Fiestes

Uviéu vive yá somórguiáu na Feria de L’Ascensión. El popular certame vive la so segunda xornada ente la plataforma superior de la estación ferroviaria y les places de Porlier y de la Catedral, onde yá ta en marcha el mercáu astur que permanecerá abiertu tamién mañana. Una boda vaqueira real, na que los contrayentes cellebrarán los sos 25 años de matrimoniu a partir de les 18 hores, centra los actos festivos del día.

Amás, la segunda xornada de la feria inclúi una amuesa d’adiestramientu de perros a les 16,30, y un mercáu astur que permanez abiertu a lo llargo de tol día nes places de Porlier yde la Catedral.

El remate del día festivu pondrálu l’actuación de los grupos folk Corquiéu y Tejedor, protagonistes del segundu de los tres conciertos que’l departamentu de Festexos del Ayuntamientu d’Uviéu programó pa esta edición de la feria cola intención de que’l festival tenga continuidá n’años posteriores.

L’Ascensión apuesta pola música folk. El festival que protagonizarán esti fin de selmana Gatos del Fornu, Llan de Cubel, Corquiéu, Tejedor, Llangres y Xuacu Amieva tendrá continuidá n’ediciones posteriores de la popular feria uvieína, que se cellebra ente’l vienres y el domingu n’estremaos escenarios. El programa d’esta edición inclúi la representación d’una boda vaqueira y una amuesa etnográfica de l’Asturies rural.

Sedrá -igual que los conciertos- na esplanada esterior allugada enriba de la estación conxunta de Renfe y Feve, onde amás habrá una exhibición de ropes tradicionales y una competición de deportes autóctonos. La otra referencia habitual a la tradición del país, el Mercáu Astur, treslládase nesta edición a la Plaza Porlier al quedar acutada la Plaza l’Ayuntamientu pa la cellebración ciudadana de la boda’l Príncipe d’Asturies y la periodista Letizia Ortiz.

El tercer escenariu de la Feria de L’Ascensión sedrá’l recintu ferial de Llanera, onde va mantenese l’habitual mercáu de ganao definitoriu nel orixe de la feria. Pa facilitar l’accesu a eses instalaciones, l’Ayuntamientu d’Uviéu prevé entamar un serviciu regular d’autobuses que van partir del cascu urbanu de la capital con una frecuencia de doce minutos.

Les actividaes de la Feria de L’Ascensión 2004, ente les que se cuenta asinamesmo un concursu nacional d’escanciadores, tán respaldaes por un presupuestu de 300.000 euros.

Programa completu na web del Ayuntamientu

La imaxen d’hasta 30.000 persones alredor de la foguera de San Xuan xunta l’embalse de Tresona cuerre peligru de quedar como una mera alcordanza. La popular nueche celta corverana, la xuntanza más multitudinaria nel calendariu celta asturianu, llucha pola so sobrevivencia énte la falta del sofitu municipal y podría nun se cellebrar finalmente el prósimu 23 de xunu, sustituyida por una folixa animada por una orquesta nun allugamientu distintu.

Según fontes prósimes a la organización del eventu corveranu, el cambiu de signu políticu rexistráu nel gobiernu llocal tres de les elecciones de mayu de 2003 y qu’upó a l’alcaldía a Luis Moro, cabezaleru de la Unión Social y Progresista de Corvera (USPC), traxo con él un sentimientu de rocea p’hacia la nueche celta de Tresona, que podría sustituyise por voluntá municipal por una folixa de práu amenizada por una orquesta.

L’allugamientu d’esa fiesta aprosimaríase más al cascu urbanu de dalguna llocalidá del conceyu -presumiblemente a Les Vegues- y en tóu casu abandonaríase l’habitual escenariu al cau del embalse, nel que los grupos asturianos asiduos de la foguera corverana estudien entamar una cellebración alternativa si a la fin la nueche celta pierde dafechu el sofitu de l’Alcaldía.

La foguera de San Xuan xunta l’embalse de Tresona afitóse por drechos propios como la cita celta con mayor poder de convocatoria n’Asturies, axuntando a unes 30.000 persones nes sos últimes ediciones. De consumase la so perda, el calendariu de nueches celtes quedaría doblemente tocáu esti añu, llueu de que la Xuntanza Astur de Santu Adrianu, otru eventu con gran participación popular, desapaeciera la pasada Selmana Santa.

La delegación asturiana que participare esta fin de selmana nel Festival intercélticu de Les Anthinoises (Liexe – Bélxica), tornó p’Asturies col ésitu como rempuesta de los belgas al so bonfacer musical. La delegación asturiana formábenla’l collectivu Muyeres y los grupos de rock Dixebra, y de folk Corquiéu y Niundes, xunta’l grupu de folklor del centru asturianu en Bruseles que lleva por nome “Puxa Asturias”.

El Festival de Les Anthinoises, amás d’un completu programa d’actuaciones, ufre tamién un espaciu pa la cultura’l país y de los países invitaos como Asturies nesti añu, que cuntó nel festival con un pabellón propiu nel que pudo asoleyar una amuesa de la so cultura, gracies a la presencia d’artesanos y la esposición de productos asturianos. Ente les munches actividaes programaes, destacó la charra sobre etnografía que dio’l responsable de la discográfica Fonoastur y miembru del Conceyu d’Estudios Etnográficos Belenos Lisardo Lombardía.

El collectivu Muyeres ufiertó abondes actuaciones a lo llargo de los tres díes y foi protagonista de desfiles como’l del ramu, que se fizo nel preciosu pueblu de Les Anthinoises. Los grupos asturianos, con Dixebra a la tiesta, foron felicitaos pola so bona actuación y Muyeres dio-y un color especial a la presencia asturiana nel país belga.

Villaviciosa espera abrir un muséu del acebache nun plazu de dos años, como complementu turísticu al Muséu Xurásicu allugáu na vecina Colunga. La Villa acoyerá nel segundu fin de selmana de mayu les sos I Xornaes del Acebache, qu’axuntarán en tierres maliayes a espertos internacionales, investigadores y artesanos p’abordar, ente otros asuntos, la posible creación d’una marca de calidá del acebache asturianu.

Tala iniciativa contribuyiría dafechu a afitar una industria artesana que ve enforma llimitáu el so espardimientu pola llexislación en vigor sobro mines, qu’impide la estracción del material fósil y fai que los artesanos tengan que trabayar siempre con pieces de pequeñu tamañu.

Ente los asistentes previstos a les xornaes figuren el prestixosu mayestru acebecheru compostelanu Requeixo Rebón, l’investigador etnográficu Valentín Monte, l’arqueólogu Rogelio Estrada y la doctora n’arqueoloxía y directora’l Muséu Misión de San Luis (La Florida-Estaos Xuníos), Bonnie McEwan. Tamién participarán miembros del equipu d’investigación sobro acebache de la Universidá d’Uviéu.

Na parte estrictamente festiva del eventu, ente’l vienres 7 y el domingu 9 de mayu les cais de La Villa sedrán escenariu d’una feria d’artesanía y de representaciones teatrales xuglaresques coles tradiciones del Camín de Santiago como elementu central.

D’una espicha na cai nel Nalón a otra nel epicentru de la Cuenca’l Caudal. Mieres, cola IX Folixa na Primavera, y Llangréu, na octava edición de les Xornaes de la Sidra, centren la fiesta popular nesti fin de selmana, dos xornaes nes que les cabeceres de les Cuenques acoyerán representaciones de teatru, deportes tradicionales, escanciáu gratuitu de sidra y los conciertos de Llangres y John McSherry.

Estos dos recitales cellebraránse na nueche de güei nel parque Xovellanos de Mieres como remate musical de la Folixa, complementu d’un espectáculu pirotécnicu que culminará nel baille popular de la Dancia d’Oñón. Pa la tarde tán previstes la cellebración d’un tornéu de gaita y una amuesa de bailles asturianos.

El programa de la novena Folixa na Primavera de Mieres pesllaráse’l domingu con una olimpiada de deportes tradicionales, representaciones de teatru na cai y la xinta d’un menú especial cocináu nos restaurantes de la villa, a base de sopa d’ablanes, menestra, bacalao, cabritu y borrachinos.

Al otru llau de la cordal, nel parque Dolores F. Duro de La Felguera, la folixa arranca güei con un escanciáu masivu de sidra pa desembocar el domingu nuna xornada que los organizadores conciben como exaltación de l’asturianía, y qu’inclúi un actu d’homenaxe al artífice’l concursu de tonada de La Nueva, José Francisco Torres.

La Felguera prepárase pa chiscar el parque Dolores F. Duro. Nos próximos sábadu 24 y domingu 25, disconceyu, tintos llagares procedentes d’estremaes llocalidaes d’Asturies escanciarán gratis la so sidra d’esta temporada pa los ciudadanos que s’acerquen a Llangréu vasu en mano.

La espicha sedrá’l filu conductor de les VIII Xornaes de la Sidra Natural, pero esti eventu va incluyir tamién nesta edición, como cita destacada, un actu públicu d’homenaxe a José Francisco Torres Álvarez, creador del concursu de tonada asturiana de La Nueva. El reconocimientu cellebraráse’l domingu, xornada consagrada pol Ayuntamientu de Llangréu a la exaltación de l’asturianía.

Les xornaes llangreanes de la sidra ocupen ún de los primeros llugares de la temporada en certames d’esti tipu, y coinciden nel tiempu cola Folixa na Primavera de la vecina Mieres, que dende’l vienres escancia sidra gratis pa tolos asistentes a la fiesta.

Siete mil llitros de sidra y 90.500 euros de presupuestu pa tres díes de fiesta. La novena edición de la Folixa na Primavera, que se cellebra dende güei hasta’l domingu entamada pol Ayuntamientu de Mieres, presume de tener nel so cartel a un referente na música popular como ye Mercedes Peón, a un gaiteru de prestixu como John McSherry y a una digna representación del país, ostentada polos llangreanos Llangres.

El repartu de sidra faráse a partir d’esta tarde y pa él repartiránse ente los asistentes un total de 5.000 vasos col logotipu de la Folixa, que nesta edición ye una mazana de sidra diseñada por Magdalena Cano ya inclúi el lema de la fiesta, “toma un culín”. L’escenariu de la espicha -mesmo que’l del restu d’actos- sedrá’l Parque Xovellanos, allugáu nel centru la villa.

Nesta mesma xornada primera abrirá’l fueu Skolvan, un quintetu bretón con quince años d’esperiencia al llombu, hasta qu’a la una de la mañana garre’l relevu la veterana Mercedes Peón. Pal sábadu tán previstos los conciertos de Llangres, qu’estrena en Mieres puesta n’escena cola incorporación d’una vocalista, y del gaiteru irlandés John McSherry, consideráu un de los meyores nel xéneru en so país.

Amás del aliciente musical, la IX Folixa na Primavera ufrirá tamién deportes tradicionales, teatru na cai y un menú oficial integráu por sopa d’ablanes, menestra’l tiempu, bacalao, cabritu, borrachinos y sorbete de sidra.

Pa facilitar l’asistencia a la Folixa en tresporte públicu, la Conceyalía de Festeyos del Ayuntamientu de Mieres, organizadora del eventu, habilitará servicios especiales d’autobús nocherniegu ente la capital del conceyu y les llocalidaes de Ruturbiu, San Andrés, Uxo y Valdefarrucos.

La Pola Sieru abandona’l blancu y negru. El collor vivu de los güevos pintos envuelve güei la villa polesa nun ambiente folixeru centráu na amuesa y nel comerciu’l productu que-y da nome a la fiesta, pero abiertu tamién a la música y la gastronomía. La principal novedá d’esta edición, na que ta acompañando’l tiempu, ye la recuperación de la puya’l ramu por iniciativa’l sector hosteleru llocal.

Depués de la bendición n’asturiano de los güevos pintos, a cargu’l párrocu de La Pola, Juan Bautista Álvarez, que se fexo a mediudía, espichóse una pipa de sidra pa consumu’l públicu asistente, con actuaciones folclóriques de los grupos ‘El Ventolín’ y ‘Los Campones’.

Una réplica en vivo del mercáu de La Pola a fines del sieglu XIX anima amás la xornada, cuyu actu central pa pola tarde ye, a partir de les cincu y media, el desfile folclóricu peles cais Celleruelo y Florencio Rodríguez.