Lliteratura

Carla Perucho (Xixón, 1982) presenta esti miércoles, 13 d’ochobre, nel Centru de Cultura Vieyu Institutu de Xixón, el llibru Mansín. La presentación va entamar a les 19:30 hores y nella va esplicar les claves d’esti llibru infantil sobre’l gallón qu’andulió del tiempu pel pueblu de Tarna y convivió cola so xente hasta la so muerte.

Con guapes y cencielles ilustraciones, la historia quier averar a los escolinos al mundu natural asturianu y, por casu, a la cultura asturiana al traviés de dellos personaxes-animales emblemático, como ye’l casu de Mansín.

Hasta la fin d’ochobre ta abiertu’l plazu pa la presentación de rellatos al concursu lliterariu de la Fundación Cultural Asturias, qu’esti año celebra la so edición cuarta. El concursu ta destináu a mozos menores de 30 años residentes n’Asturies y ta dotáu con 1.000 euros de premiu y la publicación de la obra.

La tema ye llibre, siendo’l testu inéditu y escritu en castellán o n’asturianu, con un máximu de 25 fueyes.

Bases completes

L’Asociación d’Escritores d’Asturies entregó esti xueves el V Premiu de les Lletres, que foi pa Juan Cueto, autor en castellán; y los XI Premios de la Crítica d’Asturiese que tuvieron por ganadores aBerta Piñán en lliteratura infantil y xuvenil, Carlos Suari, pola so poesía n’asturianu ya Ismael González Arias pol columnismu lliterariu, ente los autores n’asturianu.

Amás, pola so obra en castellán, llevaron premios Francisco García Pérez llevó de columnismu lliterariu; Pablo Huerga, narrativa de non ficción; José Ángel Ordiz Llaneza, cuentu; ya Ignacio del Valle na catergoría de novela.

El Vicerrectoráu d’Estensión Universitaria, Cultura y Deportes celebra güei, día 6 d’ochobre, a les 20 hores na Aula Magna del Edificiu Hestóricu de la institución, un homenaxe al profesor Francisco Ayala. Nél van intervenir la so vilda, la profesora Carolyn Richmon; Luis García Montero, catedráticu de Lliteratura y asesor de la Fundación Francisco Ayala; José Alberto Álvarez Sanagustín, profesor de la Universidá d’Uviéu y Josefina Martínez, directora de la Cátedra Alarcos.

El llibru XIX(ON) CENTURY, orixinalmente espubublizáu n’asturianu, acaba d’apaecer na so versión en portugués col nome “XIX(ON) SOUND”. La obra, de Xavier Frías Conde, filólogu y escritor n’asturianu, gallegu y otres llingües, espublízase en versión dixital y de la mesma forma que la obra orixinal, pue descargase de baldre y embaxo llicencia Creative Commons. El volume ta formáu por un cuentu curtiu tituláu “Sobrevivencia” y cinco microcuentos ambientaos en Xixón y escritos n’asturianu, pero qu’agora ven la lluz na so versión lusa.

Xavier Frías-Conde (1965) ye Doctor en Filoloxía Románica, autor de lliteratura infantil, poesía y ensayu. Amás, ye traductor lliterariu, autor de delles antoloxíes (de poesía galesa, gallega y sarda contemporanees), miembru del Grupu Bilbao d’escritores en llingua gallega en Madrid. Tien obra espublizada en gallegu, castellán, asturianu, inglés, catalán…

Descarga’l llibru de baldre

L’asociación del Eo-Navia “Xeira” vuelve convocar, y van venti ediciones, el so concursu lliterariu. Un certame que ye anguaño “el de más sonadía y antigüedá en tola fastera eonaviega”. Los rellatos, escritos en gallego-asturianu, pueden mandase por cuadruplicao col sistema de plica al apartáu de correos 5 d’A Caridá (El Franco). El premiu ye de 600 euros, rematando’l plazu’l 15 de payares.

Coinciendo con esti venti aniversariu del premiu, Xeira ta preparando delles actos de los que van dar noticia ceo.

El ganador da edición anterior foi l’escritor bualés Miguel Rodríguez Monteavaro, col rellatu «Amazonas». La entrega del premiu fízose na Casa Cultura de Bual el 11 de febreru pasáu, nun actu onde tamién participó’l grupo de folk Moxega y onde se presentó’l discu “Versióis eonaviegas” de Dixebra.

Ente los premiaos n’ediciones anteriores, dende la primera, que se convocó en 1991, tán los nomes de los más de los autores de llibros en gallego-asturiano de los últimos años, como Manolo Galano, Alejandro Antúñez, Jacinto Díaz, Fredo de Carbexe, Rafael Cascudo, Xaviel Vilareyo, María José Fraga, Aurora García Rivas, Alfredo de Ponticella, Marisa López Diz o Miguel Monteavaro.

Bases completes

La Casa Cultura de La Pola Siero acueye esti martes 28 de setiembre a les 20:00 hores la presentación del llibru “Mael al Debalu”, de Sidoro Villa Costales. Na presentación va tar, amás del autor, la periodista y escritora Mari Luz Pontón.

Nel llibru, un rapaz, Mael, va al debalu pela mar nun sofá y pasa unes aventures bien entreteníes. Un llibru encamentáu “lo mesmo pa rapazos que pa grandes”.

El Centru Municipal Integráu de L’Arena, en Xixón, acueye l’actu d’entrega de los Premios Timón, qu’entrega l’Asociación L’Arribada y qu’esti añu estrena estaya p’autores asturianos qu’escriben en castellán. A les ocho la tarde y cola actuación del Cuarteto Antolín de la Fuente, Roberto González-Quevedo y Luis Fernández Roces van recoyer el premiu, que consiste nuna obra del escultor y ceramista xixonés Jesús Castañón.

Amás, y primero d’esti actu, l’Arribada va cuntar güei con dellos actos más. A les cinco y media la tarde, conferencia de David M. Rivas “L’añu de la cris que nadie nun quixo ver”. Darréu, tertulia, “Sociedá civil y promoción lliteraria”, a les siete, presentación del llibru “Del romanticismu al rexonalismu: escritores carlistes na lliteratura asturiana”, Premiu Fierro Botas d’Ensayu 2009, de Javier Cubero, rematando les presentaciones col llibru “As razóis d’Anxélica” d’Aurora García Rivas.

Los autores ganadores de los Premios Timón

Luis Fernández Roces

Ñació en Pumarabule, Siero, en 1935. Crióse en Carbayín (Siero) y reside en Xixón. Ye autor de les noveles El Buscador (Premio Novelas y Cuentos, 1977), La Borrachera (Premio Asturias, 1982), Diálogo del éxodo (Premio Casino de Mieres, 1986), El paraje escondido (Premio Alfonso García Ramos, del Cabildo Insular de Tenerife, 1988), La arena de los ciclos (Premio Torrelavega, inédita), y de los llibros de narrativa curtia De algún cuento a esta parte (Biblioteca Cajastur, 1990) y Ageón (Ediciones Trea, 2001). Estes dos últimes publicaciones recueyen obres qu’algamaren premios tan relevantes como los siguientes: Hucha de Oro, Ciaño, Lena, Ciudad de Villajoyosa, Ignacio Aldecoa, La Felguera, Caja de Ahorros de León y Sara Navarro. Dalgunos de los sos cuentos tan recoyíos en Pequeña antología de cuentistas contemporáneos (Universidad del Valle, Colombia 1975), Cuentos de autores asturianos, de María Elvira Muñiz (Ayalga, 1978), Antología de cuentistas contemporáneos, de Francisco García Pavón (Editorial Gredos, 1984) y Cuento español de posguerra, de Medardo Fraile (Cátedra, 1994). Tamién tien publicaos los poemarios Viejos Materiales (2006) y Letras de cambio (2009).

Roberto González-Quevedo

Escritor, filósofu, antropólogu y llingüísta ñacíu en Palacios de Sil, conceyu de Lleón, en 1953. En 1981 algamó’l Premiu de Narraciones Curties de la Diputación d’Asturies (antecesor del Xosefa Xovellanos) col so relatu Pul sendeiru la nueite. Ye miembru de númberu de l’Academia de la Llingua Asturiana ocupando anguaño’l cargu de secretariu, y director de la revista Cultures, editada pola Academia asturiana y dedicada a temes antropolóxicos y etnográficos.

Ente les sos obres tán Pul sendeiru la nueite (1981), Inis Aion (1986), Llume de Lluz (2002), Pan d’Amore (2004), El Sil que baxaba de la nieve (2007). A comuña cola so madre, Eva González, Poesías ya hestorias na nuesa tsingua (1980), Poesías ya cuentus na nuesa tsingua (1980), Bitsarón: Cousas pa nenus ya pa grandes na nuesa tsingua (1981), Xentiquina (1983), Xeitus: poesías ya cuentus (1985) y Branas d’antanu ya xente d’anguanu: poesías ya cuentus (1990).

Entrevista con Roberto González-Quevedo n’Asturnews

L’asociación Furmientu, de Zamora, acaba d’anunciar la salida del númeru nuevu d’El Llumbreiru, la publicación trimestral alredor del patrimoniu llingüísticu zamoranu, que llega al númberu 24. La revista pue descargase de baldre en pdf.

Nesta edición pueden atopase informaciones sobre’l V Concursu de Vocabularios Tradicionales, un espaciu dedicáu a la Lliterarura n’asturllionés de Zamora: ¿A quién embeleca usté?, por Severino Alonso; un trabayu sobre los “Nombres de calles y plazas en leonés ne la comarca de Sayago (I)”, por J. Alfredo Hernández. Amás dapaez un editorial y la resolución de la sopa de lletres del númberu anterior.

Descarga’l númberu completu de baldre

L’Academia de la Llingua Asturiana abre la xornada de güei na Arribada cola presentación de les actividaes y publicaciones feches pola institución nel 2010. El Centru Municipal Integráu de L’Arena va acoyer darréu la presentación específica d’una d’elles, el poemariu “L’alcordanza” de Marta Mori.

A les 18:30 Berto Cobreros Gil presenta’l llibru “De la escritura a la llectura”, falando darréu Inaciu Iglesias, qu’arriba a los actos col so ensayu últimu, “Tu como yo. El nacionalismu vistu d’otra manera”, espublizáu por Trabe. Un actu al que va siguir la presentación del llibru de cocina “Recetes llambiones” de Beatriz Rato Rionda, qu’edita VTP.

A les ocho y media, últimu actu de la xornada, tiempu pa la “estaya musical” con “De mandilín”.

Entrevista sobre’l llibru n’Asturnews