Lliteratura

Esta fin de selmana remata la edición de l’Arribada 2011 en Xixón. El vienres va dedicase a la presentación de les novedaes últimes de Miguel Rojo, Xabiero Cayarga, Adolfo Camilo Díaz, Pilar Sánchez Vicente y Xuan Xosé Sánchez Vicente, amás d’un alderique sobre la novela asturiana y la música de Taranus.

El sábadu pela mañana va dedicase al ensayu, cola presentación de “Incompetentes y autoritarios. La industria de Xixón dende l’autarquía al desmantelamientu” de David M. Rivas, “De totalitarios a demócrates” de Pablo Rodríguez Alonso, “De les coses del mundu (1)” d’Ignaciu Llope y l’alderique “La realidá propio nel ensayu asturianu”.

Yá de tarde, de magar les cinco, va presentase “Portugal, país, posada y paraíso” d’ Ángel García Prieto y Daniel Gouveia. Darréu va celebrase un recital de Sabel de Fausta y va proyectase’l documental “Barriu de Cimavilla” al que va siguir la presentación de “Sucedió aquí” de Miguel López García.

A les siete y media van entregase los Premios Timón, cuntando cola Actuación del Cuarteto Antolín de la Fuente.

El domingu, a la una, preséntase, “Antón quería ser porteru” de Xurde Fernández y David Fernández, con illustraciones de Francisco Pimiango.

El Garrapiellu tien abierta la convocatoria de la que ye la venti edición del so concursu de cuentos curtios. Un concursu nel que los cuentos han de tar redactaos dafechu en Llingua Asturiana, respetando les normes ortográfiques de l’Academia de la LLingua Asturiana, ensin pasar les 12 fueyes de llargor.

El concursu ta empobináu a escritores mayores de 16 años, la temática ye llibre y el plazu d’entrega tará abiertu hasta’l 13 d’ochobre de 2011, teniendo d’unviase a: TERTULIA CULTURAL EL GARRAPIELLU, apartáu de correos 8133 – 33280 Xixón, nun sobre onde s’escribirá “XX Concursu de Cuentos Curtios EL GARRAPIELLU”. Dientro del mesmu dirá l’orixinal del cuentu col títulu y TRÉS copies, baxo plica, amás d’otru sobre cola plica’l autor y el títulu del cuentu escritu per fora, que contendrá los sos datos y un teléfonu de contactu.

El fallu’l concursu sedrá’l día 25 d’ochobre de 2011. El Garrapiellu nomará un xuráu debidamente cualificáu pa fallar estos premios y les sos decisiones nun serán retrucaes. La entrega de los premios comunicaráse personalmente.

A xuiciu de la Tertulia Cultural El Garrapiellu, el ganador de la presente edición formará parte del xuráu del próximu concursu. Los trabayos premiaos son propiedá d’El Garrapiellu que los espublizará nel IV volumen de Cuentos Curtios. En dengún casu se tornarán los orixinales a los autores de les obres non premiaes, pero éstos podrán, pela so parte, facer usu de les copies nun presentaes.

“El cordobeyu y otros cuentos” forma parte de lo que l’autor, Joaquín Fernández García, llamó yá hai tiempu «lliteratura etnográfica de creación». Refierse con ello a la lliteratura que ta enraigonada na etnografía, la qu’a él más-y presta. Y con ello quería tamién significar que los cuentos populares, les histories que se tresmiten de manera oral, de recrealos, había que lo facer na llingua de quien los cuenta y con una ambientación etnográfica asturiana dafechu.

Tolos cuentos qu’equí apaecen tán basaos n’histories que-y contaron o que de dalguna manera vivió l’autor, ye dicir, que nun salieron de la so imaxinación, yá que formen parte del padrimoniu cultural alleranu. La manera de narralos sí que ye «creación» de so. Ello ye que nesti llibru realidá y ficción van de la mano: de xuru, la xente allerano que llea’l llibru nun va ser quien a desentrellizar lo que de ficción pueda haber nestos cuentos muncho bien ambientaos y meyor escritos, que caltienen y dan lustre a una llingua, a una cultura y a una sensibilidá: la del Altu Ayer.

Joaquín Fernández García (Uviéu, 1943) ye doctor en Medicina pola Universidá d’Uviéu y médicu especialista n’Hematoloxía-Hemo-terapia y Análisis Clínicos. Amás d’obres etnográfiques y médiques, tien publicaos dellos llibros al rodiu de creencies, lleendes y mitoloxía asturianes (Coses d’osos, 1993; Maldaes de l.l.obos, 1996; Les vaques tamién piensan y sienten, 1996; Fito nel país de los gorretinos, 1994; Gene, 1998) amás d’una novela sobre la emigración a América (Siete vides, 2001).

Güei, xueves 15 de setiembre, l’Arribada de Xixón, va cuntar cola presentación de delles obres lliteraries nueves, entamando coles actividaes a les cinco la tarde, nel patiu Centru de Cultura Vieyu Institutu, cola presentación de “¡Qué te preste!”, los monólogos más nuevos de Cristina Muñiz Martín. Les presentaciones lliteraries son una de les actividaes cimeres d’esta edición de la Vagamar lliteraria xixonesa.

Dempués van presentase “Contadores de lluz”, volumen colectivu de Suburbia Ediciones, “El Norte. Cuentos 1976-2010” de Vicente García Oliva, “Onde viven los amigos” de Roberto González-Quevedo, y “Azurriángamelamelongana” de Xuan Xosé Sánchez Vicente.

A les siete y media la tarde va dedicase un alderique a “35 años de cuentu asturianu”, rematando la xornada colos sones de Víctor Álvarez.

Azurriángamelamelonga ye una palabra eufónica que s’usaba como señal d’arranque nun xuegu infantil: una de les persones participantes arrancaba detrás de les otres pa da-yos zurriagazos con un trapu.

Y xuegu, lliterariu nesti casu, ye esta nueva obra de Xuan Xosé Sánchez Vicente, Azurriángamelamelonga, cola que ruempe un llargu silenciu creativu n’asturianu. Xuega l’autor a reeditar una obra que ye plural, pero que tien unidá: la que-y da l’espíritu de «dar zurriagazos» metafóricos al personaxe principal de toles histories que nella se cuenten, que nun ye otru que l’espíritu o sencia mesma del ser asturianu: el cainismu.

Xuegu lliterariu ye porque tres d’una apariencia d’oralidá y popularidá escuéndese la voz de la erudición que ye, a la fin, a devolver los cuentos tradicionales al orixe: enseñances, entreteníes y amañoses, p’andar pela vida.

Xuan Xosé Sánchez Vicente (Xixón, 1949) ye una de les voces de más prestixu na lliteratura asturiana. Cofundador de Conceyu Bable y políticu activu, ye autor d’una amplia obra lliteraria qu’abarca tolos xéneros: poesía (Camín de señardaes. Antoloxía poética 1974-1979, 1980; Poemes de Xixón, 1981; De reidores costes, 1988; …Y de llastientes picos, 1999; y As de corazon/es/y/es, 2001), narrativa (Cuentos de llingua afilada,1984; La muerte amiya de nueche, 1984 –novela–; Lluna llena, 1990 –volume de relatos–), amás de dellos diccionarios, artículos lliterarios, estudios sobre lliteratura y obres de teatru.

Ta abiertu’l plazu de presentación de trabayos, n’asturianu o castellán, al VIII Concursu de Rellatos Mineros Curtios hasta’l 21 d’ochobre. El concursu, qu’entama la Fundación Juan Muñiz Zapico, tien un primer premiu d’ochocientos euros y trés accésit (asturianu, Testimoniu Hestóricu y Mocedá). El fallu del xuráu daráse a conocer el 4 d’avientu coincidiendo cola fiesta minera de Santa Bárbola.

Les bases del concursu son les que siguen:

1. Podrán presentase a esti concursu escritores de cualquier nacionalidá, siempre y cuando que les obres presentaes tean escrites en castellanu o n’asturianu, seyan orixinales y ensin asoleyar y nun fueren premiaes enantes en nengún otru concursu. Pue presentase un máximu de dos microrrellatos por cada autor o autora.

2. El conteníu tendrá que falar necesariamente a dalgún aspeutu (motivos temáticos, personaxes, argumentu o ambientación) venceyáu col mundu de la minería de cualquier país.

3. La estensión nun podrá perpasar les 40 llinies en lletra de cuerpu 12 y tipu Times New Roman o asemeyada, pudiendo ocupar el microrrellatu un máximu d’una páxina en formatu foliu o DIN-A4 por dambes cares.

4. Les obres hai que les unviar per corréu postal a: Fundación Juan Muñiz Zapico (Concursu de Rellatos Mineros Curtios “Manuel Nevado Madrid”) c/ Santa Teresa 15, CP 33005 Uviéu.

5. Los concursantes tienen qu’unviar un sobre onde dientro apaecerá:

• El o los dos microrrellatos

• El sobre de la plica col alcuñu y títulu o títulos na so portada; amás dientro, tienen qu’apaecer tolos datos personales del autor o autora (nome y alcuñu, apellíos, señes, númberu del DNI o equivalente, títulu del microrrellatu o microrrellatos, teléfonu y, si tien, corréu electrónicu).

6. El plazu d’entrega d’orixinales acaba’l día 21 d’ochobre de 2011.

7. La organización nomará al xuráu competente, presidíu pol caderalgu Benigno Delmiro Coto. El xuráu nun conocerá los nomes de los/les autores o autoras, namás el títulu de los rellatos y l’acuñu del autor.

8. Del fallu del xuráu, al que nun se podrá retrucar, daráse conocencia pública’l 4 d’avientu de 2011 coincidiendo cola fiesta minera de Santa Bárbola.

9. Premios:

• Primer Premiu 800 € (500 € en metálicu, más un llote de llibros y un grabáu de Manuel Calvo por un valor total de 300 €).

• Accésit asturianu 500 € (300 € en metálicu, más un llote de llibros por valor de 200 €), para obres presentaes en llingua asturiana.

• Accésit Testimoniu Históricu 250 € (100 € en metálicu más un llote de llibros por valor de 150 €), para obres que falen de fechos reales (biográficos, sindicales o sociopolíticos); siempre en rellación con conteníos históricos o acontecimientos socedíos nel entornu familiar o llaboral mineru.

• Accésit mocedá 250 € (100 € en metálicu más un llote de llibros por valor de 150 €), para obres presentaes por autores de menos de veintiséis años. Para presentase a esti Accésit, los menores de veintiséis años tendrán que lo mentar xunto al alcuñu del microrrellatu.

TOLOS MICRORELATOS QUE SE PRESENTEN CONCURSEN PAL PRIMER PREMIU, INDEPENDIENTEMENTE DE QUE TAMIÉN OPTEN A UN ACCÉSIT. Tolos y toles premiaos o premiaes van recibir un diploma conmemorativu onde va figurar el so microrrelatu impresu.

10. Los premios podrán dexase ermos si, a xuiciu del xuráu, nengún rellatu axuntare los méritos necesarios.

11. Igualmente, los rellatos premiaos, y una escoyeta fecha ente los rellatos presentaos asoleyaránse na forma que camiente más afayadiza la Fundación Juan Muñiz Zapico.

12. Participar nesti certame lleva inxerío aceutar perdafechu estes Bases.

La Obergruppenführersaal, Sala de los xenerales, del castiellu de Wewelsburg tien en suelu de mármole un mosaicu que representa un sol de doce rayos formaos poles runes SS, el Schwarze Sonne, o Sol Negru. Esti castiellu, destruyíu demientres la Guerra de los Trenta Años y vueltu a construyir, foi un centru d’importancia bien grande demientres el nacionalsocialismu: alquiláu en 1934 pol llugarteniente de Hitler, Heinrich Himmler, esti tentó de convertilu nel centru del nuevu mundu que diba xurdir en ganando’l Tercer Reich la batalla última.

El mundu de la emigración, del racismu, la xenofobia y el antisemitismu afitáu na probitú material y mental de l’Alemaña unificada del sieglu XXI ye l’escaparate que nos presenta esta novela de Xabiero Cayarga, al traviés de Marcial, un asturianu de la emigración, que va xuntase con un grupu de neonazis que tienen como centru base esti castiellu, al que van a recibir llecciones polítiques y de revisión de la hestoria.

Xabiero Cayarga (Cangues d’Onís, 1967) ye ún de los escritores más reconocíos de la lliteratura asturiana d’anguaño. Narrador y poeta tien publicaos dellos volúmenes de cuentos (Les gatileres del cielu, Güelgues sobre’l llagu, A flor de piel) y la novela Trastes de bufarda. Ganador de los premios «Teodoro Cuesta» y «Xuan María Acebal», ye autor de los poemarios El deliriu d’esclavu, Pequeña Europa, Les llingües de la Hidra y La ñeve del cuquiellu(en preparación).

Esti xueves, 15 de setiembre, a les cinco la tarde, la escritora xixonesa Cristina Múñiz presenta en L’Arribada de Xixón el llibru de monólogos “Que te preste”. Nel volume espublícense 39 monólogos que s’echaron pela TPA nel programa “Al aldu: La Risión”. Va facer de presentador Lluis Antón González, que tien echaos unos cuantos de los monólogos d’esti llibru espublizáu por Trabe.

Un añu entama en Xixón La Vagamar cola arribada a Puertu Deportivu de Xixón (El Muelle) del barcu colos escritores nel Cimavilla I, pa dempués facer un pasacáis cola Banda de Gaites de Corvera d’Asturies. Darréu, nel Salón d’actos del Centru de Cultura Vieyu Institutu va facese la inauguración de l’Arribada 2011 con un homenaxe a la narrativa del sieglu XXI, y la llectura de microrrellatos en llingua asturiana por representantes políticos y sociales, acompañaos pola música de Pindi Díaz.

La primer xornada d’esta Arribada, que va durar hasta’l domingu 18, va pesllase cola proyección d’El tercer home (The Third Man), na so versión n’asturianu.

El programa completu puede consultase nel blogue de L’Arribada.

Programa completu de l’Arribada 2011

El llunes 12 de setiembre a les 17:00 hores, dientro de les xornaes sobre cultura asturiana entamaes pola asociación L’Arribada Vagamar, inaugúrase la esposición de los orixinales del álbum ilustráu “Deva y yo”, de Vicente García Oliva y Begmont nel Centru de Cultura Vieyu Institutu.

La esposición tará abierta del 9 al 30 de setiembre. Tres la inauguración, a les 18,30, va facese la presentación del álbum colos autores. Esta actividad faise en collaboración cola Oficina Municipal de la Llingua de Xixón.