Fiestes

La parroquia de Valdesoto, asitiada nel conceyu de Siero, acueye dende esti vienres les Xornaes de Mazcaraes d’Iviernu, cola presentación de la fiesta cántabra de La Vijanera de Silió, ún de los antroxos más vieyos. No que cinca a la representación asturiana va cuntase con L’aguilando de la parroquia de Xedré, en Cangas del Narcea, col testimoniu de Pepito’l de Llorianes, de 93 años, que va falar de Los sidros y como lo pasaben va más de setenta años viendo les representaciones de les comedies, amás dirán tamién a Valdesoto dende Xedré José Ramón Collar “Quei Funsiquin”, de 75 años y Herminia Galán “Quei’l madreñeiro”, de 86 años que van contar como vivíen L’aguilandu.

El sábadu, de magar les 17:00 va celebrase’l desfile de mázcares tradicionales más importante del país. Va ser la primer vegada que participen cuatro mazcaraes d’Asturies: Os reises de Tormaleo, Os reises del Valledor, L’Aguilandu de Xedré y Los sidros y la Comedia de Valdesoto. Tamién van participar dos mazcaraes de fuera’l país: La Vijanera de Silió (Cantabria) y Los guirrios y las madamas de Llamas de la Ribera (Lleón). Los escolinos de la Escuela Faes tamién van tar presentase y pa finar el desfile van representar la comedia “La Ruina” de Manuel Pergentino Martínez.

La música va correr a cargu de La Bandina del Grupu Principáu de Llugones. A lo llargo’l desfile los vecinos de Lliceñes y Faes van convidar a mazcaritos y visitantes a frixuelos, bébora y delles viandes. Dende l’Asociación animen a tola xente que quiera participar nel desfile a que lo faiga siempres que vaya mazcaritáu d’acuerdu a la tradición (vieyos, vieyes, galanes, dames, muxigangues, etc) y piden que nun vengan con traxes de batman, “ninjas” o coses asemeyaes.

El domingu de magar les 12:00 hores van facer otru desfile dende’l Centru Polivalente de Carbayín onde tará La Vijanera de Silió y los Sidros y la Comedia de Valdesoto. Otra vuelta la música pondránla los collacios de La Bandina del Grupu Principáu de Llugones. Pa finar, representarase “La Politica ye una comedia” de José Ramón Oliva.

L’Antroxu de Xixón 2012, que va celebrase nes xornaes que van del 17 al 21 de febreru, yá tien imaxe. El cartelu ganador ye obra de la xixonesa Carmen María Vázquez Fuentes, llicenciada en Belles Artes pola Universidá del País Vascu. El títulu de la obra ye “Superantroxu”.

Siguiendo cola programación del mes d’ochobre del Centru Social La Semiente que tenía como títulu “Ochobre revolución y castañes”, esta selmana tóca-y la vez a la tema les migraciones y a la celebración d’un amagüestu, con castañes y sidra dulce pa tolos que participen. Nesti actu va cuntase con músicos y poetes que van pone-y voz y notes a esta xornada.

Güei, xueves 27, va celebrase la proyección dinámica de la película “Las uvas de la ira”. Los ponentes van ser Adama Diouf de la Ruta Escontra’l Racismu y Eduardo Romero del colectivu Cambalache. Nel mesmu, a partir de la narración de les migraciones internes n’Estaos Xuníos na dómina de la Gran Depresión, van analizase la política migratoria europea y estatal de la última década, amás de la so vinculación cola crisis.

El vienres día 28 la seronda va ser la protagonista, con un amagüestu, tradición viva anguaño y que tien los sos oríxenes nuna antigua celebración céltica venceyada a lo que güei conocemos como “día de los muertos” o “de tolos santos”. A les 18:00h na Plaza d’abastos de L’Entregu van repartise castañes y sidra duce a los asistentes. Tamién va haber un mayu tradicional y un llagar, pa que los mas pequeños esfruten mayando y conozan un pocu d’onde vien la sidra.

Dempués a les 21:30, l’amagüestu treslládase a la cai Eladio Jove al interior del C.S. La Semiente, onde va haber un escenariu abiertu nel que se va a entemecer, poesía, monologu y música. Toles persones interesaes en participar nun tienen mas que dir.

. Toles actividaes son gratuites y convidamos a tol mundu a participar y esfrutar. Tamos nel Centru Social La Semiente, Cai Eladio Jove, 6, L´Entregu (lasemiente@hotmail.com)

El chigre La Taberna de Piedra de Xixón organiza una espicha pal próximu sábadu, 24 de setiembre de margar les ocho y media la tarde. Nel actu va participar el monologuista Carlos Alba “Cellero”, el cantante, ex de Nuberu, Manolo Peñayos, y César Blanco, Cepedal y Cía y El Cantu la Estrella.

Una nueche que s’anuncia “enllena de rock, tonada, folc, monólogos y fartura!”, y que va facese nel llocal asitiáu na avenida Galicia de Xixón, con un preciu de 20 euros.

El próximu domingu 25 de setiembre nel Parque de la Eragudina d’Astorga celebraráse’l VI Alcuentru de Cultura del Reinu de Lleón, entamando con una parva y receición de participantes a les diez de la mañana.

Darréu va va facese un desfile de pendones hata’l monumentu al Reinu de Lleón. A les 12:30 van facese xuegos y deportes lleoneses y pocu dempués van abrise los puestos del mercáu.

A la una y media van celebrase bailles llariegos y de pendones. Y de magar les 14:30 hores va facese un cociíu popular (a 3 euros) de gabrieles Picu Pardal.

La tarde van ocupala, xuegos y deportes lleoneses, aluches y un alcuentru de música tradicional lleonesa, con homenaxe a Victoriano Santiago Comisaña “Anico”. L’actu va pesllase a les ocho cola toma de les sopes d’ayu, pa les qu’ha de llevase escudiella.

La celebración organícenla a comuña’l Conceyu d’Astorga, l’asociación La Caleya y l’Asociación del Reinu de Lleón d’Amigos del Folclor.

El viniente 11 de setiembre La Plaza Mayor de Salamanca va celebrar la 23 edición del Día del Tamboriteru, actu organizáu pola asociación El Tamboril, cola participación de músicos asturianos, estremeños y andaluces.

L’actu inclúi una procesión coles vírxenes de Cuadonga, el Rocío y Guadalupe, y va rematase con una misa castellana n’asturianu.

La fiesta grande de Xixón llega’l 14 d’Agostu cola Nueche de Fueos al so puntu más altu, cola celebración del día de Begoña. L’espectáculu pirotécnicu va celebrar a partir de les 00:00 hores dende L’Atalaya de Cimavilla. Primero van apagase les lluces de centru de la ciudá, por que de siguío, la nueche xixonesa resplanda gracies a el colores y formes que se van crear cola quema de 2.500 quilos de pólvora.

Miles de persones van contemplar un espectáculu de lluz, color y soníu cola traca final de los fueos artificiales. Los fueos van poder trate dende distintos puntos céntricos de la ciudá, como la Sablera de Pando, el Muro de San Llorienzo, o si se prefier más tranquilidá y velos na distancia, puedes esfrutar d’ellos dende’l Parque de la Providencia o la Campa Torres.

A les ocho la mañana d’esti martes, 26 de xunetu, va facese en Grau la gran descarga de palenques. Yá a les 11 va entamar el tradicional pasacais de xarrés de Santa Ana, con salida del Mercáu de Ganáu y llegada al Parque de Baxo.

Darréu va celebrase sesión vermú y yá de tarde y de nueche gran romería y verbena, dando fin a les fiestes de Santiago y Santa Ana con fueos artificiales. Estes fiestes vienen celebrándose nel conceyy moscón dende’l pasáu 15 de xunetu.

La Conceyalía de Cultura y Festexos de Grau entama esti vienres los díes grandes de les fiestes cola orquesta Cuarta Cai, a partir de les diez y media la nueche. A lo llargo de tola fin de selmana van repetise les nueches de verbena con estremaes orquestes.

El llunes celebráse una misa solemne a la una la tarde. Darréu entamará otra vegada la música y la folixa.

Colunga va pesllar los Alcuentros d’esti añu los díes 23 y 24 de xunetu, na Plaza del Monumentu de Colunga.

A lo llargo d’estes dos xornaes caberes va celebrase un mercáu, esposiciones y otres actividaes, ente les que tán l’actuación del Grupu Xagardúa o’l monologuista Armando Felgueroso, Min de les Pieces.

Programa completu d’actividaes