Lliteratura

El Gremiu d’Editores d’Asturies entama na plaza de Trescorrales d’Uviéu’l primer Salón del Llibru Asturianu Solidariu, que va celebrase dende’l vienres 25 al domingu 25 de marzu, cola participación de les 17 editoriales que formen parte del Gremiu, que van poner a la venta’l so fondu editorial, con llibros en castellány asturianu, y que por cada llibru compráu na feria, van donar otru igual a instituciones como’l Centru Maternu Infantil d’Uviéu o’l Centru Penitenciariu de Villabona.

L’horariu d’esti salín ye d’11:00 a 15:00 hores y de 17:00 a 21:00 hores, cuntando con delles actuaciones, cuentacuentos… La Bandina’l Tombu va tar el sábadu 26, a les siete y media la tarde.

L’Asociación de Telespectadores y Radioyentes d’Asturies convoca’l concursu de cuentos y microrrellatos “La Radio y/o la TV” que ta estremáu en trés categoríes: participantes ente 10 y 13 años; participantes ente 14 y 17 años; y participantes con edaes penriba los 18 años.

Los premiaos van ver publicaos los sos cuentos, van ser protagonistes d’entrevistes, van recibir llotes de llibros y van tener una matrícula gratuita nun taller lliterariu.

La unviada de les obres, que pueden tar n’asturianu y en castellán, han facese al traviés del corréu atrasturias@gmail.com, hasta’l 15 d’abril.

Bases completes del concursu

El vienres 18 de marzu a les 20 hores nel llocal Cambalache d’Uviéu, preséntase’l llibru Pop Retórika, asoleyáu por Glayíu Editorial. Nel actu va facese un recital de los poemes de Pop Retórika que la editorial define como “una bofetada na cara de los aspirantes a voceros xeneracionales, un jab-jab nos morros de los incendiarios de la tinta, una falta a la llírica bienpensante y moquetada”.

En Pop Retórika el poeta X fai balance del so más recién poesía con un estilu tremendamente propiu: una incapacidá manifiesta pa espresar con seriedá lo que-y interesa; un humor omnipresente y omnipotente que-y dexa enarbolar “pene per espada” pa enfrentase a aquello que pretende baltar; una ironía, d’últimes, que fai de la llectura de los versos del caracoláu señor X un auténticu privilexu namás aptu pa quien saben rise de sigo mesmos.

El Seminariu de Filoloxía Asturiana de la Universidá d’Uviéu decidió publicar de manera separtada, en formatu llibru, los artículos incluyíos nel volume últimu de la Revista de Filoloxía Asturiana escritos n’homenaxe al profesor Diego Catalán, que morriera en 2008 y con quien los investigadores d’esti Seminariu tenía collaborao en proyectos distintos. El resultáu ye’l llibru, Homenaxe a Diego Catalán, n’edición de Juan Carlos Villaverde Amieva, y asoleyáu por Trabe y Alvízoras.

Esti xueves, 17 de marzu, de magar les siete la tarde, la FNAC de Parque Principáu, en Siero, va acoyer la presentación de la reedición fecha por Suburbia Ediciones del llibru “Añada pa un güeyu muertu”, d’Adolfo Camilo Díaz. Na presentación van participar l’autor de la obra, l’escritor Antón García y la editora Silvia Cosío.

“Añada pa un güeyu muertu”, ganó en 1985 el Premiu Xosefa Xovellanos de novela.

La Estaya de Cultura del Conceyu Bimenes ta acabante de convocar el Concursu de Cuentos pola Oficialidá del Asturianu, qu’esti añu llega a la so XIV edición. El plazu de presentación de cuentos al certame fina l’1 de xunu y la entrega de premios (dotaos con 800, 500 y 350 €) sedrá xusto un mes dempués,l’1 de xunetu, coincidiendo coles cellebraciones de la Fiesta de la Oficialidá de la Llingua Asturiana.

Los cuentos han de tar redactaos en Llingua Asturiana, respetando les normes ortográfiques vixentes. Sedrán inéditos, de tema llibre, non premiaos n’otros concursos lliterarios y que nun tean suxetos a nengún compromisu d’edición. Los rellatos han de tener una estensión másima de 10 folios y presentase mecanografiaos a doble espaciu, per una sola cara. Unviaránse un orixinal, tres copies y una copia en versión informática (CD). Cada autor o autora nun podrá presentar namás qu’una obra.

Los cuentos han d’unviase a Ayuntamientu de Bimenes (pal XIV Concursu de Cuentos pola Oficialidá del Asturianu). Martimporra, s/n. CP 33527 – Bimenes. Afítase’l teléfonu de contautu ya información que vien darréu: 985 700 004.

El día 14 d’abril, a partir de les 19:00 hores na Capiella los Dolores de Grau, va tener llugar la inauguración de la Biblioteca de Poesía Asturiana de l’Aula de les Metáfores, una iniciativa que se suma a la biblioteca de poesía catalana cola que yá cuntaba la institución moscona. La Biblioteca de Poesía Asturiana va convertise esi día nuna realidá gracies al patrociniu de la Conseyería de Cultura, que va sumar a los fondos yá esistentes na Aula, más de 300 volumes donaos pola Dirección Xeneral de Política Llingüística, que va siguir apurriendo dacuando exemplares a una colección que suma nesti momentu más de 400 y que va axuntar les referencies ineludibles de la poesía asturiana de tolos tiempos, dede Antón de Marirreguera a Antón García.

Van Compartir espaciu na Biblioteca los clásicos de la poesía asturiana como’l Padre Galo, Constantino Cabal, Teodoro Cuesta o Xuan María Acebal, los autores del Surdimientu, Xuan Xosé Sánchez Vicente, Manuel Asur, Xuan Bello, Berta Piñán, Antón García, Pablo Antón Marín Estrada, Lourdes Álvarez o Esther Prieto, y los más nuevos continuadores d’esa tradición, como Xandru Fernández, Vanessa Gutiérrez, Pablo Texón o Héctor Pérez Iglesias. La Biblioteca va poner a disposición de los llectores tamién les antoloxíes más importantes que se ficieron hasta la fecha, les principales traducciones y les revistes y demás publicaciones periódiques que recueyen amueses de poesía n’asturianu.

Nel actu d’inauguración van intervenir los representantes de la Conseyería, el Conceyu de Grau y la Fundación Aula de les Metáfores, pa dar pasu de siguío a un conciertu nel que se van interpretar cantares basaos en testos de dalgunos de los más destacaos poetes asturianos.

L’alcuerdu suscritu cola Conseyería de Cultura y Turismu contempla tamién la realización conxunta d’actividaes de promoción de la poesía asturiana. Nesi sentíu, destaca la collaboración de l’Aula de les Metáfores na próxima Selmana de les Lletres Asturianes, dedicada al escritor llangreanu Mánfer de la Llera. El 5 de mayu, a les 20:00 hores na Capiya de los Dolores, trés poetes que se cunten ente los más representativos de les socesives xeneraciones del Surdimientu, Xuan Xosé Sánchez Vicente, Xuan Bello y Vanessa Gutiérrez, van lleer poemes propios y van esponer la so valoración de la obra y la figura del poeta homenaxáu.

El Club de Prensa Asturiana acueye esti xueves 3 de marzu a les siete la tarde la presentación del llibru “Poemas de ciertos días”, d’Efrén Cañedo Granado, espublizáu pol Foru de Creación y Llectura de la Biblioteca de Grau. Nel actu van participar Luis Arias Argüelles-Meres, escritor, profesor y columnista de La Nueva España, Gustavo Adolfo Fernández, representante del Foru, y el propiu autor Efrén Cañedo Granado.

L’Asociación d’Hostelería “El Barriu de La Sidra” convoca la segunda edición del so certame lliterariu “sidreru”. Nesta ocasión va haber un premiu en castellán y otru n’asturianu, amás de los accésit qu’envaloren oportunos los miembros del xuráu. El fallu del II Concursu de Microrrellatos sidreru “Barriu De La Sidra” va faese públicu’l 31 de marzu , siendo’l plazu llende d’entrega’l 17 de marzu y los premios de 500 euros pa caúna de les categoríes.

Esti concursu entámenlu en collaboración la revista La Sidra, xunto cola Fundación Asturies Sieglu XXI y El Barriu de La Sidra.

Na primer edición del premiu algamó’l primer puestu Mercedes Alonso Blanco pol rellatu “Viaje de Ida”, mientres que “Las tres mentiras de Sidora”, de José Luis Rendueles, algamó la segunda posición, recibiendo 500 y 300 euros, respectivamente.

Bases completes del concursu

Xuventú Asturianista, mocedá del PAS, organiza un actu d’alcordanza a la figura de Pachin de Melás per segundu añu consecutivu y coincidiendo col 73 aniversariu de la muerte na Cárcele d’El Coto, en Xixón. Dende la organización de mocedá asturianista recuerden que nun pueden “escaecer la fecha na que morrió una persona tan importante p’Asturies como foi Emilio Robles Muñiz” al que califiquen d’escritor “comprometíu cola cultura asturiana y coles condiciones de vida de los obreros d’aquel entós”, amás de pidir “l’autonomía p’Asturies”.

Los responsables de la organización del actu califiquen al autor xixonés de “patriota” y “verdaderu amante del so país”, lo qu’argumenten “demuéstrase na defensa de la democracia, el progresu social y económicu y la identidá nacional asturiana que reclamaba, pa lluchar escontra l’escaezu de los nuesos paisanos y del so exemplu de sacrificiu”.

L’actu homenaxe, que se celebrará xunto a la Vieya Cárcele d’El Coto a les 12:00 hores del sábadu 5 de marzu; tará compuestu por una llectura de poemes del autor, actuación musical y la participación de familiares del escritor xixonés.