Hestoria

Xaviel Vilareyo (Mieres del Camín, 1967) reivindicó la figura del rei asturianu Fruela II (910-925) nel 1100 aniversariu de la so proclamación como rei d’Asturies na catedral d’Uviéu. Xunto cola reina Nunilo entamen el so reináu como reis soberanos d’Asturies nel territoriu orixinariu del reinu, qu’algamaba dende la llende del ríu Eo hasta’l ríu Deba en Guipúzcua, cola famosa donación de la Caxa de les Ágates que lleva grabada en plata la Cruz de la Victoria de Pelayu. Fruela II foi un rei mui importante yá que llueu de la partición del reinu ente los trés fíos d’Alfonsu III el Grande, Fruela II quedó como soberanu del territoriu asturianu, nomando como herederu al so fíu, el futuru Alfonsu IV Froilani, rei d’Asturies, que llueu de sufrir tormentu y arrinamientu de güeyos pols so primos, morrerá presu nun conventu a les afueres de Lleón pola rebelión de los sos primos, los Ordóñez. Alfonsu IV Froilani d’Asturies, fíu de Fruela II, morrerá nesti conventu nel añu 933 convencíu de qu’él ye’l verdaderu y llexítimu rei d’Asturies.

Xaviel Vilareyo destacó la importancia de Fruela II yá que ye con esti rei “cuando s’entama l’actual territorialidá d’Asturies y la so dixebra respecto a Galicia y la meseta, puesto que Fruela II ye rei del territoriu asturianu tresmontanu ente los ríos Eo y Deva”. Guipúzcua nunca perteneció al Reinu d’Asturies pero lo que llueu sedría Bizcaya sí yá que la historiografía vasca asina lo reconoz nel famosu mitu de la batalla d’Arrigorriaga contra l’Asturies d’Alfonsu III, mitu que ta representáu incluso na actual bandera vasca. Xaviel Vilareyo espuso tamién la so teoría sobre un posible orixe o influencia asturiana na creación del reinu de Pamplona cola dinastía Ximena impuesta por Alfonsu III d’Asturies pa crear un reinu fronterizu aliáu d’Asturies tanto contra francos como frente a musulmanes.

La Xunta d’Escritores acoyó esti llunes a les 17,30 hores una conferencia de Javier Cubero: “Llingües, clases y nacionalismos”, na que fizo comparanza ente la burguesía catalana y l’asturiana del sieglu XIX, que dixo “nun pue llamase asina siquier”, porque según l’ensayista “nun yera emprendedora sinón rentista”, añandiendo que “namás aspiraba a caltener los sos privilexos, solucionando los sos conflictos col pueblu tirando de la Guardía Civil en delles ocasiones”.

Esti grupu social yera pa Cuberu “una clas que s’intregaba perdafechu nel sistema oligáquicu español” y que xustificó esta postura “creando’l Cuadonguismu, que define a una Asturies al serviciu y embaxo la dependencia d’España, alienada”.

Faustino Zapico, como voceru d’UNA, fixo llegar la felicitación al Conceyu de Ḷḷena pola creación de la Comisión de la Memoria Hestórica y al empar solicitó al Gobiernu d’Asturies que tresllade esta iniciativa al ámbitu asturianu.

Pal voceru nacionalista “énte la deceición que foi la Llei de la Memoria Hestórica, qu’al cabu y la postre nun ye más qu’otra midida publicitaria del gobiernu Zapatero pa tentar de facese pasar por un gobiernu d’esquierdes, fáense precises midíes como les del Conceyu de Ḷḷena pa resarcir a les víctimes del franquismu, sobre manera no que cinca a la localización de tales víctimes”.

Zapico tamién recordó que “nós yá solicitamos públicamente al gobiernu asturianu qu’asuma los costos de la localización de les víctimes del franquismu” y amestó qu’agora “solicitamos que s’axunte a esta iniciativa y la esparda a toa Asturies”.

Los nacionalistes dicen nun entender “la llercia qu’hai a una midida esclusivamente humanitaria como ye que los familiares sepan ónde s’afayen los sos seres queríos, lo que nun habría molestar a naide”.

Per último Zapico señaló que “una organización política nun tien solo que criticar a los responsables políticos cuando faen mal les coses, sinón dar el parabién tamién cuando acierten nes sos decisiones, porque pa nós eso define a una oposición responsable” y polo tanto “reiteramos la nuesa felicitación al Conceyu de Ḷḷena por esta midida tan necesaria y xusta” concluyó.

L’Ayuntamientu d’Avilés ta acabante recuperar una segunda copia orixinal del fueru de la ciudá, del que yá se caltenía un exemplar del añu 1155, y que llevaba perdíu dende va 200 años, cuando Asturies foi invadida poles tropes de Napoleón. L’alcaldesa de la ciudá, Pilar Varela, y el conceyal de Cultura, Román Antonio Álvarez, presentaron públicamente esti segundu exemplar, que ta testáu nun primer analís pola catedrática de Paleografía de la Universidá d’Uviéu Pepa Sanz, y l’hestoriador Ignacio Ruiz de la Peña.

El percorríu d’esti documentu, consideráu como’l más vieyu en llingua asturiana que se caltién, entamó cola invasión a Asturies de les tropes de Napoleón, momentu en que’l daquella xerente de l’Audiencia Provincial d’Uviéu, Pascual Quílez, llevó consigo’l documentu. Foi colos sos descendientes colos que fizo l’alcuerdu de compra de la pieza, al preciu de 72.000 euros (perbaxo de la tasación técnica), de los que 20.000 euros fueron apurríos pol Ayuntamientu.

El conceyal de Cultura destacó la importancia d’esta operación de recuperación del patrimoniu hestóricu, polo que significa d’oportunidá pal estudiu del contestu asturianu y español, en clave xurídica, sociolóxica y llingüística. L’alcaldesa, pela so parte, aseguró qu’Avilés “tenía media alma perdida y recuperóla con esti documentu”.

Varela y Álvarez esplicaron que los sos dos exemplares sedrán curiaos nel archivu municipal de Valdezarzana,con derechos recoyíos nel mesmu como la inviolabilidá de la casa a los avilesinos o’l reclamáu por un vecín nos años ochenta del sieglu XX, qu’eximía a los avilesinos de cumplir serviciu militar.

La Estaya de la Llingua de la Conceyalía de Cultura d’Avilés va presentar una guía hestórico-artística d’Avilés n’edición billingüe (asturianu-castellán). La guía ye’l resultáu del trabayu de dos grupos d’estudiantes de la Universidá d’Uviéu que ficieron práutiques na Conceyalía y del resultáu d’eses práutiques, xunto cola torna de la Estaya de la Llingua, xurde esti trabayu, que la Estaya califica de “prestosu , de diseñu modernu y perfayadizu de formatu”, col que se pue dar un paséu hestóricu peles cais d’Avilés. La presentación va tener llugar el 22 d’avientu, a les ocho la tarde, nel Palaciu de Valdecarzana.

La editorial La Cruz de Grau busca en collaboración col Conceyu de Nava, semeyes antigües de costumes, familiares, hestoria… del conceyu. Los interesaos en dixitalizar les sos semeyes pueden pasar pela Casa Cultura ya inscribise nel proyectu.

L’Ayuntamientu de Llangréu ta acabante estrenar la primer rede social n’internet venceyada a la minería esclusivamente. Embaxo’l nome d’”Archivo Histórico Minero”, esti proyectu quier “desenrrollar una gran fondu documental sobre’l sector estractivu con imáxenes, testimonios y archivos sonoros en dellos idiomes pa que puedan ser consultaos na rede por toes aquelles persones que lo deseen”. L’oxetivu ye que sean los propios usuarios los que aporten los sos documentos y los xuban a la páxina web. Un equipu d’espertos sedrá l’encargáu de recoyer, clasificar y catalogar los documentos recibíos de los usuarios.

Pel momentu, l’Archivu cunta con 400 semeyes de les más de 10.000 yá axuntaes.

Archivu Hestóricu Mineru

El Salón d’Actos de la Cátedra Gaspar Melchor de Xovellanos d’Estensión Universitaria de la Universidá d’Uviéu, va acoyer esti miércoles, 11 de payares, dende les siete y media la tarde, la conferencia “La figura d’Hipatia nel so contestu hestóricu”, que va pronunciar la escritora Olalla García.

El Salón d’Actos de la Delegación d’Asturies en Madrid va acoyer mañana miércoles, la celebración d’una mesa redonda sobre’l 75 aniversariu de la Revolución d’Asturies. Na mesma van participar David Ruiz, catedráticu eméritu de la Universidá d’Uviéu y autor d’”Octubre de 1934″, Santiago Carrillo, ex secretariu xeneral del PCE, Eduardo G. Rico, miembru del equipu de redacción de Triunfo yJosé Ángel Ezcurra, ex director de Triunfo y presidente de l’AART.

La delegación asturiana en Madrid ta asitiada na cai Santa Cruz de Marcenado 2.

L’escritor, ensayista y presidente del Partíu Asturianista, Xuan Xosé Sánchez Vicente dio un conferencia na tarde d’ayeri y dientro d’un ciclu del Atenéu Xovellanos de Xixón, sobre la revolución d’ochobre de 1934, embaxo’l títulu “Octubre del 34: la foguera y les ascues”. Más de cien persones siguieron la intervención celebrada nel edificiu d’Estensión Universitaria de Xixón.

Na conferencia, Sánchez Vicente declaróse “en contra” de lo que denomó “golpe d’estáu d’ochobre de 1934”, que pal asturianista supunxo “una torga pal desenrrollu d’Asturies a nivel económicu”, siguiendo pa él, tovía anguaño, “condicionando la vida social y política de la comunidá”.

Sobre los acontecimientos d’aquellos díes, de los que responsabiliza al PSOE comentó que “dende’l puntu de vista militar pa los asturianos foi un embarcazu, una operación tan desastrosa como la d’Anual”, pero que tamién tuvo “consecuencies y tovía sobrevive’l so mitu como un modelu únicu pa proponer a la mocedá”, dalgo que criticó duramente. “Los llíderes del PSOE mandaron a la xente a una matanza ensin armes, preparación nin apoyos, engañándolos o faciéndo-yos creer nuna utopía”.

Na conferencia refirióse amás a unes declaraciones del parllamentariu d’Izquierda Xunida na Xunta Xeneral, Francisco Javier García Valledor, “que cuando propunxo fundar un nuevu partíu d’izquierdes punxo como modelu la revolución del 34”. Basándose néstos y otros exemplos, Sánchez Vicente consideró que “hai dalgunos vectores que condicionen la nuesa realidá, y la nuesa condición del mundu llaboral”, y que creen “dificultaes pa que s’instalen equí empreses”. “Toa esa permanencia como un mitu positivu de lo que foi un desastre tien munches d’estes consecuencies nesti momentu sobre la vida social, política y llaboral d’Asturies”, opinó nel Atenéu Xovellanos.