Hestoria

Xuan Xosé Sánchez Vicete, presidente del PAS, escritor y articulista collaborador d’Asturnews, va dar una conferencia sobre la Revolución de 1934 nel Atenéu Xovellanos, xunto a la Plaza’l Parchís de Xixón. Va ser mañana, miércoles 21 d’ochobre del 2009, a les siete y media la tarde. La conferencia lleva por títulu “Ochobre del 34: La foguera y les ascues”.

El martes, 5 d’ochobre, dende les nueve la nueche, el Cafeton, aitiáu na Cai del Sol 8, n’Avilés, va organizar una charra-alderique sobre la Revolución d’Ochobre de 1934 y les sos repercusiones nel conceyu. L’encargáu de la mesma va ser l’hestoriador Pablo Martínez Corral.

La Conceyalía de Cultura de Grau organiza la presentación del llibru de Carmen Martínez Álvarez“Fotografías en blanco y negro, y rojo, claro” pa güei, martes día 29 de setiembre a les 20 hores.

Carmen Martínez ñaz en Xixón en 1930. Hasta los 7 años vive en Bayo (Grau). Esti llibru ye autobiográficu y trata de les sos alcordances dende qu’en 1937 la saque cola so familia, republicana, per El Musel, fuera d’Asturies.

L’asociación La Foz del Pielgu organiza esti sábadu les III Xornaes de la Cultura Asturiana nel Centru Tomás y Valiente de Les Vegues y a partir de les 11 la mañana. Nesta ocasión el protagonista de les mesmes va ser El Picu Castiello.

El doctor n’Hestoria, Jesús Antonio González Calle, va falar del mesmu cola charra “El castru del Picu Castiello”; Pablo León, hestoriador del Serviciu de Patrimoniu Cultural, va facer un repás de les polítiques en patrimoniu cultural de la Conseyería de Cultura; y l’etnógrafu y miembru de la Fundación Belenos, Alberto Álvarez Peña, va falar sobre los ástures y la forma de vida nes sos poblaciones, cola ponencia “Los castros d’Asturies”.

Esti domingu 23 d’agostu, Andecha Astur entamó por tercer añu consecutivu l’actu d’alcordanza del Conseyu Soberanu d’Asturies y Lleón coincidiendo col aniversariu de la Declaración de Soberanía de 1937. La prinipal novedá d’esti añu foi el llugar escoyíu pal actu, pasando de la Plaza del Parchís de Xixón, al tamién simbólicu escenariu del Puertu Tarna.

L’actu consistió na instalación d’un monolitu, la intervención de Daniel Cueli y de Rafael Fernandez Tomás, nietu de Belarmino Tomás, la llectura d’un saludu de Joan Tardá, diputáu d’ERC nel parllamentu español y una xinta popular.

Nel Puertu instalóse un monolitu, qu’años atrás, y según comenten dende Andecha Asture “l’Ayuntamientu de Xixón torgara la so instalación nesti Conceyu y una nuea placa que recuerda l’actu d’esti añu, xunta a la que se punxera en 2007, coincidiendo col 70 aniversariu de la declaración”.

Pasaes les 13:30 hores empincipió l’actu cola intervención de Daniel Cueli voceru d’Andecha Astur. Cueli dio les gracies a los presentes por asistir al actu “nun llugar estremáu al d’otres vegaes, pero non menos especial: el Puertu Tarna”, especial porque “tamos al llau del pueblu del mesmu nome, Tarna, que precisamente va setenta y dos años foi bombardeáu fasta que nun quedó piedra sobre piedra”.

Andecha Astur entama un actu n’alcordanza del Conseyu Soberanu d’Asturies y Lleón, coincidiendo col 72 aniversariu de la robla de la declaración de soberanía. El mesmu ta programáu pal próximu domingu, 23 d’agostu, nel Puertu Tarna (Casu), llugar onde, de magar les 13’30 hores, tendrá llugar una intervención política, la colocación d’una placa conmemorativa nun monolitu llantáu al efeutu y una xinta popular.

El pueblu lleonés de San Román de la Vega va celebrar una xornada dedicada a la cultura lleonesa por mor del 1.100 aniversariu del Reinu de Lleón. Los actos van tener llugar mañana xueves, 13 d’agostu, de magar les ocho la tarde, na Casa Cultura.

Ricardo Chao, hestoriador, y Xosepe Vega, escritor n’asturlleonés, van ser los ponentes d’una conferencia sobre la hestoria de Lleón “dende los ástures hasta’l sieglu XV y la llingua asturlleonesa en cada dómina”. Una esposición de semeyes va completar la xornada.

El Muséu del Xurásicu d’Asturies (MUXA) va acoyer dende’l 30 de xunetu al 30 de setiembre la esposición “Atrapaos en Xelu”, que ta compuesta por más de 70 pieces de la fauna de la Edá de Xelu, atopaes en Siberia. Ye la primer vez que “Atrapaos en Xelu”, s’espón n’Europa dempués de viaxar al continente asiáticu y a los Estaos Xuníos. Parte de los fondos que componen la esposición pertenecen a la colección permanente del Muséu-Teatru “La Edá de Xelu” de Moscú, qu’agospia esqueletos completos de mamús, rinocerontes cubiertos con llana, osos de les cavernes, gües almizcleros y otros fósiles momificaos. El Muséu-Teatru “La Edá de Xelu” posee la mayor colección privada paleontolóxica de Rusia y recibe anualmente más de 50.000 visitantes. Amás, cuenta con un equipu encargáu de les espediciones científiques pa esplorar los ríos de Yakutia (Siberia), onde los mamús vivieron hai miles d’años.

P’atopar los restos de la fauna que poblaba Siberia na Edá de Xelu, los paleontólogos tuvieron que trabayar en condiciones durísimes faciendo llocalizaciones en grandes ríos, pantanos y suelos xelaos qu’hai que calentar con fogueres pa poder facer les escavaciones. Gran parte del resultáu de los sos trabayos va poder vese nel MUXA enntes de treslladase a Vancouver (Canadá).

El pueblu natal del escritor ya investigador lleonés Caitanu Álvarez Bardón, Carrizu la Ribera, va celebrar un homenaxe esti sábadu 11 a les once la mañana. La vieya cai Villagatón va garrar el so nome y l’actu va cuntar coles pallabres de persones del pueblu venceyaes a la cultura lleonesa, amás de descendientes del escritor de los “Cuentos en dialecto leonés”.

Ente ochobre y payares de 1937 les tropes franquistes qu’entraben en Xixón, incautaraon nel llar de la Conseyería de Facienda del Conseyu Soberanu d’Asturies y Lleón, más d’un millón de sellos, que dempués fueron almacenaos fuera d’Asturies. En 1987 fueron precintaos nun armariu y agora y gracies a la petición d’un investigador, sacáronse ya inventariáronse, afayando alredor d’un 1.100.000 sellos.

Les estampes tán nel “Centru Documental de la Memoria Hestórica” de Salamanca, según informó’l Ministeriu de Cultura y hai 19 tipos distintos de diseños, con un valor que podría superar los seis trés millones d’euros nel mercáu filatélicu.

Los motivos de los sellos son diversos: ún d’ellos presenta na mitad superior un barcu pesqueru navegando p’hacia la izquierda y rede, y la mitá inferior a un agricultor arando con dos gües, aludiendo a la dualidá campu-costa del territoriu. Otru grupu de sellos presenta na mitá superior una carabela navegando haza la derecha ente dos palmeres, y na mitá inferior figura una plantación de tabacu. Otros temes qu’apaecen son el yunque, la paleta y pinceles de pintor, el farol, el símbolu de Mercuriu y espigas, dalguna inclúi proclames polítiques antifacistes.

La formación política Andecha Astur declárense a favor “de la devolución integra de tolos materiales y documentos incautaos n’Asturies demientres la guerra civil y que conformen parte del patrimoniu historicu del Pueblu Asturianu”.

Sobre’l conxuntu filatélicu de más d’un millón d’unidaes consideren “que ye la mayor amuesa de la nuesa producición filatelica propia y consideramos que la coleición tien que tornar a Asturies d’onde enxamás debió salir”, asina que reclamen al Gobiernu d’Asturies que camuden la so actitú, yá que pa los independentistes “dende’l “Principado” nun fain un res pola recuperación de parte tan importante del nuestru patrimoniu históricu y por contra la so posición siempres foi d’un provincianismu insultante”.