Lliteratura

L’Academia de la Llingua Asturiana acaba d’espublizar un llibru nuevu del escritor y dibuxante Enrique Carballeira, faciendo’l númberu 67 de la colección Escolín. “Xaime Bon y los cinco planetes” cunta les aventures intergaláctiques del héroe que yá protagonizare otros llibros del autor.

El volume ta clasificáu col llapiz encarnáu qu’usa l’ALLA pa encamentar la llectura a neños dende los seis años.

Enrique Carballeira ye natural de L’Infiestu (1970). Periodista y escritor, ye autor de dellos llibros pa rapacinos, de los qu’él mesmu ye l’ilustrador, ente ellos El cuélebre y l’home del espaciu (1991), El príncipe medranosu (1992), El gaiteru de Sotu(1993) y Les aventures de Xaime Bon, detective galácticu (1995), Tres hestories de Ñublina más una de propina (1996) o El casu de los centollos xigantes y Les aventures de Pillu. Tien escrito tamién rellatos p’adultos. Ye collaborador habitual del diariu xixonés El Comercio y del selmanariu en llingua asturiana Les Noticies.

Sigue abiertu’l plazu pa presentar obres al Premiu Alfonso Iglesias de cómics n’asturianu, que convoca la Conseyería de Cultura d’Asturies con una dotación de 7.000 euros, pa obres d’estilu, tratamientu y tema llibre, pudiendo abarcar el desenrrollu d’una hestoria única o un conxuntu d’hestories, y con una estensión mínima de cincuenta páxines. El plazu ta abiertu hasta’l 16 setiembre.

Presentación de orixinales, sitiu y plazu

Les obres tienen que se presentar nel Rexistru Xeneral Central de l’Alministración del Principáu d’Asturies (Edificiu Alministrativu, c/ Coronel Aranda, s/n, planta plaza, sector central, Uviéu) hasta’l día 16 de setiembre —inclusive— del 2011, en dos sobres cerraos onde tien que s’escribir el nome del Premiu y tien que se facer constar el títulu de la obra y l’alcuñu del autor. Caún de los sobres tien qu’incluyir: Sobre A: Datos del autor/a (señes, teléfonu y un currículum d’estensión curtia); Sobre B: Orixinal y cuatro copies del testu.

Los premios van ser concedíos acordies colos principios d’oxetividá, tresparencia, igualdá, non discrimina¬ción y publicidá per aciu del procedimientu de concurrencia competitiva.

Hasta la fin d’ochobre ta abiertu’l plazu pa la presentación de rellatos a la quinta edición del concursu lliterariu de la Fundación Cultural Asturias, de la UXT. El concursu ta destináu a mozos menores de 30 años residentes n’Asturies y ta dotáu con 1.000 euros de premiu y la publicación de la obra, amás d’un accésit de 500 euros. La tema ye llibre, siendo’l testu inéditu y escritu en castellán o n’asturianu, con un máximu de 25 fueyes.

Eva María Alonso Ruisanchez resultó ganadora de la edición pasada, siendo finalistes Inaciu Galán y Sofía Castañón.

Bases completes del concursu

L’Academia de la Llingua Asturiana espublizó apocayá’l númberu 28 de “Lliteratura. Revista Lliteraria Asturiana”. Nel númberu apaecen testos de José Luis Rendueles, Lauren García, Héctor Pérez Iglesias, Inaciu Galán y Lourdes Álvarez, con poesía, narrativa, traducción y teatru.

La publicación, dirixida por Xosé Bolado, inclúi tamién una entrevista de Paz Fonticiella a Montserrat Garnacho, un ensayu de Vicente García Oliva sobre lliteratura y política por cuenta del cuarenta aniversariu de la revista Libre, traducciones d’Antón Gacía de diecinueve poetes norteamericanos del sieglu XX y les adaptaciones que fizo Toli Morilla de dellos cantares de Bob Dylan.

P’acabar, Lliteratura recueye una crítica de Luz Pichel sobre’l llibru de Berta Piñán Arroz, agua y maíz.

Conteníos completos de la revista

La editorial Trabe recupera na so colección “Clásicos y contemporanios” la novela ganadora del nonu premiu Xosefa Xovellanos (1988) y publicada un añu después.

“Asina somos Nós” ye la primer novela de Miguel Rojo (Zarracín, Tinéu, 1957). Al traviés d’una historia de perdedores, Miguel Rojo enfrenta a quien llee con un doble planu narrativu: el de los personaxes, los sos amores y odios, les sos pasiones, fracasos y ésitos, y el del autor, contra quien tienen que lluchar los protagonistes si quieren sobrevivir dientro de la narración y que va apaecer como’l personaxe omnisciente que se llama Nós.

La editorial Trabe recupera na so colección “Clásicos y contemporanios” la obra “Malia, Mariantia y yo”, que supunxo’l primer volume de lliteratura p’adultos y n’asturianu espublizáu por Josefa Canellada.

María Josefa Canellada (L’Infiestu, 1913-Madrid, 1995), doctora en Filoloxía y académica de la llingua, ye autora d’una obra lliteraria n’asturianu curtia pero novedosa. Nella foi quien a derromper caminos nuevos tanto na temática como na manera de narrar.

Cola publicación del rellatu Malia, Mariantia y yo (1990) envereda’l camín de la muyer asturiana p’hacia la prosa lliteraria. Dellos de los cuentos que recueye esti volume apaecieron publicaos en Lletres Asturianes, otros tuvieron inéditos hasta 2002, cuando se-y dedicó la Selmana de les Lletres Asturianes y apaecen n’Antoloxía lliteraria.

El Club Xeitu, asociación venceyada a la montaña suroccidental asturlleonesa acaba d’espublizar un volume de más de doscientes páxines tituláu “Pequena enciclopedia de nós”, de l’autora lleonesa, yá finada, Eva González.

De la escritora Eva González Fernández (Palacios del Sil, 1918-2007) quedaron munches obres escrites y espublizaes a la so muerte, destacando les de la serie Na Nuesa Tsingua (axuntaes na publicación Poesías ya cuentus na nuesa tsingua, 2007) ya Cuentos completos (2008), onde se compilaron les narraciones y cuentos.

Nesta nueva obra, Pequena enciclopedia de nós, Xeitu publica los sos escritos filolóxicos y culturales: vocabularios, reflaneiru, cusitsinas, escritos etnográficos y cantares, redactaos ente 1980 y 1985. Queda, asina, pendiente de publicar la so obra “Hestoria de mia vida”, a mou de biografía.

Con motivu de les Fiestes de San Roque del Carbayedo, a facer n’Avilés del 19 al 22 d’agostu del 2011, y col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Conceyu d’Avilés, dependiente del Serviciu de Promoción Cultural de la Conceyalía de Cultura, entama’l quintu concursu de micro-rellatos b’asturianu “L’horru Del Carbayedo” al que pueden presentase autores hasta con trés rellatos de menos de 500 pallabres y temática llibre.

El plazu pa presentalos piésllase a les 14 hores del día 1 d’agostu. La presentación namás pue facese pel corréu lletrónicu, unviando los rellatos en formatu Word a avvelhorreo@yahoo.es. Los trabayos dirán encabezaos per un títulu y firmaos namás con un nomatu. Nel corréu lletrónicu axuntaráse un archivu aparte, que la organización (A. VV. El Hórreo) guardará en secretu, ensin que’l xuráu pueda conocelu enantes del fallu, colos datos siguientes: nome, teléfonu, señes, DNI, y títulu/os presentáu/os al concursu.

Daránse dos premios: primeru, de 400 euros y troféu; segundu, de 200 euros y placa. Los dos premios nun pueden recayer nel mesmu autor/a. El 4 d’agostu un xuráu formáu por reconocíes personalidaes de la cultura asturiana determinará los trabayos ganadores. El llunes, 22 d’agostu, los/les autores lleerán los rellatos premiaos y recoyerán los premios, a les 20:00 hores, nel Salón d’Actos de la AA. VV. El Hórreo (Cai Dr. Marañón, 16, baxu).

Tolos rellatos presentaos, premiaos o non, van esponese al públicu al aire llibre, nel campu la fiesta (Parque del Carbayedo), los díes que dure la fiesta. El Xuráu entenderá de cualesquier dulda o problema que pueda apaecer. A les sos decisiones nun se pue retrucar.

El Club Xeitu fizo públicu’l fallu del xuráu del III Certame Lliterariu ‘Guzmán Álvarez’ en Pal.luezu, variedá del asturianu, que recayó n’Irma González-Quevedo Pedrayes, pola so obra “Eternidᔠ. L’autora, ñacida n’Uviéu en 1987, yá consiguió’l premiu na modalidá de poesía na so primer edición. Diplomada n’Enfermería, amuésase bien interesada pola lliteratura y la cultura del Altu Sil, tierra de la que ye natural tola so familia paterna, incluyida la so güela, la célebre escritora, yá finada, Eva González y el so padre, Roberto González-Quevedo.

El premiu, que se va apurrir el próximu 6 d’agostu en Vil.lablinu, ta dotáu con 200 euros y un diploma acreitativu, que contien la imaxe del certame, fecha pol artista l.lacianiegu Manuel Sierra. El xuráu tuvo integráu polos escritores Emilce Núñez, Severiano Álvarez y Manuel Gancedo.

La editorial Trabe recupera na so colección “Clásicos y contemporanios” el primer llibru de Xilberto Llano.

Premiu Xosefa Xovellanos del añu 1987, “De Corinto de Grecia” –primer novela de Xilberto Llano (Arroes, Villaviciosa, 1965)– ye un percorríu peles siendes de la memoria, una memoria inventada como futuru, pero que vien del pasáu más llonxanu y clásicu y que sirve d’arrincada p’analizar el momentu cultural asturianu. D’estructura complexa, con un rellatu del futuru (l’acción dase a finales del sieglu XX y primeres décades del XXI), esta obra derrompe caminos nuevos pa la narrativa asturiana, que daquella taba, como quien diz, naciendo.