Fiestes

Uviéu celebra mañana la tradicional fiesta del Martes de Campu, que fai alcordanza de la donación fecha en 1232 por una dama de la nobleza llocal al gremiu de los xastres y que se venceya a la Balesquida.

Los carbayones van pasar el día na redolada y parques de la ciudá, xintando sobre’l prau y celebrando una de les fiestes con más tradición na capital d’Asturies.

El III Mercáu Tradicional, qu’organiza nel Parque de La Paz de Lugones el COnceyu Cultural El Carbayu ufre esta fin de selmana mediu cientu de puestos d’artesanía y productos ecolóxicos amás de dellos oficios tradicionales como un ferreru con una fragüa de más de 4 metros. El Mercáu fina esti domingu con una amuesa de cetrería con ferres y curuxes.

Esta fin de selmana del 30 y 31 de mayu va celebrase nel Parque de La Paz de Llugones, en conceyu Sieru, el III Mercau Tradicional, iniciativa del Ayuntamientu y organizáu esta vegada pol Conceyu Cultural El Carbayu.Amás de los más de cincuenta artesanos que ya confirmaren la so asistencia (cueru, azabache, xoyería en plata, vidriu, quesos, pan d’escanda, madreñeros, xabones artesanos, cestería, bisutería, etc) y la representación d’oficios vieyos (un ferreru con una fragüa de más de 4 metros, por exemplu), el gran atractivu d’esti añu sedrá la esibición de cetrería – con actividaes interactives educatives- y la presencia d’animales autóctonos como asturcones, xaldes y gochos celtas, ente otros.

La Selmana Negra va tener a lo postrero un allugamientu inesperáu: l’entornu de la playa d’El Arbeyal. El conceyal de Festexos del Ayuntamientu de Xixón, José Manuel Sariego, y el director del certame, Paco Ignacio Taibo, van presentar esti miércoles la programación de la Selmana Negra de 2009, afitando l’entornu d’El Arbeyal en llugar de la parcela de 100.000 metros cuadraos allugada xunta’l campus universitariu, ente la Escuela de Marina Civil y la Escuela d’Inxeniería Técnica Industrial.

Fai! entama esti 23 de mayu nel CSOA La ReFLEXón una xornada reivindicativa y folixera que va cuntar con un recital poéticu, la ellaboración d’un mural conmemorativu y un conciertu con Gomeru, K-Nalón, Arma X, 13 Palabras y Vinagre de Sidra.

Asina, Fai! quier recuperar esta data como día nacional d’Asturies, como se viniere cellebrando históricamente nel asturianismu d’hai 30 años.

El recital poéticu entamará a les 17.30, que col títulu “Poetes agresivos disparen les sos obres contra los que se duermen” cuntará cola presencia de dellos autores asturianos. La lliteratura reivindicativo dexará pasu a un mural conmemorativu de la Revolución de 1808, pa finar la xornada con un conciertu y folixa con precios populares a les 19.30 hores pal que’l preciu de la entrada ye de 5€, destináu a financiar l’eventu y futures reivindicaciones.

Mieres del Camín va celebrar los díes 3, 4 y 5 d’abril la XIV Folixa na Primavera el festival de la música y la cultura del Arcu Atlánticu qu’esti añu tien como cartel a los grupos ya intérpretes Llan de Cubel, Altan, Batterfield Band y Dixebra.

La fiesta presentóla esta fin de selmana’l conceyal de festexos, Rafael Perdiguer, acompañáu pol periodista asturianu Aurelio Argel. El conceyal de Festexos destacó que “la Folixa na Primavera consolidóse como una de les grandes fiestes d’Asturies y del Norte d’España, al contar con carteles musicales de proyeición internacional”. Nesta 14 edición van actuar los grupos Batterfield Band (Escocia), Altan (Irlanda), Dixebra y Llan de Cubel.

La UNESCO ta acabante facer pública en París la nueva versión del “Atles de les llingües en peligru nel mundu”. Cada llingua ta calificada según cinco niveles de peligru (vulnerables, en peligru, seriamente en peligru, en situación crítica y estintes dende 1950). L’asturianu ta asitiada nel segundu nivel “en peligru”, igual que l’aragonés, mientres qu’otres llingües del ámbitu cercanu, como’l vascu, tán nel nivel 1.

Nel Atles apaecen más de 2.500 idiomes, que se complente, corrixen y actualicen de contino. De les 6.000 llingües esistentes nel mundu, más de 200 estinguiéronse nel cursu de les trés últimes xeneraciones, 538 tán en situación crítica, 502 seriamente en peligru, 632 en peligru y 607 nuna situación vulnerable.

Llamen l’atención dataos como’l que 199 idiomes tengan menos de diez falantes y 178, ente 10 y 50. Ente les llingües muertes va poco, tán el manés de la Islla de Man, que s’estinguió en 1974 cola muerte de Ned Maddrell; l’aasax de Tanzania, extinguíu en 1976; l’ubyh de Turquía, desaparecíu en 1992 cola muerte de Tefvic Esenc; o l’eyak d’Alaska, que morrió l’añu pasáu al mesmu tiempu que Marie Smith Jones.

Mapa de les Llingües del Mundu en Peligru

L’Antroxu avilesín entama güei vienres cola resaca de la fiesta de Les Comadres d’esti xueves. A les 17.30 hores, va celebrase un desfiles d’escolinos antroxaos, acompañaos de fanfarries y de Los Lunnis, saliendo d’El Parche y percorriendo les cai La Cámara, Cuba, Orejas Sierra, Plaza’l Vaticanu, Xuan XXIII y pa finar, el pabellón del Complexu Deportivu d’El Quirinal.

A les seis de la tarde va celebrase una folixa infantil y una gran chicolatada.

A les ocho y media la nueche va celebrase un “SHOW TELEVISIVU DE CORONACIÓN DE LOS REIS DEL GOXU Y LA FABA 2009”, que va retresmistir TPA en directu.

Darréu va actuar la banda de funk-music The Far Tones, amás d’un grupu de drag queens, xunto con delles fanfarries asturianes, too ello n’El Parche.

A les 21.30 va celebrase un cena-baille de disfraces, va celebrase nel Hotel Palaciu de Ferrera.

Los actos van continuar a lo llargo de tola fin de selmana y hasta’l miércoles, cuando va producise’l pieslle de la fiesta del Antroxu 2009 n’Avilés.

Programa completu del Antroxu 2009 n’Avilés

Güei vienres, a les seis de la tarde va producise l’apertura y Presentación de llibros na Carpa El Muelle de Llanes, un actu que va suponer l’entamu de trés díes d’actividaes alredor de la cultura asturiana en Llanes. A les 19.00 hores va celebrase un Pasacáis tradicional y media hora más tarde, un conciertu d’Alfredo González na Carpa El Muelle. Mientres, a les 20.00 hores, van dase a conocer dellos curtiumetraxes en REC 08, na Casa la Cultura. A les 21.00 hores “Teatru de cai” la obra “Thys’is América” na Plaza Santana. La nueche d’esta primer xornada van protagonizala un conciertu de Tush, a les nueve na Carpa El Muelle, y a les diez de la nueche na Carpona La Bombilla, l’actuación de la Banda de Gaites de Llacín con 45 convidaos. Ente los que van tar Zuco 103, dende Brasil y Holanda: CANTECA DE MACAO y el grupu LAM.

El sábadu y el domingu van siguir con acitivdaes de mañana y tarde nel casu del sábadu, y de mañana namás, el domingu. Destaquen la presentación de la recién atopada primer novela n’asturianu, el sábadu a les 13 hores na Carpa El muelle y el conciertu de Felpeyu y DRD na nueche d’esa mesma xornada. Esti ye’l programa completu de les xornaes del sábadu y el domingu:

SÁBADU 1 D’ PAYARES
12.00 h. Títeres Compañía Caracol Teatro, “Las pepitas de oro” (Carpa El Muelle)
13.30 h. Presentación del llibru Viaxe del tío Pacho El Sordu a Uviedo, d’Enriqueta González Rubín (Carpa El Muelle)
18.00 h. Pasacáis tradicional
18.00 h. Presentación del Diccionariu castellanu-asturianu de Xuan Xose Sánchez Vicente de Trabe (Carpa El Muelle)
19.00 h. Conciertu folk DRD (Carpa El Muelle)
20.00 h. Curtiumetraxes REC 08 (curtios d’animación) (Casa la Cultura)
20.30 h. Conciertu Felpeyu (Carpa El Muelle)
21.00 h. Conciertu (Carpona La Bombilla): PIGNOISE. España / LILA DOWNS. Mexico / PERET. España / KILA. Irlanda Carpona (La Bombilla).

DOMINGU 4 D’ PAYARES
12.00 h. Presentación llibru (Carpa El Muelle)
13.00 h. Mago Norber, espectáculu “Ilusionario” (Carpa El Muelle)
14.00 h. Clausura.

Páxina de Llanes al cubo

La tercer Seronda d’Illas va desarrollase’l 18 y 19 d’ochobre con una montonera d’actividaes pa tolos públicos, qu’inclúin la esposición d’una amuesa artesana y un menú especial con castañes, sidra dulce, tortos de maíz, quesos de la zona, o papes con ‘guichu’.

Na Señaldá y La Bandina van componer el programa musical de la Seronda y nel trescursu del domingu van desendolcase xuegos tradicionales y dellos talleres infantiles tola fin de selmana.