Lliteratura

El Vicerrectoráu d’Estensión Universitaria, Cultura y Deportes de la Universidá d’Uviéu convoca un concursu lliterariu en dos modalidaes: de rellatu curtiu y poesía, cola posibilidá de presentar testos n’asturianu y en castellán. Pueden paticipar los alumnos y alumnes matriculaos nel cursu académicu 2010/11 en cualquiera de les enseñances oficiales impartíes en centros propios de la Universidá.

Cada concursante pue presentar una única obra por cada modalidá, siendo de tema llibre.

Na modalidá de rellatu curtiu la estensión de los testos tien un mínimu de 10 folios y un máximu de 30. Na modalidá de poesía la estensión mínima ye de 600 versos y máxima de 1.200.

El concursu ta dotáu d’un premiu únicu de 1.000 euros por cada modalidá. La presentación o unviu d’orixinales, dirixíos a la Vicerrectora d’Estensión Universitaria, Cultura y Deportes ha efectuase en cualquiera de los rexistros de la Universidá. El plazu acaba l’11 d’abril del 2011.

El BOPA del 4 de xineru afitó la decisión del Vicerrectoráu d’Estensión Universitaria de la Universidá d’Uviéu de camudar les bases del so I Concursu Lliterariu qu’agora recueyen la posibilidá de presentar obres n’asturianu, y non solo en castellán, como se recoyía enantes de la reclamación fecha pol Conceyu Universitariu pol Asturianu (CUPA), que motivó esti cambiu nes bases.

El BOPA yá recueye la rectificación de la Universidá sobre’l Concursu Lliterariu

L’Asociación d’Escritores Noveles convoca esti Certame Nacional al que se pueden presentar noveles en castellán hasta l’1 d’abril. La obra tien de tener ente 160 y 200 páxines y han mandase a Apartáu de Correos 5069 de Xixón, c.p. 33209.

La Conceyalía de la Muyer de Nava convoca’l Premiu de Rellatu Curtiu Navactúa 2011, que se convoca pa rellatos n’asturianu y en castellán, en dos categoríes, “promeses”, pa mozos hasta 17 años y pa “lliteratos”, de 18 años n’adelantre. El concursu busca rellatos que trate sobre la violencia de xéneru con ente 5 y 15 fueyes d’estensión.

El premiu pa la primer cayegoría ta conformáu por un llote de llibros, mientres que la categoría d’aultos va tar dotáu con 450 euros.

Los candidatos han mandar les obres embaxo’l sistema de plica, al Ayuntamientu de Nava, asitiáu na Plaza Manuel Uría 1, 33520. Pue recibise más información nel teléfonu 985 716 008. El fallu va emitise enantes del 9 de marzu de 2011, entregándose en Nava’l 19 de marzu.

El viernes 21 de xineru van entregase los premios del Concursu de cuentos en llingua asturiana pal alumnáu de quintu y sestu d’EP, de les escueles de los conceyos del Valle del Ese-Entecabos nel Salón d’Actos de la Biblioteca y Casa la Cultura de Valdés. Sedrá a les 18.30 hores.

Nesti concursu participen escueles de Cuideiru, Salas, Tinéu, La Puela y Valdés, y los ganadores van lleer el so rellatu en público. El primer premiu ta dotáu con 100 euros, el segundu con 75 y el terceru con 50. Amás, los premiaos van recibir un diploma y un llibru de Nené Losada.

Había dos categoríes dientro’l concursu, de tema llibre y cuentos basaos nel Valle del Ese-Entecabos. Dientro de la primera, la ganadora foi Alexia Fernández, el segundu premiu pa Samanta Suárez y el terceru pa Mayte Fernández. Na segunda categoría el primer premiu cayó en Rubén Marqués, el segundu en Llarina Rodríguez y el terceru n’Aida Mariño.

La edición del VIII Concursu de Cuentos Curtios p’adultos del Conceyu de Cangas del Narcea tuvo como ganadores a Elías Veiga y Xuan Carlos Crespos. Na categoría d’“asturianu estándar” el vencedor foi Xuan Carlos Crespos Lanchas, que yá ganara’l mesmu premiu na edición del añu pasáu. Nel casu de la obra na variedá occidental del asturianu, el ganador foi Elías Veiga, col trabayu “Tierra adientro”.

El xuráu tuvo formáu por Xuan Bello, Ignaciu Llope, Elena Martínez, Julia Gallego y Mónica Rodríguez.

La Conceyalía de Cultura del Conceyu de Ribeseya asoleyó yá les bases de la cuarta edición del Premiu Arbidel de Cuentos Eróticos que se convoca “col envís de contribuyir al espardimientu y promoción del usu del asturianu y de la cultura asturiana en xeneral”. La obra pue presentase hasta l’8 d’abril d’esti añu.

Van entregase dos premios, unu dotáu con 1.200 euros y el segundu con 500. La entrega va facese na Selmana de les Lletres Asturianes, en mayu. L’añu pasáu resultaron ganadores David Artime Coto y Adolfo Camilo Díaz, participando diez autores na convocatoria.

Los Alcuentros Poéticos nel Vieyu Institutu de Xixón, coordinaos por Antonio Merayo, reciben a la poeta Lourdes Álvarez, que va recitar la so obra xunto al músicu Xurde Fernández Álvarez. Nel actu va lleese un testu de presentación del profesor Álvaro Ruiz de la Peña. L’actu va celebrase esti vienres 14 d’avientu, de magar les ocho la tarde.

Lourdes Álvarez

(La Güeria d’Urbiés, Mieres, Asturies, 1961). Ye llicenciada en Filoloxía Hispánica y Especialista en Llingua Asturiana pola Universidá d’Uviéu. Ente les sos obres tán “Aldabes del olvidu”, “Mares d’Añil” o “Mediando les distancies”.

Foi ganadora en dos ocasiones del premiu de poesía “Teodoro Cuesta”, en 1992 con “Mares d’añil” y en 1994 con “Como aquella que yeres”. Tamién foi premiada nos VIII Premios de la Crítica de Asturias, nel añu 2006, na modalidá de “Poesía n’asturianu”. Apaez incluyida nes principales antoloxíes d’estos últimos años, dende l’Antoloxía poética del Resurdimientu, de Xosé Bolado (1989) hasta Toma de tierra. Poetas en lengua asturiana. Antología (1975- 2010) de José Luis Argüelles.

La hestórica llibrería Alborá Llibros de Xixón, asitiada na Plaza Romualdo Álvarez González dende los años setenta, anque con un cambiu de llocal, echa’l pieslle dempués de más de trenta años como referencia imprescindible del llibru asturianu y mui especialmente de les publicaciones en llingua asturiana. La crisis del sector editorial, qu’acabó esta mesma selmana cola Llibrería Trabe, fai agora que la llibrería xixonesa pieslle les sos puertes de forma indefinida.

Nel añu 2007 Alborá pasó de manes de Xicu Yepes, que tuvo al frente de la mesma a lo llargo de cuasi dos décades, a Distribuciones Cimadevilla, qu’apostó na llibrería por un tonu más xeneralista, con best-sellers y guíes de viaxes, amás de la tradicional llinia de llibru asturianu del negociu.

Nel día a día de la llibrería tuvieron a lo llargo de la so hestoria persones como Frichu Yustas o Pili Yepes, ente otros. Dende que Distribuciones Cimadevilla se fizo con Alborá, esta vien tando baxo la xestión directa de Chusa Barril, que fizo pola realización d’actos y presentaciones n’Alborá, acoyendo nestos recitales, presentaciones d’eventos culturales y publicaciones.

Personal de la Distribuidora ta estos díes empaquetando los llibros sobrantes y lliquidando colos distribuidores los llibros en depósitu. Otru hestóricu espaciu asturianista qu’echa’l pieslle nestos díes, anque quiciabes nun seya pa siempres.

El tercer Salón del Llibru de Grau llega a la so fin güei, 5 de xineru, na capital moscona. D’11 a 14 hores y de 17 a 20, van poder mercase llibros con un 5% de descuentu (inclúi novedaes, best-seller, infantil, etc.) sortiando regalos ente toles compres. La feria entámala la Conceyalía de Cultura a comuña coles Llibreríes de Grau, la Biblioteca’l Conceyu y el Gremiu d’Editores d’Asturies.

Na so cabera xornada, va celebrase, de 12 a 14 hores, un taller de marcapáxines, pa neños a partir de 6 años.

Suburbia Ediciones va llevar a les llibreríes a non tardear, el númberu 10 de la so colección Mecánica Popular, un llibru tituláu “Contadores de lluz”, nel que trece autores acompañen cola so lliteratura a les semeyes de Jandro Llaneza.

Los autores son Pablo Texón, Quique Faes, Xabiero Cayarga, Vanessa Gutiérrez, Xandru Fernández, Alberto Carrio, Sofía Castañón, Xabel Vegas, Miguel Rojo, Pablo X. Suárez, Xurde Fernández, Iris Díaz Trancho y Ramón Lluís Bande.