Fiestes

La edición del presente añu del Antroxu xixonés va acoyer un nuevu concursu d’amarutes, “El xixoneses na dómina de Xovellanos”, por cuenta de los actos que celebren el Bicentenariu de la so muerte. El concursu cunta con premios que van dende los 300 euros a los 100, en bonos del Teatru Xovellanos.

Nel añu 2011 celébrase’l Bicentenariu de la muerte de D. Gaspar Melchor de Xovellanos. Por esti motivu’l Teatru Xovellanos, al traviés del so Departamentu de Festexos, convocó esti concursu que consta de dos modalidad: pareyes y grupos. Nesta última categoría’l máximu de participantes va ser de cinco. La participación nuna de les categoríes esclúi la inscripción na otra.

Los disfraces tendrán de tener como referencia la indumentaria típica de la dómina na que vivió’l nuesu prócer. El concursu va tener llugar el sábadu 5 de marzu nel Paséu de Begoña a les 21:30 hores.

Establécense tres premios pa caúna de les modalidaes mentaes.

PAREYES:

1º premiu, 204€ en bonos del Teatru Xovellanos

2º premiu, 102€ en bonos del Teatru Xovellanos

3º premiu, 54€ en bonos del Teatru Xovellanos

GRUPOS

1º premiu, 300€ en bonos del Teatru Xovellanos

2º premiu, 204€ en bonos del Teatru Xovellanos

3º premiu, 102€ en bonos del Teatru Xovellanos

Les inscripciones van formulase nes oficines del Teatru Xovellanos asitiaes na cai Cabrales, 82, edificiu Casa de la Palmera, (33201 – Xixón), n’horariu de 09:00 a 14:00 hores. El plazu d’inscripción pa participar nesti nuevu concursu va dende’l 17 de xineru al 25 de febreru.

El Conceyu de Navia convoca un concursu pal diseñu del cartelu que promocione les sos fiestes y failo cola obligatoriedá de que’l testu del cartelu vaiga escrita namás en castellán.

Los cartelos han presentase montaos sobre cartón pluma de 1 cm. d’espesura. El so formatu de presentación va ser a Din-A3. Los autores qu’opten a realizar les sos obres por aciu sistemes informáticos, tendrán d’apurrir una reproducción a color coles midíes y demás característiques enantes indicaes. El testu ha poner “¡¡¡Navia!!! Fiestas de Nuestra Señora de la Barca y San Roque. Del 14 al 17 de Agosto de 2011”.

El plazu remata’l día 1 de marzu, estableciéndose un premiu de 250 euros. Los trabayos han presentase o unviase a la Conceyalía de Festexos del Conceyu, cai de Real, 6 33710 Navia, en díes llaborales de 9:00 a 14:00 hores.

Bases completes del concursu

Entamen los plazos d’inscripción pa los distintos concursos del Antroxu xixonés, qu’en 2011 va celebrase ente los díes 4 y 8 de marzu.

El Antroxu de Xixón calez motores. Toes aquelles persones interesaes en participar en dalguna de les modalidaes a concursu d’esta cita festiva declarada d’Interés Turísticu Rexonal yá pueden consultar les bases onde se detallen tolos requisitos necesarios pa formar parte de la fiesta.

Asina, les bases pa la elección del Cartelu del Antroxu, del XIX Concursu Infantil d’Amarutes, del XXIV Concursu de Charangues, del XXIII Concursu de Xarrés, nos sos trés categoríes, y del XVII Desfile Infantil (fase escenariu y fase desfile) pueden atopase na páxina web del Teatru Xovellanos.

Les inscripciones pueden formalizase nel Departamentu de Festexos del Teatru Xovellanos, na Casa la Palmera (Cabrales, 82) n’horariu de 12:00 a 14:00 hores.

Llanes celebra estos díes delles actividaes espardíes per tol conceyu. La Casa Cultura acueye l’amuesa de semeyes “La espiral de la sidra”, de Miki López hasta’l 6 de xineru.

El xueves 30, n’El Casinu y de magar les ocho la tarde, celébrase un conciertu de la pianista Paz del Castillo, mientres el domingu, a les 20:15, toquen los miembros de la Capiella Polifónica Ciudá d’Uviéu, na Basílica de Santa María, a les 20:15 hores.

Amás, estos díes el conceyu cunta con actividaes de títeres, maxa, ciclu de cine infantil, talleres pa neños y neñes (decoración, figures animaes, adornos reciclaos, etc.), taller de dances afrobrasileñes, persusión y capoeira, campeonatos de parchis, torneos de golf o de futbol, natación, etc.

Esti vienres 29, de magar les diez de la nueches, el chigre d’El Picu La Sierra, en Meruxeo, cerca de L’Entregu, acueye un amagüestu-espicha nel que músicos asturianos van improvisar les sos actuaciones alredor de castañes y sidra.

Les fiestes de San Matéu, n’Uviéu, siguen con actuaciones musicales esti llunes. A les nueve y media la nueche, na Plaza la Catedral, van tocar los grupos SFDK con Jesuly, Puto Largo, El Límite, Legendario y la célebre formación Ilegales.

El programa pa los guah.es va entamar delles hores enantes, a les cinco la tarde, nel Parque San Francisco, con xuegos tradicionales d’Asturies y del mundu, cirrcuitos d’educación vial, Superbang,Minigolf, Escuela d’Aventureros, Escala d’echadores de sidra y otres actividaes que van durar hasta les nueve la nueche.

La tonadillera, que non cantante de tonada, Isabel Pantoja, desapaeció esta selmana del programa del Día d’Asturies (o igual ye qu’enxamás nun tuvo) que va desendolcase en Ribeseya depués de que se afitare la so participación na gala que va tresmitir en direuto la TPA y na que van tar presentes Tejedor, Hevia, Anabel Santiago, Cristina del Valle, Pastora Soler, Tamara, Innocence, Daniel Diges, Mirko, Diego Martín y Los Vivancos.

La presencia d’Isabel Pantoja nel conciertu cimeru del Día d’Asturies el 8 de setiembre foi contestáu por tola clas política asturiana, ya inclusu nes files de la FSA-PSOE. Y a una selmana de la celebración del actu sigue ensin apaecer nel programa, polo que ya nun val como disculpa dicir, como hasta agora, que se sigue negociando con ella.

Agora, el gobiernu tendría de dicir si hai marcha atrás o nun se quier comunicar l’actuación faciéndola desapaecer del programa, nuna señal de debilidá y desconciertu absolutu no que cinca a la programación cultural del Principáu que pon oitra vuelta nel puntu de mira la xestión del Viceconseyeru de Cultura, Jorge Fernández León, qu’apocayá xustificara la presencia de la tonadillera nesta programación y que ye’l responsable últimu de la mesma y de la presencia de José Luis Moreno na programación de Llaboral, Ciudá de la “Cultura”.

Esti vienres, na playa de Poniente y con un total de 7.293 participantes, batióse una vegada más el record mundial d’escanciáu simultáneu. Les cuasi 7.300 persones aconceyaes na sablera xixonesa llevantaron la botella y echaron un culín al mesmu tiempu, dientro del marcu de la XIX Fiesta de la Sidra Natural del conceyu, que se celebra estos díes con actividaes de tou tipu.

El Bloque por Asturies apoyaba esti día nun comunicáu la petición del conceyu de Tapia y de la organización y va poner tolos medios pa quel Gobiernu Asturianu “faiga xusticia col intercélticu”. El Bloque por Asturies quier “comprometese y apoyar públicamente a la organización del Festival Intercéltico d’Occidente na so petición a la Conseyería de Cultura y Turismu del Gobiernu Asturianu pa que se declare’l Festival como Fiesta d’Interés Turísticu Rexonal”.

Esti ye un de los referentes culturales del occidente asturianu, na opinión del Bloque, y lleva catorce años trabayando “p’averar la cultura a Tapia apoyando a los grupos asturianos, por eso diba ser una pena que se perdiera pola falta d’apoyu del gobiernu asturianu que-yos dexó la subvención anguaño a la metá al tiempu que marafundia miles y miles d’euros n’actuaciones que nun representen a la cultura asturiana y namás beneficien a los sos promotores”.

El presupuestu del Festival anda pelos 50.000 euros, que ye muncho pa la organización, pero mui poco pal gobiernu asturianu “viendo los planes y negocios que tien pa La Llaboral y pal día d’Asturies. Respecto a esto último les declaraciones del señor José Luis Moreno son un insultu pa los contribuyentes y los profesionales asturianos al dicir qu’equí hai sitiu pa venti productores como él. La realidá ye que los profesionales asturianos tán indignaos, y con razón, y los negocios namás son pa unos pocos como el señor José Luis Moreno que se reune a escondíes con Álvarez Areces a arreglar lo d’ellos. Esperemos que’l modelu nun sea’l mesmu que’l que siguió’l señor José Luis Moreno en Baleares”.

Mañana, vienres 6 d’agostu, va tener llugar la inauguración de la Selmana Grande de Xixón na Plaza Mayor del Conceyu. Sedrá a les 13:30 hores. El Pregón, que va correr al cargu del ecritor Ladislao de Arriba, “Ladis”, va dir acompañáu del Tambor del Conceyu, Manolo Durán. Nel actu van intervenir los grupos folclóricos Cuadonga, Acebache, Los Xustos, Flor de Xaranzaina, L’Allegría, El Xiringüelu y Xovellanos. Víctor va interpretar “Gijón de l Alma” y “Asturias”.

L’horariu del espectáculu “El Folclore n’Asturies” caltiense a les 20:00 hores. Nel mesmu ufiértase un percorríu pol folclore tradicional d’Asturies, entamáu en bloques correspondientes a los trés zones del país: Oriente, Centru y Occidente. Esta propuesta ye frutu de la collaboración de los grupos citaos.