Hestoria

L’Asociación ‘Escontra’l Raigañu’ ta acabante d’abrir el plazu p’apuntase a les Xornaes na Seronda, que van celebrase dientro de los actos de la V Seronda n’Avilés, qu’esti añu va tar dedicada esti añu al maíz, la sidra y el pote n’Avilés ente los díes 9, 10 y 11 de payares na carpa de “Les Meanes”. Los actos van incluyir amagüestos, bailles y dances, cancios de chigre, esfoyaza, tonada, oficios tradicionales, xuegos populares y la esposición “formes de vistir, maneres de vivir”.

Toes aquelles persones que tean interesaes na cultura asturiana y componentes de grupos de baille y danza, enseñantes, artistas, estudiantes d’historia, turismu, antropoloxía, etc pueden apuntase hasta’l 24 d´ochobre nel corréu llertónicu estaya@ayto-aviles.es o nos teléfonos 985 510 235 y 663 820 129.

A les 13:00 hores nel centru cultural Palacio de Revillagigedo va presentase la esposición “El Códice Atlántico de Leonardo da Vinci”, que recueye grabaos de les lámines orixinales de la edición del Códice Atlánticu fecha ente 1894 y 1904 anguaño recopilaos na Academia dei Licei. L’amuesa ta organizada por Cajastur y la sociedad Anthelios.

Amás de los grabaos, el Centru Cultural Cajastur Palacio Revillagigedo tamien va mostrar al públicu una selección de les maquines que se construyeron a partir de los bocetos que Leonardo incluyó na obra. Les dos amueses van tar disponibles hasta’l 31 de xineru de 2008

Güei, sábadu 20 d’ochobre a les 13:00 hores y coincidiendo col 174u aniversariu del primer llevantamientu carlista d’Asturies en La Pola Siero va celebrase nel Cementeriu de San Salvador d’Uviéu un actu d’homenaxe al destacáu poeta carlista Xuan María Acebal (1815-1895) abiertu a tolos asturianos que quieran homenaxear la figura del autor uviedín.

Nel actu va intervenir el periodista Inaciu Galán y González que va lleer dellos versos del poema Cantar y más cantar, consideráu polos estudiosos de la lliteratura asturiana como’l “primer poema nacional asturianu” y va tar acompañáu de la música del gaiteru Ángel Cuesta Piquero que va interpretar la La marcha d’Antón y La marcha procesional de Llanes, ente otres marches fúnebres.

Darréu va facese una ufierta floral énte la tumba d’Acebal y va pesllar l’actu Javier Cubero, voceru del Partíu Carlista d’Asturies y estudiante d’hestoria. Esti ye’l segundu añu que s’organiza esti homenaxe, que l’añu pasáu cuntó cola presencia del profesor Lluis Xabel Álvarez ‘Texuca’. La organización convida a tolos asturianos a acompañanos nesti día d’homenaxe y alcordanza a la figura d’esti ilustre asturianu.

Un cientu de neños, de tolos que’l 23 de setiembre de 1937 fueron evacuaos hacia la URSS pol gobiernu de la República durante la guerra civil española, van asistir al homenaxe que-yos va tributar esti domingu la conceyalía de Cooperación del Ayuntamientu de Xixón. Los actos van cellebrase a partir de les 13:00 hores na playa L’Arbeyal.

Esti homenaxe, nel que van tar presentes na memoria los más de 1.100 neños y neñes que viaxaron en total, coincide cola cellebración del 70 aniversario de su evacuación. Los actos van entamar con una ofrenda floral delantre la escultura conmemorativa d’otru “neñu de la guerra”: Vicente Moreira, pa siguir con una xinta nel restaurante Savannah.

Según informó Andecha Astur, al traviés del so voceru, Daniel Cueli, “el Gobiernu asturianu asumió la propuesta que la organización política Andecha Astur-y ficiere, delles vegaes a lo llargo de los años caberos, de recuperar el mobiliariu del despachu de Belarmino Tomás, presidente del Conseyu Soberanu d’Asturies y Lleón, de gran valor hestóricu y formáu por un escritoriu y la so siella, un armariu y cuatru confidentes”.

Los muebles del despachu quedaren en manes del exércitu en 1937 y en dalgún momentu de la dictadura franquista pasaren de la Casa Blanca, na Plaza’l Parchís de ixón, sede del Conseyu Soberanu, a la sede que’l Ministeriu de Defensa tien n’Uviéu. La fuercia qu’emite’l comunicáu recuerda que “nun sólo-y vieno pidiendo al Gobiernu d’Asturies la recuperanza del mobiliariu, ensin recibir rempuesta dala, sinón que solicitó énte’l Ministeriu de Defensa la cesión del mesmu, que nesti casu sí retrucó nel sen de que nun había problema dengún siempres que lo solicitare formalmente’l Gobiernu asturianu”, lo que’al paecer fizo a la fin l’executivu d’Areces.

Amás el gobiernu “recuperó y remocicó’l mobiliariu del despachu de Belarmino Tomás, qu’anguañu pue atopase nel Palaciu del Conde de Toreno, ocupando una sala de protocolu na que se reciben personalidaes pela parte de los miembros del Gobiernu d’Asturies”.

Redacción.

La Universidá d’Alcalá de Henares entama güei na Casa Cultura de Llanes un cursu de branu tituláu ‘Asturies: Alcordances del exiliu y la Guerra Civil 19372007’, dirixíu por Jose María Naharro Calderón. El cursu va durar hasta’l vienres 24 d’agostu y na presentación van tar, güei a les seis de la tarde, el profesor Naharro y la conceyala llanisca de Cultura, María Antonia Echevarría.

A les 18:30 hores, Juan Antonio de Blas va pronunciar la primer conferencia, titulada ‘La Guerra Civil n’Asturies’. A les ocho menos cuartu de la tarde van intervenir Jose Luis Villaverde Amieva, que va falar ‘La Guerra Civil en Llanes’. El día va zarralu Gregorio Morán.

Pero mañana xueves habrá más conferencies, nesti casu de Carlos Jose Martínez y Juan Manuel Menendez, mientres que’l vienres va facese una visita a la zona d’El Mazucu, onde se llibró una dura batalla na Guerra y van poder escuchase les conferencies de Begoña Camblor Pandiella y Jose de Albornoz. Una de los conteníos más novedosos del cursu va ser la posibilidá d’oyer testimonios de la Guerra Civil y del exiliu, que van poder oyise esa mesma tarde a les ocho.

Yá a les nueve va presentase’l llibru de la esposición ‘Hacia el exilio’ y quince minutos más tarde va echase’l pieslle oficial al cursu.

Redacción.

L’añu que vien van celebrase en tol Estáu actos na alcordanza del llevantamientu escontra la invasión de los frances en 1808, la llamada Guerra de la Independencia, na qu’Asturies tuvo un especial protagonismu y onde la Xunta Xeneral diba tomar la soberanía pa ser quien a salir de la invasión.

Y na comisión que ta conformando’l Ministeriu de Cultura Asturies ye una de les seis comunidaes autónomes que van formar parte de la organización de los actos conmemorativos del bicentenariu de la guerra de la Independencia. Les otres cinco autonomíes van ser Madrid, Andalucía, Aragón, Castiella-La Mancha y Castiella y Lleón.

L’alcuerdu firmólu estos dies la nueva conseyera de Cultura y Turismu del Principáu, Encarna Rodríguez Cañas. 2008 va ser un añu enllenu de conmemoraciones n’Asturies: Los doce sieglos de la entrega de la Cruz de los Ánxeles a la catedral d’Uvieu, los once sieglos de la Cruz de la Victoria y el cuartu centenariu de la Universidá d’Uvieu.

Redacción.

Esti 30 de xunu próximu van cumplise 16 años de la muerte de Tino Casal, l’artista asturianu que más fizo pola música pop nos años 80. El próximu 30 de xunu, la familia del artista y los qu’aprecien la so música van descubrir una placa d’homenaxe na casa onde ñació, en Tudela Veguín.

Tino Casal ñaz en Tudela Veguín en 1950 y entama na música dende bien mozu. Tocó col grupu ‘Los archiduques’ col que fizo una versión d’un tema pop con acompañamientu de gaita per primer vegada na hestoria. Dempues de pasar unos años en Londres, en 1975 torna y entama una carrera musical con esitos como ‘Champú de Huevo’ o ‘Oro Negro’.

El próximu vienres, 15 d’avientu, a les 20,00 hores, la historiadora María Álvarez, becaria d’Ivestigación nel Departamentu d’Historia de la Universidá d’Uviéu, dará nel salón d’actos de la Casa la Cultura de Llanes una charra sobre “Les villes nueves n’Asturies medieval”.

Cola so intervención pondráse’l pieslle al ciclu de charres sobre’l Fueru de Llanes que, baxo la dirección del catedráticu de la Universidá d’Uviéu Juan Ignacio Ruiz de la Peña, se vien desenvolviendo dende’l pasáu 27 d’ochobre nel centru cultural municipal.
El Fueru de Llanes foi otorgáu pol rei Alfonso IX. L’históricu testu, del que se conseva nel Archivu Históricu Municipal la confirmación de la reina Isabel I ye una de les ayalgues del padremoñu documental d’Asturies. Constituyéndose nun de los ordenamientos locales de mayor relevancia del reinu na Edá Media. La carta foral llanisca convertía a los alcaldes nos personaxes principales de la villa y concedía a los vecinos una riestra derechos qu’hasta esi momentu nun taben reconocíos. Nel últimu términu, representa l’orixe del conceyu de Llanes.

N’homenaxe a esti documentu, camín de cumplir los 800 años, y col propósitu de dfundir el so altu significáu y los sos conteníos, l’Ayuntamientu entamó una esposición y un ciclu de conferencies nel que bien d’especialistes analizaron el Fueru de Llanes y el so contextu históricu.
Nestes conferencies participaron Miguel Calleja Puerta, profesor del Departamentu d’Historia de la Universidá d’Uviéu, que na charrña inaugural faló sobre “El Fueru de Llanes”; trés d’elli Juan Ignacio Ruíz de la Peña, caderalgu d’Historia Medieval de la Universidá d’Uviéu pronunció la conferencia “Llanes, una villa costera na Edá Media”, María Josefa Sanz Fuentes, caderalga de Ciencies y Técniques Historiográfiques y Directora del Departamentu d’Historia de la Universidá pronunció la so conferencia “La documentación municipal: el casu de Llanes”, y Isabel Ruiz de la Peña González, profesora d’Historia del Arte cola so ponencia “Románicu y góticu nel Conceyu de Llanes”.

José Antonio Álvarez Castrillón, profesor d’enseñanza secundaria, recibió ayer la comunicación del fallu del xuráu de la XXVII edición del Premiu “Juan Uria”. El trabayu que mereció esti premiu tien por títulu “La comarca de los Oscos en la Edad Media, doblamiento, economía y poder”.
El xuráu taba compuestu por MArta Rendo, Julia Barroso, María Josefa Sanz y Serafina García y como secretaria Olga Casares. El premiu, concedióse por unanimidá destacando los planteamientos científicos y la orixinalidá, yá que rpesenta bien de documentación inédito.