Lliteratura

Asturnews ufre una galería na so canal de Facebook onde pueden vese les semeyes de tolos participantes na Llectura Institucional de Testos n’Asturianu que se celebró esti miércoles na Sala Europa de la Xunta Xeneral d’Asturies, cuntando per primer vegada col Presidente d’Asturies, Vicente Álvarez Areces. Ente los particpantes, el Rector Vicente Gotor, la Presidenta de l’ALLA, Ana Cano, el Delegáu del Gobiernu Español n’Asturies, Antonio Trevín, la Conseyera de Cultura, Mercerdes Álvarez, y representantes de tolos partíos nel parllamentu.

Galería de semeyes

El Teatru Nuevu de la Felguera recibió a grupos y cantantes pa facer homenaxe a Mánfer, al traviés de l’adaptacion de poemes de so como cantares. Ente los participantes, Alfredo González, Toli Morilla, los Hermanos Valle Rosso, el Renacencia… Asturnews ufre una completa galería de semeyes.

Galería de semeyes del conciertu

Dientro de los actos de la 32 Selmana de les Lletres Asturianes, n’homenaxe al escritor Manuel d’Andrés Fernández, Mánfer de la Llera (1918-2005) va celebrase güei , miércoles 4, a les 13:00 hores, una Llectura pública institucional de testos n’asturianu nel Salón Europana Xunta Xeneral d’Asturies, n’Uviéu. Un actu nel que diputaos, conseyeros, senadores y otros políticos lleen testos recoyíos nuna antoloxía asoleyada a costafecha pal actu y que nesta ocasión inclúi testos sobre la mina.

Yá pela tarde, a les ocho, nel Nuevu Teatru de La Felguera (Llangréu) celébrase’l Conciertu “13 x Mánfer”, que va cuntar coles actuaciones d’Alfredo González, Felpeyu, Hermanos Valle Roso, Mario Fueyo (Dark la eMe), Renacencia, Toli Morilla, Xera, Silvino Torre y alumnáu y docentes del IES Cuenca del Nalón.

Güei nesti nuevu episodiu
sol frañir la nuestra tierra
voi tocavos otra estaya
que ta dándonos rocea.
Prúyeme falar del bable,
la probe llingua asturiana,
que lleva yá abondos sieglos
pol centralismu frayada
y hai quien intenta entovía
a ver si llogra esguazala.
(…)

Y eso ye lo que-yos pasa
a los que tenen ser finos
por facer casu de cuatro
centraliegos señorinos
que por haber tao estudiando
presumen de ser más llistos.
Y dígovos yo, collacios,
col mio corazón na mano:
nun facer casu de naide,
lo nuestro ye l’asturiano,
sin qu’esto quiera dicir
despreciu pal castellano.
Los dos nacen del llatín,
son dos idiomes hermanos;
deprendiendo bien el nuestru
ye más fácil estremalos.
Pero equí, na nuestra tierra,
suena meyor l’asturiano.
(…)
Nin ye cosa d’inorantes,
nin ye una llingua aldeana,
nin ye un falar d’otru mundu,
nin ye más fea nin más guapa:
ye una llingua como toes,
desemeyá, culta sana,
que préstase pa escribir,
y pa falar como tala,
igual que val la franchuta,
la rusa o la castellana.
Con ella Asturies entiéndese
sin mester d’otra foriata.
Y nun hai que da-y más vueltes,
pues siendo llingua asturiana
y nosotros asturianos…
¡será un arguyu falala!
Hai que llantala na escuela,
na radio y televisión,
y en tolos papeles diarios
pa qu’algame difusión.
Pa que nun haiga un paisanu
en toa la nuestra rexón,
dende Unquera a Cadavéu
y dende Tarna a Xixón,
que nun sepia l’asturianu.
¿Nun ye una satisfaición?
Xixón, 1982

Aconceyáu en Ribeseya el xuráu del Cuartu Premiu Arbidel de Cuentos Eróticos, formáu por Nieves Otero Paraja, especialista n’asturianu pola Universidá d’Uviéu y profesora d’asturianu, Vicente García Oliva, miembru de l’Academia de la Llingua asturiana y escritor y Xandru Martino Ruz, especialista n’asturianu pola Universidá d’Uviéu y faciendo de secretariu con voz, pero ensin votu, don Juan González Martino, conceyal de cultura del Conceyu de Ribeseya, apautaron da-y l’accesit del Cuartu Premiu Arbidel de Cuentos Eróticos al rellatu “Mientres me Mires”, presentáu ensin alcuñu, y escritu por Marisa López Diz, y declarar ganador del Cuartu Premiu Arbidel de Cuentos Eróticos al rellatu “La marca d’agua”, presentáu baxo l’alcuñu de El destín fetichista y que ta escritu porPablo Rodríguez Medina.

La Selmana de les Lletres entamó esti martes pela tarde nel teatru de La Felguera, en Llangréu, onde familia y autoridaes axuntaron pa da-y el primeru de los homenaxes a Mánfer de la Llera, autor al que se-y dedica la Selmana. Nel actu tuvieron presentes la Conseyera de Cultura, Mercedes Fernández, que dio un discursu; l’Alcadesa de Llangréu, Esther Díaz y la Directora Xeneral de Política Llingüística, Consuelo Vega, ente otres autoriades.

L’actu, presentáu por Vanesa Gutiérrez, cuntó cola participación de la música d’Anabel Santiago, la llectura d’un poema de Mánfer per parte de Marisa Vallejo, y la pieza escénica “Cultura popular” con Begoña Quirós, José Ramón Oliva y Xuaco Carballido.

Semeyes del actu en Facebook

La Tertulia Pachín de Melás que se celebra nel Chigre Cantábrico de Xixón, na cai Muelle d’Oriente, 3, xunto a los Xardinos de la Reina, dedica esta selmana’l so alderique al tema “El coríu feu. Alrodiu de la lliteratura asturiana infantil y xuvenil”. L’alderique va entamar esti martes 3 de mayu a les ocho y media la tarde cola participación de los escritor Vicente García Oliva; Ángela Sánchez, editora responsable de Pintar-Pintar Editorial; Mar Martín, responsable de la Biblioteca Virtual MªXosefa Canellada, y la escritora Iris Díaz Trancho, como presentadora del actu.

Esti martes, 3 de mayu, entamen los actos de la 32 Selmana de les Lletres Asturianes, n’homenaxe al escritor Manuel d’Andrés Fernández, Mánfer de la Llera (1918-2005). La so Gala inaugural va celebrase güei, día 3 de mayu, nel Nuevu Teatru de La Felguera (Llangréu). Asturnews ufre esta selmana una amplia cobertura de los actos entamaos a lo llargo de toa Asturies, dende la Conseyería de Cultura, conceyos y otres instituciones y organizaciones privaes.

El programa completu d’actividaes pue descargase dende esta mesma páxina y entama tres d’esa Gala inaugural, a les 13:00 hores del miércoles 4 na Xunta Xeneral del Principáu d’Asturies (Uviéu) cola Llectura pública institucional de testos n’asturianu nel Salón Europa y a les 20:00 hores otra vuelta nel Nuevu Teatru de La Felguera (Llangréu) col Conciertu 13 x Mánfer, que va cuntar coles actuaciones d’Alfredo González, Felpeyu, Hermanos Valle Roso, Mario Fueyo (Dark la eMe), Renacencia, Toli Morilla, Xera, Silvino Torre y alumnáu y docentes del IES Cuenca del Nalón.

El xueves día 5 a les 13 hores na Casa de los Alberti (Ciañu, Llangréu) presentaráse la edición conmemorativa “Mánfer de la Llera, de la rampla a la pluma”, volume ilustráu al rodiu del escritor y la so época y el llibru “En cata de la mio lluna” Antoloxía lliteraria, de Mánfer de la Llera. Esie mesmu día a les 20 hores na Casa la Cultura de Sama (Llangréu)habrá Asturianada y monologuismu: conciertu n’alcordanza de Mánfer de la Llera; con José Manuel Reguero (El Maestru), Valentín Fuente, Juan Pablo Santos, Manolo Collado, Bibiana Sánchez y Carlos Ronderos. Y a les 20 hores na Capiella de los Dolores (Grau) fadráse un recital poéticu n’homenaxe a Mánfer de la Llera. Cola participación de los poetes Xuan Xosé Sánchez Vicente, Xuan Bello y Ana Vanessa Gutiérrez, en collaboración cola Fundación Aula de les Metáfores.

Pa finar el vienres 6 de Mayu, a les 11 hores nel Barriu de La Llera, en Sama (Llangréu) fadráse’l Descubrimientu d’una placa dedicada al escritor, na cai Mánfer de la Llera y a les 12:00 hores nel IES Cuenca del Nalón (La Felguera, Llangréu) habrá’l tradicional actu escolar de celebración de la Selmana de les Lletres Asturianes cola entrega de premios del «XVI Concursu de Poesía y Dibuxu» y del «VIII Concursu de Cartelismu», amás de l’actuación del grupu Duerna.

Programa completu d’actividaes de la 32 Selmana

¡Oh, Dioses del Olimpu!, echáime una gabita, que nun sé si yo solu podré tirar del carru y finar esta xera.

¡Oh, Muses del Parnasu!, sofitáime un migayu, que tamién a vosotres necesita na estaya esti humilde poeta.

¡Y a tí, hermanu Apolo!, acudo en tí enfotáu: Tú, que les ames tanto, inspira a les tos Muses, pa qu’elles m’inoculen el néutar del to numen.

Que voi narrar la síntesis d’una epopeya diaria que tán llibrando impávidos, nes coraes de la tierra, forníos topos humanos, los héroes anónimos, ¡los homes de la mina!

Yo baxé abondes vegaes a lo fondero del Tártaru (tercer rexón del Avernu), a u Plutón tien el so tronu atarraquináu solombres: espeu tros cadavéricos habitantes d’esi reinu.

Yo vime n’ocasiones escorríu poles Furies, que nun queríen dexame lluchar pola esistencia, que’l trabayu me daba,—a mí y a mio familia— allá abaxu nel fondu, onde elles s’erixíen de Dioses d’esi prediu.

Y en delles circunstancies, yo ablayáu, furando chipiteles perestrenchos, esbolígome al centru d’esi mundu, un mundu de materies minerales, baxu un cielo ensin sol y ensin estrelles, onde lo que camines ye a cencielles.

Y enrítense les Fíes de la Nueche, al ver que los humanos el so reinu, intenten invadir p’apoderase d’escomanaes riqueces qu’elles guarden. Y ordenen a la Parca que destruya al que tratare d’entrar dientru l’Arcanu.

Faciendo casu omisu de necies alvertencies, de pies nun montacargues, que baxa en vertical per tubu abovedáu revistíu de cementu, viaxo a la boca l’Orcu. Alluéu per prollongaes galeríes, de metálicos arcos reforzaes, o cuadros de madera bien encaxaos, penetro na morada de les dioses, esponiéndome impávidu, a les monstruoses artes yá emplegaes escontra otros collacios fenecíos: al barrenu qu’españa y t’invalida, al costeru traidor que t’estrapalla, o al argayu carbón de fría lava, que t’endolca na masa y te tapez. O a la invisible nube que mata silenciosa con ósidos durmientes, o a la muerte ruidosa con españíos tremendos del metanu prendíu, al mecese col aire, que con furia espantible retorcigaña o france los arcos o los cuadros, y les xugaes los tayos, na galería y na rampla, acabando nel intre con tola entibación y encelegaes y nuna quiebra ciega. Nesi apavoriáu instante too ye muerte y medrana, desolación y ruines en tola rodalada. Equí nun queda dalu requexu pal amor; equí nun hai afayu pa cantar poesía; equí nun queda nada prestoso pa la vida. Sólo queda un silenciu pa la tristura l’alma; sólo queda un espaciu pal duelgu y pa la murnia, pal lloru y… poco más.

Mas, comu la esistencia ye una llucha continua, colingáu n’estratos carboníferos, (fósiles arbolacios prehestóricos), y a traviés d’una viesca de mampostes, allá voi esmuciéndome na rampla, comu nun tobogán que m’empobina escontra d’un testeru d’oru prieto, ayalga rellumante na solombra. Esti ye’l mio destín. Y quiciabes, quiciabes, pue ser el mio afechar.

Y equí fina’l mio cantu, o más que cantu tartiu, ¡oh, Dioses del Olimpu!, ¡oh Muses del Parnasu!, y ¡oh, Apolo, bon hermanu!. Pa que s’enteren dellos —fabricantes de guerres— que nun son mester griesques ente pueblos hermanos, pos épiques batalles yá se llibren a diariu, nes coraes de la tierra, ente los elementos y los topos humanos, los héroes anónimos, ¡los homes de la mina!

(En Lletres asturianes, 40)

La Oficina de Normalización Llingüística de Samartín del Rei Aurelio va celebrar la 32 Selmana de les Lletres Asturianes con dellos actos. El martes 3 va inaugurase la esposición “Escritores n’asturianu de Samartín del Rei Aurelio” na Casona del Bravial de Blimea. Amás, el 5 de mayu, a les diez de la mañana, va presentase’l llibru “Pelegrinos del abismu”, de Lluis Portal, un actu nel que van participar alumnos del IES Juan José Calvo Miguel entrevistando al autor.

El 6 de mayu, coincidiendo col Día de les Lletres, el Conceyu va repartir bolses conmemoratives peles tiendes de Samartín del Rei Aurelio.

La Selmana en Facebook

L’actividá más llamativa de toles entamaes por esta Oficina de Normalización Llingüística va ser la entamada na rede social Facebook, pola que les persones que xuban testos n’asturianu a la so muria van entrar nun sortéu de llibros n’asturianu. Les bases pueden consultase nel perfil de la Oficina en Facebook.