Lliteratura

La Conseyería de Cultura organiza la entrega de los Premios Lliterarios n’asturianu 2011 esti martes, 20 d’avientu, a les 19:00 hores, nel Palaciu d’Inclán Leiguarda, na Plaza’l Sol, d’Uviéu. Los premios son nesta ocasión Xosé Anxelu G. Morán nel casu del Premiu «Xuan M.ª Acebal» de poesía, Lluis Portal Hevia, pal «Máximo Fuertes Acevedo» d’ensayu, Paquita Suárez Coalla el Premiu «María Josefa Canellada» de lliteratura infantil y xuvenil, Isaac del Rivero na categoría Premiu «Alfonso Iglesias» de cómic y Xandru Fernández nel casu del Premiu «Xosefa Xovellanos» de novela, que consigue per tercer vegada.

Asturnews vien entrevistando a dalgunos de los premiaos nes selmanes caberes:

Paquita Suárez: “Faigo porque les neñes tengan un papel muncho más relevante na lliteratura”

Esti vienres 16 d’avientu a les ocho la tarde, la Casa Cultura de Mieres va acoyer la presentación del poemariu “Pallabres sin dicir” de Cristina Menéndez Fernández (Mieres, 1984), que ta acabante asoleyar Suburbia Ediciones. Amás de l’autora, nel actu va tar l’académicu Roberto González-Quevedo.

Esti miércoles, 14 d’avientu, a les siete la tarde, el salón d’actos de Caxa Rural en Xixón, asitiáu nel Paséu la Infancia, nel barriu de La Puerta la Villa, va acoyer la presentación de “Llara quier ser astrónoma”, trabayu de la escritora llangreana Helena Trexu Fombella. “Llara quier ser astrónoma” ganó’l premiu Asturnews de lliteratura infantil y xuvenil na so edición del añu 2007.

La presentación de Llara quier ser astrónoma va facela Inaciu Galán y González, periodista y escritor, que foi amás miembru del xuráu que-y concendió un gallardón del Premiu Asturnews a esta obra en 2007.

Helena Trexu tien tres de si una llarga carrera lliteraria con munchos premios y una montonera llibros publicaos que toquen tolos xéneros y temátiques, anque nos últimos años vien centrando’l so llabor na lliteratura infantil y xuvenil.

El Club Xeitu, asociación venceyada a la montaña suroccidental asturlleonesa acaba d’espublizar un volume de más de doscientes páxines tituláu “Pequena enciclopedia de nós”, de l’autora lleonesa, yá finada, Eva González. La edición ta al cargu del so fíu, Roberto González-Quevedo y la so ñeta Irma González-Quevedo Pedrayes, qu’arrecoyeron los sos escritos filolóxicos y culturales: vocabularios, reflaneiru, cusil.linas, escritos etnográficos y cantares, redactaos ente 1980 y 1985. Queda, asina, pendiente de publicar la so obra namás “Hestoria de mia vida”, a mou de biografía.

El llibru ábrese con un llistáu de nomes n’asturianu, na variedá pal.lueza, darréu un vocabulariu xeneral d’unes cien páxines, onde l’autora da la correspondencia col castellán. A esti llistáu súmense otros más pequeños d’estremaos temes: plantes melicinales, animales domésticos, oficios, páxaros…

El llibru fina con refranes, espresiones y frases feches y dos apartaos etnográficos, unu dedicáu a tradiciones y vezos del pueblu, y otru a cantares. En conxuntu, una verdadera “pequena enciclopedia” de la cultura asturlleonesa, de los pal.luezos.

De la escritora Eva González Fernández (Palacios del Sil, 1918-2007) quedaron munches obres escrites y espublizaes a la so muerte, destacando les de la serie Na Nuesa Tsingua (axuntaes na publicación Poesías ya cuentus na nuesa tsingua, 2007) ya Cuentos completos (2008), onde se compilaron les narraciones y cuentos.

La editorial Trabe ta acabante sacar al mercáu “Aquella xente nunca sabía aú llevaben les carreteres xunta les que vivíen”, el que definene como “quiciabes el poemariu más heterodoxu, plural y diversu d’Héctor Pérez Iglesias”. Con esta obra ganó Héctor Pérez Iglesias (Arlós, Llanera 1978) el Premiu «Elvira Castañón» na convocatoria del 2010.

Dividíu en cuatro partes, «Cosmogoníes», «Nocturnos», «Estielles» y «Rumbos», aliméntase de versos llargos de reminiscencies bíbliques y poemes onde la imaxe surrealista apodera los versos. Nun falten tampoco aquellos otros más figurativos que vinieron alimentando los poemarios anteriores del autor o’l poema que bancia pa lo visual y esperimental.

Héctor Pérez Iglesias (Arlós, Llanera 1978) ye un poeta de reconocíu prestixu y voz (voces) personalísima, tien publicaos los volúmenes Prisión de náufragu (2006), L’amarga cazumbre(2008), Como crecieres tu y Lo peor del bon tiempu (2010). Nel añu 2009 estrenóse publicamente nel mundu de la narrativa col volume de cuentos Desinencies.

Esti martes 13 d’avientu, a les 19:00 hores, la Casa los Alberti de Ciañu va acoyer la presentación de “Llara quier ser astrónoma”, trabayu de la escritora llangreana Helena Trexu Fombella. “Llara quier ser astrónoma” ganó’l premiu Asturnews de lliteratura infantil y xuvenil na so edición del añu 2007.

Helena Trexu tien tres de si una llarga carrera lliteraria con munchos premios y una montonera llibros publicaos que toquen tolos xéneros y temátiques, anque nos últimos años vien centrando’l so llabor na lliteratura infantil y xuvenil. La presentación de Llara quier ser astrónoma va facela Esther García López, escritora, doctora en pedagoxía y Académica Correspondiente de l’Academia de la Llingua Asturiana. L’actu va tener llugar esti martes a les 19.00 hores nel Centru de Referencia de la Cultura y la Llingua Asturiana Casa los Alberti de Ciañu.

Una editorial de Valladolid acaba d’asoleyar una versión nueva facsimilar nueva del llibru “El dialecto vulgar leonés hablado en Maragatería y Tierra de Astorga”, cunado pasaron 102 años de la so espublización n’Astorga. Obra del llingüista aficionáu Santiago Alonso Garrote qu’en 1909 decidió llevar esti estudiu a la imprenta. Dende entós, otra edición namás, la del Conseyu Cimeru d’Investigaciones Científiques, en 1947, mirare pa esti llibru.

“El dialecto vulgar leonés hablado en Maragatería y Tierra de Astorga” inclúi notes gramaticales, vocabulariu y un prólogu del entós senador astorganu Pío Gullón.

En 2007 espublizaba Antón García’l llibru Xeneraciones y dexeneraciones: sobre lliteratura asturiana, volume I, D’Antón de Marirreguera a Fernán-Coronas. Yera la primer entrega d’un proyectu que diba recoyer los artículos que l’autor escribiera sobre lliteratura asturiana a lo llargo de les tres últimes décades. Esti segundu volume completa la xera entamada. Centra l’atención na lliteratura del sieglu xx, dende los autores que nacen alredor de 1900 hasta dalgunos de los protagonistes de lo que se vien llamando’l Primer Surdimientu.

La obra ábrese con un averamientu a la idea de llingua lliteraria, una esmolición permanente nel autor sobre la que vuelve varies vegaes a lo llargo d’esti volume, y remata con un curiosu trabayu qu’apurre datos sobre’l llibru asturianu y los sos llectores. Pente medies queda tiempu pa falar de la poesía d’a primeros del sieglu xx, de la narrativa de posguerra, de grupos xeneracionales, o de la obra d’homes y muyeres qu’escribieron nesta llingua cola idea de da-y vida nueva.

La obra lliteraria d’Antón García empieza en 1984 cola publicación d’Estoiru, un llibru de poemes al que sigue la narración El viaxe (1987), una nueva entrega poética que se titula Los díes repetíos (1989), El pelegrín valiente (1993, un llibru infantil); l’estudiu y antoloxía Lliteratura asturiana nel tiempu (1994), l’ensayu escritu xunto con Consuelo Vega Del centru a la periferia (1994); Venti poemes (1998); la novela Díes de muncho (1998, que va pela cuarta edición y tradúxose al español en 2002); La mirada aliella (poesía reunida, 1981-2006), publicada en 2007 y traducida al español nel 2011 col títulu La mirada atenta, y el llibru de cuentos Xente tan cerca, del 2009.

Traductor al asturianu d’Eugénio d’Andrade, Álvaro Cunqueiro o Clarice Lispector amás d’otros munchos autores, Antón García fundó y dirixó ente 1983 y 1986 la editorial Llibros de Frou, y ente 1992 y 2007 Ediciones Trabe.

Actualmente dirixe la revista asturiana de cultura Campo de los Patos, al empar que remata un nuevu llibru sobre la lliteratura del Surdimientu.

Trabe ta acabante asoleyar el segundu númberu de la colección «Reciella», “Cómo toi”, ye un llibrín pa prellectores, guapu y cenciellu a la vez. Más visual qu’otra cosa, quier averar la reciella más nuevo al conocimientu del asturianu dende los primeros díes. Ilustráu de manera espléndida por Nanu González, tien un preciu de seis euros.

Darréu recoyemos los rellatos ganadores pa les categoríes n’asturianu del Concursu Manuel Nevado de microrrellatos mineros 2011, convocáu por Comisiones Obreres d’Asturies.

Accésit Asturianu

Gabino Busto Hevia: Chamiceruca

Eso ye lo que saqué de la Guerra: Quedar viuda y con tres fíes. Y como’l mio home yera de los roxos, nun me daben trabayu en nengún sitiu. Aquelles neñes pidiéndome un cuernín de pan y yo: “Prendines, si nun tengo ná que davos…” Y nestes, un día que taba a la gueta nel monte, topo un furacu bien fondu, y allá voi de culu, que nun sé cómo nun me maté. El casu ye que llego a casa acoxando y les mis fíes, namás veme: “Á ma, ¿ónde tuvisti, que vienes toa manchada?”. Y yera verdá: La cara, les manes, la saya…toes prietes, prietes de carbón.

Aquello del furacu calentóme la cabeza. ¡Un güecu nel monte enllenu carbón y les mis fíes y yo con fame! Viénoseme a la memoria tolo que me contaben mio pá y el mio home, picadores: que si dieren tira na sesta, que si aquella veta dábase bien, que si esto, que si aquello… La cosa ye que voi yo, llamo a Reme y Elvi, dígo-yos que m’esperen a l’escurecer y sin esplica-yos ná, metémonos nel monte y plantámonos na boca’l furacu. Elles que me ven quitar el vistíu y quedame cola camiseta y los pantalones del mio home, qu’en paz descanse; elles que me ven prender el candil, meter un sacu en bolsu, amarrar una cuerda a la castañal, enganchar la regadera y la pala, y baxar pel boquete… Nun yeren a creelo. Y al pocu, ya taba yo dientro’l furacu y col candil al llau, zis-zas, zis-zas, en menos que canta un gallu, tenía’l sacu enllenu carbón, y yo: “¡Reme, Elvi, tirái fuerte, que sal el sacu!”. Y detrás, esguilando, prieta como un zapatu, la que salía yera yo.

Lo qu’había qu’andar yera con munchu güeyu. Polos guardes xuraos. Y tamién polos tricornios, que patrullaben pel monte de nueche, a la gueta los fugaos. ¿Picadora? ¡Picaba tanto como un home o más! Si hasta empezaron a llamame Chamiceruca. Y nun sé si yera pola fame de les mis fiyines o ye qu’había que trabayar rápido por si les mosques, que lo de picar y pañar carbón dábaseme de maraviya. Tenía arte pa ello. Y brazu tamién. Que sin brazu, col carbón, nun faes ná. ¡Ai, muncho piqué!

Y al pocu de too esto, toi nel llavaderu, y siento voces y glayíos, y venga pasar xente asustao corriendo pa la bocamina. “¿Qué ye lo que pasa, rapaz?”, entrúgo-y a ún. Y él: “Un derrabe nel chamizu; quedaron atrapaos tres.” Entós quedé cavilando. Y pasó una selmana y aquéllos sin salir, y sin sacalos. Y yo venga cavilar, que claro, nun les tenía toes conmigo, nun fuera pal chamizu y acabara metiéndome nun trafullu. Pero nun aguanté más. Enantes que dieran les diez yá taba yo xunto al furacu. Ato la cuerda y p’abaxo como un tiru col candil na mano y la regadera y la pala nel cintu. Y doi zapatu y sí, lo que me figuraba, nel octavu, ellí taba’l fregáu, pero entrando pel boquete’l monte, muncho más afayaízu de furar que per otros llaos. Y púnxime a trabayar con arte. Darréu. ¡Igual que si picara pa matar la fame! Y furo y furo; y tiro de pala; y doi pataes a les piedres, y quito mampostes coles manes, ¡mecagonallechiquemamé! ¡hostiesenvinagre!¡mecagonaputamuerte! y venga; y a les cuatro o cinco hores, sal d’ente’l polvu’l primer mineru, un guah.e asustáu; y llueu, ente tusíos, medio afogáu, l’otru, y dempués, l’otru. Y agora canto-yos a los mios nietos: “Si tán vivos ye / gracies a la fame que pasé / y a un furacu que atopé”.

Menciones especiales n’asturianu

Ánxel Nava: El Castillete

a Nel Amaro

La sebe verdexaba la soledá de la mina. Lo que fuere un pozu yera un ermu de ferruñu. Corno un sauriu en desguace la sombra del castillete siguía roñeciendo. Fuxía l’agua de los llavaderos a los cestos de la memoria naquel ríu de silenciu qu’esclariab´l sable prieto del islán. Los díes de muga viníal prexubiláu a tira-y la foto al pozu peslláu. El trípode triangulaba la imaxe. L’aire retayaba les hores del atapecer. El güeyu percorría’l paisaxe qu’enrnarcaba’I castillete. Al bellume, el clip de la cámara frañaba un territoriu de solombres.

L’horne sintió cómo falsiaba la tierra y fundía embaxo los pies:

-Nun sé quién va morrer primero, esto o yo.

—–

Ánxel Nava: El penitente

Soi el penitente, una pantasma, una sombra nel rellumu negru que pasa como ánima en pena, tapada con una capucha y tinos sacos empapaos d’agua, guiando un palu y una estopa encesa a la gueta del grisú. Siento los ruíos sordos de la mina, les goteres d’agua, los ecos de los propios pasos. La mio penuria ye un andar tola vida en tientes tres de la lluz. Meyor qu’esta solitú sería dir peles galeríes col paxarín, el canariu na xaula que cuando muerre avisa del gas. Prestaríame sentilu cantar ente la música de les piedres. Pero ye igual xilgueru que mineni, el metanu nun perdona. Un españíu y alón, acabóse’1 penitente.

Accésit mozu

Beatriz Fernández Álvarez: Lo que la mina unce

_ ¿Quién ta ehí? ¿Ta daquién? ¡Que m’escalabro! ¿Qué ye esi golor? ¡Buf qué tufu!, ¿Nun será grisú? ¡Ahí madre! Pera, pera, el grisú nun güel, esto güel más a les consecuencies de la fabada’l chigre Mari. ¡Martin! ,soi Melu, ¿yes tu? Coño, lo qu’hai que facer pa poder vete a soles rei míu!