Hestoria

Nun escritu dirixíu a la presidenta de la Xunta Xeneral del Principáu d’Asturies, la formación nacionaliega Andecha Astur solicitó’l reconocimientu per parte de la institución a la figura histórica de Belarmino Tomás, asina como a la revolución asturiana de 1934, cuando pasen más de setenta años d’estos fechos. ‘Dende la serenidá que permite’l pasu del tiempu, somos munchos los asturianos que vemos estos fechos con respetu, al sacar d’ellos l’enseñu más positivu: el deseu d’una Asturies emancipada socialmente y d’una Asturies soberana, na que destacó la figura de Belarmino Tomás, presidente que foi del Conseyu Soberanu d’Asturies y Lleón’. Por estos motivos, Andecha Astur solicita de la Xunta Xeneral que faiga una declaración institucional de la conmemoración ‘del ideal emancipador de la revolución del 34’ y qu’inste al Ministeriu de Defensa y al Principáu a facer les xestiones necesaries pa que’l mobiliariu del despachu de Belarmino Tomás quede na titularidá del Principáu, pasando a ser d’esa manera declaráu Bien d’Interes Cultural.

Caltiense abiertu’l plazu d’inscripción pal Cursu Básicu d’Historia Contemporánea d’Asturies, que se va a celebrar nos locales de Conceyu Abiertu tolos xueves de 7 a 9 la tarde ente los meses d’ochobre y avientu, al que se van poder apuntar toles persones interesaes hasta’l próximu 4 d’ochobre. El cursu, impartíu n’asturianu polos profesores Faustino Zapico, Rafael Rodríguez Valdes y Jose Luis Carmona, va repasar la situación social, política y económica de la historia más recien d’Asturies.

Empobináu a toles persones interesaes en conocer delles de les claves que despliquen la situación social, política y económica d’anguaño, el Cursu Básicu d’Historia Contemporánea d’Asturies cuesta una cuota de 20 euros, a pagar en La Casa Posafuelles antes del día 4 d’ochobre, a la hora de la inscripción.

Los historiadores encargaos de poner les clases van ser Faustino Zapico, autor del trabayu ‘El discursu de la periferia: corrientes federalistes y autonomistes na Asturies decimonómica’, entre otros estudios; Rafael Rodríguez Valdes, responsable d’estremaos artículos d’investigación, como’l cuadernu ‘Llingua asturiana y movimientu obreru, 1899-1937’; y Jose Luis Carmona, autor de ‘Cien años de socialismo en Langreo’ y ‘Historia militar de Asturias’.

La organización moza nacionaliega Darreu va remembrar la Revolución d’ochobre de 1934 con una xornada reinvidicativa, prevista pal próximu 7 d’ochobre en Llangreu y na que’l tradicional conciertu ‘Asturies nun escaez’, nel que van actuar los valencianos Obrint Pas, Dixebra, Escuela de Odio, K-Nalón y Testimoniu la Viztima, va ser complementáu por una serie d’actos que conformen el ‘Día de la Mocedá Revolucionario’, en recuerdu ‘de la mocedá nel procesu revolucionariu y col enfotu de recuperar el protagonismu de los más mozos na formación social de l’Asturies d’anguaño’.

L’actu central de la xornada del próximu 7 d’ochobre va ser una manifestación peles cais de La Felguera baxo’l lema ‘Futuru n’Asturies. Escontra la esplotación y la emigración de la mocedá’. Amás del tradicional conciertu y la manifestación, Darreu organiza esti añu dientro del Día de la Mocedá Revolucionario un alcuentru internacionalista onde van participar delegaciones d’otros países, amás d’un homenaxe a Berlarmino Tomás, una espiecha ‘antirrepresiva’ organizada por Calecer, un mural conmemorativu y un mercáu d’organizaciones onde dellos colectivos sociales van tener el so puestu informativu asina como la venta de material.

El conciertu ‘Asturies nun escaez’ va contar esti añu col grupu valencianu Obrint Pas, que va actuar xunto a los asturianos Dixebra, Escuela de Odio, K-Nalón y Testimoniu la Viztima.

Mañana xueves 14, a les siete la tarde, el Salón d’Actos de la Biblioteca Pública Xovellanos de Xixón va acoyer una conferencia de Guillermo Álvarez Pardo que lleva por títulu ‘Galileo Galilei. El desafíu, el trunfu, la caída y el legáu d’una cabeza pensante’. Esti acti, organizáu pol Ateneu Obreru de Xixón, va desplicar ‘cómo’l fíu d’un músicu esbarrumbó la física na que creyíen los científicos y filósofos dende había más de 17 sieglos, asina como la visión del Universu; y cómo les altes esferes lu protexeron del peligru p’abandonalu depues, dexándolu solo ente la furia de los necios, qu’ayudaron al so xuiciu condenatoriu’.

Guillermo Álvarez Pardo (Xixón, 1986) participa, dende mui neñu, na vida cultural xixonesa. Collabora con revistes como Ágora y Kalepesia asina como coles Xustes Lliteraries organizaes pol Ayuntamientu de Xixón. Pertenez a la compañía de teatru Talía-Astur. Ye autor del cortometraxe Dinero. Actualmente cursa estudios de Matemátiques na Facultá de Ciencies de la Universidá d’Uvieu.

El Centru de Cultura Antiguu Institutu (cai Xovellanos, 21) acueye dende esta mañana la esposición cola que l’Ateneu Obreru de Xixón repasa los 125 años de la so fundación. Col envís de celebrar esti significáu acontencimientu, y cola fin de recuperar la hestoria de la entidá asina como la so presencia na sociedá asturiana, l’Ateneu organiza esta esposición, comisariada por Boni Ortiz (directivu del Ateneu amás de críticu teatral).

Amás de los venti paneles esplicativos, hai otros cuatro coles firmes autógrafes y los retratos de Blasco Ibáñez, Ortega y Gasset, Pío Baroja y Perez Galdós. Completen la muestra cuatro vitrines con llibros, documentos y otros oxetos de valor hestóricu del Ateneu Obreru de Xixón, asina como dalgunes pintures y semeyes de miembros destacaos de la entidá xixonesa: Eladio Carreño, Magnus Blikstad, Fernando García Vela, Daniel Palacio y otros.

La esposición, que cuenta cola collaboración de la Fundación Municipal de Cultura y la Universidá Popular del Ayuntamientu de Xixón y de caxAstur (Obra Social y Cultural), va poder vese nel Patiu del Centru de Cultura Antiguu Institutu del 1 al 20 de setiembre.

Mañana sábadu 26 d’agostu, el pueblu ayeranu de Pel.luno va dar a conocer la so candidatura a Pueblu Exemplar con una serie d’actos culturales enmarcaos nel lema ‘Pel.luno, cuna de Doña Urraca’. Reivindicando’l llugar de nacencia de la reina fía de Gontrodo Petri, natural tamien de la localidá, los vecinos van inaugurar una plaza col nome de la reina, de la que se diz que llevó a cabu un intentu de secesión d’Asturies.

El programa festivu que se va celebrar ente les once la mañana y les nueve la nueche ta organizáu pola Asociación de vecinos ‘Peña Mea’, en collaboración col Ayuntamientu d’Ayer. Con un marcáu acentu medieval, a la una la tarde va facese una misa cantada en llatín n’honor de Doña Urraca y Doña Gontrodo, pa depues inaugurar una plaza en Pel.luno dedicada a la reina Urraca, conocida tamien como ‘l’asturiana’, y una cai col nome de so madre.

De tarde, los visitantes van poder esfrutar una espicha popular de baldre, con música y actuaciones folclóriques, animación medieval, y un mercáu con una esposición d’artesanía y productos autóctonos.

Dende’l 20 d’ochobre hasta’l 15 d’avientu la Universidá asturiana tendrá un espaciu d’estudiu de la Historia del Movimientu Obreru Asturianu. El cursu, codirixíu por Rubén Vega y Rafael Rodríguez, centraráse nel analisis d’esti movimientu, que marcó la vida social del país.
L’estudiu de les diferentes etapes de la organización del proletariáu asturianu amuesará una bona colección de materiales audiovisuales como’l documetal “El Paisano” de Ramón Lluís Bande, “Hay una luz en Asturias” o Lluvina. Amás de los codirectores participarán nes ponencies historiadores como Francisco Erice, Claudia Cabrero o Carlos A. Gordón. El cursu ye homologable por 4,5 creditos de llibre configuración y tien un coste d’inscripción de 126€, la inscripción, y ampliación de la información, puede facese dende’l web de la Universidá.

L’Ateneu Obreru de Xixón cumple nesti añu 2006 el 125 aniversariu de la so fundación, razón pola que, en collaboración cola Selmana Negra de Xixón, aprovecha pa remembrar tamien el 70 aniversariu del principiu de la Guerra Civil española con una charra-coloquiu na que van participar el críticu teatral Boni Ortiz, el profesor d’Historia Contemporánea de la Universidá d’Uvieu, Ruben Vega, y l’historiador Marcelo Laruelo. El debate lleva por títulu ‘Vida cotidiana en Xixón na Guerra Civil’.

Col títulu de ‘Vida cotidiana en Xixón na Guerra Civil’ l’Ateneu Obreru organiza una charra sobre la Guerra Civil española, qu’agora cumple 70 años dende’l so españíu. L’Ateneu vióse directamente afectáu pola contienda al ser clausurada la so se y confiscaos tolos sos bienes tres de la toma de la ciudá poles tropes franquistes.

Na charra que va tener llugar na Carpa de Radio Kras na Selmana Negra, el prósimu vienres día 14 a les siete y media la tarde, y que va ser introducía cola proyección del audiovisual ‘La toma de Gijón (1937, 7 min)’, van intervenir el críticu teatral Boni Ortiz, el profesor d’Historia Contemporánea de la Universidá d’Uvieu, Ruben Vega, y l’historiador Marcelo Laruelo.

El Museu de la Gaita del Ayuntamientu de Xixón fue fundáu’l 29 de xunu de 1966 nel antiguu Institutu Xovellanos col envís de dar a conocer la gran diversidá de gaites usaes nel mundu, asina como les melodíes, dances y tradiciones esistentes alrodiu d’esti instrumentu. Situáu dende l’añu 1992 na casona hidalga de los González de la Vega (1757) dientro del Museu del Pueblu d’Asturies, va llevar a cabu esti añu, cuando se cumplen cuatro decades dende la so fundación, una reforma na presentación de la so importante colección, adaptándola a los criterios esteticos y tipográficos que manden anguaño.

La colección del museu qu’empezó con malapenes una docena de pieces, ameyoró gracies al llabor del so primer director, Rafael Mere, teniendo anguaño como finalidá la investigación, conservación y difusión del patrimoniu musical d’Asturies. Dientro d’el, de fechu, agospia l’Archivu de Música Tradicional, nel que se recueyen, ordenen y estudien les melodíes, cantares, bailles y dances guardaos na memoria colectiva de los asturianos.

El museu que na so distribución actual ta dividíu en cuatro sales (gaites del mundu, gaites barroques, gaita asturiana y restu d’instrumentos de la tradición asturiana) va celebrar el so cuarenta cumpleaños afrontando una tarea de remodelación de les sos instalaciones, adaptándoles a los criteriores esteticos y tipográficos del Pueblu d’Asturies nel que s’encuentra.

Cinco grandes apartaos que lleven por nome «La revolución de octubre de 1934», «La propaganda», «Escribir y dibujar en tiempo de guerra», «El control de las personas y la perdida de libertad» y un apartáu audiovisual que cunta la narración de cuatro supervivientes a la guerra, son la base de la esposición que baxo’l títulu de “Documentos de la guerra en los fondos del Museo del Pueblo de Asturias” puede visitase estos díes en Xixón.

Agora que se cumplen 70 años de la guerra civil, salen a la lluz los documentos de munches families asturianes, como carteles y otros instrumentos de propaganda, certificaos y avales de conducta, llistes negres, cartilles de racionamientu o salvoconductos.

Ente ellos destaca’l diariu d’un combatiente nel frente de Teruel, les cartes de los prisioneros republicanos poco primero de ser fusilaos o la colección de caricatures feches na cárcel xixonesa d’El Coto por un autor, «Xivis», del que nun se conoz el verdaderu nome.