Lliteratura

Xandru Fernández ye’l ganador de la trixésimo segunda edición del Premiu de novela en llingua asturiana “Xosefa Xovellanos”, que concede la Conseyería de Cultura y Deporte d’Asturies. El xuráu que concedió esti gallardón aconceyó na sede de la Conseyería de Cultura y Deporte baxo la presidencia del Director Xeneral de Política Llingüística, Alfredo I. Álvarez Menéndez, y cola participación de los escritores Antón García, Elisabet Felgueroso y Paz Fonticiella.

Otres seis noveles optaben a esti premiu, dotáu con 7.000 euros. Ente les obres presentaes, el xuráu decidió por mayoría conceder el Premiu al testu tituláu El príncipe derviche al valorar que se trata d’una novela na que destaca la construcción d’un universu narrativu personal nel que se van esbillando acontecimientos, datos y situaciones sobre les que l’autor vuelve dende distintes perspectives a lo llargo de tola obra. El testu ganador presentóse col alcuñu “El príncipe derviche”.

Abierta la plica, l’autor resultó ser Xandru Fernández. Xandru Fernández (Turón, 1970) ganara yá n’otres dos ocasiones el Premiu Xosefa Xovellanos coles obresEl club de los Inocentes (1993) y El suañu de los páxaros de sable (1999). Amás d’estes, tien publicaes otres tres noveles: Los homes de bronce(2001), Les ruines (2004) y La banda sonora del paraísu (2006). Publicó asinamesmo’l llibru de relatos Entierros de xente famoso (2008). Tamién tien una notable actividá como traductor: La tresformación, de Franz Kafka, y Mario y el magu, de Thomas Mann (dambes dos al asturianu); y La promesa, de Friedrich Dürrenmatt, y La transformación, de Franz Kafka (al castellán). Tamién tien collaboraciones en prensa escrito en distintos medios de comunicación (La Nueva España, El Comercio, Les Noticies y La Voz de Asturias).

Una obra sobre les creencies paganes y la so rellación cola cultura, que l’etnógrafu, escritor y dibuxante Alberto Álvarez Peña presentó baxo’l títulu «Mitoloxía de los santos n’Asturies. Raigaños paganos nel cristianismu», resultó gallardonada col cuartu premiu d’ensayu y trabayos d’investigación Fierro Botas, que convoca la conceyalía d’Educación y Cultura del Conceyu de Xixón.

Un xuráu, formáu por Jaime González-Fierro, profesor de secundaria y representante de la familia González-Fierro, Miguel Ramos Corrada, vicepresidente de l’Academia de la Llingua Asturiana,Montserrat Machicado Company, especialista en llingua asturiana y responsable de la Estaya de la Llingua del Ayuntamientu d’Avilés, Humberto Gonzali, escritor y xestor cultural y miembru del RIDEA, María Xosé Rodríguez, Responsable de la Oficina municipal de la LLingua del Ayuntamientu de Xixón y actuando como Secretaria, y presidíu por Xosé Nel Riesgo, Director de la Fundación Municipal de Cultura, Educación y Universidá Popular del Conceyu de Xixón, falló esti xueves el premiu, en conceyu fechu nun restorán xixonés, otorgándolu a la obra mentada que se presentó col nomatu Bardión.

El Premiu Fierro Botas ta dotáu con 4.000 euros n’efectivo y cola publicación del trabayu ganador. N’otes ocasiones resultaron ganadores Rafael Rodríguez Valdés o Javier Cubero de Vicente.

El Vicerrectoráu d’Estensión Universitaria, Cultura y Deportes entrega güei, a les 12 la mañana, na Tienda Universitaria, asitiada nel Edificiu Hestóricu d’esta institución, n’Uviéu, los premios del “I Concursu Lliterariu Universidá d’Uviéu. Los ganadores fueron Diego Llorente pola so obra “Balas”, Premiu de Rellatu Curtiu, y José Luis Sevillanu pola so obra “La victoria en la derrota”, Premiu de Poesía. A esti concursu podíen presentase obres n’asturianu y en castellán.

El concursu tuvo arrodiáu de polémica cuando se convocó, pues namás permitía que fuera pa obres en castellán. A la fin, una reclamación del Conceyu Universitariu pol Asturianu (CUPA) fizo que la Universidá cambiara les bases y se permitiera la presentación d’obres n’asturianu, anque nesta ocasión nun resultó ganadora nenguna obra escrita n’asturianu.

La editorial xixonesa va presentar el so llibru últimu nel café Trisquel, nel 30 de la cai Marques de San Esteban, esti vienres 18 de payares, a les 21:30 hores. El volume ye “Mountain’s Silent Shout/El gritu silenciosu de les montañes”, de Larry Derdeyn, que se presenta n’edición billingüe, inglés – asturianu. La traducción asturiana fírmenla Fran Molinero y Silvia Cosio. Darréu la presentación va poder sentise un conciertu del grupu La Colmena.

L’autor, Larry Derdeyn, músicu norteamericanu afincáu n’Asturies, rinde tributu, nesti primer llibru, al paisaxe asturianu. Poesía de dobles sentíos, atenta a los cambios de lluz, alcuando na llinia de Robert Creeley o Kenneth Rexroth pero ensin perder un marcáu acentu personal. Les fotografíes qu’acompañen la edición son tamién obra del autor.

Xareos! Xestión Cultural espubliza un númberu nuevu de la revista de lliteratura “mui” moza, Formientu, que cumplió 5 años apocayá, con dos númberos añales saliendo al mercáu lliterariu dende 2006. Los responsables de la revista espliquen como “dempués de cinco años llegaba’l momentu de dicir adiós a dalgunos de los sos collaboradores, qu’entamaron siendo bien mozos y que tienen yá encadarmada una carrera lliteraria, con premios y volúmenes propios nel mercáu en munchos casos”, polo que nesti númberu va poder oyese per última vegada nesta publicación la voz d’autores como Pablo Rodríguez Medina, Ricardo Candás o José Ángel Gayol.

Dende’l númberu viniente, el 10, namás van poder espublizar testos los autores ñacíos dende 1980 n’adelantre, tarazando cinco años la edá máxima permitida pa la publicación nesta revista sotitulada de lliteratura “mui moza”.

El númberu 9 apurre amás otra novedá al llector. Estrénase la estaya de crítica, sobre la que na revista esplique “costó, pero por fin, dalgún autor mozu animóse a abrir camín nesta abegosa xera de la crítica y equí ta’l resultáu qu’esperemos que tenga continuidá en númberos próximos”.

A lo llargo d’esti añu Xareos! Xestión Cultural va organizar dellos actos pa celebrar los primeros cinco años d’esistencia de Formientu, que la convierten na revista lliteraria fecha dende la iniciativa privada con más años al llombu d’ente les que s’asoleyen n’asturianu con regularidá.

Nesti númberu apaecen poemes de Pablo Rodríguez Medina, Xurde Fernández, Ricardo Candás y Héctor Pérez Iglesias. Testos narrativos d’Abel Martínez, Jorge Fernández García, Pablo A. Quiroga Prendes, Rubén Rey Menéndez ya Inacio Rodríguez-Solar. Amás de dos crítiques de llibros, feches por Iván Cuevas y José Ángel Gayol sobre «Les últimes pallabres» y «Pequeñu álbum de familia».

Formientu ta dirixida por Inaciu Galán. El so Conseyu de Redacción ta formáu pol escritor Benxa Pérez y el director, coordinaos pola escritora y filóloga Laura Marcos.

Pa conmemorar los trenta años de la muerte de Josep Pla (1897-1981), la Obra Social de CatalunyaCaixa convidó escritores, críticos, homes de teatru y del cine pa qu’espliquen y alderiquen sobre cómo lleen la obra del autor d’El quadren gris dende la contemporaneidá y dende otros llinguaxes artísticos. Ente los convidaos ta l’escritor asturianu Xuan Bello.

L’actu va celebras na tarde del martes, 15 de payares, a les seis de la tarde. Nel auditoriu de La Pedrera, nel Passeig de Gràcia, en Barcelona, y va cuntar cola presentacia de Xavier Pla, Enric Vila, Núria Perpiñán, Àlex Susanna, Joan Ollé, Marc Recha y Mercè Ibarz, ente otros.

Acaba conocese que Lluis Portal Hevia ye’l ganador de la edición decimosétima Premiu d’ensayu en llingua asturiana Máximo Fuertes Acevedo, del Gobiernu d’Asturies, dotáu con 7.000 euros. La obra escoyida ye “Cipriano Folgueras, una gloria d’Asturies”, que ta centrada na vida d’esi escultor asturianu que l’autor camienta “escaecíu pola sociedá asturiana”.

El xuráu del premiu taba formáu, baxo la presidencia d’Alfredo Álvarez Menéndez, director xeneral de Política Llingüística, polos escritores Vicente García Oliva, Xosé Anxelu Gutiérrez Morán y Vital d’Andrés Díaz.

Lluis Portal Hevia (Villaviciosa, 1964) ye escritor y periodista. Amás, fai un importante llabor d’axitación cultural nel so conceyu, Villaviciosa, collaborando en distintes publicaciones n’asturianu y organizando actividaes al traviés de l’asociación “La Compaña del Ronchel”. Ente otros munchos, ganó’l II Premiu Asturnews de Lliteratura Infantil y Xuvenil.

Esti vienres 11 entamen los actos de les XI Xornaes de Lliteratura de Pravia, na Biblioteca Pública Municipal Antón de la Braña. La inauguración va cuntar con Mariano Arias, Presidente de l’AEA; Pepe Monteserín; José Luis Vega, Obra Social y Cultural de Caxastur; Antonio de Luis Solar, alcalde de Pravia, y Emilio Marcos-Vallaure, Conseyeru d’Asturies. Ente los temes que se van tratar, toos ellor alredor del periodismu y la lliteratura, tarán el columnismu, la información cultural, les figures lliteraries en prensa, etc.

Programa completu d’actividaes de les Xornaes

La presentación d’“El cielo de las cosas” de Pelayo Fueyo, el númberu seis de la colección de poesía “Mala letra”, de KRK Ediciones, va tener llugar el xueves, 10 de payares a lkes 19:30 hores, nel Vieyu Institutu de Xixón. Amás del autor, van tar nel actu José Luis Argüelles, Leopoldo Sánchez Torre y César Inclán.

Esti xueves, 10 de payares, va presentase nel Club de Prensa de La Nueva España de Xixón el llibru “Noche sobre España. Siete años en las cárceles de Franco”, de Juan M. Molina, Juanel, destacáu miembru de la FAI y director de “Tierra y Libertad” y de “Tiempos Nuevos”. Esti llibru escribióse en delles cárceles ente 1946 y 1954 y espublizáu per primer vegada en Méxicu nel añu 1958.