al cine y otros cuentos”.

L’Asociación de Vecinos El Horreo del Carbayedo, en collaboración cola Estaya de Normalización Llingüística del Ayuntamientu d’Avilés, convoquen con motivu de les Fiestes de San Roque del Carbayéu, que se celebren del 20 al 23 d’agostu del 2010,el cuartu concursu de microrrellatos n’asturianu “L’Horru del Carbayéu”. El plazu pa presentar rellatos, n’asturianu y d’un máximu de trés fueyes, ye’l 2 d’agostu.

El concursu tien les bases siguientes:

1-Pue participar cualesquier escritor/a en llingua asturiana como muncho con tres rellatos.
2- Los rellatos nun puen pasar de les 500 pallabres. La temática ye llibre.
3- El plazu pa presentalos piésllase a les 14 hores del día 2 d’agostu.
4- La presentación namás pue facese pel Corréu Elletrónicu, unviando los rellatos en formatu WORD a: avvelhorreo@yahoo.es.
Los trabayos dirán encabezaos per un TÍTULU y firmaos con un NOMATU/pseudónimu.
Les señes del mail nun puen ser indicatives de l´autoría.
El xuráu reclamará dempués, tamién por mail, tolos datos a los autores de los rellatos finalistes.
PREMIOS.-
Daráse un primer premiu de 400 € y troféu al meyor rellatu y 3 accesits, consistentes en llotes de llibros y placa, a los otros 3 rellatos finalistes.
SISTEMÁTICA.
a.- El 5 d’agostu un xuráu entamáu por reconocíes personalidaes de la cultura asturiana determinará los trabayos ganadores.
b.- El llunes, 23 d’agostu, los cuentos premiaos serán lleíos por un contador avezau o contadora, o polos mesmos autores, nel prau la fiesta (parque del Carbayedo), a les 20:00 hores. A esi actu han asistir los/les ganadores, pa recoyer los premios.
c.- Tolos rellatos presentaos, premiaos o non, van asoleyase nuna esposición al aire llibre, nel prau la fiesta, abierta al públicu los díes que éstes duren.
e.- El Xuráu entenderá de cualesquier dulda o problema que puea apaecer. A les sos decisiones nun se pue retrucar.
f.- Presentase a esti concursu implica la plena aceptación d´estes BASES.