Fiestes

L’escritor, periodista ya investigador de la lliteratura asturiana Lluis Portal Hevia (Villaviciosa, 1964) va ser esti sábadu 6 de xunetu l’encargáu de poner el pregón a la XVII Fiesta de la Oficialidá de la Llingua Asturiana de Bimenes, que se va celebrar na capital del conceyu, Martimporra. Dende’l Conceyu de Bimenes espliquen como “magar les dificultaes económiques d’anguaño, va presentase un programa d’actividaes bien completu qu’inclúi, amás del pregón, la tradicional misa n’asturianu, delles actuaciones de grupos folklóricos, la tamién tradicional xinta popular, la final del XVI Concursu de Gaita de Bimenes y una muestra de cuatriada”. Pondrá’l ramu a la folixa un conciertu de folk.

Concursu de gaiteros y gaiteres mozos

La final del concursu de gaiteros mozos tendrá llugar na pista cubierta del Colexu Públicu de Martimporra, el sábadu 6 de magar les 17’00 hores, nel marcu de la XVII Fiesta de la Oficialidá.

Presencia d’Iniciativa pol Asturianu

Iniciativa pol Asturianu anunció que va tener puestu informativu y de venta de productos na Fiesta de la Oficialidá de Bimenes, como na edición anterior. Con esta presencia Iniciativa pol Asturianu quier siguir dándose a conocer ente los habitantes del conceyu de Bimenes, asina como sofitar una fiesta que pasa per malos momentos económicos.

El programa completu de la Fiesta pue consultase yá na rede.

Programa completu de la Fiesta de la Oficialidá

L’escritor, periodista ya investigador de la lliteratura asturiana Lluis Portal Hevia (Villaviciosa, 1964) va ser el pregoneru de la XVII Fiesta de la Oficialidá de la Llingua Asturiana de Bimenes, que se va cellebrar el sábadu 6 de xunetu na capital del conceyu, Martimporra. Lluis Portal ye, amás, miembru de La Compaña del Ronchel, asociación cultural enfotada na defensa y promoción de la llingua asturiana.

El Conceyu Bimenes, magar les dificultaes económiques d’anguaño, presenta un programa d’actividaes bien completu qu’inclúi, amás del pregón, la tradicional misa n’asturianu, delles actuaciones de grupos folklóricos, la tamién tradicional xinta popular, la final del XVI Concursu de Gaita de Bimenes y una muestra de cuatriada. Pondrá’l ramu a la folixa un conciertu de folk. El programa detalláu de la Fiesta de la Oficialidá 2013 pue consultase yá na páxina web del Conceyu.

Programa completu de la Fiesta

Esti vienres 22 de febreru, clebraráse un pinchéu con cerveza Caleya nel Centru Social La Semiente a les 19:30 hores. Los organizadores anuncien que “pa ximelgar los cadriles” van pinchar, Dj El Corrector (soucialismu o muerte) y Asgayah Sound.

La folixa va acabar con una carrera en calzonciellos y bragues (opcional) pel Cascu Vieyu de L’Entregu. Les perres que se recalden van empobináes al pagu de los gastos xudiciales que reclama Tini Areces. L’actu organízalu SOFITU (Organismu Independentista Antirrepresivu d’Asturies)

El Gran Desfile d’Antroxu de Xixón va dir esti añu dende la Plaza Toros hasta L’Humedal. Nesti Desfile d’Antroxu, amás de ser un pasacais abiertu, hai dos concursos, unu de charangues y otru de carroces, con trés categoríes. Esti l’actu central de toa una riestra d’ellos que se celebren na ciudá a lo llargo d’estos díes.
Programa completu del Antroxu de Xixón

Iniciativa pol Asturianu pidió estos díes al Conceyu d’Uviéu qu’usen l’asturianu nes celebraciones d’Antroxu, como se vien faciendo n’otros conceyos d’Asturies con total normalidá. Dende la organización espliquen que “l’asturianu suel tar presente en dellos de los cartelos asoleyaos per estes feches p’anunciar la programación d’Antroxu nos conceyos”, anque tamién destaquen que “na mayoría de los mesmos preséntense en castellán o faen un usu mínimu del idioma propiu -llendáu namás al nome de la fiesta- mientres otra información como la fecha o los actos a celebrar vienen en castellán”.

Dende Iniciativa pol Asturianu vaoren positivamente l’usu del términu tradicional d’Antroxu que faen dalgunos conceyos d’Asturies, como Avilés o Xixón, onde cásique tolos conteníos d’esta fiesta son n’asturianu dende va munchos años. Recuerden dende Iniciativa qu’en munchos conceyos “d’otra miente, suel arrenunciase a emplegar l’idioma d’una manera normal en tola información (programación, feches, regles de los concursos…) o mesmamente úsase únicamente’l castellán, escaeciendo y arrequexando’l nuesu patrimoniu llingüísticu”.

Como exemplu negativu ponen a Uviéu, “onde, dende 2010, volvió a recuperase’l términu Antroxu”, pero “ na cartelería oficial del Ayuntamientu emplega namás “Carnaval” y “Oviedo”. Pa la organización denunciante “esti arrequexamientu refuérciase cola nueva imaxe corporativa de la promoción cultural de la capital representáu con una “O” (en referencia a “OviedoX4”)”. Consideren qu’esti llogotipu, que nun principiu pretende crear una identidá de marca, “escaez al tiempu y contradictoriamente la propia identidá del conceyu, ya que’l topónimu propiu y tradicional ye “Uviéu”. Pa Iniciativa pol Asturianu “l’asturianu sigue siendo víctima d’una Casa Conceyu que representa a la segunda mayor población d’Asturies y que nun fai nada por respetar la Llei d’Usu y por da-y puxu al idioma dende les instituciones”.

Por ello, dende Iniciativa pol Asturianu, esixen a los responsables d’esti conceyu “qu’igüen esta llaceria y que garren el compromisu de dar pasos nuevos nel usu del idioma asturianu”.

Otres denuncies

Amás, dende Iniciativa pol Astureianu piden a ciudadanos d’otros conceyos que se pongan en contautu con ellos p’asoleyar otres situaciones paecíes y poder presentar les quexes oportunes. Pue facese nel so corréu contautu@iniciativapolasturianu.org

La Conseyería d’Economía y Empléu declaró d’interés turísticu rexonal les fiestes de la Vendimia, en Cangas, y La nuesa Señora d’El Carbayu, en Llangréu.

La orixinalidá de dambes celebraciones, la so contribución a desestacionalizar el turismu na zona, el so fuerte enraigonamientu na sociedá llocal, según la so influencia positiva sobre’l territoriu y la so capacidá p’atraer visitantes d’otros llugares son dellos de los factores que se tuvieron en cuenta al atender los pidimientos formulaos dende la Xunta Llocal d’Hostelería de Cangas y dende la Sociedá de Festexos de La nuesa Señora d’El Carbayu, pa declarar dambos festexos d’interés.

La Escuela de Música y Danza Tradicional del Conceyu de Cuaña, da la bienllegada a la Navidá al traviés de la música esti sábadu 15 d’avientu na Casa Cultura d’Ortiguera. Y pa ello, anguaño, va cuntar con unos invitaos d’esceición, el grupu de música folk “Tuenda”. El perconocíu grupu ta formáu por Elías García, Pepín de Muñalén y Xosé Antón Fernández “Ambás”.

Esta actividá, enmarcada dientro del ciclu comarcal de conciertos “Conceyo de cantares nel Parque Histórico del Navia”, ta sovencionada pola Conseyería d’Educación, Cultura y Deporte y llevada a cabu en collaboración cola Fundación Parque Histórico del Navia.

Amás los alumnos de la Escuela, nes especialidaes de gaita asturiana, acurdión diatónicu, percusión tradicional asturiana, pianu, guitarra y gaita gallega van ufiertar un ampliu repertoriu tantu de música clásica como tradicional. Van tar acompañaos, nes sos actuaciones respectives, pol profesoráu qu’imparte les distintes asignatures.

La entrada ye llibre y de baldre. Amás, mientres el Festival va rifase una cesta navidiega.

Esti sábadu, 10 de payares, dende les 17:00 hores va celebrase en La Baragaña, Candás, el Primer Amagüestu Popular, que entamen l’Ensame Xuvenil Trisquel, el Grupu de Baille Tradicional San Félix y la Banda Gaites Candás que, amás de castañes, sidra dulce y sidra, dende les 21:00 hasta les 23:00 van facese y vendese crêpes bretones y kir bretón.

L’amagüestu va entamar a les seis col Inauguración. Media hora más tarde van actuar los miembros del Grupu de Baille San Félix de Candás. A les 19.15 hores celebraráse un pasucáis de la Banda Gaites Candás, p’actuar darréu xunto a un ochote.

A les 10 dea la nueche Fest Noz y taller de baille bretón al cargu de Stéphane Riou, zarrando l’amagüestu, a les 23:30, l’actuación de la Bandina La Curuxa.

Entama la folixa de la X Seronda n’Avilés. Yá son diez años dende que l’asociación Escontra’l Raigañu entamare cola recuperación del espíritu de Seronda na ciudá, siendo agora la federación d’Asociaciones Xuntanza, l’organismu encargáu d’ello, col sofitu del Conceyu d’Avilés. Esti añu entamen los actos el día 30 d’ochobre cola conferencia de Bertu Peña nel Palaciu de Valdecarzana entitulada “Mitos y tradiciones na nueche de difuntos” a les 20:30 hores.

Los díes 2, 3 y 4 habrá una carpa na Plaza de Domingo Álvarez Acebal (delantre la Casa Cultura del Conceyu) pa llevar ellí les xeres más tradiconales de la Seronda (mayar la mazana o la esfoyaza ), música y baille tradicionales, amás d’amueses de diferentes races de mazanes, el certame de tonada o la posibilidá de comer los productos típicos d’esta época del añu.

Porgrama completu d’actividaes de la Seronda

El vienres día 26, la seronda va ser la protagonista una vegada mas nes actividaes del C.S. La Semiente, con un amagüestu, tradición viva entá anguaño y que tien los sos oríxenes nuna antigua celebración celtica venceyada a lo que güei conocemos como “día de los muertos” o “de tolos santos”, lo que yera’l Samhain, y de lo qu’entá güei en munches aldegues d’Asturies caltiense la tradición de poner calabaces agüecáes con forma de cabeza pelos caminos o en fuera les cases. Anque paeza mentira, esti iconu de les calabaces vuelve agora a los nuesos llares non por recuperación de parte de la nuesa cultura, si non por influencia del consumismu americanu; cola so propia versión del halloween, qu’estos díes va anubrir de fiestes munchos pubs en forma de promociones y demás y que pocos o nengún van rellacionar col nuesu tradicional amagüestu y nueche de los muertos.

Esta segunda edición del amagüestu de La Semiente va trescurrir de la mesma forma que la pasada edición. Va haber una versión pa los mas pequeños, y otra pa los yá non tan pequeños. A les 18:00h n’El Parque La Llaguna de L’Entregu (o na PlazaAbastos si lloviera), van repartise castañes y sidra duce a los asistentes. Tamién va haber un mayu tradicional y un llagar, pa que los neños esfruten mayando y conozan un poco de la nuesa cultura tradicional y dú vien un productu tan natural y tan nuesu como ye la sidra.

Tamién van tener otres actividaes rellacionaes coles manualidádes. Dempués a les 21:00,h l’amagüestu treslladarase a la cai Eladio Jove, al interior del C.S. La Semiente, onde va haber un escenariu abiertu nel que se va a entemecer, poesía, monologo y música. L’añu pasáu foi un ésitu de participación asina que toes la persones que quieran mostrar el so arte o namás comer unes castañes y tomar daqué nun tienen mas que dir. Una de les novedaes d’anguaño ye que tamién se podrá esfrutar de les castañes acompañaes de Cerveza Caleya, una nueva forma d’esfrutar del amagüestu con una cerveza artesanal de calidá, produco por dos miembros del colectivu de La Semiente.

Toles actividaes son gratuites y convidamos a tol mundu a participar y esfrutar. Tán allugaos en Centru Social La Semiente, cai Eladio Jove, 6, L´Entregu (lasemiente@hotmail.com)