Hestoria

La Canal Historia, qu’emite per Telecable ente otres plataformes emite güei llunes la repetición d’”AsturianUS”, un documental ambientáu en West Virginia y Pennsylvania, onde viven los descendientes de los mineros asturianos qu’emigraron a EE.XX va un sieglu.

L’asturianu Luis Argeo dirixe’l documental “AsturianUS”, presentáu na seición competitiva de “Documenta Madrid-07”. El documental, cuenta la historia de los descendientes de los antiguos trabayadores de la mina d’Arnao (Castrillón) que viaxaron a los dos estaos norteamericanos a la busca d’una nueva vida; y de cómo faen éstos por caltener vivu’l so sentimientu d’asturianía.

Va poder vese a les 07.00 y 15.00 hores.

Uviéu acoyó ayeri, 25 de mayu, un emocionáu actu n’homenaxe del 25 de mayu de 1808. El Conceyu Universitariu pol Asturianu entamó un actu na tarde del domingu nel que se fizo una visita hestórica y cultural pelos espacios onde asocedieron los fechos del llevantamientu contra los franceses en 1808.

Yá na puerta de la catedral diose llectura a un comunicáu nel que se reclamó que la Universidá d’Uviéu “vuelva a convertise nuna institución que mire p’Asturies y respete y asuma la llingua y cultura asturianes”. Darréu pudieron sentise dellos temes rellacionaos col 25 de mayu, na gaita de Xaime Menéndez, pa darréu rematar l’actu cola entrega d’una ofrenda floral.

El CUPA preséntase a les elecciones al Claustru de la Universidá d’Uviéu, que van celebrase esti xueves 29 de mayu. L’actu del domingu yera tamién l’actu central de la campaña pa estos comicios. Los miembros del CUPA van tar faciendo campaña, mañana pela mañana nel campus de Xixón y el martes nel de Mieres.

Güei, miércoles 21 de mayu, a les siete y media la tarde, l’etnógrafu, difusor de la cultura tradicional, presentador del programa Marabayu en TLG y miembru de la Fundación Belenos y l’Asociación l’Arribada, Alberto Álvarez Peña va dictar la conferencia titulada “Túmulos y dólmenes: el megalitismu n’Asturies”, dientro del cilcu entamáu pola Tertulia Cultural “El Garrapiellu” dende va unos meses.

Álvarez Peña va falar de los principales xacimientos asturianos: Sierra del Carondiu (Ayande), La Borbolla (Llanes), Santa Cruz (Cangues d’Onís), Monte Areo (Carreño) y Merías (Cuartu de la Riera de Tinéu); nes sos reflexones nun va faltar too aquello que rellaciona estos monumentos megalíticos col folclore xeneráu n’Asturies a partir d’estes construcciones funeraries.

Si la selmana pasada yeren asturianistes como Faustino Zapico, Inaciu Galán o Toño Martínez los participantes nesta XVI Selmana Cultural de la Facultá d’Hestoria y Xeografía d’Uviéu, güei llunes, nel entamu d’esta segunda etapa de la Selmana, va participar el filósofu Gustavo Bueno, qu’a les 12 la mañana va falar de “la Filosofía n’Uviéu hasta 1934”.

A la una, los actos van siguir col conciertu de música clásica “Música nacionalista española” y yá mañana, a la una, con un conciertu de música contemporanea.

El miércoles va ser el remate d’esta XVI Selmana, cola conferencia del nuevu rector, Vicente Gotor, “La Universidá d’Uviéu énte los próximos 400 años”.

“El paxellu asturianu o traxe’l país”, una guía na que se fai un repás de la historia del traxe tradicional asturianu ta acabante de salir a la cai de la mano de Cajastur. La obra alfama esti añu la so decima entrega y ta escrita por Gausón Fernande Gutierri n’asturianu y castellanu. El volume cunta con grabaos y semeyes del sieglu XIX pa ilustrar la evolución de la vestimenta n’Asturies. El preciu de venta únicu ye de venti euros.

Un nuevu ensayu n’asturianu llegó estos díes a les llibreríes, trátase del nuevu llibru del hestoriador mierense Faustino Zapico, qu’estudia na so última obra, “La revolución de mayu de 1808”, asoleyada por Trabe, la importancia que tuvo n’Asturies la Guerra de la Independencia entamada depués de les claudicaciones de Bayona, que permitieron que José Bonaparte, hermanu de Napoleón, se ficiera col tronu español.

El trabayu estructúrase en trés capítulos qu’estudien los precedentes hestóricos de l’Asturies del Vieyu Réxime, les distintes llectures que se vinieron faciendo del 25 de mayu y la descripción detallada de tolos acontecimientos d’aquellos díes. El volume complétase con un apéndiz documental, una bibliografía y unes notes biográfiques sobre los personaxes históricos qu’aparecen na obra.

Faustino Zapico llicencióse n’Hestoria y Xeografía na Universidá d’Uviéu nel 1995 y dende 1996 vien dando clas d’Hestoria en distintos centros d’Enseñanza Secundaria. Nesti momentu prepara la tesis doctoral sobre les corrientes federalistes y autonomistes na Asturies contemporánea. Participa en política, siendo escoyíu nn xineru de 2007 Secretariu Xeneral d’Izquierda Asturiana.

La Televisión del Principáu d’Asturies va emitir, el domingu 30 de marzu un trabayu documental nel que se recueyen los fechos más destacaos a los llargo de los 400 años de vida de la Universidá d’Uvieu, coincidiendo coles cellebraciones que pol so aniversariu tan llevándose al cabu esti añu na institución academica asturiana. El programa tien 56 minutos de duración y contien entrevistes a los rectores Teodoro López Cuesta y Alberto Marcos, amás de a otres personalidaes del ámbitu universitariu.

La Casa de Cultura de Colombres, en Ribedeva, ta acoyendo dende esti domingu una esposicioón qu’afonda y mustres como yera la vida cotidiana de les sociedaes de neandertales, en base a los restos atopaos ne cueva de Güelga, en Cangues d’Onís. L’amuesa, que lleva’l nome de “Los últimos neandertales de Asturias” va poder vese, de llunes a vienres de 11:00 a 14:00 y de 17:00 a 20:00, hasta’l prósimu 4 de Mayu. Ta organizada pola UNED y l’Ayuntamientu de Ribedeva

Dempués de cuatro díes d’actos, les Xornaes d’Hestoria Contemporanes, organizaes pol Conceyu de Xóvenes Hestoriadores nel Campus del Milán lleguen a la so última xornada. La primer activida d’esti día últimu va celebrase a les diez de la mañana, una mesa redonda col títulu “Fascistes n’Europa, América Llatina y Asia”.

A les doce la mañana, la conferencia “Asturies nel marcu de los estudios rexonales sobre’l fascismu español”, que va esponer Julian Sanz, de la Universidá de Cantabria y la Cassino.

A les ocho la tarde va echase’l pieslle definitivu cola conferencia de clausura “Neofascismu y nacional-populismu: una vieya realidá y un nuevu fenómenu” que va presentar Xabier Casals, hestoriador y escritor. A diferencia de les demás actividaes, celebraes na Biblioteca del Campus d’Humanidaes, ésta va desenrrollase nel Club de Prensa Asturiana, asitiáu na cai Calvo Sotelo.

Les Xornaes, que terminen güei tán organizaes pol Conceyu de Xóvenes Hestoriadores y finaciaes pola Universidá d’Uviéu y la Facultá de Xeografía y Hestoria.

Güei miércoles siguen les Xornaes d’Hestoria Contemporanea qu’esti añu tán dedicaes a los fascismos. Nesti penúltimu día los actos van entamar con una mesa redonda, a les diez de la mañana. Esta mesa va titulase “Memoria, cultura y fascismu”.

A les doce la mañana va celebrase la conferencia “La estrema drecha ente los años sesenta y el trunfu del PSOE en 1982. Una averamientu a la crisis política del franquismu y a la permanencia de la cultura antidemocrática n’España”, de la que ye autor Ferrán Gallego, de la Universidá de Barcelona.

La última de les actividaes de güei va ser la conferencia “Ciudá y fascismu. L’urbanismu de los rexímenes fascistes” que va esponer Sergio Tomé, de la propia Universidá d’Uviéu.