Lliteratura

Hasta’l 16 setiembre sigue abiertu’l plazu pa presentar obres al Premiu Alfonso Iglesias de cómics n’asturianu, que convoca la Conseyería de Cultura d’Asturies con una dotación de 7.000 euros, pa obres d’estilu, tratamientu y tema llibre, pudiendo abarcar el desenrrollu d’una hestoria única o un conxuntu d’hestories, y con una estensión mínima de cincuenta páxines.

Presentación de orixinales, sitiu y plazu

Les obres tienen que se presentar nel Rexistru Xeneral Central de l’Alministración del Principáu d’Asturies (Edificiu Alministrativu, c/ Coronel Aranda, s/n, planta plaza, sector central, Uviéu) hasta’l día 16 de setiembre —inclusive— del 2011, en dos sobres cerraos onde tien que s’escribir el nome del Premiu y tien que se facer constar el títulu de la obra y l’alcuñu del autor. Caún de los sobres tien qu’incluyir: Sobre A: Datos del autor/a (señes, teléfonu y un currículum d’estensión curtia); Sobre B: Orixinal y cuatro copies del testu.

Los premios van ser concedíos acordies colos principios d’oxetividá, tresparencia, igualdá, non discrimina¬ción y publicidá per aciu del procedimientu de concurrencia competitiva.

Hasta la fin d’ochobre ta abiertu’l plazu pa la presentación de rellatos a la quinta edición del concursu lliterariu de la Fundación Cultural Asturias, de la UXT. El concursu ta destináu a mozos menores de 30 años residentes n’Asturies y ta dotáu con 1.000 euros de premiu y la publicación de la obra, amás d’un accésit de 500 euros. La tema ye llibre, siendo’l testu inéditu y escritu en castellán o n’asturianu, con un máximu de 25 fueyes.

Eva María Alonso Ruisanchez resultó ganadora de la edición pasada, siendo finalistes Inaciu Galán y Sofía Castañón.

Bases completes del concursu

El sábadu pasáu José Luis Rendueles Antón recibió en L.luarca’l premiu Fernández Lema na so modalidá d’asturianu, dotada con 3.500 euros. El rellatu premiáu foi “Les vaques, toles vaques”, un testu calificáu pol xuráu como “retratu realista de la vida aldeana”.

Na so versión en castellán, dotáu col doble de premiu, 7.000 euros, la ganadora foi Elena Alonso Frayle por “Antes de la tormenta”. Los premios entrégalos la Fundación Fernández Lema.

L’asociación L’Arribada dio anuncia de la decisión tomada pol xuráu de concede-y el V Premiu Timón p’autores en llingua asturiana y eonaviegu al escritor Vicente García Oliva. El gallardón consiste nuna pintura cerámica obra del artista xixonés Jesús Castañón, que va entregase nun actu que forma parte de la programación de L’Arribada 2011, el viniente 17 de setiembre.

El xuráu aconceyó’l miércoles, 3 d’agostu, y taba formáu por Alberto Álvarez Peña, Fernando de la Fuente , Aurora García Rivas, David M Rivas, y presidíu por Humberto Gonzali.

Vicente García Oliva ñació en Xixón nel añu 1944. Cursó estudios de profesor mercantil. Foi ún de los fundadores de Conceyu Bable nel conceyu xixonés. Ye miembru de númberu de l’Academia de la Llingua Asturiana, onde dirixe la Coleición Lliteratura Xuvenil. Forma parte del conseyu de redacción de la revista Lliteratura.

García Oliva ye integrante destacáu de la primera xeneración del Surdimientu y autor d’una numberosa obra lliteraria onde figuren los siguientes títulos:

Títulos de lliteratura infantil y xuvenil – Les aventures de Xicu y Ventolín (1982), La bruxa Pumarina y el Dragón Maragatu (1983 y 2004), Xicu y Ventolín en vacaciones (1984), Fontenebrosa: El reinu de los Silentes (1984 y 1992), Delfina la ballena cantarina (1986),Memoria de los Cimeros (1986), Diariu d’Enol (1988), El mercaderu de tormentes (1993), Muerra la Reina de Corazones (1996), Eso… de la Mitoloxía Asturiana (1998, edición n’asturianu y en castellán),Los camientos de Deva y Xulián (1998), El barco de los locos (2004, en castellán), La fada que nun quixo ser fada (2005), ¡Alabín, bon, ban…! (2006), Relato de las aventuras de Inés Saldaña y de cómo ayudó a Colón a descubrir América (2006, en castellán), Elemental, querida Lisa (2007), Garulla. Antoloxía del ritmu (2007), El Club Social d’Altos Vuelos (2007).

Lliteratura p’adultos – L’aire de les castañes (1989), El norte (1991),Aventura humana y lliteraria al rodiu de don Enrique García Rendueles (1992), A simple vista (2001), Constelaciones (2002), El ríu soterrañu (2003), El síndrome de Scherezade (2011).

Los ganadores anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’(2009) y Roberto González-Quevedo (2010).

El xuráu de V Premiu de Microrellatos de l’AAVV “El Hórreo de Carbayedo”, independiente dafechu de la organización, alcordó da-y el primer premiu al micro-rellatu “Pol amor d’una muyer” de Pablo Rodríguez Medina; y el segundu a “Vaya peles ánimes” de Vítor Suárez.

El llunes 22, a les 18:30 representaráse una comedia de teatru asturianu y darréu (sobre les 20 hores) va facese la entrega de premios, con llectura de los rellatos por parte los premiaos, nel salón de l’asoaciación avilesina, asitiada na cai Dr. Marañón, 16, baxu.

El Cafetón d’Avilés organiza esta nueche, de magar les nueve, un homenaxe al escritor y artista Nel Amaro. L’actu, nel que van participar Ánxel Nava, Roxelio Crespo, José Lobo, Carmen «Lin», Ánxel Nava y José Rico, ente otros, va facer alcordanza de la figura d’esti autor de Mieres que morrió nel mes d’abril pasáu, dexando una amplia obra artística y lliteraria.

Nel Amaro, yera miembru de l’Academia de la Llingua y ún de los poetes más combativos y modernos del Surdimientu. Nacíu en Quentuserrón (Mieres) en 1946, y foi ún de los animadores culturales del Valle del Caudal de les dos últimes décades.

Presu políticu nos últimos años de la dictadura, fundó y dirixó en Mieres y Turón revistes culturales tan actives como “Sapiens” y “Cuélebre literario”. Nel Amaro ye ún de los escritores más prolíficos y versátiles de la moderna lliteratura asturiana. Poeta, novelista y autor teatral, primero en castellán y más tarde n’asturianu, ye tamién ún de los pocos nomes de la primer xeneración del Surdimientu que siguía publicando na actualidá y faciendo actu de presencia en performances y otres instalaciones.

La so obra poética alcuéntrase recoyida nos llibros: Responsos laicos (1979), Habitación de poeta (1981), Boca arriba, lentamente naufragando (1982), Y tu, Marta B., qu’entoncies nun yeres, tampocu, l’Anna Karina de les películes de Jean Luc Godard (1990), Diariu d’un polizón (1990), Poemes de San Francisco (1993) y Pruebes d’autor (1994). Nellos practica una estética que xunta en dosis asemeyaes guiños vanguardistes con ecos de protesta social (de Vallejo, Blas de Otero, Aresti, mayormente) y que faen d’Amaro ún de los autores más singulares del panorama poéticu del Surdimientu.

Como novelista dio a estampa: “Adiós Dvorak” (1990), “Novela ensin títulu” (1991), dos exemplos del cultivu del xéneru policiacu ente los actuales escritores asturianos y “Falanxista” (1996), una obra que conxuga l’alcordanza hestórica cola denuncia política, y “Na borrina” (1993) y “L’últimu del pelotón” (1994). Amaro dirixó tamién grupos teatrales y ye autor, al empar, de diverses obres dramátiques, ente les que resalta Antígona, por exemplu (1991). Nos años noventa l’escritor mierense empieza a dedicase a otros campos creativos como’l de la poesía visual, la elaboración de fancines y l’entamu de “happenings” y instalaciones de calter colectivu.

Hasta la fin d’ochobre ta abiertu’l plazu pa la presentación de rellatos a la quinta edición del concursu lliterariu de la Fundación Cultural Asturias, de la UXT. El concursu ta destináu a mozos menores de 30 años residentes n’Asturies y ta dotáu con 1.000 euros de premiu y la publicación de la obra, amás d’un accésit de 500 euros. La tema ye llibre, siendo’l testu inéditu y escritu en castellán o n’asturianu, con un máximu de 25 fueyes.

Eva María Alonso Ruisanchez resultó ganadora de la edición pasada, siendo finalistes Inaciu Galán y Sofía Castañón.

Bases completes del concursu

Con motivu de les Fiestes de San Roque del Carbayedo, a facer n’Avilés del 19 al 22 d’agostu del 2011, y col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Conceyu d’Avilés, dependiente del Serviciu de Promoción Cultural de la Conceyalía de Cultura, entama’l quintu concursu de micro-rellatos b’asturianu “L’horru Del Carbayedo” al que pueden presentase autores hasta con trés rellatos de menos de 500 pallabres y temática llibre.

El plazu pa presentalos piésllase a les 14 hores del día 1 d’agostu. La presentación namás pue facese pel corréu lletrónicu, unviando los rellatos en formatu Word a avvelhorreo@yahoo.es. Los trabayos dirán encabezaos per un títulu y firmaos namás con un nomatu. Nel corréu lletrónicu axuntaráse un archivu aparte, que la organización (A. VV. El Hórreo) guardará en secretu, ensin que’l xuráu pueda conocelu enantes del fallu, colos datos siguientes: nome, teléfonu, señes, DNI, y títulu/os presentáu/os al concursu.

Daránse dos premios: primeru, de 400 euros y troféu; segundu, de 200 euros y placa. Los dos premios nun pueden recayer nel mesmu autor/a. El 4 d’agostu un xuráu formáu por reconocíes personalidaes de la cultura asturiana determinará los trabayos ganadores. El llunes, 22 d’agostu, los/les autores lleerán los rellatos premiaos y recoyerán los premios, a les 20:00 hores, nel Salón d’Actos de la AA. VV. El Hórreo (Cai Dr. Marañón, 16, baxu).

Tolos rellatos presentaos, premiaos o non, van esponese al públicu al aire llibre, nel campu la fiesta (Parque del Carbayedo), los díes que dure la fiesta. El Xuráu entenderá de cualesquier dulda o problema que pueda apaecer. A les sos decisiones nun se pue retrucar.

La Sala Loreto, de Colunga, va acoyer el miércoles 20 de xunetu, a les 20:30 hores, la presentación del últimu llibru del escritor y políticu Xuan Xosé Sánchez Vicente, “Retrato de desposados con Panamá a su frente”, editáu por Septem Ediciones. L’actu enmárcase dientro del programa de los Alcuentros cola Cultura Tradicional d’Asturies.

La introducción va correr a cargu de Lluis Antón González.

La editorial Trabe recupera na so colección “Clásicos y contemporanios” la que fuera primer novela de Xuan Xosé Sánchez Vicente, “La muerte amiya de nueche”.

Con esti llibru Xuan Xosé Sánchez Vicente (Xixón, 1949) ganara’l premiu Xosefa Xovellanos, qu’entá yera de narraciones curties, nel añu 1983. D’entós p’acá muncho tien llovío, pero la obra –una novela negra que val de pretestu p’analizar l’Asturies del momentu y la rellación que la so xente establez pa cola so tierra y les sos espresiones culturales más xenuines– nun perdió un rispiu d’actualidá: l’abandonu d’entós ye l’abandonu de güei pa coles coses de nueso.