Fiestes

Bollu y vinu contra l’amenacia persistente d’orbayu. Miles d’uvieínos participen dende esti mediudía na romería cola que la ciudá cellebra, nel Campu San Franciscu, el día grande de les fiestes patronales de Samatéu, una xornada que pesllarán un conciertu d’El Canto del Loco nes pistes de San Llázaru y un recital de música llatina na Plaza la Catedral.

Depués d’una mañana marcada pola distribución del bollu y el vinu y la cellebración d’una misa mayor na Catedral, el programa festivu de Samatéu prevé pa esta tarde una corrida de toros na plaza de Buenavista y un pieslle musical desdobláu en dos escenarios.

Na Plaza la Catedral, una nueche llatina contará a partir de les 21,30 hores cola participación de Sonia Fausto, Los Charros de Jalisco y Hedí Mc Lean. Dos hores depués, nel complexu municipal de San Llázaru, los integrantes del grupu madrilanu El Canto del Loco actuarán na ciudá nel que sedrá’l so regresu a Uviéu depués de participar, hai un añu, n’anterior edición de les fiestes de Samatéu con un concurríu conciertu na plaza de Buenavista.

Les fiestes patronales d’Uviéu entamaron el pasáu 10 de setiembre y camudaron la fisonomía’l cascu vieyu de la capital, onde s’allugaron los habituales puestos hosteleros de cai. A lo llargo d’once díes de folixa, polos escenarios de la ciudá pasaron, ente otros, Café Quijano, Fran Perea, Estopa, O’Funkillo, Mala Rodríguez, Malú, Hevia, Felpeyu y Chus Pedro Suárez.

Café Quijano, Fran Perea, Estopa, El Canto del Loco, O’Funkillo, Mala Rodríguez, Malú y una nueche de folk de la casa con Hevia, Felpeyu y Chus Pedro Suárez. Uviéu ultima los preparativos pa somorguiase a partir de güei nos once díes de folixa que propiciarán les fiestes de Samatéu, que se desendolquen con un presupuestu d’un millón y mediu d’euros y esti añu contarán con más baños a pie de cai que n’ediciones anteriores.

N’esencia, los espectáculos musicales previstos repartiránse en dos escenarios, ún de pagu nes pistes de San Llázaru y l’habitual allugamientu de baldre na plaza de la catedral, na que los técnicos trabayaben güei p’habilitar el montaxe de lluces y soníu. Pol primeru pasarán Café Quijano (güei, vienres), Fran Perea (sábadu), Estopa (martes 14), Andy y Lucas (miércoles 15), Víctor Manuel y Ana Belén (xueves 16), O’Funkillo y Jacky Trap (sábadu 18), Malú (domingu 19) y El Canto del Loco (martes 21).

A la plaza la Catedral acudirán los grupos y solistes Paloma San Basilio y Javier Gurruchaga (güei, vienres), Roser (sábadu 11), Beres Hammond (domingu 12), Melendi y Junior Míguez (llunes 13), Trashtornados ya Ilegales (martes 14), Mala Rodríguez (xueves 16), Carlos Baute (sábadu 18), Manu Tenorio (domingo 19)y Tomatito (domingu 20), amás de los intérpretes asturianos Hevia, Felpeyu y Chus Pedro Suárez, que protagonizarán una nueche folk el vienres 17 de setiembre.

A esi intentu de tocar el mayor númberu posible de palos musicales, hay que-y sumar los conciertos del concursu de rock ‘Ciudad de Oviedo’, cuyos recitales se cellebrarán na plaza Feijoo y nel que participen 56 bandes, les romeríes previstes en Monte Altu (día 12) y nel Cristu les Cadenes (26 de setiembre), y el tradicional repartu’l bollu y el vinu que se fará na plaza España el día’l patrón, martes 21.

Música, teatru, mercáu, sidre de baldre. Mieres convirtióse güei nuna gran folixa cola llegada de miles de persones que se desplazaron a la villa minera pa participar nos actos entamaos pol Gobiernu’l Principáu pa conmemorar el Día d’Asturies. Depués d’acusaciones cruzaes y d’una rectificación ‘in extremis’ por parte l’Executivu, la llingua asturiana pasó a la fin inalvertida nos cartelos ya inscripciones institucionales allugaos na ciudá.

A lo menos asina quedó asoleyao nos cartelos de formatu cuadráu qu’anunciaben perdayures la cellebración y que na so mayoría colingaben de les faroles. Toos ellos taben en castellán, lo mesmo que la propaganda institucional que los propietarios de pequeños comercios de la villa minera asitiaron nos sos escaparates p’anunciar los actos festivos del 8 de Setiembre, y que les inscripciones na plaza de La Pasera, onde se publicitaba con profusión una ‘degustación de sidra’.

Esa espicha de sidra de baldre concentró a gran parte de los visitantes na tarde de güei, anque’l públicu desfiló tamién en grandes cantidaes pol mercáu astur allugáu nos xardinos del Ayuntamientu. Artesanía, llambionaes y una amuesa d’aves rapaces centraron l’atención de los visitantes.

Na vieya estación del Vasco, un concursu de postiaores foi siguíu asinamesmo por abondu públicu, mientres qu’un cuartu escenariu festivu, la emblemática plaza de Requexu, acoyó un conciertu de La Bandina’l Tombo y Liliana Castañón Cuartetu. Con música se peslló tamién la xornada, nun recital nel parque Xovellanos compartíu poles bandes Los Ciquitrinos y La Bottine Souriante.

Rock desnudu y vitamínicu. La banda Pereza presentó anueche les sos credenciales en Llugones y desplegó una intensa puesta n’escena que llevó al públicu a dexase somorguiar nun ‘crescendo’ qu’abre la traca final de les fiestes patronales de Santa Isabel. L’intérprete Chus Pedro Suárez pesllará güei el programa festivu, qu’inclúi amás un desfile de carroces, el repartu’l bollu y fueos artificiales.

Pocos espectadores nel parque de la Paz, inda cola resaca fresca del exitosu conciertu que’l grupu Marea protagonizó na nueche’l sábadu nel mesmu escenariu y con un orbayu calquín qu’insistió en cayer dende la salida a escena’l grupu lideráu por Rubén Pozo y Miguel Leiva, acabante aportar a Asturies depués d’un llargu viaxe dende La Seu d’Urgell.

Salieron y nun escatimaron enerxíes. Los primeros acordes de la banda, fichada pola discográfica RCA y rodada nuna xira qu’entá va prollongase hasta finales de setiembre, sacaron al públicu d’un hómidu pigazu y foron enriedándose cada vez más rápido hasta dar cola receta’l baille abiertu. Pa cuando llegó una estirada y remocicada versión de ‘Música ligera’ con set de percusión desbocáu, l’ambiente en Llugones yá yera’l propiu d’un conciertu de rock que se permitió poques concesiones a la calma.

Con más metros cuadraos pa blincar y revolvese que na so anterior visita a Asturies, na xixonesa sala Albéniz, los integrantes de Pereza amosaron cómo repetir un patrón de directu ensin cayer na galbana o na comodidá y desatáronse a partir de la mitá’l recital nuna folixa que dacuando taba más enriba l’escenariu que nel prau del parque.

“Nun hai nada meyor que tener una banda de rock and roll”, sentenciaron los músicos madrilanos, y lliáronse -homenaxe a Babylon Chat incluyíu- a nun-yos dar fuelgu a les guitarres nun tramu final qu’apostó por una popularidá segura, encadenando ‘La bruja Avería’ (de ‘La Bola de Cristal’), ‘Voy a pasármelo bien’ y ‘Yo pienso en aquella tarde’, tema que’l grupu rueda como’l principal éxitu del so segundu y más reciente discu editáu, ‘Algo para cantar’.

Al final, remate d’un conciertu col que los propios músicos dixeron tar mui conformes nos camerinos, especialmente depués d’un grave problema de monitorización que la banda sufrió nel so conciertu de La Seu d’Urgell, carretera y manta y clima idénticu pa la cabera xornada de les fiestes, que se pesllarán esta medianueche con una descarga de fueos artificiales.

Web oficial de Pereza

Avilés enfila’l fin de selmana grande de les sos fiestes patronales. Un conciertu del intérprete cántabru David Bustamante, qu’algamó notoriedá nel programa televisivu ‘Operación Triunfo’, abre esta nueche un programa de cellebraciones qu’inclúi amás un recital de Lolita, un certame de ganao en La Madalena, un mercáu d’artesanía en Les Meanes, estremaes competiciones deportives y el llibre accesu al Palaciu de Camposagráu, futura sé de la Escuela Superior d’Arte del Principáu.

Bustamante xubirá a les 23 hores al escenariu allugáu na Pista de La Esposición, en Les Meanes, entornu nel que ta asitiáu un mercáu de productos artesanos que podrá visitase a lo llargo de tola xornada. L’Ayuntamientu mantién amás abiertes hasta’l sábadu -día de San Agustín- dos grandes opciones festives: El certame de ganao de La Madalena, consideráu ún de los más antiguos del Estáu, y la Fiesta de la Cerveza, que se desendolca na plaza de los Hermanos Orbón.

Pa la xornada’l sábadu, asinamesmo, el programa de cellebraciones prevé una misa solemne a mediudía na ilesia de San Francisco de Bari con procesión posterior poles cais del cascu vieyu, un concursu de pesca a caña pa neños na marxe drecha de la ría, una verbena na plaza’l Parche a partir de les 21 hores y un conciertu en Les Meanes a cargu de Lolita a partir de les 22,30 hores. Pesllará la xornada, na medianueche, un espectáculu de fueos artificiales nel parque’l Muelle.

Avilés aprovecha amás les sos fiestes patronales p’amosa-y al públicu les instalaciones del Palaciu de Camposagráu, edificiu qu’acoyerá la Escuela Superior d’Arte del Principáu y que pue visitase en xornaes de puertes abiertes, hasta última hora’l sábadu, n’horariu mañaniegu de 11 a 13 y de 16 a 19 pola tarde. L’héstóricu inmueble monopolizó’l pabellón del Ayuntamientu d’Avilés na última edición de la Feria Internacional de Muestres d’Asturies, que peslló les sos puertes en Xixón el pasáu domingu 22 d’agostu.

Ventiocho posibilidaes distintes d’algamar sidra de baldre. Esi ye’l númberu de llagares que servirán culinos de la bebida tradicional asturiana na XIII Fiesta de la Sidra Natural de Xixón, que se cellebra a partir del vienres acordies con un programa presentáu esti mediudía y que tien previsto rendi-yos homenaxe a los productores Alberto y José Manuel Acebal.

Dambos sedrán protagonistes de la xornada’l domingu, recibiendo’l culín qu’abrirá la espicha de sidra de baldre na Plaza Mayor y asistiendo depués a la plantación d’un pomar nel campu municipal de golf de La Llorea como reconocencia a la trayectoria profesional de los responsables de la marca Sidra Acebal.

Asina s’anunció esti mediudía nel trescursu d’un actu cellebráu nel Teatru Xovellanos que se concibió como presentación y reclamu’l festival sidreru y al qu’asistieron representantes de los llagares participantes, qu’esti añu son dos más que na edición de 2003.

La folixa empezará’l vienres 27 d’agostu con un mercáu de productos derivaos de la mazana y un concursu d’escanciadores que desembocará nel intentu d’algamar una nueva marca mundial d’escanciáu simultáneu de sidra. L’Ayuntamientu facilitará les primeres 3.495 botelles -una más que les que s’emplegaron l’añu pasáu p’algamar el récord-, pero habilitará un accesu especial pa los participantes qu’acudan cola so propia botella a la playa de Poniente, u va intentase batir el récord.

Na so segunda xornada, el sábadu 28 d’agostu, la XIII Fiesta de la Sidra Natural centrará les sos actividaes al rodiu de los populares cantares de chigre, que’l públicu asistente podrá interpretar na Plaza Mayor en compaña del Orfeón Xixonés, que tará dirixíu por Carlos José Martínez.

Magar de too ello, el día grande de la folixa sedrá’l domingu 29, xornada na que se servirá sidra de baldre durante cinco hores -de 12 a 14 y de 18 a 21 hores- nos puestos allugaos polos llagares na Plaza Mayor y l’entornu inmediatu de la Plaza’l Marqués. El grupu Trebeyu y la banda de gaites Llariegu protagonizarán l’animación musical a lo llargo de tol día.

El Principáu comprométese a financiar al 50 por cientu les futures campañes de promoción de la sidra

Una xornada “mui popular, mui abierta y mui de cai”. Esa ye la definición que’l director xeneral de Deportes del Principáu, Daniel Gutiérrez Granda, emplegó esti mediudía pa presentar les cellebraciones del Día d’Asturies, qu’esti añu van centrase en Mieres los prósimos 7 y 8 de setiembre. El programa inclúi los conciertos de Fangoria y La Bottine Souriante, un mercáu astur, una amuesa d’entibaores, sidra de baldre ya una xubida virtual en coche de carreres a Santumilianu.

Les actuaciones del grupu formáu por Olvido Gara y Nacho Canut -martes 7 nel parque Xovellanos- y de la hestórica banda canadiense de folk -miércoles 8 nel mesmu escenariu- son la punta más visible d’una riestra d’actuaciones nes que tamién participarán los conxuntos asturianos Koniec y Los Ciquitrinos, encargaos de telonear a los dos grupos principales, y Skanda, La Bandina’l Tombo y Liliana Castañón Cuartetu, que llenarán de folk la plaza de ‘Requejo’.

Esi sedrá amás l’escenariu d’una amuesa de tonada nel mediudía’l miércoles 8 de setiembre, y acoyerá sendes espiches de sidra de baldre nes tardes de les dos xornaes que van prollongase los actos festivos, que nesta edición promociona un cartelu ellaboráu por Juan Gallego y que Gutiérez Granda resumió como un programa “de marcáu acentu asturianu, con concesiones a nivel nacional”.

Amás del mercáu astur, que se desendolcará nos Xardinos del Ayuntamientu y contará cola participación d’un grupu lleonés espertu n’amueses de vuelos d’utres y otres aves rapaces, les cais de Mieres rexistrarán un espectáculu de teatru nel colexu Aniceto Sela y los sones de tres bandes de gaites -La Reina’l Truébano, Llariegu y Fonte Fuécara-, a les que van axuntase los bailles de los grupos folclóricos D’Escarpinos, L’Artusu y Esbardu.

Ún de los actos novedosos respecto a ediciones anteriores del Día d’Asturies ye una xubida virtual al altu Santumilianu que “reproduz les sensaciones d’un pilotu” y que centra les ufiertes del Ayuntamientu de Llangréu nel so pabellón allugáu na Feria Internacional de Muestres d’Asturies.

Nesi recintu xixonés presentó güei Gutiérrez Granda la programación del 8 de setiembre, acompañáu del músicu y xestor cultural Carlos Redondo y del alcalde en funciones de Mieres, Luis Álvarez Payo, pa quien la cellebración del Día d’Asturies na villa minera supón “un emburrión pal resurdimientu de la comarca” y un retu pa que la xornada trescurra como un día “brillante ya intensu”.