Lliteratura

L’Academia de la Llingua Asturiana (ALLA) entregó’l vienres pasáu los premios de los sos concursos. Esti añu, per primer vegada, celebróse l’actu nel llar nuevu de la institución, nel Monesteriu de les Pelayes d’Uviéu. Nel actu tuvieron presentes la Presidenta, Ana Cano; l’Aylagueru, Carlos Lastra, y el vicepresidente Miguel Ramos Corrada. Ente los premiaos, Xosé Ramón Lozano, Rafael Valdés y Héctor Pérez Iglesias, ente otros.

El xuráu del Concursu d’Investigación de Recoyida de Material Toponímico Oral, formáu por Ana María Cano González como presidenta, Xosé Lluis García Arias como vocal y Corsino García Gutiérrez faciendo de secretariu decidió premiar con 600 € el trabayu tituláu “Toponimia de la parroquia de Barros (Llangréu)” del que ye autor Xabiel Fernández García; mientres que nel casu del Concursu d’Investigación de Recoyida de léxicu asturianu, el premiu foi pal trabayu “Léxicu de Llaiñes, Sobrescobiu” del que ye autor Xosé Ramón Lozano Cuervo.

Nel casu del Concursu de Llectures pa Rapazos el xuráu formáronlu Urbano Rodríguez Vázquez como presidente, Vicente García Oliva como vocal y Pablo Xuan Manzano como secretariu, apautando dar el premiu de 600 €, al trabayu tituláu “Eladio, el dinosauriu que ñació ayeri”, del que ye autor Alberto Menéndez García.

El Concursu de Creación Lliteraria, premiu “Llorienzu Novo Mier” foi nesta ocasión pa “La mano vacía”, poemariu del que ye autor Héctor Pérez Iglesias. El xuráu formáronlu Miguel Ramos Corrada como presidente, Xosé Ramón Iglesias Cueva como vocal, y Marta Mori d’Arriba como secretaria.

El Concursu de Teatru tuvo como xuráu a Miguel Ramos Corrada, Adolfo Camilo Díaz y Carlos Rubiera Tuya, que decidió facer ganador a Noel Canto Toimil por “El facedor de gomeros”.

N’últimu llugar entregóse un accesit de 150 euros del Concursu de Recoyida de Material Lliterario Escrito, premiu “Federico G.-Fierro Botas” al trabayu tituláu N’el falar de la mio tierrina de Gabino Muñiz García-Robés, del que ye autor Rafael Rodríguez Valdés. Fueron xuráu Ana María Cano González como presidenta, Xosé Lluis García Arias como vocal y Corsino García Gutiérrez faciendo de secretariu.

Los concursos d’Investigación Llingüística, Investigación sobre lliteratura asturiana, Recoyida de Material Lliterario Oral, de Curtios Cinematográficos y el Concursu de Cómics en Llingua Asturiana quedaron ermos.

Nel actu presentáronse amás delles obres ganadores n’años anteriores, pertenecientes a les colecciones “Escolín”, “Toponimia” o “Llibrería Académica”.

Álbum de semeyes de la entrega de premios de l’ALLA

La Sociedá Popular La Regalina abre’l plazu del so premiu de poesía, dedicáu a la figura del Padre Galo (1884-1939), clásicu de la lliteratura asturiana hasta’l 16 de xunetu. Al concursu pueden presentase poemarios en llingua asturiana, con un mínimu de 275 versos. Los trabayos han mandase a la Sociedá, que ta asitiada nel Casinu de Cadavéu, na cai Curión e/n.

El premiu consiste en 1.300 euros y la posibilidá de publicar el poemariu . El premiu pue quedar ermu, conociéndose’l resultáu del xuráu, el 7 d’agostu, aniversariu del ñacimientu del Padre Galo.

Nos últimos años ganaron autores como Héctor Pérez Iglesias, Rubén d’Areñes, Carmen Guardado, Berto García o L.luis Fernández, ente otros.

El Conceyu d’Ayer entregó esti xueves pasáu los gallardones del II Concursu de Cuentos Curtios pa Mozos «José Antonio Robles». Na categoría de castellán premióse a Tomás Blanco Carrasco por “La última casería”, mientres que la categoría d’asturianu quedó erma.

La editorial Suburbia tien nes llibreríes dos novedaes. D’una banda, Pablo X. Suárez espubliza “El sistema débeme una chocolatina”, el so tercer poemariu (el segundu n’asturianu, dempués d’Asturiana Beat). Afonda con él nel particular estilu desenfadáu (y n’ocasiones tamién enfadáu) que gasta tamién en narrativa (véase la colección de cuentos Yoni y yo, tamién espublizada por Suburbia Ediciones). Munchos de los poemes recoyíos nel llibru yá son habituales nos recitales o timbes poétiques organizaes pel autor estos últimos dos años.

Una amuesa d’inxeniu, iconoclastia y fuerza espresiva que nun-y va cayer embaxo al llector atentu. “El sistema débeme una chocolatina” ye’l númberu 5 de la colección de poesía “males tierres”.

D’otra banda, na colección d’ensayu “páxina en blanco” la editorial presenta’l primer volume de “De les coses del mundu”, del poeta y ensayista Ignaciu Llope. Ye esti un llibru con hestoria, una y bones l’autor yá usó d’esi títulu hai más de dos décades pa recoyer los sos artículos sobre cuestiones polítiques y antropolóxiques. Ignaciu Llope siempre pensó que “De les coses del mundu” yera un proyectu en marcha, y nesta edición recueye non sólo aquellos artículos inaugurales, sinón tamién tolos que, dende la década de 1980 hasta l’actualidá, foi asoleyando en mui diversos medios.

La producción ensayística del autor ye tan abondosa que “De les coses del mundu” va publicase en dos volúmenes. El primeru, que ye’l qu’agora ve la lluz, recueye tolos escritos sobre celtismu y música folk, amás de los ensayos y artículos espublizaos sobre’l paisaxe y la hestoria del conceyu de Cuideiru, llugar de nacencia de Llope. El segundu volume va incluir los ensayos sobre política y lliteratura.

La última obra del autor asturianu Alfonso Zapico va presentase na llibrería Gizzmo, en Mieres, el sábadu 11 de xunu a les 19 hores, acompañáu pol escritor ya investigador del cómic asturianu Chechu García. A la fin del actu, l’autor va roblar y dedicar exemplares.

En “Dublinés”, Zapico amuesa un gran trabayu de documentación y de plasmación en viñetes, con rellatu chiscáu de múltiples anécdotes que son un viaxe en tren per aquelles ciudaes –Dublín, Trieste, París y Zurich– peles que foi dexando’l so rastru de vida esti irlandés universal. Pernomaos autores van desfilando poles sos páxines como Henrik Ibsen, W.B. Yeats, Ezra Pound, H. G. Wells, Bernard Shaw, T.S. Eliot, Virginia Wolf, Paul Valéry, Marcel Proust, Ernest Hemingway, Samuel Beckett, Sergei Eisenstein, Henry Matisse, André Gide, -y Corbusier, y hasta Lenin.

Alfonso Zapico

(Asturies, 1981). Ñacíu en Blimea ye diplomáu n’Ilustración y Diseñu pola Escuela d’Arte d’Uviéu. Como freelance fai trabayos gráficos de calter infantil/xuvenil pa editoriales (llibros de testu, dibuxos animaos, página web, ilustraciones…), y exerz d’ilustrador nun proyectu de la Conseyería d’Educación d’Asturies dende’l 2005.

Ye collaborador habitual d’un periódicu La Nueva España, y publicó historietes y tires cómiques en diverses revistes xuveniles y dixitales d’Asturies. El so primer álbum de cómic, “La guerre du professeur Bertenev”, espublizólu en Francia Editions Paquet, y recibió’l Prix BD Romanesque nel FestiBD Ville de Moulins nel 2007. Tamién collaboró n’otru álbum colectivu, “Un jour de mai”, editáu na primavera del 2007 por Paquet con guión del francés Règis Hautiere.

Trea asoleya con prólogu d’Araceli Iravedra, n’edición bilingüe asturiana y castellana, el llibru “La mirada aliella/La mirada atenta”. Sedrá esti xueves día 9 de xunu a les 19,30 hores na Llibrería Cervantes d’Uviéu.

La obra d’Antón García ocupa un llugar central na poesía contemporanea d’Asturies, tantu na escrita na mesma llingua asturiana, que ye la de so, como en castellán. Esta antoloxía billingüe aspira, según la editorial “a presentar al llector castellanofalante una de les más indiscutibles y canóniques voces del Surdimientu”.

La profesora Araceli Iravedra, autora del estudiu preliminar d’esta selección, pon de relieve les esmoliciones y motivos que, dende’l primer llibru d’esti autor, tomen asientu y permanecen a lo llargo de la so obra: l’amor y el desamor, el destierru, l’amenaza del tiempu y la so conxura, el poder terapéuticu de la poesía o, más llargamente, la reflexón metapoética, ellí onde aquella verbaliza la voluntá llingüística que la promueve.

El Conceyu de Navia convoca’l XIII Certame Lliterariu Villa de Navia y el X Certame de Poesía Ramón de Campoamor. En dambos casos la dotación ye de 2.000 euros y el plazu d’entrega pal 30 de xunu. Al Certame Lliterariu puedes presentar rellatos curtios de non más de 30 llínies, sobre la modalidá de narrativa llibre, cuentu o reseña hestórica. Al Certame de Poesía pueden presentase poemarios de 200 versos. En dambos casos les obres han ser en castellán.

Nesti nuevu númberu de la revista moscona “Las hojas del Foro” inclúyese, amás de los conteníos habituales de narrativa, ilustración, poesía, cómic y “el bebederu” de cites arrexuntaes pol escritor Fernnando Menéndez, la carta ganadora del Certame de Cartes de Amor “San Valentín” d’anguaño que ye obra de Lola Sanabria García y titúlase “Me quieres, no te quiero”.

La portada cuerre a cargu de Paco Garabato, qu’espubliza amás una ilustración interior xunto a otra obra de Guille Fernández. El cómic ye obra d’Oscar Luis Nogal y María José Fernández, que tamién espublicen dellos rellatos, el restu de la parte narrativa de la revista ta firmada por Paula López G. Virumbrales, Bijou, Teresa Fernández-Barbón, Gustavo Adolfo Fernández, Fidel Sánchez, Diego Casero, Fernando Martínez, la poesía ye d’Efrén Cañedo, Carlos Granda, Wlady y Alfredo Díaz.

Suburbia Ediciones asoleya’l númberu 2 de la so colección pa nenos “camín de Bree”, con esti llibru a comuña ente los dos escritores Xurde Fernández y Marián García. “L’árbol de la verdᔠye un llibru d’aventures onde los propios llectores van tener qu’escoyer el camín a siguir. Un llibru qu’en pallabres de la editorial “estimulará la creatividá y la imaxinación de los neños”. La obra ta ilustrada pola pintora Gloria Caamaño.

Ta abiertu’l plazu pa presentar obres al Premiu Alfonso Iglesias de cómics n’asturianu, que convoca la Conseyería de Cultura d’Asturies con una dotación de 7.000 euros, pa obres d’estilu, tratamientu y tema llibre, pudiendo abarcar el desenrrollu d’una hestoria única o un conxuntu d’hestories, y con una estensión mínima de cincuenta páxines. El plazu ta abiertu hasta’l 16 setiembre.

Presentación de orixinales, sitiu y plazu

Les obres tienen que se presentar nel Rexistru Xeneral Central de l’Alministración del Principáu d’Asturies (Edificiu Alministrativu, c/ Coronel Aranda, s/n, planta plaza, sector central, Uviéu) hasta’l día 16 de setiembre —inclusive— del 2011, en dos sobres cerraos onde tien que s’escribir el nome del Premiu y tien que se facer constar el títulu de la obra y l’alcuñu del autor. Caún de los sobres tien qu’incluyir: Sobre A: Datos del autor/a (señes, teléfonu y un currículum d’estensión curtia); Sobre B: Orixinal y cuatro copies del testu.

Los premios van ser concedíos acordies colos principios d’oxetividá, tresparencia, igualdá, non discrimina¬ción y publicidá per aciu del procedimientu de concurrencia competitiva.